قصيدة فى شعر المديح لروح المرحوم زين العابدين عبدالله حاج البدرى ولكل آل الشريف

منذ فترة تزيد عن العاميين وتحديداً بعد فترة قصيرة من وفاة الحاج زين العابدين عبدالله حاج البدرى وأنا أنوى أن أكتب قصيدة له يقوم أبناء المرحوم عبدالله والمامون وعبدالعزير بمدحها والحمد لله وفقت اليوم فى العشر الاواخر من رمضان 1431هجرية وتحديداً يوم 23 رمضان وأنا فى بون التى وصلتها قبل أربعة أيام قادماً من بيرمنجهام بيريطانيا وكنت قبلها فى إجازة فى السودان وقد سعدت بحضور مناسبتين للمديح لفرقة أبناء المرحوم زين العابدين وتصادف أن يكون المكان واحد وهو منزل الاخ الفاضل والمهتم بشأن المديح والحافظ له والعارف لمعانية الاخ محمد بابكر وقد شجعنى إهتمام الاخ محمد بابكر أن أفرد له بيتاً فى قصيدتى هذه .
سوف أقوم بلإتصال بالاخ عبدالله أو التازى زين العابدين وأقرأها على مسامعهم وقد أخترت لها لحناً سوف أقدمه لهم أتمنى أن يوافقوا على أن يقوموا بوضع اللحن المناسب .
أرجو من الاخ دحدوح العمل على طبع القصيدة وتقديمها لهم وقول لى عبدالعزيز أكان ما حفظت (بعضيك ) فى راسك زى عضت التمارين زمان !!أتمنى أن يكون هذا أول عمل لى فى مجال المديح وأتمنى أن أواصل فى التأليف ويتواصل الاخوان عبدالله ومامون وعبدالعزيز فى الاداء وللامانة لديهم أداء راقى فى مدح المصطفى يحتاج الى من يطورهم ويهتم بهم وسوف أسعى لذلك ليت الاخ محمدبابكر يعطينى جزء من وقته وإهتمامة بالمديح حتى نطور إمكانياتهم خاصة أن الامر يحتاج الى مساهمة مادية ولاشك أن الاخ محمد جاهز لذلك .
والان أسمحوا لى أن أقدّم لكم القصيدة :

العنوان : زين العابدين سلام
زين العابدين سلام للبدرى .... كل شريف
ما هبتّ نسايم علينا ....... كل كل خريف
ندعو بالدعاء........من غير عناء وتكليف
أقبل أقبل لى دعانا ....ما فينا أصلو تليف
نقراهو الصباح.....ونحرص على التخفيف
عطرت سمانا ...... وكنت فينا فينا شفيف
حاضرين بالإلوف ..... حتى الكبير وكفيف
نسمع فى مديحك ... فى الحل كمان تقديف
واحدين فى اللوارى ..راكبين معاهو رديف
وتانى بقول سلام ...... للبدرى كل شريف
ما هبّت نسايم علينا ...... علينا كل خريف
يحمينا الكريم ........ من الهبوب والزييف
يحفظنا الكريم من سرقة .... من من تزييف
فى ذكراك دوام ......... وزنك بلا تطفيف
حافظين لى عهودك ... ما قلنا كيف أو كيف
حتى الضحكة ديك ...... والنكتة فيها لطيف
نوزّع إبتسامتك ........ نديها كل كل حليف
فى إسلانج هناك .... ما ضبحو أصلو نحيف
فى أمضُبان هناك..... أهل المسيد وصريف
والكباشى أهلو أهل الكرم ... الكرم والضيف
فى قرى الخليفة........... ما غبنا منو نقيف
أهل الشيخ مصطفى الفادنية......ترسو القيف
هم أهل الدواية وأهل النشيد .... النشيد تأليف
محمد بابكر .... أحى الليالى... الليالى ونيف
بتلابك معاهو ...... فى الرقصة رفعو السيف
وتانى بقول وأقول ........ قولى البديتو خفيف
زين العابدين سلام ........ للبدرى كل شريف
ما هبّت نسايم ..... علينا ... علينا كل خريف
ومن بلد الترك .......... من بون بديت تأليف
لى روح الشريف .. الشريف واديها كل شريف
آل البدرى تغشاكم ... تغشاكم خريف أو صيف
من بشرى الفقير ..... الفقير خايف من التشنيف
أقبلو لى حروفى ...لى حروفى كتبت منو خفيف
كرماً للرسول كرماً للرسول البعدو ما فى وصيف
يارب يا كريم .. يارب يا كريم خفف وزيد تخفيف
لى موتانا أرواحم ......... أرواحم كتابه نضيف
لى أحيانا أعمالم ..... أعمالم قبول قبول تصنيف
لى أرحامنا نوصل ....... بالفرد ومره مره لفيف
وتانى بقول وأقول .......... قولى البديتو خفيف
زين العابدين سلام ..... سلام للبدرى كل شريف
من بشرى الفقير .. .... الفقير خايف من التشنيف
وأقبلو لى حروفى ...... حروفى كتبت منو خفيف

ربنا يديك الصحه والعافيه وينور طريقك وباسم آل الشريف برسل ليك اجمل تحية شكر وعرفان وجعلك الله دوما نورا لهذا المنتدى

نوّر الله عليك يا بت الشريف ومنى ليك سلام وددت لو أعرف من أنتى من أهلى آل الشريف .

انا صفاء مصطفى زين العابدين لوكنت فى السودان كان خليت اعمامى يردوا عليك بنفسهم هم طبعا ما عندهم شغلة فى النت ربنا يديهم ويديك العافيه والله المنتدى قمه فى الروعة وخلانا نعرف اخبار السقاى بس الشباب الهناك شويه مشغولين من المنتدى واكيد نتمنى منهم ما ينسوا اننا بنستنى اخبار السقاى بفارق الصبر وامانة تحياتى للاولاد وامهم

صفاء مصطفى زين العابدين تحية طيبة ولعلك ووديس محمد صديق زوجك بخير (أعفينى الاسم طار منى فأرجو المعذرة) أفيدك أننى أتصلت على التازى وقريت ليهو القصيدة كلها ووعد بأن يتم تلحينها وتقديمها للاخوان عبدالله ومامون وعبدالعزيز عن قريب .
للامانة عمك التازى أكثر الاخوان إتصالاً على وطبعاً تعرفى أن التازى صديقى الروح بالروح ولم يفارقنا طيلة أيامى بالاجازة بالسودان وقد صادفت عمك التاج وذهبنا التمانيات أكثر من مره.
سلامك وصل للابناء ووالدهم ويردوا ليك السلام مطبوق .
تحياتى لكل الاخوان طرفكم فى السعودية ولو عندكم تلفون أرضى فى البيت أكتبيهو لى للاتصال عليكم .
التحايا لزوجك ومعذرة الاسم حتى الآن ما جانى .(وأتمنى أن يكون كلامى صاح الاسم ما مشكلة )

مرحب بيك تانى وبشكرك جدا على ردك ازكرك بالاسم محمد يس وهو زوج عرفات اختى الاكبر منى وانا متزوجة قريبنا اسمو معز عبدالله من ودرملى وهو بسلم عليك ومعجب جدا بنشاطك الملحوظ ومشاركاتك الجميلة فى المنتدى وربنا يديك الصحة والعافية بالنسبة للتلفون ارضى حاليا مافى بس قريب بيتوصل دا الايميل [ندعوك للتسجيل في المنتدى أو التعريف بنفسك لمعاينة هذا الرابط]

صفاء أعذرينى وسلمى على عرفات ومحمد يس وسلامى الشديد لنسيبنا وقريبنا ود ودرملى معز عبدالله والله يا صفاء عشان ظروف الغربة والله (ما تلومنى أول مرة أسمع بيك وأنك متزوجة من ودرملى ) على العموم من الان حقك على أن أتعرف عليك وعلى زوجك أكتر وأكتر.
أما موضوع المشاركات فأريد أن أسألكم وأن تجاوبوا بصراحة (إن شاء الله ترسلو لى فى البريد الخاص بتاع المنتدى لو مكسوفين من الاجابة على صفحات المنتدى ) والسؤال هل مشاركاتى الكتيرة تزعجكم ؟ وهل خفيفة عليكم أم ثقيله ؟ وهل حاولتو أن تطلبوا من ناس من السقاى أو غيرها المشاركة ؟ وما رأى من يقرأ فى منتدى السقاى ؟ وزمان فى بداية ظهور المنتدى أولاد أهلنا السروراب قال لى مشاركاتك (كتيرة ومسيخة إنت ما عندك شغله غير المنتدى ؟؟؟!!!) وقاموا بإنشاء منتدى لوحدهم بإسم السقاى السروراب وتوقف تماماً للاسف الشديد وهذا المنتدى الذى توقف أستطيع أن أشغله ولوحدى بمعدل 30 موضوع تختلف عن كل مواضيع منتدى السقاى التى أشارك بها الآن ولكن لن أفعل ذلك .

هلا بيك تانى اولا ما لايماك والله اكيد الغربه هى السبب وبعدين ناس كتيره ما بتعرفنى لانى من الثانوى مشيت درست فى شندى اربعة سنين ومن شندى للسعوديه وهنا كمان لى تقريبا خمسة سنوات ثانيا برد عليك هنا لانو مافى حاجة تكسف والبيكسف بالجد الكلام القالوا الأخوه عن مشاركاتك والمنتدى ما ملك لشخص ابدا بل ملك للجميع وكل من يحب يشارك يشارك باكبر كمية من المشاركات وللكل حق الرد سواء ايجابى اوسلبى واهلنا مع احترامى الشديد ليهم ملولين وبحبوا الانقسام وانا من وجهة نظرى شايفه مافى داعى لمنتدى تانى ومنتدى واحد بيسع الجميع وذى ما بقول المثل كان اتطايبت النيه العنقريب بشيل ميه واكيد نتمنى منك الاستمرار ومن الجميع وانشاء الله الناس دايما مجتمعين فى ساعةخير ويكفيهم شر الإنقسام الشكلو بقى موضه عامة فى السودان

يا بت الشريف ردك جميل ويشرّف
وطيبتى النفس بعد ما كان عليها يقرّف
الرد الجميل ليها النفوس النفوس حايألّف
والله بكتب دون فواصل وأصلى ما ما متكلّف
المسدار بجيبو والبكتب حبيبو وأصلى أصلى ما متخلّف

الاخت صفاء تقبلى تحيات أبنائى إسراء 18 سنه فى أولى جامعة وأحمد 16 سنه ممتحن هذا العام للجامعة ومعاى فى برمنجهام بريطانيا وقبل دقائق جينا داخلين من زيارة لجيراننا سودانين سكنوا بالقرب لنا (من أبناء دارفور ) وكانوا فى المانيا فى مدينه ما بعيدة مننا والاولاد والبنات معاهم أمهم والزوج فى المانيا وأنا هنا مع أولادى وزوجتى مع باقى الاولاد إسلام وأيمن فى المانيا .

open your message

شكراً الاخت صفاء وأرجو أن توصلى تحياتى لعمك التاج وعمَك حلوم وقولى ليهو التازى قال ليك يا حلوم بطل النوم وأمك دايرة تشوفك !!! قبال ما أجى محصلك فى حجة والله عمرة تقبلوا تحياتى ولكل من يسأل عن بشرى مبارك

الحمد لله عبد الحليم نزل السودان حاليا ليهو شهر تقريبا بس اولادوا هنا والتاج برضو كان هناك وصل السعوديه قبل اربعة ايام وانشاء الله سلامك يوصل للتاج

يا صفاء تحياتى وسلامى للاخ التاج وأيضاً للاخ حلوم وأولادة المعاكم وهو فى السودان .
أرجو أن تبلغى تحياتى الشخصية لزوجك معز عبدالله وللصغيرات وقولى ليهو رأيك شنو فى أهلك بحيراب البتلاب الذى يشاركون فى البُطان فى السقاى البتلاب وهل تؤيد ظاهرة البُطان أم ترفضها نريد أن نعرف رأيك حتى نستأنس به وعلى العموم (ناس الدوم قالوا رايم ) ممثلين فى الاخ سعد من منتدى دار جعل فما رأى ناس ودرملى والبحيراب ؟؟؟؟ أتمنى أن تشارك ولو عبر حرمكم النشطة أختنا صفاء مصطفى زين العايدين بت إبتسام عثمان . ومن برمنجهام سلام بشرى مبارك إدريس

اليوم وبعد عودتى من صلاة الصبح بالمسجد فتحت النت ودخل معى فى الماسينجر الاخ محمد بابكر من السودان ولم نتواصل أكثر من خمس دقائق طلب منى أن أمده بالهاتف الخاص بى وما هى إلا دقيقة ورن الجرس من محمد بابكر وبعد السلام والسؤال عن الحال والاحوال طلبت منه أن أقرأ عليه القصيده التى كتبتها أخيراً للحاج المغفور له زين العابدين عبدالله حاج البدرى وقرأت له المقدمة والقصيدة وأشاد بها وذكر لى أنه كان حاضراً فى العيد لجلسة مديح فى التمانيات وقد كان الاخ عبدالحليم زين العابدين حاضراً فيها وطلب من الاخوان عبدالله والمامون وعبدالعزيز أن يطوروا الاداء أكثر وطلب عبدالعزيز بعض الاشياء ووعد محمد بابكر حسب ما أفادنى بإحضارها وذكر لى أن عبدالعزيز لايحفظ وطلبت منه إشراك الاخ التازى لكى يحث عبدالعزيز على الحفظ الاخت صفاء إن شاء الله عما قريب نسمع القصيدة بصوت أعمامك .

الاخوان الاعزاء بمنتدى الجزيرة إسلانج من منكم يستطيع أن يمدنى بهاتف المادح الشيخ عبدالله محمد عثمان الحبر مادح الرسول صلى الله عليه وسلم وله الاجر .

الشيخ ادريس
مشرف منتدى المديح

إحصائية العضو

--------------------------------------------------------------------------------
خذها بيمينك يا البشرى 0914800878 واكان ما رد عليك بكون بمدح في ( نِم يا فمي ليهم بشكر الجيدين ) فأتصل على زُمالهِ البمدح معاهو وبقعد يمينو اسمهُ التاج 0912945838

بشرى مبارك
Senior Member

إحصائية العضو

--------------------------------------------------------------------------------

اقتباس
المشاركة الأصلية كتبت بواسطة الشيخ ادريس

خذها بيمينك يا البشرى 0914800878 واكان ما رد عليك بكون بمدح في ( نِم يا فمي ليهم بشكر الجيدين ) فأتصل على زُمالهِ البمدح معاهو وبقعد يمينو اسمهُ التاج 0912945838

شكراً لك يا شيخ أدريس وعشان جبت لى الرد سريع والله أكان أكشف ليك سبب طلبى للهاتف .
فى رمضان من العام المنصرم وقبل إسبوع من هذا التأريخ وتحديداً يوم 22 رمضان وأنا فى بون وبعد عودتى من إجازة رائعة قضيتها بين الاهل فى السودان وصمت 10 أيام فى السودان وخمس فى بيرمنجهام ويوم 15 رمضان كنت فى المانيا بون .
كتبت قصيدة زين العابدين سلام للبدرى كل شريف يوم 22 رمضان فى العشرة الاواخر وكنت معكتف فى مسجد الرحمة بون والذى تحّول هذا العام الى السلام ودى قصة طويلة دايره قعده !!!المهم بعد أن كتبت القصيدة وكانت عاجبنى وما زالت طلبت من إبن أختى مصعب الزبير خوجلى أن يطبعها من منتدى السقاى ويسلمها الاخ عبدالله زين العابدين وقد كان، وكنت قد هاتفت كل أبناء زين العابدين وقرأتها لهم على الهاتف وطلبت منهم أن يقوموا بتحلينها وكلفت التازى وعبدالحفيظ الشيخ وعبيد أحمد عبدالرحمن وعبدالعظيم الهادى ومحمد بابكر (نسيب ودالجميل والمهتم والحافظ للمديح ) طلبت منهم أن يشاركوا فى اللحن وأساساً أنا وضعت لها لحن يتناسب معها على وزن (صل يا قلبى ليهم وشكّر العارفيين أصحاب الرسول الشيدونا الدين ) ووافق الجماعة على ذلك وظللت كل شهر أذكرهم وقلت لهم بالحرف الواحد إذا مرّ عام ولم أسمع بها قد مدحتوها سوف أتصل على صديق وزميل المرحوم زين العابدين عبدالله حاج البدرى عبدالله محمد عثمان الحبر وأنا متأكد 100% أنه خلال العيد سوف يقدمها لكم فى الخلوه فى الجزيرة إسلانج وكنت قد أضفت للقصيدة بيت خاص بكم بعد مشاركتى فى منتدى الجزيرة إسلانج ، عموماً بعد إسبوع سوف أكون فى بيرمنجهام ويكون العام مرّ وسوف أتصل على قبايل العيد بالاخ المادح عبدالله الحبر وأعرضها عليه .
الاخ الشيخ إدريس أرجو منك الرآى فى هذا الامر على طريق ما خاب من أستشار خاصه أنكم أهل مديح وضريح والمُداح عندهم مكانة وحضور عندكم .

osama
Senior Member

إحصائية العضو

--------------------------------------------------------------------------------
اخي البشرى يبشرك الله بالخير والله اخوي شيخ العرب ده تلقى عنده كل الرايحة وعندما طلبته هذا الطلب اول شخص حضر الى زهني هو شيخ العرب وجاءك بالخبر الاكيد وسريع النهمه ماشاء الله لكن اقولك قصيدتك يمدحها الحبر انشاء الله ونشكرك جدا على اتحافك لنا بهذه المشاركات الطيبات.

بالامس الجمعة 26 رمضان هاتفت الاخ عبدالله محمد عثمان الحبر فردّ علي هاشاً باشاً وعندما عرفت نفسى وجدته أنه يعرفنى فأوضحت له سبب الاتصال وطلب منى أن أسمعة بداية القصيدة وأكمها غداً لانه معه ضيوف ودخل الان وقت الافطار ويبدو أننى لم أراعى فروقات الوقت ووعدته بالاتصال إن شاء الله فى الغد بين الظهر والعصر ، وبحمد الله اليوم أتصلت وأستقبلنى ببشاشة تزيد عن بشاشة الامس فقرأت على مسامعة القصيدة وأعجبته جداً وسألنى هل هى موجوده طرف الاخ عبدالله زين العابدين ؟؟فقلت نعم ومنذ عام تقريباً فذكر لى أن سوف يذهب للاخ عبدالله فى التمانيات ويتم التنسيق فى مو(عندما كتبت مو تمامتها موضوع رن الجرس فرفعت وكان الاتصال خارجى فسألنى المتصل الزول منو قلت ليهو بشرى مبارك إدريس فعندما تشهد عرفته أنه الاخ عبدالله زين العابدين فقلت له أقفل يا عبدالله أنا برجع ليك وعندما رجعت له أفادتنى حرمة سامية عثمان أن العصر أقامو الصلاة الان وعبدالله (إمام مسجد والده فى التمانيات قد ذهب للصلاة وأنا الان فى إنتظارة ) نرجع للموضوع ويتم التنسيق فى موضوع اللحن وطريقته والحمد لله وبإذن الله سوف تجد القصيدة الاهتمام .

أعود لكم اليوم 28 رمضان وقبل ربع ساعة من مباراة الهلال والقطن الكمرونى بالكمرون وكنت قد أتصلت على الاخ عبدالله زين العابدين بالتمانيات وأعتذرت له وأعتذر هو أيضاً عن ذهابة بالامس لصلاة العصر وعن ذهابى أنا لمشوار هام يتعلق بالتحضير للافطار الخاص بالجمعية السودانية للتعليم والخدمات الاستشارية بيرمنجهام ، تناولت موضوع القصيدة وأننى أتصلت على الاخ عبدالله محمد عثمان الحبر وطلبت منه للإمكانيات الهائلة عنده أن يقوم بأداء القصيدة فوافق عبدالله وذكر لى حتى لو لم يحضر هو أساساً نذهب له فى العيد وسوف أعطية القصيدة وطلب منى الاخ عبد الله مثلما أضفت بيت للجزيرة إسلانج ومشايخها أن أضيف شىء لناس الشيخ مصطفى الفادنى ولما كان الطلب من الاخ عبدالله العارف للامر أضفت بيتين وقلت :
أهل الشيخ مصطفى الفادنية ترسو القيف
هم أهل الدواية وأهل القصيد والنشيد تأليف

وقد أضفت البيتين فى القصيدة وأتمنى أن تنال الرضا وتجد طريقها للاداء من الاخ عبدالله أو غيرة والامر هو ذكرى للراحل المادح الشيخ زين العابدين عبدالله حاج البدرى أسال الله أن يرحمة ويغفر له ونحن فى العشر الاواخر من رمضان .

اليوم الاحد 27 شعبان 1436 هجرية المزافق 14 يونيو 2015 اى بعد اربعة سنوات من مهاتفتى للاخوان عبدالله محمد عثمان الحبر وعبدالله زين العابدين بخصوص هذه القصيدة .
الان انا فى انتظار مكالمة مع الاخ عبدالله محمد عثمان الحبر فى السعودية الرياض حيث انه معزوم اليوم ومعه عبدالحليم زين العابدين بطرف الاخ ابوالقاسم حمد بالسعودية الرياض . سوف اوافييكم .

» قصيدة فى المديح على روح الحاج زين العابدين عبدالله حاج البدرى ولكل آل الشريف
» نور الرسالة( قصيدة فى المديح من تأليف بشرى مبارك إدريس )
» قصيدة على روح الحاج زين العابدين عبدالله حاج البدرى عليه الرحمة
» بمناسبة الشهر الكريم نترحم على روح المادح إبن الرواى زين العابدين عبدالله
» أين مدائح أبناء السقاى المثلثة وعندنا ماشاء الله أبناء الشيخ زين العابدين الشريف عليه الرحمة