زول البقره

عدد المساهمات : 41 تاريخ التسجيل : 28/10/2009

والله ياجنابو حسب سمعي البقره قالو إتلقت في الخوجلاب لكن انا خايف صاحبنا ده لايلم في دهب العبيديه ولالبن تمبول

اكان مرق من ديل (لكن البوره ما بتكتلوا صاحبك ده يعرس قصايدك دى اللبن وراح !!!!) فى الخوجلاب قريبة (الخوجلاب يا قلبى !!) الحكاية شنو مع الخوجلاب دى أذكر فى السبعينات كل أولاد أبراهيم وتحديداً جدنا حمد أبراهيم عليه الرحمه والد الاخ عبدالروؤف حمد كان عندهم تيران حراته ماشاء الله لم أرى مثلهن الاً بقر الصادق المهدى المات فى الانصار (الهولندى ) فجاء حرامية بالليل وساقوا التيران وعندما أصبحوا بين الخوجلاب والسروجية على البحر قاومهم أحد التيران ورفض الحركة (مثل فيل أبرهة !!! ) فتركوها وهربوا والحمد لله كان قصاص الاثر قريب من التيران وقد نفد الحرامية بساعة وقبضوا على التيران ورجعوها وعقبال بقرة صاحبك وكمان دهبوا حتى يكون (زول عرس !!)

الليلة ياهيثم شيل شيلتك صاحبك ظهر !!! غايتو أنا مسردب أصلى فى المنتدى ده وفى الخاص الجانى تانى ما بخاف من غيرو!!!!!!! وأى كلام من صاحبك رضانيين بس يكون مشروع الدهب مشى كويس وكمان برضو مشروع البقرة واللبن (بساعد ) ولك ودى أخى أشرف والله جنس شمار فيك ناعم ومغربل !!!!

ياهيثم انت شكلك بقيت تلخبط بعد العرس
دحين بقرة الخوجلاب دى نسيت انها حقت منو ؟
وياريت لو عندى زى بقرة الخوجلاب الفى بالى دى
والله شكلها هى الحردت تيران ناس عبد الرؤوف ود حمد .
وياجنابو انا مابراى (اشرف دهب) اضف الى القابك (هيثم دهب) كمان
وكمان عندو نفس مشكلتى وبالمناسبة حتى الآن مالقينا حل
شكلى حااقعد باير ياجنابو والحمامة الالمانية حاتطير
حاول شوف لى حمامة احتياطى من اسع
وبرضو ان عدتم عدنا.

ياهيثم وجنابو انا طالع ماشى مشوارالدمام
لحدى مااجيكم يوم السبت حقو تعملو دويتو
ظريف كدة وتغنو ( اوب اللبن ابو لى بى )

عدد المساهمات : 41 تاريخ التسجيل : 28/10/2009

البقره الحلوب الليله وين ياحليــــــــله
مابخلت علي مابت يوم من غيـــــــره
يوم سرقت يمين اصبحت انا في حيـره
لالقيت اللبن لاشبعت انامن خيــــــــره

البقرة الحلوبة .....المن كنانة إصوله
ما غبت حليب وتسقى كمان لى عجوله
ديمة لبنا وافر....وجيوبنا ما منشوله
نشرب وننبسط تسوقو يوم لى حوله
أها يا أشرف رجعنا تانى ننجر إن شاءالله يكون نجرنا عجبك وشد حيك (مع الجهاز) خلينا نتفاهم ليك مع الالمانى. (وأبشر بالخير) آها دى بالالمانى ما بعرفة والله إلاّ أسأل منها إسلام ما تقول لى يا بابا أنت فى شنو والحسانية فى شنو والمقصود بالحسانية هنا (أشرف طبعاً )

عدد المساهمات : 41 تاريخ التسجيل : 28/10/2009

البقره الحلوب مازي بقر حلتنـــــا
البقر الهجين في وزنو نص بقرتنا
يوم سرقت يمين عم السواد حلتانا
وإتعدم اللبن وكيف كتل همتنا

الصقر إن وقع كترت البتابت عيب
وما همانى فقدها متروس يمين الجيب
سويت الجهاز وما كنت زول سكليب
بجيب غيرة مراح وما يكتر الجقليب

عدد المساهمات : 41 تاريخ التسجيل : 28/10/2009

الزول الصبور في المحنه قلبو صبيب
راسي وزول تقيل مابيضرب السكليب
المال إتسرق وفلسنا قد الجيب
بجهاز الدهب يعوضنا مالك الغيب

يارب يا كريم.. حرر عليهو السوق
يجيب أعلى السعر يزيد ويرفع فوق
ويلقط من بعيد.... يجيو بس ماروق
فى اليوم الكيلو برة باسط سليم الذوق

الزول الصبور مااظنو بصبح راسى
لمــا ارد عليه وامرق خزائن راسى
احسن له السكوت بدل الكلام القاسى
اكان مرقتَ سِمومى بتملالا مليون كأسِ

نجر اخضر وجاى من وين مابعرف ؟

والبقرة التقولا يابشرى انت جاهل بيهـــــــا
ماك عارف حليبا والا العليها وبيهـــــــــــا
مابتحلب للصغار اكان ده علمك بيهــــــــا
بتحلب بس للكبير البريدا وديمه ولهان بيها

رايكم شنو ؟

وووووووين يابتاعين اللبن والبقر
غرزتوا والا شنو ؟

عدد المساهمات : 41 تاريخ التسجيل : 28/10/2009

الشئ العجيب البقره شالت حالنا
صبحت همنا في حلنا وترحالنا
نجارين جداد ماكانو تب في بالنا
بي سبب البقيره الليله شنو فعالنا

أولاً يا أشرف أدفع لينا أتعاب التدريب (نزازى فيك من مسدار لى مسدار بين الخوجلاب والسقاى والبتلاب نامن بقيت شاعر مسادير ) أوعك تشيلك الهاشمية وتدخل على الغزل (بطفش البنات براهن مزعولات !!!!!) خليك فى مساديرك وزى ما قال المرحوم الامام على عليه رحمه الله للهادى أحمد بابكر (الهادى خليك فى كمسرتك وبس!!!!! عندما حاول الهادى أن يكب موية للبوكس بعد أن توقفت المكنة من مشوار طويل وهذا يعنى تسيح المكنة! وكان البوكس يقودة المرحوم الماحى السقاى الانصار !!!) نرجع لنواصل النجر ونقوّم نفسك بى سويدى كارب

بقيت شاعر وتنجر ....تنجر كمان مسدار
وما بقرة ورهيبة .....وما بتعرفو عدار
تأكل ديمة بذرة برسيم فى أحلى خضار
وقال ما ممكن أبدّل ... لو جابو لى دفار

ياهيثم اخوى انا مــــــــــــــانى شيال حال
واحســـــــن ليك واخوك تتجنبو الإشكال
انتو سويتو الكلام ومتجاهلــــين لى نزال
اخضر نجرو سماً وما اظنو كان فى البال

يابشرى الحبيب البقــــــــرة يابا حليلها
مابخلت علىٌ وساءنى المنام من غيرها
فى ساعه الحوجه توزن بل يزيد لى قبيله
وصحيح ماممكن ابدل لو جابو لى نوبيرا

عدد المساهمات : 72 تاريخ التسجيل : 06/11/2009

بقر الخوجلاب يااخوانا مية المية لابغرز كتير وحلباتو ديمة هنية البقر المأصل حبوبتو سودانية مشهور بالدلال والنزعة ديك صوفية .................... الشغلانة دي لو ما بقر حقيقي نحن اتغشينا فهمونا لسه فايلنا نضيف مادايرين نزعل زول كلكم احبابنا

والله يا أشرف أخوى حيرتنا أنا رسلت لى هيثم فى الخاص قلت ليهو يازول بختنا البوست ده شكلو حايفوز فى مسابقة المسادير ولاية الخرطوم وحا نقسم الجائزة أنا وأنت بعدد المسادير تقوم تدخل عودك وتنجر ليك كم مسدار (وقطع أخدر كمان وتدقسنا ونعترف بشاعريتك وتقسم معانا ) والان عندك التلت !!! لكن قول لى الشاعر عمر عبدالله المسلمى أكان عايز تدخل بالربع أنجر ليك 4 مسادير وسوف نقفل الباب ما يجينا ود الطيب الحاج ناط برضو !!!! كفاية لحدى هنا !!! والله أنا وهيثم كنا فيفتى فيفتى!! قسمة الروس !! بعد شوية بقت تلت والان فى طريقها للربع يلا يا ود الكباشى ورينا همتك !!! وأعدل عمتك .

والله ياجنابو الربع مابطال واعترافكم براة بالربع واكثر
وانا مُصر قلت والله الجماعة ديل الا اجيب آخرهم ويقولو
الروب حتى اقيف.
لك تحياتى والاخوان هيثم وعمر

عدد المساهمات : 739 تاريخ التسجيل : 07/03/2009

اهلا باهل البقر الرائح ومرحب بيكم كثير جد اتحفتونا واصبح للمنتدى اشراقة ونورة اعجبنى ابداعكم كثيرا وشرعت فى تحويل المسادير الى قصة راجى منكم ختام صدقوا الابداع واحد لايتجزأ يعنى من لوحة ممكن نكتب قصيدة وقصة حقيقى مبدعين وهذا ليس باطراء ولكنكم احييتم ادب اجدادنا الذى كاد ان يندثر لكم التحية اكيد سوف نسدر معكم قريبا ولكن على طريقتنا نرجو المزيد ود جيرانا طبعا زعلان منك انت وصاحبك هيثم ابحثوا عن السبب جنابو زيدنا من ابداك وزيد

يا ود القاضى والله الختمة على أشرف نحنا أديناهو الربع ده فى حالة ود الكباشى البصلح فى (عمة ترباس ) دى يوافق على الدخول (فى صندوق البقرة ) بى أربعة مسادير والله أنا البقرة بى عينى ما شفتها !! بست قطعت فيها مسادير والله التقول كل يوم بقطع رطلين لبن زى أشرف !!! وفى رواية صاحبو هيثم قال 15 لى شنو بقى سبت دودو وكمان أحسن يقول بياكل ربع التمر برضو فى يوميين زى سبت دودو حارس الهلال السابق !!!!!!وأشهر حارس مرمى فى تأريخ السودان وأفريقيا فى زمانة .
على العموم الختمة لو قلت مسادير ورطتنا وأكان قلت كتابة حا نورط أشرف . تخريمة لو بالانجليزى أحسن يستعين بالاخ مصطفى سليمان كنا ممتحنيين للثانوى وكمال الشيخ عمنا لينا موضوع كمبوظيشن كارب جداً ووزعة علينا وقال أحفظوة عديل ويبدو أن مصطفى ضاع منه الموضوع فى مكان ما وكان كمال يوصينا على ختام الموضوع بعبارة (كنكلوشن!!) فحفظ مصطفى (كنكلوشن ) وطارت منه كمبوظيشن فبدأ يكورك ياجماعة (كنكلوشتى ضاعت !!! !!) وأنتمنى أن يكون الكنكلوشن من غير مسدار وعليك يا أشرف عليك وشنو الحكاية ربع ودهب !!!

مشكوووور ياود حى الشاطى (طبعاً الاسم الجديد لى حلة وراء)
وقلنا نحاول مع الجماعه وشكلنا لاوزنا ليهم ، واسع عملت لى واحد
عشان طلتك الحلوه دى وانشاء الله يعجبك ويغيظ الجماعة اسياد
اللبن عشان يتحركو شويه .

اليوم هيثوم والبشيرة اصبح جرابهم فاضى
ابتدروهو الكـــــلام عملوا الحَكم والقاضى
يوم جــــات الردود شافيه وسيوفا مواضى
قالـــوا نحترم النفوس يااخوى ود القاضى

طريقك سلك والله جد وأسعدنا
وماتقول غفلنا أو نمنا إتمددنا
صاحين من صباح ليهو ما حددنا
من شوفة الظُراف ما نسينا إتشهدنا

قل هو الله أحد الله الصمد لم يلد ولم يولد ولم يكن له كفواً أحد
قل أعوذ برب الفلق من شر ما خلق ومن شر غاسق إذا وقب ومن شر النفاثات فى العقد ومن شر حاسدٍ إذا حسد . تعلمون أن العين حق تدخل الرجل القبر وتدخل الجمل القدر وتدخل البقر لم ترد رواية فى البقر وإن شاء الله بقرتك يا أشرف ربنا يوزنا ليك دهب زى بقرة بنى إسرلئيل (قول آمين) تخريمة : وأنا سارح فى نص المسدار إلاّ نادانى أحمد يا با الصلاة !! المغرب قرب يفوتنى فى الجامع والحمدلله الجامع قريب نصلى فيهو كل الاوقات والله يا أشرف مسادير بقرتك عايزة تضيع منى الصلاة !!! أستودعك الله والدور على صاحبك وفتح لينا موضوع نشيد للمنتدى (لكن ده ملح وللجميع مافيهو قسمة !!!)