كم بالة .؟؟!؟ بالتين والبالة تدقش باله .. وثلاثة مسادير للمريخ العالمى

هذا المسدار نجرتو الصباح للمريخابى عمر عثمان وزميلو وليد الريح وأنا ماشى الشغل ، ركبت فى الطابق الثانى للبص ومرقت ورقتى وقلمى وكتبتو ولكن قبل ما أكتبو أشوف الاهداء من منو ؟؟ الاهداء من سعادة اللواء شرطة معاش محمد المجذوب وشخصى الضعيف والاخ فيصل عثمان ( كورس ) بطريقة السعودى الذى جاء للسودان أيام ( الهجيج ) وحضر حفله فى الديم وطبعاً فيصل نحنا نردد المسدار وفيصل يقول ( أى نعم !! أى نعم !!) ويا سيد ود المجذوب القصة عارفه أم تسهل لى فى الخاص !! لكن فيصل عثمان أكييد عارفة ده لو ما كان فى نص الحفله الحقيقية والقعدة المصلحة ، آها المسدار وأنا ماشى لكن لأزم أحكى ليكم الحصل شنو فى البص وأنا راجع وحكييت القصة للمدام وتضحك حتى الان ، وأنا راجع على البيت بتكون ( المروة كملت ) ما بقدر أطلع فوق بركب فى الطابق الارضى مع السواق بعد تلاتة محطات ظهر ( الكنترول بتاع التذاكر !!!) أتنين ركبو راجل ( أفريقى أو جامايكى المهم أسمر البشرة زينا) ومعاهو إنجليزية الراجل طلع فوق والانجليزية بدأت تراجع فى التذاكر تحت مجرد طلوع الكنترول جوارى شاب باكستانى فى حدود 18 الى 20 سنه بدأ يتململ !! أنا عرفتو ما عندو تذكرة وبدأ يفكر ( فى المخارجة كيييف !!!) عندما وصلت له الانجليزية قال لها تذكرتى مع السائق فقالت له أنتظرنى جوار السائق !! بس أدتو ضهرة وهبر هبره واحد والباب فاتح وصاحبنا والله فتح لو سكوهو 20 ما يقبضوه !! والله أنا أنبسطت منو وقلت ليهو والله زكى !! الغرامة 25 جنية إسترلينى والتذكرة اليومية بى 4 جنية ولمشوار واحد بى 2 جنية والشهرية بى 50 جنية طبعاً العبد لله بقطع تذكرة شهرية وبريح نفسى لا كنترول ولا غلبه والحمد لله لى 5 سنوات فى اليوم أركب 4 الى 7 بصات لم يحدث أن مسكنى كنترول من غير تذكرة والحمد لله . شنو ليكم بالله بصاتنا ما سينما سينما !! الانجليزية كان صيدها فى الطابق الارضى إتنين !! أما زولنا ود أهلنا الافريقى واله جاء من فوق كاشى ليهو 10 شىء بنات وشىء وأولاد والقاسم المشترك كلهم أجانب !!! والله الزول ده الليلة نصيبو يطلع على الاقل 50 جنية !! طبعاً فيها نسبة زى مخالفات المرور فى السودان !!! آها بعد الفلم بتاع الهروب نرجع لى مسدارنا والذى قلت فيه :


كل ما نشوف عمر نديهو نامن يلبد
لكنو الظرييف تلقاهو شاكر ويحمد
ومعاهو وليد لى مريخو يسأل ويفقد
لكن الوصيف لى خروجو ناوى يمدد