زيارة المسجد الحرام

أدينا فضل الله وحمده يوم الخميس وبرفقتي الأسرة الكريمة العمرة وصلينا الصبح والجمعة في المسجد الحرام ولم ننسى أحبتنا أعضاء المنتدى بصالح الدعوات وخصينا بالدعاء كل من لأخوان بشرى واحمد وأبو كارم والعم محمود ومحمد سعيد والأخوات نوال (دي براها دعوة كاربه) وأم علي وأم تهاني وجميع الأعضاء بدون فرز وربنا يهون ليكم زيارة الكعبة المشرفة عما قريب.
ومن بركات العمرة قد ذهبت زيارة إلى جدة والتقيت بالاخوان فيصل المهدي وطارق حسن الشريف وياسين الحسين وسيف خير الله وكانت زيارة رائعة وجميلة وقد تناقشنا عن اخبار المنتدى وهموم القرية وثمنا على المشاركة والتواصل عبر المنتدى.
تخريمة خاصة بالأخ بشرى:
تقبل سلام الأخ صلاح عبد المحمود محمد الحسن وهو بسلام عليك سلام حار جداً وقد حكا لي الكثير من الذكريات الجميلة، وقد قابلت في مكة بالصدفة احد ألاعبين القدامى بفريق الهلال السوداني وهو الأخ/ متوكل عبد السلام وهو من ابناء بحري وقد كلمته عن شخصك الكريم وعن حبك للهلال وقصائدك فيه الرائعة وقد ذكر إلى انه قراء لك الكثير من القصائد وهو بسلام عليك شديد ايضاً.

عدد المساهمات : 134 تاريخ التسجيل : 04/03/2009

عمره مقبوله انشاءالله
اكيد كل دعاء يابو عمار برجع ليك حسنات

دمت بخير انت والاسرة الكريمة

عدد المساهمات : 308 تاريخ التسجيل : 05/02/2009

ابن عمي العزيز عمرة مقبولة وربنا يتقبل منك ومن كل المسلمين

ومرورك علي ناس جدة هو خطوة جد رائعة واكيد وصلتو لي نقاط بخصوص المنتدي
ارجو تزويدنا بها وبختك عمرة وزيارة ارحااااااااااااام من مكة لي جدة

عدد المساهمات : 154 تاريخ التسجيل : 21/02/2009

مشكور الاخ ياسر علي الدعاء وتقبل الله منك زياره المسجد الحرام ونسأل الله العلي القدير ان يبلغنا زياره المقدسات الاسلاميه

عدد المساهمات : 49 تاريخ التسجيل : 26/03/2009

ياسر يا أبن عمي بصراحه كدة مشيت الي الله ولا الي ود السرة . طبعاً أجابتك غلط وأنا عارف وانت عارف (هههههههههههههههههه

الأخوان الأعزاء
نوال ومزمل وابو كارم وفراولة ود بقدوش لكم الشكر وربنا يوعدكم بزيارة الكعبة المشرفة، ويا ابو كارم ما تجيب العيال وتجي خلينا نشوفك في الزايلة دي انتو اخف واسهل مننا ولا رايك شنو.

عدد المساهمات : 154 تاريخ التسجيل : 21/02/2009

والله يا ياسر مفكر يين فيها لكن مشغوليه الزايله دي بقت لينا في العزاه الله (ونسأل الله ان لايجعل الدنيا اكبرهمنا..... ووعد انشاء الله اذ توفقنا سنكون بمعيتكم .
بالمناسبه بلغ تحياتي لابن العم صلاح عبدالمحمود والله كم تمنيت مشاركته في المنتدي فهو رجل لديه افكار نيره،

الاخ ود الطيب لك الود والتحية والعمرة مقبولة وإن شاء الله نعّمر العمرة رغم 50 والحجة رقم واحد معاكم أهل الحرمين وأهل الحجاز، أذكر أننى دخلت كعادتى بعد كتابتك لهذا الموضوع ولاننى وجدت إسم الاخ الرايع والحارس الشرس صلاح عبد المحمود وكتبت موضوع من العيار الثقيل وفى السطور الاخيرة أتصل على أحد الاخوان من ميونيخ وأخذنى فى موضوع يتعلق بأمر سفرنا وأنا أتحدث معه أتصل أخ أخر على الموبايل وشتت أفكارى وأخذت أكثر من ساعة خارج النت والمنتدى وعندما فرغت من الموضوع وعملت خطوات الانزال طفش الموضوع وزعلنى زعل غير عادى وصراحة ياجماعة هذا الامر حصل لى أكثر من مره وعلاجة عندى ولكن قاعد أنسى العلاج فهل عندكم علاج أذا قعدت فى الموضوع اكثر من ساعة وحاولت أرسالة دون أن أحتفظ بصورة منه وأكررها بعد أن أدخل مره أخرى ؟؟؟ !!! أرجع لموضوعى وأسلم على صلاح عبد المحمود وأتمنى أن يكون من رواد وكتاب هذا المنتدى وصلاح إمكانياتة طيبة وقد درس بعدى فى الجيلى الثانوية وكذلك فى الكباشى المتوسطة .

يا ود ادريس حرام عليك ترد علي وانا في نفس اللحظة كتبة موضوع بعنوان (انا مخاصم بشرى) في داعي تتأخر علي كدا لمن اجيب اخري وتشمت فيني الجماعة.
قايتو الحصل حصل ودي ما بتنضحك يا قول اهلي البتلاب (عارف قصتها).

طبعاً ياود الطيب مصدقنى من غير حليفة وطبعاً أنا كتبت موضوعى قبل أن أقرأ موضوعك الخاص بالخصام وصراحة قدر ماحاولت أرجع الموضوع الاول (الكارب ) غلبنى لكن قلت ود الطيب بقبلو منى والحمد لله وقع ليك فوق جرح والمعلومة عرفتها من هظار الجماعة معاك وطبعاً أنت عديل عمنا المصباح عبد الله مضوى (المهندس) والمصباح من أميز أهلنا وأذكر فى إجازتى الاخيرة أصرت خالتى وعمتى أحلام عبد المحمود ورغم أنها وصلت من الجامعة أصرت ان نتغدى معاهم وأشرفت عليه بنفسها وقدمت لنا ما لذ وطاب وكان المصباح مغادر لعزاء فى برى ومعه عمه الحسين وعلى عبدالله زوج الاخت إكرام الطيب . التحية للعصامية أحلام عبد المحمود التى تخرجت بنتها (توسل) من طب الاحفاد وأبنها محمد من الجامعة وتخرجت أوسوف تتخرج هى قربياً وقد بدأت من المتوسط التحية لها ولهذا التميز والذى نقدمة لكل أخواتها بنات حواء وسوف أزورها مخصوص لكى أجلس مع أسرتها وأسألها كيف وفقت بين البيت والدراسة . وأذكر أن توسل عندما دخلت الثانوى العالى كانت أولى المركز وكتبت لها قصيدة وأرسلتها لها من المانيا وقد وجدت رضاء أسرتها خاصة الخالة أحلام عبد المحمود .

والله يا جنابو بشرى كلامك زي العسل في عديلي واحلام وعندي كلام كتير عنهم لكن ما بقدر اقوله ليك هنا الجماعة فاتحين خشمهم وقاعدين خليه فيما بعد.
وتقبل سلام خالتك الصغيرة أم عمار بسلم عليك وعازماك تضوق صينيتها حتها كاربا.

الاخ الاستاذ ودالطيب الحاج ذكرت لك أننى رديت على زيارتك للحرم سريعاً لان الامر أرتبط عندى بمشاهد كلها رايعة أولها الحرم والعمرة وبيت الله الحرام . والامر الثانى الدعاء من جانبك لاخى عبدالله عبدالله بالشفاء والامر الثالث زيارتك للاخ والخال صلاح عبد المحمود وأخيراً روايتك وحيثك مع نجم الهلال السابق إبن شمبات متوكل عبدالسلام والذى لاشك قد قرأ قصائدى من موقع شمبات (النيمة ) فالتحية له ونبارك له صعود الهلال لدور المجموعات ، أفيدك أن متوكل ينزل فى جدة مع الاخ عماد محمود محمد سراج النور شقيق الاخ والصديق عصام محمود محمد سراج النور معنا فى بون وأمين خزينة الجالية السودانية والاتحادى الديمقراطى المرتب والمنظم (جناح الشريف الهندى ) والاخ عصام سوف نسافر للسودان سوياً لملتقى السودانيين العاملين بالخارج وأشياء أخرى تهم الجالية ويعتبر عصام القائد بحكم خبرتة الطويلة فى العمل الحزبى وسوف نتحرك بسارتة الخاصة وأقابلة فى بحرى إن شاء الله ونسأل الله أن يوفقنا فى مهمتنا وسف يكون سفرنا إن شاء الله السبت 9 مايو ونصل صباح الاحد بالمصرية

الاخ الاستاذ ياسر الطيب الحاج أمّا هذا الرد فخاص بخالتى الصغيرة (ام عمار ) وربنا يحفظكم وكمان أديها مسدار :
من بون أرسل سلام.... ليك يا أم عمار
والعزومة وصلت.... وحانشّرف الإفطار
عارفينك قديره....... فى الطبيخ وخضار
يارب يجمعنا وطنناً... ونرتاح من الاسفار

بالتوفيق وربنا يوصلكم بالسلامة وتحياتنا لجميع الأهل وانشاء الله تنهوا مهمتكم على اكمل وجه، وسوف نفتقد مشاركاتك في هذه الايام، (ومرسي على المسدار الظريف) دا طبعاً كلام نقلاً عن.
وبمناسبة الطبخ كان صيف العام الماضي معي الوالد في مدينة الرياض وهو راجل مرح وصديقنا اكثر من ابونا، وفي احد المرات كان عازمنا ابن عمتي مصطفى (ود القوت) والحقيقة الراجل عازم خاله وكانت غداء يوم الجمعة وكان بصحبتنا ابن عمتي (ابراهيم حمد) وحضر الطعام وفيه كل ما لز وطاب الراجل محتفل بخاله، واثناء الأكل عجب الوالد احد الطبايخ الموجودة في الصفرة وقال والله الملاح دا جميل وصناعته جيدة، وقام مصطفى قال ليه بالهنة وانشاء الله ينفعك ياخال، لحدي هنا والموضوع كويس، مصطفى قام يجيب زيادة رغيف، وفي هذه الاثناء قال لينا الوالد طبعاً انا وابراهيم (شوفو يا أولادي كان اخوكم دا شادي حيلو ما بكلم مرتو هسي ويقول ليها جدك الملاح عجبو، وكان بقى راجل وديع"ترلا" بقوم يكلمها هسي) طبعاً بقينا فاتحين خشمنا وقاعدين منتظرين مصطفي يجيب الزيادة، واتا مصطفى وقبل ما يخت الزيادة في الصفرة قال: يا خال المرة مبسوطة بسطة شديدة، قام ابوي قال ليه: في شنو يا ولدي؟ مصطفى قال: قلت ليها جدك عجبو الملاح. وانفجرنا من الضحك ضحك شديد جدا لمن مصطفى انخلع وقال في شنو؟ وطبعاً حكينا ليه القصة، وقال والله يا خال انا ما وديع لكن انت مقلبتني.
انتو عارفين لحدي هسي في الرياض مافي زول بشكر طبيخ مرتو حتى ولو بعد أسبوع(وعملوا حسابكم والداير يبقى وديع يشكر ملاح مرتو)

عدد المساهمات : 49 تاريخ التسجيل : 26/03/2009

يا أبن عمي وابو نسب سؤال يطرح نفسه والسوال ليك يا المنطط عينيك ؟ الذي الايكون وديع هل يشكر تبيخ نسيبتو (أخت زوجه ) أجب ورد علي جنابو بشري وحكي له عن والله فلان ...................... تباخة (خلاص )

» تهنئه بالعيد وتهنئه لحجاج بيت الله الحرام!!!
» افتتاح مسجد السقاي البتلاب
» رسالة الى جار المسجد( منقول)
» ولد يصرخ كلما يصلى فى المسجد خلف الامام (منقووووووووووووووووووووووول )
» سنه حسنة فى المسجد الباكستانى جوارى فى بيرمنجهام