محن عاصم إبن الدكتور شرف الدين الطيب طبيب المريخ عليه الرحمة

---الاخ عاصم شرف الدين الطيب يكتب فى موقع النيمة من السعودية الرياض ومن أظرف من يكتبوا وكل مرة عند مواضيع (حتى أطلقت عليها محن عاصم ) وأليكم واحدة من محن عاصم وأنا أرشح من الان ودالطيب وودالقاضى سوف يكونوا أكثر من يثروا هذا البوست -----------------------------------------------------------------------------

مجكسين
'إنت ليه ما بتمسك ايدي واحنا طالعين سوا؟'

'‏لأ طبعاً يا روحي... أفرضي زول من اهلك شافنا؟ ولا واحد من أهلي؟ على الاقل كِده بنقدر نزوغ من الزرزره, لكن إن ‏شاء الله يا حبيبتي باكر آخدك وامسك إيدك قدام الدنيا كلها '.
...................................
مخطوبين
‏
'إنت ليه ما بتمسك ايدي واحنا طالعين سوا؟'

'علشان ما داير زول يعلّق علينا ويقول الجماعة ما مصدقين انهم مخطوبين...
وبعدين
بصراحة كده أنا ما برضى أي زول يتكلم على حبيبتي...
..................................
متزوجين
'إنت ليه ما بتمسك ايدي واحنا طالعين سوا؟'

'يا حبيبتي إحنا ما مراهقين عشان نقعد نمسك إيدين بعض في الشارع وكده!!....
إحنا اتنين
متزوجين ومحترمين وعندنا بيتنا نسوّي فيهو اللي عاوزينه'..
..................................
متزوجين وعندهم عيال

'إنت ليه ما بتمسك ايدي واحنا طالعين سوا؟'

'يعني امسك إيدك انتي ولا امسك إيد الشافع ولا اشيل الأكياس دي كلها، ولاّ شنو يعني؟!'
مُصيبة شنو الوقعنا فيها دي يا ربي؟؟؟
...................................
بعد 25 سنه من الكفاح المُسلـّح
'إنت ليه ما بتمسك ايدي واحنا طالعين سوا؟'

'إيد شنو دي اللي بمسكها هسه بعد العُمُر ده! إنتي دايره راجل بـِتـّك يقول علينا كبرنا وخرّفنا؟!
يا وليّه أكبَري عليك الله

--------------------------------------------------------------------------------

ياعاصم كيف حالك تانى رجعت لى (محنك ) اها أنا فى المحطة الاخيرة بتاعة ال25 دى شنو ليك ورغم أنو فى أروبا مافى مشكلة فى حكاية مسك الايدين لكن الواحد لو أنتظر مشى معاها (خطوة خطوة ياحبيبى ) يكون ما قصر والحمد لله فى العربات من المحل للبيت وكمان البرد الكتير برضو بساعد والجليد من حكاية (مسك الايادى دى )

الرجوع الى المقدمة

الاخ/ عاصم

ابدا نحن ما شعب جافي
لكن نحن بنخجل وبنشيل هم الناس يقولوا شنو

في قصة طريفة احكيها ليكم

في ايام الجامعة كنا مشتركين في ترحيل جماعي
وكان مشترك معانا استاذ مشهور بخفة الدم وجنه هظار مع الاولاد والبنات
في يوم زارته زوجته في الجامعة وركبوا الاتنين في الترحيل
والاستاذ ساااااكت خشمو اليوم داك ما فتحو
تاني يوم الجماعة اشتغلوه شغل شديد
قالوا ليه انت بتخاف من مرتك
جننوه جن
في الآخر رد عليهم وقال : ااااااي بخاف من مرتي واي راجل بخاف من مرتو
قمت رديت عليهم انا قلت ليهم يا اخوان الاستاذ بيحترم مرتو ليس الا
والاحترام بين الزوجين يعني الحب وهو الاسمي والاقوي والابقي
ما تتخيلو يا جماعة الاستاذ ارتااااح كيف

يا اخوان علينا اظهار مشاعرنا حتي لو قدام الناس
( وما تقولوا لي ما عندنا بيت يلمنا لزومه شنو )
اظهار مشاعرنا ما شرطا الا بمسك الايد ( عشان الناس ما يقولوا العوارة دي شنو ) ممكن يكون بكلمة طيبة أو أطراء

وخليهم يقولوا زي ما الناس بيقولوا ................الخ لنهاية الاغنية ( وتحية خاصة لود القاسم )

الرجوع الى المقدمة

هشام
الاخ/ عاصم

ابدا نحن ما شعب جافي
لكن نحن بنخجل وبنشيل هم الناس يقولوا شنو

في قصة طريفة احكيها ليكم

في ايام الجامعة كنا مشتركين في ترحيل جماعي
وكان مشترك معانا استاذ مشهور بخفة الدم وجنه هظار مع الاولاد والبنات
في يوم زارته زوجته في الجامعة وركبوا الاتنين في الترحيل
والاستاذ ساااااكت خشمو اليوم داك ما فتحو
تاني يوم الجماعة اشتغلوه شغل شديد
قالوا ليه انت بتخاف من مرتك
جننوه جن
في الآخر رد عليهم وقال : ااااااي بخاف من مرتي واي راجل بخاف من مرتو
قمت رديت عليهم انا قلت ليهم يا اخوان الاستاذ بيحترم مرتو ليس الا
والاحترام بين الزوجين يعني الحب وهو الاسمي والاقوي والابقي
ما تتخيلو يا جماعة الاستاذ ارتااااح كيف

يا اخوان علينا اظهار مشاعرنا حتي لو قدام الناس
( وما تقولوا لي ما عندنا بيت يلمنا لزومه شنو )
اظهار مشاعرنا ما شرطا الا بمسك الايد ( عشان الناس ما يقولوا العوارة دي شنو ) ممكن يكون بكلمة طيبة أو أطراء

وخليهم يقولوا زي ما الناس بيقولوا ................الخ لنهاية الاغنية ( وتحية خاصة لود القاسم

--------------------------------------------------------------------------------

عاصم ... كيفنك ... شايف مواضيعك بقت متجه
علي وين ياربي ... ربنا يديك العافيه
سلام يا الفوق جميعا ...موضوع دسم
تعرف انا زاتي ماني عارف في ياتو مرحله
يمكن بعد الـ 25 ... هي ماله بقت تابيده مو هيك ياجنابو
نعز جدا حريمنا ووصنا مرحله اكبر من الحب يعني تقول
موده ورحمه وده بعد الحب ..الواحد ساعة يصله اذا فقده
او غابت عنه يحس بانه فاقد شي ...والشي عزيز للغايه
ده مرحلة الموده والرحمه
نرجع لموضوع اخونا عاصم ( بقيت زول محن ) وخليت وريق الخدره
كدي في الاول خلوهن اليمشن معانا في خط واحد
اي او اغلب السودانيين تلقه الواحد ماشي والمره بي وراه ويمكن تلقه
مسافه بي ناتن ... اما المسك في الليد نحنه خلاص فات فينه الفوات
اسع الواحد ان قام مسكه من ايده ومشي معاه تقوله مالك نعل ماعندك عوجي
والله شايفلك شوفه ...الرسول عليك مالك ..نعل ماك بايت فوق راي انا عارفاكم
رجال الزمن ده ..وطوالي علي المثل يا مآمن الرجال تآمن المويه في الغربال
ده ان ما ختت ايده في جبهتك وقالت نعل ماعندك حمه
خلوه الجيل القايم اليمشو مع بعض كخطوه اولي
وبعداك مسك الليدين ... قال مسك الليدين قال
والله ان ما كته خايف من هناء تزعل كان فضفضته
جنس فضفضه ..باقي نسيبنا اكله الدودو ..لااسع حارس حنة عواطف
وبالمحبه نتواصل

الرجوع الى المقدمة

--------------------------------------------------------------------------------

لكل الاحباء :

موضوع مشوق جدا.. بس يا هناء ..حقو نعنترف انو نحن شعب لا يجيد فن التعبير عن المشاعر الرقيقة بقدر اجادتنا فن الخشونة والقول الغليظ..اضافة الى مواهبنا الفريدة الاخرى ومنها موهبة عدم اجادة فن التمثيل التلفزيونى ..على الاقل..

اقرب شعوب الدنيا لينا واشبهمهم بنا (الاحباش)ناس رقيقين وبالهم طويل يكادون لا يعرفون الزعل ..يجيدون فن التعبير عن مشاعرهم الرقيقة قولا وفعلا..(هم فى هذه الناحية اصدق من الخواجات يا ابو سعيد اصحاب الابتسامات الصفراء)

مثلا فان اهداء وتبادل الزهور امر عادى جدا .. ولذلك فان تجارة الورود والزهور تجارة رابحة جدا..(طبعا يا هشام كلامك صاح لو عملناها حا يقولوا عوارة)

الزهور امر هام فى حياة الاحباء الاحباش ..حتى - عفوا - فى حالات الوفاة فهم يضعون الزهور فوق التابوت .. ..

مرة واحد سودانى صاحبنا (فى مرحلة امسك الكيس وللا الشافع! ياعاصم)قرر انو يقتدى بالحبش .... مشى المسجد صلى الفجر ولما رجع البيت كان شايل فى يدو باقة زهور بديعة لزوم اظهار المحبة وكدة ..ناول الزهور للمدام فى رقة ورومانسية غير معهودة فيه مرددا بعض ابيات لنزار قبانى...
ولكن كانت المفاجأة انو المدام (حمبكت ومدت قدومها متر مربع)...والسبب: انها لا تصدق ان هنالك محل زهور فاتح فى مثل هذه الساعة المبكرة من الفجر .. اذا مؤكد جدا ان الزهور
لاقاها الراجل واقعة من عربية جنازة.....

واحد تانى حكى لى انه فى فبراير الماضى انو فجاءة تذكر ان اليوم هو يوم (فالانتين دى - عيد الحب) .. فجاشت مشاعره بعاطفة جياشة مفاجئة .. قام اتصل بالمدام قائلا : هالو حبيبتى هابى فالانتاين وووو...
وقبل ان يكمل قاطعته بقولها : (عليك الله خلينا.بلا فانتاين بلا طرطشة فارغة.. اوعك تنسى الغاز تعال شيل الانبوبة هسع دى)...

رغم كل هذا .. فاننا اقرب الشعوب الى قلوب كل الافارقة على الاطلاق.. رغم مجافاتنتا لهم .....ودمتم

الرجوع الى المقدمة

» أول زارع كلى سودانى وعربى وأفريقى هو الدكتور عمر محمد بليل عليه الرحمة
» وترجّل الفارس أخيراً .. الطيب مصطفى يكتب عن وفاة يسن عمر الامام عليه الرحمة
» الطيب مصطفى وخروج الدكتور غازى صلاح الدين العتبانى من المؤتمر الوطنى
» عزاء الاخ الدكتور حاتم عبدالله الكردى ومقابلتى للاخ الدكتور أسعد تاج الدين العباس
» توفى الى رحمة مولاة الاخ الطيب محمد أحمد والد الاخ هشام الطيب فله الرحمة