نبارك للدكتورة سهام إسماعيل البشير الحصول على الدكتوراة

أولاً نبارك ونبارك ونبارك حتى تصل المباركة لو رُصت حروفها اليكم فى السودان فى الثورة الحارة 13 ، نقول مبروووك للدكتورة سهام إسماعيل البشير ومبرووك لعموم الاسرة ولاشك أن الدكتورة سوف تكون أهدت هذا الانجاز الى روح والدتها العازة المصطفى عبدالله عليها الرحمة فنترحم عليها جميعاً فنقول اللهم أغفر لها وأرحمها وأسكنها الجنة مع الصديقين والشهداء .
نبارك للوالد والعم والاب والاستاذ والاديب والشاعر إسماعيل البشير نبارك للأخ الرائع نصر الدين وأسرته الكريمة للأخوات نوال وهاجر وعموم الاسرة الكريمة .
لاشك أن الرسالة التى مُنحت بها الدكتورة سهام هذا اللقب رسالة هامة وسوف تفيد الطلاب فائدة عظيمة نسأل الله أن يكتب لها فى كل حرف وصوت مسموع حسن والله يضاعف لمن يشاء .

مبروووك يا سهام نجاحك جمييل وعجبنا
وزيدى فى النجاح وخليهو عز لى طلبنا
خيرو يزيد وباسط ما قالو أصلو أصلو غلبنا
سهل للدروس وأسعد للنفوس ما ليهو إتغربنا

كتبت فى منتدى السروراب هذا التعليق وجئت هنا لكى (أحقق سبق صحفى وأنفرد بالخبر فوجدت الدكتورة سهام قد سبقتنى الى دارها بالجزيرة إسلانج ) فأكتفيت بالتعليق مثلما فعلت فى منتدى السروراب ولكن هنا كان تعليقى قبل الجميييع وخاصه منافسى الباشمهندس الشيخ إدريس !!آها دى بى ثلاثة نقاط يا باشمهندس وشد حيلك ما يحلك إلا مسدارين و30 سطر فى التعليق وأنكرب .

---------رد الدكتورة سهام على بشرى مبارك-----------------------------------------------------------------------
الله يكرمك الأستاذ الرائع السبَّاق دائماً، الأستاذ البشرى، الذي يأتي دوماً بالبشرى..جزاك الله ألف خير ،،

نمك كتير يالبشرى جد يسعدني
ومن رب العباد يجزل عليك يأجرني
سامحونا بس لو قصرنا ما تعاتبني
كتير ما ردينا، بس دي الهموم، لكني
شاحد الله الكريم في حقكم، يغفر لي ما يساعلني

رد الباشمهندس الشيخ إدريس المبارك للدكتورة سهام--------------------------------------------------------------------------------
(دكتورة وكمان عالم يسر البال
من دار ناس سرور جانا الفرح والفال
مبروك النجاح قبال نلف الشال
وابشروا بالفلاح وتهاني ليك يانوال)
دكتورة سهام وهذا (التلكلك)(والتحكحك) هو من ضمن المجاهدات التي ينبغي ان تأخذيها بعين الاعتبار فهؤلاء القوم مع احترامنا الشديد لهم الا انهم يحاربون كل مجتهد فما يضيرهم ان كان كتاب الكتروني ام حزمة الكترونية او ضوئية مادام الفحوى والاجتهاد والمضمون واحد ؟ في النهائية ستنالين مبتغاك فوق رقاب الرجالة ديل.

ومسدار ثانى من بشرى مبارك للدكتورة والشيخ إدريس والاخ حيدر أحمد عبدالله الذى بارك لها وأعتذر عن عدم إجادته فن المسادير وطلب منا التعبير إنابه عنه وقد قلت :

وما قصرت طب يا الشيخ بسط ود عبدالله جبت زياده
ومعروف ديمه قضاى واجب ومختوت للكتير وزياده
محل ودووك كنت هميم نجيض وصميم ولو فى بياده
ولو ندهدوك عيال أهلك قصاد سقاى ما يهمك تجيهو مخاده
ويا الدكتورة شوفى بشارة الرايعيين ومسدارم نسوى نسوى وساده

--------------------------------------------------------------------------------

شغلنى أخوانى الكرام بمنتدى الجزيرة إسلانج والسروراب والسقاى شغلنى مسدار وشعر عبيد الطيب (الفخيم ) يبارك لبنتنا الدكتورة سهام إسماعيل البشير خاصه ألابيات الثلاثة الاخيرة التى تقول:

ولبستيهو تاج وشبلتي فوقو الطّوق
عشان فرحتي والديك و العندو فيكي حقوق
العنوان اتركيهو وهُن عَدَّمو الطّايوق

لذلك قررت أن لايمر على هذا اليوم وإلا أكون قد كتبت قصيدة كاملة الدسم والان إليكم القصيدة وأتمنى أن تعجبكم وخاصه دكتورتنا سهام إسماعيل فقد قلت :

والله يا عبيد والله والله ذووقك ذووق
أديت لى سهامنا من من العلالى الفوق
أرضك فى الشعر مادايره طب مارووق
ونمّك جد ظريييف يحاكى كييف القوق
ياالشاطر * أخوى أدييك السلام مطبوق
جيلنا والورانا والوراهم ما بعرفوها عقوق
أتعلمنا الكتيير الكتير ما خلينا جر واسوق
نحترم الكبير لو لاقانا نص نص السووق
نوقّر صغيرنا صغيرنا نلعب معاهو الطووق
ولو قصرنا واجب نجييب لكل لكل فرووق
وما فينا البخييل العوير وفينا من ممحوق
موظف ومحاسب الحكومة ما بنى الطابوق
أسألو أخوانى والطييب الطييب ترب شيقوق
وعمر على حسن فى عدلو هو الفارووق

منِّي والرَّيَّس عُمر والمستشار شيقوق
نبارِك لي سهام سِت النَّفَل والذّوق
مبروك النجاج ورفعتي بلدِك فوق
ولبستيهو تاج وشبلتي فوقو الطّوق
عشان فرحتي والديك و العندو فيكي حقوق
العنوان اتركيهو وهُن عَدَّمو الطّايوق

هذا ما كتبة الاخ عبيد الطيب فى سودانيز أون لاين يبارك للدكتورة سهام ، وهو والمستشار الطيب .تخريمة

يا سهام عاد لازمك رد كارب أنقلو ليهم فى سودانيز أون لاين وشدى حيلك ومعاك الباشمهندس عشان تبيضو وشنا وتزيدوهو بياض..

هذا هو رد الاخت الدكتورة سهام إسماعيل بمسادر أو قصيدة على الشاعر عبيد الطيب رداً على ما كتبه لها من شعر مباركاً الدكتوراة والرد لا شك يشمل الريس والمستشار شيقوق بل وكل حضور ومعلقين البوست الرائع .

أرح يا الشيخ نسو تعظيم سلام مطبوق
للطيب والطيبين طيبي الأصل والذوق
الجونا عبر الأسير شايلين السلام بي فوق
حديثهم طبيعي لا مصنوع ولا من سوق
حديث جميل وطريق يخلي الزول رايق روق
بنرسل ليهم تحايا شايلاها الخيول والنوق
ياربي كده حقيت حقهم وأوفيتهم الحقوق..؟؟

» نبارك الدكتوراة(فى الفيزياء ) للأخت سهام إسماعيل (السروراب غرب )
» د. كبشور كوكو قنمبل لـ «الإنتباهة»: والمقال للدكتورة سهام إسماعيل تناد
» إسماعيل العتبانى يكتب عن الانتخابات والرئيس البشير فى المقدمة
» نرحب بعبد الغفار عبدالملك عبدالله ود سامية البشير أبراهيم الخالو السر البشير
» منى سلمان والغاية فى الحصول على التصاديق من الولاية نقلاً من الرآى العام