زول البقره

تذكير بمساهمة فاتح الموضوع :

والله ياجنابو حسب سمعي البقره قالو إتلقت في الخوجلاب لكن انا خايف صاحبنا ده لايلم في دهب العبيديه ولالبن تمبول

يا اخوانا البقر الليلة كيف اخبارو لاشفناهو طل ولاانعرف ادرارو كان فيهو العشم ورونا سر اسرارو وكان غرز الضرع خلوهو لي صرارو

ياابو عمير كيف حالك مشتاقين ياخ ، وكنت منتظرمنك رد والانسيتنا خلاص
وبعدين يااخوى وراك شنو ؟ ماتصلح مسدارك ده وتنظموا زى الجماعه
كمان عندك بقر بتحلبوا والا عليقه شاغله بالك انا البعرفوا جدادة ماعندك
عشان كده روق وظبط اللعب عشان الجماعه يقسموا ليك معاهم

يااخوانا البقر الليلة كيف اخباروا
لا شفناهو طل ولا انعرف ادرارو
كان فيهو العشم ورونا سر اسرارو
وكان غرز الضرع خلوهو لى صرارو

البقر الفريزين الليلة عدى الميس قرانو الكبار زي مدفع البوليس شافوهو الصغار بنطح كأنو أبليس ياأشرف اخوي خليهو وابقى عريس ـــــــ اشرف والله مشتاقيين لكن بقراتك دي من نخش تنسينا الشغلة الداخلين ليها الله يلزمك الصبر وعملية تنظيم الابيات دي غلبتني عديل انتو العارفين وضحوا لي

الخبر الاكيد قالو البقر بتحبا بشغل لي القلوب واحوالا تصبح ربا ياالله الكريم شوفني ديمة الكعبة والبقر ان شرد بدخلو جوا القبة ......

ياخوي ياعمر بقرة فلان تتحبا
جرست الرجال حميانا اسم الشربا
صاحبنا العزيز سنادله قلبو وصبه
مفوم باللبن بطبعو من يوم شبا

ياشرف البقر معروفه وين حلالو
قبال الرجال فسر وقول اخبارو
مين غير جدير يقدر يحل اسرارو
يمتلك الزمام وتبقى البقيره حلالو

ياناس الشرق بقرتكم ابكوا عليها
جات قاطعه البحر والحله فرحت بيها
فوق الوادي سال دم البقيره الفيها
واتقسم حشاها من ايدها لي كرعيها

فرحت دار سرور من حوشها حد العُرضي (بضم العين)
وريحة اللحمه مرقت في الشمال الغربي
من اكل اللحم كل زولا اصبح مرضي
والشربوت ختام من ناس جدي الهندي

السلام ياجنابو انا حاخرم علي طول واخش في الموضوع لانو انا مستعجل عندي نجره خدره عاوز الحقه ياجنابوانا شايفك بديت تخرم شويه من المسداروبديت تخترع ريقه جديده انا ماعارف ده عن قصد ولافي شئ في نفسك لانو المسدار معروف هو بيكون في شكل رباعيات وانا شايفك بتنجر خمسه وسته عشان كده عاوز استفسر بس ماكتر بعتباري الجاهل بالشئ مش اكتر ومرات بقول يمكن الراجل ده بيلقي العود اخضر ونجرو ساهل عشان كده بينج خمسه وسته ولا يمكن ده من غزارة الموهبه المهم افيدونا

السلام عليكم ورحمة الله
اخيراً لقيت لى زول لاحظ نفس ملاحظتى ياهيثم وجنابو
انا ملاحظ للشى ده من دخلت المنتدى انو جنابو بشرى
بخمس ويسدس المسادير لكن ماحبيت انبهوا للحاجة دى
بحكم انو اكيد عارف نظام المسادير ، وبالمناسبة كتير
جداً ماافقدت المسدار حلاوتة لكن بنقول يمكن جنابو
ماقاصد يكون مسدار نرجو ملاحظة الشى دة ياجنابو
وراجع مساديرك كلها ، والدليل ايضاً مسادير اختنا
مينو، جابت اربعة وفصلت بينها وتانى جابت اربعه
فى قافيتين مختلفتين.
فالمسدار كأنو سؤال وجواب وسؤال وجواب
والله اعلم مع تحياتى

التحية لكل الشباب الذين شاركوا فى هذا الموضوع والشكر ايضاً للرائعة
مينو اسعد ونقول ليها نحن الاسعد بوجودك بيننا وربنا يحفظك.
هيثم وهو صاحب الموضوع ده كلو والسبب فيهو ومن خلال مسدارة الاخير
شكلو عايزنى افصح عن قصة البقره (ففى الروحوها وفى الحلبوها وفى الضبحوها
وسلخوها ونجضوها وحمروها واكلوها ، وجروا يحدثو امهم عدييل كده كمان) انشاء الله
تنفعهم ، وكمان حبسوا بى الشربوت وبس انشاء الله ماسِكروا وراسهم لف
والبقرة هى مصطلح شبابى دخيل على المفردات اصبح يطلق ومن قديم
على السمينة من النساء او البنات ليس تقليلاً وتقبيحاً، وانما تشبيهاً ليس إلا
فكان اللفظ يطلق بين الجماعة او الشلة المعينة حتى لا يعلم السامع الآخر المقصود
من اللفظ (فمثلاً ان يقول لصاحبة : والله الليلة لاقيت لى بقرة فاهمة خلاص)
(بمعنى بنت جميلة جداً)فاكيد السامع الآخر راسو بلف وحايقول فى سروا:
والله انتو الماكُن نصاح وماكن فاهمين وينصرف .
ونحن فى المرحله المتوسطة فالثانوية كانت لدينا شلة جمعتنا الكورة اولاً
واشياء اخرى مشتركه واستمرينا طوال هذه السنوات والى الآن وهذا هيثم خير دليل .
كان كل واحد من الشلة ربما لديه حبيبة (وحبيبة شنو هى ، الواحد يكون معجب بالواحدة
ينتظر خروجها من المدرسة يشاهدها يرفع لها يده وهى كذلك وينصرفان كانما
ملكا الدنيا ومافيها ) ويستمر المسلسل طوال السنه او السنتين ، والله يكون حتى ماعارف
بتعرف تتكلم والا بكماء ، يااخوانا ده حب شنو ده ، لكن والله ده الحاصل .
المهم كنت الصائم الوحيد فى الشلة ولكن عندما فطر فطر بى (بقرة)
وكان ان يصادف كل من تعجبنى او اقول والله البت دى حلوه ، تطلع سمينه وتحصل التريقة
( يااخوى انت مالك جنك بقر ) وتخيلوا الباقى. طوال سنه سنتين وعشرة والى الآن
ودة الجاب الكلام فى هذا البوست الشيق والذى ابدع فيه الكل سواءاً بالمسادير
او التعليق ، والله شكلوا ونحن على خواتيموا زى الحلقة الاخيرة من المسلسل
المصرى زمان (مااسع)... عصفور النار او لن اعيش فى جلباب ابى او ادهم الشرقاوى
اوالمال والبنون .... الخ
ودى قصة البقر مع هيثم فى البوست ومع الشلة فى السابق وانشاء ربنا يديهم العافية
ويهدى سرهم وازواجهم ويخلى ليهم عيالهم والماعرس (زييى كده) الله يدية الفى مرادوا
اكان بقرة اكان غيرة وانشاء تكون زى المرأه المزكوره فى موضوع من مواضيع اختنا مينو
او عزة السودان ، لانها دى المرأة والا بلاش .
خلاااص انتهينا ...
لكن الختمه دى شكلها عايزه ليها مسيدير صغيرون كده ، كدى شوفوا ده

بقرتى ياناس المنتدى ماها البقر حيوانى
اكان جمح الخيال وفسٌر كلاماً تانى
دى بشريتاً عدييييل ملكت من زمان لكيانى
كانت حلوه خلوقه وفيها كل شئ انسانى

البقر الغتيت الليلة يمة بطحني في وسط الفريق بقرونو ديك نطحني ودوني الحكيم بي حقنو ياما جرحني كان ما بقيت شديد الليلة كان شرحني

والله يا اشرف بقرك دا اكان حيواني كنا زمان خلينا سيرتو بس البركة في اعترافك وهاك استلم .. البقر الحنين من شفتو اتخدرتا جافاني المنام ومعاهو ضعت ودرتا من بعدو جد جنيت يااخواني اتكدرتا شوفولي العلاج قبال يقولو عترتا ..... عووووووووووك وروني الشغلانة دي كيف تتنظم