عندما طلب منى الاخ على جويلى أن أشارك فى بوست فى سودانيز أون لاين

عندما طلب منى الاخ على جويلى أن أشارك فى بوست فى سودانيز أون لاين

--------------------------------------------------------------------------------

هاتفنى بالامس الاخ والصديق والدفعة من أمريكا الاخ على جويلى وطلب منى مطالعة موضوع فى سودانيز أون لاين على الراحل المقيم المقدم تاج السر محمد حامد الباترا، فدخلت البوست الرائع الذى أبتدره وأفتتحه الاخ عمر عثمان وسلمه لضابطة الاعلى سعاده اللواء عمر على حسن وصراحة لم نتشرف بمقابلة أو العمل مع سيادته ولكن طالعنا مقالاته الرائعة عن الهلال عشقه ونادية الذى كان رئيسه وسكرتيره ونسأل الله له مزيداً من الصحة والعطاء وكنت قد تحدثت مع سعادة اللواء شرطة دكتور محمود محمد صالح فى المانيا والذى قابله فى الامارات قبل فتره وطمأننا على أحواله وعزمت إن شاء الله إذا أمد الله فى الايام أن أزور سيادته فى الامارات وكذلك بقية الضباط فى الدوحة قطر منهم دفعتى مكرم أحمد البشير وتحياتى لهم جميعاً . أما التعليق عن الراحل الباترا فيبدأ أننا تعرفنا عليه فى المعاينة النهائية فى أواخر العام 1979م وكان مسؤول من قياس طول الطالب قبل أن يقابل لجنة مدير عام الشرطة بالكلية . دخلنا كلية الشرطة فى 23 يناير 1980م وكان فى رتبة الرائد شرطة مشرفاً على الميدان ومعه الرائد وقتها أمين عباس.
وجدنا سمعته وشخصيته وصرامته وسخريته تملأ الافاق ويهابه حتى التعلمجية وكان برنامجة المسائى فى مزرعته جوار الكلية على النيل الازرق ويملك بوكس (ركاب) وأحياناً فى الجمع والعطلات يعمل بالبوكس فى خط برى ونبدأ بإحدى قفشاته مع الخط فذات مره تعطل البوكس لعطل فى البطارية كانت (نايمة ) وهو يعلم ذلك فنزل وكانت (الفردة كلها نساء ) فنظر للنساء وبنفس طريقته فى الدورس والنداء الجهورى خاطب النساء أنزلن أدفرن البوكس ده !! فما كان من النساء إلا وصرخن (سجمنا الليلة الراجل ده بدقنا !!!!) .
فى نشاط الاربعاء المسائى كان يحضر فى الطابور ويقول للطلبة المن الجيلى وغادى يطلعو بره!!!! فيخرج أبناء النيل والشمالية فيقول لنا شيلو السيوف نضفو الميادين ولمو القش وبعد أن نلم القش يأتى بالشولات ويعبى ونكون قد نضفنا الميادين وعشى الباترا بهايمو !!!.
فى إحدى الامسيات بعد تمام التاسعة حضر مدير الكلية وكان وقتها العقيد شرطة دكتور سرالختم عثمان إدريس وكان يحلو أن يقول للباترا بعد الانتهاء من إستعراض أعمال البيادة والطابور للدفعة فى شمساً تصر العين يقول له (جمييل يا السر !! أعمل ليهم إنصراف ) ويتبسم الباترا لنجاح مهمته فى ذلك اليوم ، نعود للطرفة لفت إنتباهة الرقيب المناوب بأن المدير موجود وكان حضورة فى المساء بالجلابية والطاقية الحمراء وعندما يرفع التمام (ينزل الطاقية الحمراء ) وما عارفين نحنا السر فى إنزال الطاقية شنو !! المهم طلب من الطالب المناوب قلم وقام بكتابة التمام بالكاد ورفعه للمدير والذى خاطبنا بأن نرفع من مستوى الاداء والانضابط ولم يستغرق وقتاً طويلاً !! عندما صرف الطابور قال الطالب النبتطشى للباترا القلم يا سياتك ؟؟!! فقال له الباترا ليه قلم باركليز !!! ويقصد قلم باركر .
عند قرب التخرج فى الثلاثة أشهر الاخيرة ينشغل الطلبة بالقراية والسهر ويتناوبو على القاعات والباترا يشاهد ذلك ولكن لا ناقة له ولا جمل فى القانون ودراسته فيجمع الطلبة فى طابور الصباح وكان يخلط بين الدكتور محمد محى الدين عوض صاحب كتاب (قانون العقوبات السودانى معلقاً عليه ) وبين عابدين عوض صاحب الازياء العسكرية المعروف!!! فيجمع الباترا الطلبه ويبدأ فى محاضرته والتى لا يفهم مفرداتها إلا الطلبه والتعلمجية وشخصه فيقول يا طلبه نحنا عايزين نخرّج ضابط يلعب بالبيضة والحجر والله لو قريتو كل كتب (عابدين عوض ) وما نجحتو فى الميدان ما تتخرجوا !!! والغريب لم يكن هناك أى شخص يستطيع أن يضحك أو يحاول تصليح الباترا !! ولكن فى جلساتنا الخاصه ندوّر أحاديثه ونضحك كأننا لم نضحك من قبل .
الرحمة تتغشاهو وسوف أتواصل معكم لكى أحدثكم عن يوم تخرجنا فى الثلاثاء 3 يناير 1982م.
رائد شرطة معاش بشرى مبارك إدريس بريطانيا بيرمنجهام ودفعة الاخ على جويلى خارج الخدمة وداخل الخدمة اللواء شرطة دكتور الطيب عبدالجليل واللواء شرطةدكتور عزالدين عبدالمحمود والذى لو شاهده الباترا الان لتعجب لأنه كان فى الميدان صاحب طرائف وحكاوى وحتى قرب التخرج شغالين معاهو التعلمجية هال هج هال قف !! وعزالدين يضحك ويخرج لهم فى فقشاته والتى تحتاج أيضاً لبوست كارب !!والاخ عزالدين والراحل العميد شرطة أحمد محمد الامين(أبواللميين ) ونترحم عليه هم من أطلقو كل الالقاب على دفعتنا وعلى الضباط والتعلمجية وفى تقديرى الاخ عزالدين عبدالمحمود أكثر طالب ترك ذكريات لدى التعلمجية فى الكلية ما زال يحكى بها الزملاء وكذلك قفشاته التى لم تتوقف أثناء العمل .

هاتفت الاخ الرائد شرطة فيصل عثمان(الدفعة 47 وهم ورانا طوالى بعام واحد فقط ) فى سويسرا وهو من المتداخلين فى بوست سودانيزأون لاين وذكرت له طلب الاخ على جويلى بأن أشارك وقرأت له مشاركتى الاخيرة وبعض قفشات من الراحل العميد شرطة أحمد محمد الامين (أبواللمين ) عليه رحمة الله فضحك كثيراً وطلب منى أن أقوم بإنزال كل هذه الطرف فى البوست وسوف أعمل إن شاء الله .

نزولاً لرغبة الاخ على جويلى (46) ورغبة الاخ فيصل عثمان (47) والمتواجد فى سويسرا وسويسرا يا جماعة جنة الله فى الارض وجوها خاصه هذه الايام مع (الخضره والوجه الحسن ) حاجه لاتوصف فقد كنت أقيم وزوجتى من منتصف 1992م فى أخر (حلة المانية ) على حدود المانيا الجنوبية الغربية مع سويسرا وفرنسا وكانت أول مدينة سويسرية بعد (قرينزخ حلتنا 5 كيلو بازل السويسرية ) وبإتجاة أخر 15 كيلو مدينة (فايل آم راين الفرنسية ) ولكن فرنسا جعانه وتعبانه مقارنة بسويسرا فلا نذهب إلا لسويسرا وكانت على بعد 10 كيلو مننا مدينة (راينفيلدن الالمانية وعلى الجهة الاخرى من نهر الراين راينفيلدن السويسرية) وفى مستشفى النساء والتوليد فيها والذى يطل على نهر الراين كأنه القصر الجمهورى فى السودان وضعت زوجتى أبناءنى الكبار إسراء فى 14 يناير 1993 وأحمد فى 29 يوليو 1994م والان على دخول الجامعات الانجليزية وتمر أيام وتتعده ونقعد نحسب فى المده !!! والمنظر تماماً مثل شمبات وأبروف فى أمدرمان وبينهما نهر النيل بعد كبرى شمبات وبعد خروج النيل مباشرة من المقرن .
أقف هنا حتى لاأسرح كثيراً وأمرقكم من جو الموضوع ونعود لذكريات العم الباترا عليه الرحمة وأتحدث عن يوم تخرجنا .
قبل التخرج كانت هناك طوابير الساقية الخاصة بالتخرج والتى تبدأ قبل شهرين والله العظيم لو لا الفرحة بالتخرج وتركيب ولبس الدبورة لهرب الواحد من إرهاق الساقية وتكرار الطوابير والحالة كان أولنا الاخ محمد الحسن محمد حمدناالله كان كارب فى البيادة لم يرهق الباترا (مثلما أرهقه أول 35 وكان صاحب لكنه مصرية وأول 37 وما فى داعى لكسير التلج خلوهو فى سركم !!) المهم كان أولنا والحمد لله زينة وعاجبنا وأهم حاجة عاجب الباترا ولم نسمع أن زجره أو قال له كما كنت !!! وعلى فكره معى فى بريطانيا هو والاخ أسامة عبدالوهاب فى مدينة بريستول 200 كيلو من بيرمنجهام وكم وعدونى بالحضور ووعدتهم ولكن لم نتقابل إلا بالهواتف والحمد لله .
فى يوم التخرج وكان بالثلاثاء والاسر تملاً ميدان التخريج منهم من حضر من السقاى والعيلفون والخوجلاب ومدنى والجنينة وكسلا ومروى وعطبرة ومعظم مدن السودان وقراه 188 طالب منهم 8 من دولة قطر .
لبس الباترا كما لم يلبس من قبل ويبدو أنه كان فى قراره نفسه يعلم أن هذه الدفعة هى أخر دفعة يقود طابور تخرجها من الميدان الاحمر الى الميدان الاخضر حيث الوقوف أكثر من أربعة ساعات هى مده إحتفالات التخرج والتى يكون فيها كل (إصطاف الكلية فى حالة تأهب ومتابعة وحذر لا توصف ) وكان أكثرهم فى ذلك اليوم هو المقدم تاج السر محمد حامد الباترا فقد بكى عندما رفع التمام للضابط الاعلى منه وغادر فى مشهد تراجيدى مسح به كل الصرامة والصعوبة والنشاف الذى عرفناهو وعهدناهو عنده وكان كأنه طفل صغير فأسأل الله أن يرحمة ويغفر له ويغفر لجميع موتانا وشهداءنا من الشرطة وأسألكم بالله أن تترحموا عليه .
بعد التخرج والذى كان طابوره ناجحاً حضره رئيس الجمهورية جعفر محمد نميرى عليه الرحمة
وطاف علينا الباترا فرداً فرداً وبارك لنا ولأهلنا فتلك اللحظات يتذكرها كل طالب وأسرته .
الان أسمحوا لى أن أتناول بعض الذكريات والمواقف لأخواننا الزملاء بالدفعة مع التعلمجية منها أثناء التدريب ومنها مواقف بعد التخرج وقفشات تخص الراحل العميد شرطة معاش أحمد محمد الامين واللواء شرطة دكتور عزالدين عبدالمحمود .
نبدأ بالاخ الطالب حسين أمين التنى، التنى كما يحلو للتعلمجية أن يخاطبوه كان كثير الكلام والنظريات والسبب أنو كان ماسك الميس مع عزالدين عبدالمحمود فى الشهر الاول لذلك طلعوا فى الطابور أى كلام !! التنى دخل فى حوار مع العريف حسن صالح المشهور بالقطامة والرد المسيخ فقال له التنى يا فندوم أنا عندى وجه نظر !!!! فقال له يا طالب خطوه للخلف مارش لليمن دور ودورو حتى أوقفة فى نصف الميدان الاحمر وصرف الدفعة كلها وجاء على التنى قال ليهو يا التنى أنا الليلة قاعد معاك هنا فى الميدان ده للصباح من طابور ذنب لى إدارة وخلى الليلة وجه نظرك التعمل ليك إنصراف !!!!.
قبل 8 سنوات تقريباً ودفعتنا فى رتبة العقيد كان عندهم إفطار جماعى فى دار الشرطة وكان محضوراً جداً حسب ما ذكر لنا الاخوان الزملاء وكان نجم الحضور عزالدين عبدالمحمود بتعليقاتة الساخرة ويبدو أن عزالدين لم يقابل عدد كبير من الزملاء لفترة طويلة منهم فتح الرحمن عبدالقادر الامام أبوعاقلة الاحمر (هكذا إسمه الذى قرأته فى الجريدة فى العام 1979م وكان فوق لى إسمى بإتنين) والاخ والصديق (كردقيلى ) لم يتغير شكلة من هو طالب وحتى الان لم يتغيير كثيراً لا صلعه ولا شيب ولا كرش لا كرميش ما تجيهو حاجة يقولو من بشرى مبارك !!! عزالدين عاين ليهو وقعد يضحك وقال يا جماعة تعالو شوفو كردقيلى والله التقول كان سايقو قبطى !!(ولمن لم يفهم النكته مثلى فى أول الامر أن الاقباط معروفين بالمحافظة على سياراتهم تلقاهو سايق عربيتو 20 سنه خرشه ما فيها !!!) .
فى العام 2009م جلست مع الراحل المرحوم العميد أحمد محمد الامين (أبوالميين) فى مكتبة فى المغتربين فقد كان فى ذلك الوقت مدير جوازات المغتربين ، فقال لى حضر ذات مره الاخ حيدر أحمد سليمان دفتنا مدير شرطة البحر الاحمر الان برتبة اللواء وكانت هناك زهور بلاستيكية فأعجبتة فوقف يحركها فحرك منها الغبار فمسك أبوالميين يده وقفل خمشه ونادى بعنف على حيدر يا حيدر إنت ما عارف أنا (البلوتوز بتاعى فاتح !!) وطبعاً كان عائد من التو من نقل الكلى !! فضحك حيدر حتى بكى !!!.
فى العام 2010م حضرت وذهبت للعزاء فى وفاة الاخ أحمد محمد الامين وبعدها قابلت عدد مقدر من دفعتنا منهم الاخ العميد وقتها المكى محمد المكى وكان فى إذاعة ساهرون فحكى لى أن أبواللميين قبل وفاته عليه الرحمة بسنة توفيت والدته عليها الرحمة وحزن عليها حزناً شديداً فقال لى المكى كنا نتردد عليه يومياً لكى نخفف عليه وبعد إسبوع وكان جمعة حضرت الصباح فى حدود العاشرة ووجدت معه عدد مقدر من أهل الفن من المطربين منهم القلع عبدالحفيظ وفرفور والراحل نادر خضر فقلت له يا أبواللميين الحكاية شنو فقال له والله جونى من الصباح التقول عندى صبحية !!!!.
أخوانى إذا أردتم أن تموتو بالضحك جد جد فأستمعوا للأخ المكى محمد المكى يحاكى لكم الباترا والعجب لو لابس الجلابية وخات الشال فى كتفو ولابس الطاقية الحمراء !!!!.
ود اللميين بعد أن عاد من زراعة الكلى فى العام 2007م تقريباً وكان وقتها فى رتبة العميد وعضو مجلس إدارة نادى المريخ العاصمى فلاحظ أن سكرتير النادى لم يحضر لزيارته فى البيت بل لم يتكرم بالاتصال عليه ويبدو أنه كان مشغول بسفر خارجى فأتصل عليه أبواللميين وسأله عن أسبابة عدم حضورة أو إتصاله وحاول أن يجد له عذرا !!فقال له وداللميين إنت عارفنى أنا مشيت زرعت كلى؟؟ قال ليهو نعم سمعت بيك فقال ليك طيب أنا ما مشيت أزرع كلى ما زرعت (أبسبعين)!! فضحك الراجل وقال له والله يا وداللميين ما تشيل حالى أنا الليلة معاك فى البيت ، ولمن لا يعرف أبسبعين نوع من العلف الخاص بالبهائم يتم زراعته فى شرق النيل .
ونواصل إن شاء الله
وأرجو منكم أن نترحم على كل من فقدناهم من الزملاء بالشرطة من أول شرطى سودانى إلى أخر شرطى فارق هذه الحياة الدنيا ، ونقول اللهم أغفر لهم وأرحمهم وعافهم وأعف عنهم وأكرم نزلهم ووسع مدخلهم وأدخلهم الجنة وأعذهم من عذاب القبر وعذاب النار ، وأخر دعوانا أن الحمد لله رب العالمين .
وتقبلوا تحياتى رائد شرطة معاش بشرى مبارك إدريس الدفعة 46 رقم قديم أولنا محمد الحسن وأخرنا المرحوم مكير من أبناء الجنوب وعدد مقدر من التمانية القطريين . ومن بيرمنجهام سلام .

الاخوان الكرام قبيلة الشرطة من الزمن الطيب والى الان الى القمندانات الذين يتواصلون معنا وكأننا بينهم نعمل معهم نرفع لهم التمام اليومى على دفتر الاحوال أو عند ميادين الكليات النظامية ومدارس تدريب المستجدين ومن هذا البوست الرائع الذى يتحدث عن قامة من قامات التدريب الميدانى فى كلية الشرطة منذ أن كانت فى موقع المجلس الوطنى الحالى يتمتع طلابها بمشاهدة الزائرين لضريح الشيح بر أبوالبتول (الكلية عرفناها تحولت الضريح موجود ؟؟؟) رأيت أن أوثق للقامة العقيد معاش المرحوم تاج السر محمد حامد الباترا بطريقة المسادير وأتمنى أن يتتابع النم والمسادير الى أن يبلغ ما نريد إن شاء الله وأبدأ بهذه الابيات وأقول :

مسادير لملك البيادة والسلاح والطوابير

بدور أجر النم فوق قايداً هميم وجسور
الباترا ودحامد تاج السر.... ملك طابور
فى علم السلاح تنهل...... كأنو بحوور
فى الخطوة الاسد وصوتو يجييك جهور
********************
من زمن الترك........ وأحوالو داير دور*
فى الهندام نضييف وزايد على الريفى دور
ملك الحزّية الحزّية والصف والنداء الماثور
وحقو الانضباط وصحيانو ...... ديمه بكور

أحوالو داير دور تعلمون أن دفتر الاحوال عند أخواننا بقوات الشعب المسلحة (الجيش ) يسمى الدور داير .

***********************
زى صقر الخلا يجييك سهمو يفور
لو غيّرت حزّية أو بديت فى فتور
عندو لغة خاصه ما ليها من منظور
طابورو الرصين بالرئيس محضور
يبكى يوم وداعكم ما تقول أسد وهصور

ونواصل على بركة الله مشوار المسادير فى ملك الطوابير تاج السر محمد حامد الباترا وأقول :

أتلمّ الجمييع والبوست البوست مصلّح وكارب
فى الباترا داك صقر الخلا الديمة واقف يحارب
الخدمة الطويلة... ما اتغيير ملاحمو وشارب
معروف بى نداهو ولى كفو دايماً دايماً ضارب
يردد يردد فى العجائب ويقول هو دايماً صايب

************************
يا عمر ودحسن سردك هو كلو مطايب
ما تخلينا قصه قول فيها كل عجائب
الكل ليك حضور من الصغير والشايب
لا خُفنا الضلام لا خُفنا جوع ودبايب

Quote: *
سعادة اللواء شرطة معاش عمر على حسن من الامارات يرد شعراً على بشرى مبارك فى بوست الباترا التعلمجى الاشهر على كلية الشرطة فى سودانيز أون لاين

يا عمر ودحسن سردك هو كلو مطايب
ما تخلينا قصه قول فيها كل عجائب
الكل ليك حضور من الصغير والشايب
لا خُفنا الضلام لا خُفنا جوع ودبايب

الي فيصل الحسين وبشري مبارك

فيصل وبشري خليتونا فوق نتجدّع
ماسكين سيرة البطل البتُر وما بيرجع
كان قام في (الكديب) نارا لهيبا مولع ..
الطابور يدستر وقولة قف تدك وتفرقع

ابشر ياولد الكيس ملان نوادر وروعه
لو ما السر افدي الباتره خلانا زي الولعه
ماكنا لامين لا عساكر لا بنجيد ليك صنعه
وكان روبن لا يمين لا شمال وقاعد يرعي ...

انهر الطابور يا طالب

عمر علي حسن

الحمد لله أن تفاعل سعادة اللواء عمر على حسن مع ما كتبت فى حق الباترا من مسادير ولا شك أن ملكات سعادة اللواء عمر على حسن متعددة ما شاء الله تبارك الله وقولو ماشاء الله ما تدوهو عين !! ولذلك رأيت أن أواصل حتى يواصل هو وأبدأ بالرد عليه برباعية بل برباعيتين وأواصل للحديث عن النساء فى كلية الشرطة :

الليلة اللواء جاب الشعر أحلاهو
وفى (الباترا) سطّر وأصلو ما جلاهو
صوّب فى (السواده ) وكراع كديس ختاهو
إبداع إبداع يا سيادتك واقفين واقفين بنتحراهو
*************************
ما تطّول غيابك وبالسطور قول لينا
نتابع بى اهتمام وأصلو أصلو ما ملينا
لو تدينا تدينا (صلعه) تلقانا جت بلينا
ولو جرييت لى سطر تلقانا تلقانا إتلميينا
*************************

والان الى عنصر النساء ونبدأ بأول عنصر من النساء دخل كلية الشرطة وهى الاخت محاسن التازى حسب معلومات سعادة اللواء عمر على حسن وأقول :

بدأ بى محاسن بت التازى أول دُفعه
وفى جنس (النساء ) كان عايز عديل لى شُفعه
يقدّم (لا مؤاخذة) وصوتو يجييب يجيييب الخُلعه
ومنو أتعلمن منو أتعلمن وفى الخطوه زادن سُرعه

******************************
ما زهجن من نداهو ولى طابورو برعن وقادن
وحازن إنضباط وفى العمل العمل كييف جادن
أخوات منى زكى فى الحكمة ديمة أفادن
وتركن ذكرى ذكرى طيبة وفى القوانيين سادن

رد الاخ القمندان فيصل عثمان من سويسرا على المسادير التى أرسلتها له رداً على مسادير القمندان عمر على حسن بأن الشغلة أصبحت بين ناس البطانة (بإعتبارى من البطانة ) وناس نهر النيل حيث ينتمى القمندان عمر على حسن لمدينة عطبرة فكتبت هذه الابيات وقلت له :

ما من البطانة ... بس تحيا البطانة تعيش
فى السقاى سكونى وتكنت لوبا عدسى وعيش
أبوى بدأ بالزراعة (جموعى ) وختم رقيب فى الجيش
وسعى البصات (ب ن) الحلفاية ورايق يعرفو (بريش )
معروف بى صلاتو يقطع ديمة ناشف وما بعرف الهبيش *****************************
أتعلمت الشعر من أمى وأنا درفون
وأكتب فى الشعر وزادى كلو شجون
أكتب فيهو ساهل ودايماً علّى يهون
ودايماً فى لقاهو فرحان واكون ممنون
ولى أخوان سلاحى للعشرة دايماً أصون
******************************
مسمى على جدى بشرى عبدالرحمن ولقبو (صغير )
ناظر (خور طقت) بعد النصرى حمزه وأصلو ما متحيّر
حديثو بالانجليزى حديثاَ رصين حديث الطوال ما قصير
فى بلد الانجليز كان ملحق ثقافى وكان ليها نعم مسيّر

سعادة اللواء عمر على حسن أسمح لى أن أكرر طلبى بأن يتواصل أمر المسادير خاصه أنها تصب فى موضوع البوست وهو بطل الفلم (الباترا) فإذا وافقت سيادتك أرجو أن تسمح بهذه الرباعيات وإن لم توافق فلا نحب مخالفة التعليمات .

يا سيد عمر فى الباترا واصل شعرك
والبوست ما أنفتل وإنت زايد فكرك
لمّ الناس وجييب إن شاء الله ما يوم شكرك
ودايماً إنت راقى .. راقى ودايماً صايت ذكرك

************************

كرمو بالشعر وبالقصص وحكاوى
ده الباترا قائد صوتو عالى وعاوى
يجيب فى كلام ما بعرفو حتى الحاوى
بقول الداير يقولو وما يهمو أصلو بلاوى

مسمى على جدى بشرى عبدالرحمن ولقبو (صغير )

علق سعادة اللواء شرطة معاش عمر على حسن فى بوست الباترا التعلمجى الاشهر فى كلية الشرطة علق على هذا البيت بالتحديد وكتب :

Quote: ******************************
مسمى على جدى بشرى عبدالرحمن ولقبو (صغير )
ناظر (خور طقت) بعد النصرى حمزه وأصلو ما متحيّر

له الرحمة والمغفره .. كان الناظر الثالث للمدرسة بعد الراحلين النصري حمزه وعبد الحليم علي طه ..
وقد حضرنا ثلاثتهم الاول ونحن في السنه الاولي والثاني ونحن في السنة الثانيه والثالثه وجدك ونحن في
السنة الرابعه ..

هل تعلم انه ايضا من كبار رجال الهلال ومؤسسيه واقطابه المؤثرين بل وانه الرئيس الثاني لنادي الهلال
بين عامي 1933 و 1934 اتاريك ماك هين !

عمر علي حسن
فقلت للسيد اللواء (وليس القمندان لانه أشتغلنى فيها !!!) هذه الابيات :

والله ما بنهون لو فى راسنا ناس زى دييل
ناس ماسكين فى الإصول وما بعرفو البدييل
نديهم تحية ونترحم عليهم بالنهار النهار والليل
ونجتر ذكرياتم بالخطوة البطيئة وزاد الذكرى أصلو حلييل

الاخ الهميم على سرالختم (تسلم يا الهميم تسلم ويغنن ليك بنات العم !!! ما تقوم تقول داير تعرس !!!) شكراً لك على إيصال مشاركاتى وسرعتك والله أغرتنى بالمشاركة أما كتابات فارس موسى فهذه تحتاج الى أن يجد السير ويشدّ الخطوه ويرفع الرجل زواية قائمة 45 درجة حتى يسلمنى وأولنا محمد الحسن (الباسورد ) وكمان لا أنسى سينيرنا الراقى النور يوسف وتحياتى الشديده له ،كتابات فارس موسى عن المسادير جعلتنى أقطع له أخدر وأقول له وللجمييع :

والله عيد ... فى دفتر أحوالنا المجيد
تحلف تقول ... الاصلى ذاتو وتعليق عقيد
فيهو الطرافة والظرافة ... وبزيد عليهو من القصيد
وأبوحراز المرتضى لو جانا مره ... وادانا من سطرو الفريد
زى (من أنت يا حلم الصبا ؟؟) ويارب يارب تعيد الماضى عيد

*******************************

وبمناسبة سعى الاخ فارس موسى الجاد وهمته فى طىء الفيافى والغفار الامريكية وصولاً لبكرى أبوبكر، ومن قبل رفض قريبة وصديقى المقدم شرطة معاش إدريس السيد عبدالرحمن (درش) أن يتوسط لى !!ولكن أرى أن جهود الاخ فارس ومن قبله جهود وطلبات دفعتى وصديقى على جويلى جاده فأتمنى أن تُكلل الجهود بالنجاح وإلى ذلك الحين أترككم مع هذا المسدار :

لو ألقى (كود )... أكون حضور ويوماتى يوماتى شوت
مره الشعر مره القصص مره المسادير ... المسادير بالرموت
من القديم من الجديد من ذكريات داخل السودان ومن اليمن من حضرموت
من الحكايات القديمة والارشفات من ناس عمر على حسن وتربال معاهو وفريقنا (بوت )

ذكر سعادة اللواء عمر على حسن فى إحدى مداخلاته رداً على محاولتى الاتصال عليه أنه سعيد بهذه المحاوله التى لم تتم فى زمن يفر المرء فيه من أخيه وأمه وبنيه!!! ولكن ما زال فى عزوه الشرطة وخوتها الشىء الجميل !! ومواصله لهذا الجمال ونحن نتحدث عن سيرة الباترا جميل السيرة بواسطة اللواء عمر على حسن الاجمل وصفاً وسيره رأيت أن أرد بمسدارين وأقول :

المتل عمر على حسن منو ما بنّفر
ودايماً عنو نسأل وفى السؤال حانصرّ
نفرح وننبسط لو بى سطورو حروفو يقرّ
عن بوليس زمان وعن الافندى تاج السر

*********************

جييب لينا الحكاوى ومشهدنا بى أفكارك
سردك ما بنملو ما تنسى جييب أشعارك
كلو فيهو مُبّدع قصصك كمان أسفارك
كل من ليك بيعرف ما أوفى كل أخبارك
عن الدفعة أحكى وسوح بينا حول مدارك

e: الباترا .. التعلمجي الاشهر في تاريخ كلية الشرطة (طرائف وصور) (Re: عمر علي حسن)

Quote: ذكر سعادة اللواء عمر على حسن فى إحدى مداخلاته رداً على محاولتى الاتصال عليه أنه سعيد بهذه المحاوله التى لم تتم فى زمن يفر المرء فيه من أخيه وأمه وبنيه!!! ولكن ما زال
فى عزوه الشرطة وخوتها الشىء الجميل !! ومواصله لهذا الجمال ونحن نتحدث عن سيرة الباترا جميل السيرة بواسطة اللواء عمر على حسن الاجمل وصفاً وسيره رأيت أن أرد بمسدارين وأقول :

المتل عمر على حسن منو ما بنّفر
ودايماً عنو نسأل وفى السؤال حانصرّ
نفرح وننبسط لو بى سطورو حروفو يقرّ
عن بوليس زمان وعن الافندى تاج السر

*********************

جييب لينا الحكاوى ومشهدنا بى أفكارك
سردك ما بنملو ما تنسى جييب أشعارك
كلو فيهو مُبّدع قصصك كمان أسفارك
كل من ليك بيعرف ما أوفى كل أخبارك
عن الدفعة أحكى وسوح بينا حول مدارك

أعلاه مشاركة كريمة من الصديق بشرى , وهو رجل معروف عنه البر بالزملاء ومتابعة اخبارهم وتفقدهم وهذه خصلة كريمة تعبر عن أصالة المعدن وحسن التنشئة
كلنا ممنونون لك عزيزى بشرى على هذا الدفق الانسانى .

سعادتو عمر على حسن لى ان أتعشم فى اطلاعنا على البعض من سيرة سعادة اللواء أبو رفاس أحد الأركان الادارية لفريق المريخ وأحسب ان الرجل قد زاملكم فى فترة
من فترات العمل فى قمة الناديين العريقين , اكيد تقديرى وأرجو أن لا أكون قد أثقلت بطلبى هذا .

الاخ فيصل عثمات تحياتى ، كنت قد هاتفت قبل إسبوع الاخ فرح جيلانى(الدفعة 42 وفرح قريبى ) لكى أخبره عن بوست الباترا فوجده مشكل حضور يومى وأعطانى أكثر من ربع ساعة فى مدح سعاده اللواء عمر على حسن عندما عمل معه فى ولاية الخرطوم ، اليوم هاتفى الاخ فرح جيلانى وذكر لى أن لابتوبه تعرض (لفايروس ) حرمه كم يوم ولكن عاد ويقول لى أننى لم أشارك كثيراً إلا بأخر مسادر رائع لسعادة اللواء فقلت له أننى أرهقت الاخ فيصل (بطوابير الذنب فى النقل !!) والان رديت على الاخ بكرى أبوبكر حسب سعى الاخ فارس والاخ على سرالختم مشكورين والاخ كوستاوى وعلى كل حال إذا وصل (الرقم الوطنى حبابو )، أفيدكم أيضاً أننى أخطرت فى المانيا سعادة اللواء شرطة دكتور محمود محمد صالح والاخ عكرمة عبدالقادر الشيخ إدريس أبوهالة الدفعة 42 المتواجد فى مدينة ميونيخ الالمانية لكى يتابعو بوست الباترا التعلمجى الاشهر فى تأريخ كلية الشرطة ، إذا وصل الرقم الوطنى سوف أدخل عدييل تمساح مسادير ومواضيع أخرى والى حين ظهور الرقم الوطنى سوف أجادع بهذه المسادير وأقول :

أسلاك ما تقييف يا ضابط المباحث يا فرح جيلانى
وحالاً عالجو (فايروس ) والبوست جمييل إنسانى
فيهو الذكريات عن الشرطة يارب يارب ترجع تانى
للماضى الجمييل ... زرع الباترا فتّق وكلو كلو معانى
عهد الانضباط عهد الاحترام عهد التضحيات وتفانى

لاشك أن الاخوان فيصل عثمان والاخ على سرالختم محاجين لمسدار كارب أرد لهم دينهم وأتعابهم وإقول لهم :

سريع النهمه فيصل فى نقلو ما بتأخر
جنو على سرالختم فى التانى أصلو محكّر
يردّ وينقل سريع سريع ملكية كان أو عسكر
يا الطاعم الطاعم كلامكم والله سطرو مسكّر
واصلو عينى باردة ويارب يارب شراب من كوثر

الاخوان الاعزاء جميعاً المتابعين لبوست الباترا التعلمجى الاشهر فى تأريخ كلية الشرطة والمشاركيين تحيات طيبات أرسلها لكم وحتى لا يموت البوست ولا يكون سعادة اللواء عمر على حسن وحده يرد هنا وهناك رأيت وبعد أخذ إذنه للمره الثانية والثالثة أن يسمح لى بهذه المسادير والتى لا تبعد عن مضمون البوست كثيراً بل تصب فيه مزيداً من المياه النقية وأحسب ذلك إن شاء الله وقد قلت :

كل يوم زايد سطورو بوست الافندى السرّ
ولسع ماقبضنا من (بكرى ).... كلمة سرّ
يا بكرى أخوى ما بنحمل برد كمان معاهو القِرّ
يا الدكتورة (رحاب خليفة ) عايزين لى كتابنا نفرّ
عايزين نذكر محاسنو نذكر جمايلو وفى الاخرة ليهو نبرّ

******************************
يا رئيس نادى الهلال بزيت لكل أقارنك
أكتب ما تقييف ورُد رُد لى جمييع أخوانك
أكتب فيهو حاضر والاحلى برضو زمانك
يا رب يا كريم يدييك صحة ونعييم تقضيها كل أركانك
نكون فى الحج جمييع أهلك ربعك سلام سلام أحضانك

*******************************
ما دايرين نشوف البوست وقف واتقهقر
دايرنو الرعد فى صوتو صوتو دايماً كركر
عايزين ذكرياتو تبسط تبسط هناك ناس عرعر
والكل ينبسط الكل ينبسط ونشرب جمييع من كوثر

حتى لا يفقد بوست (الباترا التعلمجى الاشهر فى كلية الشرطة ) بريقة سوف أواصل إن شاء الله بالمسادير خاصه أن سعادة اللواء أدانى الاذن اللازم وذلك برده بمسادير قويه وكاربة مما يجعل للمجادعة طعم ونكهه أتمنى أن تتواصل ويشاركنا الجميع التعليق والاضافات وقد قلت :

شايلين ما بنقييف (فى الباترا ) كيف مسدرنا
وهاتفنا الزمالة هاتفنا الزمالة وفى كل محل سدرنا
أدينا الخبر وعمّ وانتشر مع العمرين كمان كمان فكرنا
نقبلو كتاب عديل والدكتورة جاهزة وفى وصفو ما قصرنا
من زمن التُرك من المقرن مناظر (والباترا) الافندى فى محفلنا

***********************************
وهذا المسدار لسعادة اللواء عمر على حسن والذى يستقطع من وقته الغالى ورغم ظروفة التى نعلمها والتى نجهل الكثير عنها يشارك ما شاء الله تبارك الله بكل قوه وحماس وذكريات (صادقة وأمينة) فقلت فيه :

سطرك حالى طاعم منّو ما بنّغب
(الباترا) قال فايت عدييل الطب
من دغُش الصباح واقفين عليهو نشب
واحدين فى الجيوب واحدين ملوهو العب
يا العمرين سلام ليكم جمييع جمييع بنحب

* أخونا عمر عثمان أكيد لابد (فوق رآى ) وأنا أتوقع يكون فوق السماية وعايز يلم الناس دى كلها عشاء فى دار الشرطة ونحنا جاهزين على كل حال وتحياتى لعديلك الدفعة فتح الرحمن عبدالقادر (كردقيلى ) إذا لم أكن مخطىء .

الاخوان الاعزاء ببوست الضابط المناوب والباترا التعلمجى الاشهر فى تأريخ كلية الشرطة بسودانيز أون لاين تحية طيبة ....يا جماعة وييين أخباركم وأنا شغال أنهر فى طابور البوستات بالمسادير والحاله من (غير رقم وطنى !!) والله يا بكرى أبوبكر لو قلت كدى رسلت الرقم الوطنى أمانة ما (أبدّع بدع وأبوّر سلع وصلع !!!وأنا ذاتى مصلّع !! بس لو حبييت أجييب صورة بجيب صورتى بتاعة الثانوى العالى !!!) رأيت أن أديكم هبشه من النوم وأقول :

ويين البوست وناسو زى التقول فى إجازة
ومالم منو بعدو وزى زى المشو فى مفازة
ويين ناس العلوم ناس الكديب والاوديسا والإليازة
ويين الظاهرين بياض زى لونه لونه دييك حرازة

*************************

مالو الناصر ضعف وضُباطنا قلو وفترو
عايزين (صُفاره جررّ) نشوف الجمييع كيف نترو
حليل السودان ونيلو وميدانا ونخيلو وحليل سبيطو ومترو
يا الدكتورة (فتحية) عايزين نشوف عايزين نشوف كيف سفرو
يا (الباترا) ذكراك آلآف جموع صفوف صفوف ليك حضرو

***********************************

ما تغبّو الحضور والقصص وحكاوى
يا ها الفضلت ويا ها لينا لينا تداوى
نحىّ نجوم هلالنا وسيفنا ود مساوى
ونحىّ فيصل عثمان ومريخو نجمو الضاوى

أولاً أعتزر لسعادة اللواء شرطة معاش عمر على حسن أننى ربما (بالمسادير ) قد فتلت البوست رغم أنها كلها تدور حول موضوعنا (الباترا) بل حاولت إيراد الاسم فى أكثر من مسدار ولكن فى هذه المداخله سوف تكون عباره عن مجموعة إستفسارات وإسئلة حوارية .
* الصول الباترا كان المعلم الاول لدفعتكم التى كانت فى عددها (30 ) طالب تساوى بلتون واحد من 6 بلتونات فى دفعتنا الدفعة 46 ولاشك أن الباترا خلال العامين قد حفظكم (صم !!) السؤال من هم مساعدين الباترا من الرتب الاخرى وهل كان هناك شيبة له فى الصرامة والجدية والكلمات المبتكره وحصرية ؟؟؟.
* بعد تخرجكم للعمل فى مواقع الشرطة المختلفة كيف كان تعامل الباترا معكم عندما يصادفكم فى الاقسام أو عند حضوركم أو عمل أحدكم فى الكلية .
* العميد شرطة معاش (جبتها من رأسى ساكت) أحمد ورسمة غالب كان أول دفعتكم وعمل مديراً للكلية وأظن كان الباترا فى رتبة النقيب أو الرائد حدثنا أولاً عن الراحل ورسمة حسب طلبى وطلب أولنا الاخ محمد الحسن حمدنالله ، وهل لك مواقف تذكرها للباترا مع سعادة العميد أحمد ورسمة غالب عليه رحمة الله ؟؟.
*الباترا هل كان يشجع القمة الهلال أو المريخ ؟؟؟ وما علاقته بدخول مباريات كرة القدم أو (الباسكت بور !!!) .
* هل كان الباترا يقضى إجازاته بالخرطوم أو خارجها وهل أرسلته الشرطة لأى مهمة تدربية أو ترفيهية خارج السودان ؟؟؟.
* ما هى قصص الباترا مع الطلبة العرب التى تتذكرها أو سمعت بها !!؟؟.
*الباترا لم نشاهدة يستعمل عربات الشرطة لماذا ؟؟!! كان عندو بوكس خاص ملاكى .
*حسب علمك ما هوأكبر تكريم ناله الباترا وأنت كنت حضوراً لذلك التكريم أو سمعت به ؟؟.
* هل الباترا يحب أن ينافسه تعلمجى أخر فى عمله ؟؟؟.
* ماذا عندما يغييب الباترا عن الطابور بسبب المرض أو الاجازة من هو بديله وماذا كان يقول لكم بعد عودته ؟؟؟.
* الاخ اللواء شرطة معاش عمر على حسن بجييك راجع تانى بس جاوب الكمية دى ولك تحياتى وإن شاء الله ما أكون كترت عليك .
* وهل كان يتعامل مع التعلمجية بنفس طريقته مع التعامل مع الطلبة ؟؟؟.

أخوانى المتابعين لبوستى بإسم عندما طلب منى الاخ على جويلى المشاركة فى بوست الباترا وتحديداً فى منتدى السقاى فقط الذى كتبت فيه الاسئلة أعلاه .... لقد جاوب سعادة اللواء شرطة معاش عمر على حسن كل هذه الاسئلة ولكن أمانة الحقوق والملكية الفكرية تمنعنى من نقل الاجابات الى المنتدى فإذا أردتم الذهاب الى البوست الاصل فى سودانيزأون لاين فلكم الخيار وسوف أوافيكم بالرابط وخوفى أن تربطوا هناك وتتركوا منتدى السقاى الاصلو أساساً غير بشرى مبارك ما بكتبت فيهو زووول !!!.
والله أخوانى الكرام جاوب سعادة اللواء شرطة معاش عمر على حسن بطريقة لو كنت مكان الاخ بكرى أبوبكر لمنحت أى ضابط شرطة (الرقم الوطنى ) حسب ما يسمية الاخ فارس موسى لحلاوة الردود وإيقاعها اللامحدود والتى تبدأ بالبنود بنداً بنداً وسرداً سرداً فواصل وسوف أواصل فى الاسئلة .
* أولاً كنت شايل هم من المسادير وطالما كانت فى المطلوب فسوف تكون مداخلاتى (مره كده ومره كده ) على وزن قصه المطربة السودانية المشهورة فى القاهرة (ستونه) أجرت معها الفضائية المصرية حوار فكان أول سؤال من صاحبة الحوار تسأل المطربة ستونه عما إذا كانت (مدام أم مُزمزيل ؟؟!!) فلم تفهم السؤال جيداً وأحتارت !!!! ولكن قررت أن تخبط ليها إجابة قدرت أنها (ذكية ولماحه !!) فقالت لها والله مره كده ومره كده (والنكته ذكرها حسن أبشر الطيب) فى سهرة تلفزيونية سودانية قبل عشر سنوات تقريباً .
* كان هناك ثلاثة طلبة من أبناء الجنوب على ما أعتقد لماذا (أتلّح ) الباترا الطالب (رووبننن!!!) دون أخوانه وهل للباقيين قصص مثيرة من الباترا ؟؟؟؟.
*يبدو أن الطالب كمال حسن أحمد كان مثل زميلنا الطالب حسين أمين التنى كثير الكلام مع التعلمجية هل كان الباترا يجازية كثيراً ؟؟؟ .
*أذكر لنا منتخب كره القدم بتاعكم فى دفعتكم وهل كنت من النجوم ؟؟ وهل لعبتم ضد الكلية الحربية وماهى المناشط التى كانت متاحه لكم خلاف كره القدم والباسكت بور !!!وكم كانت دفعة الكلية الحربية الموازية لكم عدداً ومن هم أشهرهم الذين عاصروكم هم طلبة وأنتم كذلك؟؟؟؟ .
* ما علاقة الرئيس الاسبق جعفر نميرى بكم وأنتم طلبة وعندما درسكم فى أى رتبة كان وما الذى لفت إنتباهكم ؟؟؟ .
*هل كان الطلبة من أبناء الاقليم الجنوبى يتابعون المحاضرات بالعربى أم باللغة الانجليزية حال بعضهم فى دفعتنا !!والذين للأسف لم ينجح بعضهم فى القانون لا بالعربى ولا بالانجليزى وأتذكر أن الطالب عزالدين عبدالمحمود كان يداعب الطالب مجوك يقول ليهو والله يا مجوك لو أمتحنت (بالدينكاوى تسقط !!!) .
*صف لنا يا سعادتك شعورك وأنت تخرج الى أهللك بعد الثلاثة شهور الاولى ؟؟؟.
* أعلم أن معاشنا (معاش التابة واليابة !!) وما عندو شبيه إلا (رقصة كاديابا بتاع مازيمبى !!) التى وصفها مزمل أبوالقاسم فى كبد الحقيقة لكى يقيظنا نحن أهل الهلال بعد الهزيمة التأريخية من مازيمبى فى عقر دارنا بخماسية مقابل هدفين فذكر (أن رقصة كاديابا رقصة التابة واليابة !!) وضحكت صراحة على تعليق حرمكم حتى بكيت لأن زوجتى لم تتاح لها فرصه إستلام معاشى لأننى وهبته للوالده منذ 20 عاماً والحمد لله !! وبما أن زوجتى (رباطابية والحمد لله ) كانت عملت فيهو مسدار عديييل !!!.
* أتركك سعادة اللواء عافيه الى المداخله القادمة وأرجو أن تعطينى الاذن بأن تكون مسادير .

بعد أن أعطانى سعادة اللواء شرطة معاش عمر على حسن (الاوكى ) للمسادير عن موضوعنا فأواصل ليكون الدور هذه المره للمسادير وحسب ما ذكرت لكم مره كده ومره كده والان كده للمسادير فأقول :

أديتنى الإذن وسطرى ما بتأخّر
(فى الباترا) داك أوصافو قوة عنّتر
فى الطابور يقودو تقول عدييل عدييل بتبخّتر
ما بحب الخمج ما بحب الخمج والكاكى فيهو مسطّر

**************************
فى علم البيادة والسلاح حافظو وفيهو معلّم
ما بحب المياته وما تجيهو يوم يوم متظلّم
لو قلّت هممكم تشوفو كيف تشوفو كيف متألّم
ولو أحرزتو درجات يجييك يجييك هاش ويسلّم

نواصل مع سعادة اللواء عمر على حسن فى حوار الباترا ونقول :

* هل كان كورس النفر فى السنة الاولى فى ولاية الخرطوم وكورس الرقيب المناوب فى دفعتكم فى الاقاليم وحدثنا عن ذكريات هذه الكورسات !!وأوعه يكون أدووكم صلعه مثلما أدونا الملازميين أوائل (الدفعة 37 بقيادة على عبدالله وعوض وداعة وسيف النصر ) عند سفرنا الاقاليم لكورس الرقيب المناوب والله العظيم لحقو بعضنا فى محطات السكة حديد خارج المحطة الرئيسية وكان معاهم الحلاق حلقو لبعض الطلبة الذين زاغو من الصلعة الجماعية للدفعة داخل القطر !!! .
*بذكرك فقرة ذهابكم الى تمرين الهلال مع أخوانك يتضح أنك كنت أساسى فى تيم كره القدم نريد المزيد من الذكريات والمباريات ؟؟؟.
*حدثنا عن علاقتكم ببعضكم البعض بعد إنتهاء العمل الرسمى من تدريب ومحاضرات .

الاخوان الاعزاء ببوست الباترا التعلمجى الاشهر فى تأريخ كلية الشرطة سلام ولاشك أننا من (المتاوقة ) قربنا نعمى !!والمشاركات التى أرسلتها لعلى سرالختم وصلت رقم لا أريد أذكره بس بقولو الغائب عذرو معه !!ويا فارس إنت بمبانك ده يا أخوى (فشنك والله شنو ) والله لانفع البمبان ولا الايميلات الى أرسلناها لصاحبك بكرى أبوبكر لذلك زوّد العيار حبات كثيرة لعله يصيب ونحصل على الرقم الوطنى ونرتاح من (المناوله !!!) .
كنت من ضمن المواضيع الغائبة قد سألت سعاده اللواء أكثر من سؤال ولا أريد أن أكرر الاسئلة ربما ظهر الاخ على سرالختم وفكّ كل المشاركات مساديرها ومشاويرها ولكن أطلب من سعادة اللواء شرطة معاش عمر على حسن أن يكتب لنا عن سيرته الذاتية بإسهاب .

فى مداخله للأخ فارس موسى قال فيها أن لم يتأخر من التمام اليومى للبوست ولكن مثلك يا ضابط يا صاحب الرقم الوطنى (المتاوقة ما فينا!!) من غير مشاركة فقلت له وللجمييع :

يا فارس تمامك أديهو سطرين زيدو
وما تاوق تفوت والبوست تسيبو لسيدو
يكتب ما مقصّر زى التقول يوم يوم عيدو
ورينى منو الفينا قدرو أو قرييب هو نديدو
عينى عينى عليهو بارده لو أدانا منو منو قصيدو

الاخوان الاعزاء الزملاء رفقاء السلاح سعادة اللواء شرطة معاش عمر على حسن والاخ النقيب شرطة معاش عمر عثمان تحياتى وأقول لكم وللجميع رمضان كريم تصوموا وتفطروا على خير .
والله العظيم الواحد خجلان عدييل من التقصير أولاً البوست (طفش منى !!) وبدل ما أجتهد أنشغلت بالسوق قبل رمضان أصلو الموسم عندنا كان مسخن جرى من الصباح حتى أنصاص الليالى والحمد لله !! هاتف سعادة اللواء الارضى لا يرد وقلت أديهو فرصه حتى مساء اليوم وأهبش الموبايل بالقروش ( أصلو الارضى عندى شبة ملح عقد داخلى مع شركة BT الانجليزية الام والتى تعادل زين فى السودان) وبالامس حاولت الى أن عثرت على ضالتى وبالفرحة (فرحة التخريخ وهوشة أحمد ورسمة غالب عليه رحمة الله ) كتبت ثلاثة مسادير فيها واحد خماسى وأتنين رباعيات وسوف تجدونها إن شاء الله بينكم ، نترحم على جمييع موتانا ونخص بالترحم الضابط الفذ تاج السر محمد حامد الباترا موضوع بوستنا الذى وصل بحمد الله حسب سطور سعادة اللواء عمر على حسن الاخيرة الى نهايته وبصدد إختيار شخصية شرطية جديدة نترك الامر فيها لسعادة اللواء عمر على حسن ونحنا علينا تنفيذ التعليمات .
الان أسمحوا لى قبل أن أكتب مساديرى أن أخاطب الاخ فارس موسى وأحيّة وأقول له يا أخى صاحبك بكرى أبوبكر ده ما كمّل فهمنا لا أريد أن أتحدث عن نفسى ولكن إرسال (رقم وطنى لى مكسب كبير له وليس لى ) وأنا لو أدونى الرقم الوطنى والله ما بقصّر إن شاء الله والموية تكضب الغطاس ، تحياتى أخى بكرى أبوبكر وفى الانتظار .
والان مع المسادير :

كيفن ما بنهوش نهوش من القصص وحكاوى
أحمد ورسمة أحسن للقيادة ودايماً مرتب وكاوى
وراهو عدييل إسود إسود وقانون معاهو فتاوى
الباترا الباترا ما برمش مع الطابور ومره يلاوى
لو قصرّت مره تسمع منو تسمع منو العجب وبلاوى
***************************

التخريج بديع وعبود رئيسنا اتكشّم
والباترا فرحان داير عدييل يتقسّم
حىّ تحية كاربة وكلامو ماهو ملعثم
خرّج دفعة كاربة ودايماً تشوفو منظّم
*****************************

نختم للحديث وحديثك يا عمر ما نملُو
لو كان بى مرادنا ما نفوتو أصلو نخلُو
نشوف قامة جديدة وقاماتنا ديمة تجلُو
كيف حفظوا البلاد وللحديد كيف كيف فلّو

يا سلام يا على جويلى ذكريات ، سوف انقلها قروووب الدفعة

» مأساه بيئية سببها مصفاة الجيلى ..... حرق الغاز !!! نقلاً من سودانيز أون لاين
» أهلــي الــســقاي
» إضراب المعلميين فى برمنجهام وأدونا إجازه بعد الواحده لكى نشارك ولم أشارك
» ربما أشارك فى الملتقى الثانى للاعلاميين السودانين العاملين بالخارج فى السودان
» توفى الى رحمة مولاة الاخ الطيب محمد أحمد والد الاخ هشام الطيب فله الرحمة