الفساد فى الشرطة والفاتح جبرا ورد من بشرى مبارك نقلاً من منتدى العيلفون

الفساد فى الشرطه الفاتح جبرا

--------------------------------------------------------------------------------

عزيزى القارئ : بتاريخ 23 يناير 2010م كتبت مقالاً بعنوان (بدون أورنيك ذاتو) تحدثت فيه عن توجه ولدنا (عبدو) إلى أحد مراكز السجل المدنى لإستخراج شهادة (بدل قيد) إذ يعتزم إستخراج شهادة تسنين للتقديم بها إلى وظيفة بعد أن جلس على (دكة العطالة) لسنوات طوال منذ تخرجه ، لاحظ (عبدو) وهو لا يزال فى الصف ينتظر دفع الرسوم (المكتوبة على الإيصال) والبالغ قدرها (عشرون جنيهاً) أن (الناس بتدفع) ثلاثين جنيهاً وقد رفض (عبدو) أن يقوم بدفع الثلاثين ما لم يتم إعطاؤه أيصال بثلاثين جنيه وعندما أحس (جنابو) بأن (عبدو زول حقانى) طلب منه الدخول (لى جوة) حيث أفهموه بأن (العشرة جنيه الزيادة) دى تعتبر (دعم) ولابد من دفعها كما درج بقية المواطنين على دفعها (بالتى هى أحسن) وأحسن ليهو يدفعا (وما يعمل فيها تفتيحة) عشان أمورو تمشى وكده !!
بعد نشر المقال إتصل بي بى الأخ المقدم (محمد زين) من قوات الشرطة طالباً (الدليل) فبعثت له ببطل القصة والشاهد العيان (ولدنا عبدو) الذى تم التحرى معه وذكرلهم كل صغيرة وكبيرة تتعلق بصحة الأمر فعاد الأخ المقدم للإتصال بى موضحاً بأن هنالك تحقيقاً سوف يجرى فى المسالة وسوف يتم إخطارى بما يسفر عنه … ولما تأخرت نتيجة التحقيق قمت بكتابة مقال آخر حول الموضوع بعنوان (نسال منو تاني) نستفسر فيه عن نتيجة التحقيق .. ولكن لا حياة لمن تنادى ولم يحرك إخواننا في الشرطة ساكنا ليعلمونا بالنتيجة !
لأن العبد لله (زول على نياتو) إعتقد بإنو (الشرطة) لما عرف عنها من (ضبط وربط) قد قامت بإيقاف تلك التجاوزات ومحاسبة من يقوم بها لكن إتضح مؤخراً وبالصدفة أنو القصة ماشة عال العال وفل الفل .. القروش البتدفعا حاجة والبكتبوها ليك على الإيصال حاجة تانية (ناقصة طبعن) ! ولا زالت هذه الممارسات غير القانونية تمارس عيني عينك (ما شرطة وكده) ! وهاكم الدليل (تااااني)
المكان : مكتب جوازات بحري
الزمان : قبل عدة أيام
المعاملة : تجديد جواز مواطن
الرسوم المكتوبة على الإعلان : 96 جنيه
الرسوم التى طلبها المحاسب : 98 جنيه
المواطن : طيب الإتين جنيه الإضافية دي شنو؟
الموظف : دي دمغات
المواطن : طيب ليه ما تكتبوها في الإيصال !
الموظف : دي رسوم براها !
(بعد تسلم الإيصال يتضح للمواطن بأن قيمته ليست 96 جنيها ولكن 84 جنيهاً فيعود ليسأل الموظف)…!!!
المواطن : طيب الجنيهين بتاعين الدمغة خليناهم .. هسه القروش الأديتك ليها دي ناقصة 12 جنيه تاني
الموظف : في رسوم عشرة ألف بتاعت غلاف ودمغة تاااني 2 جنيه
المواطن : طيب انا الغلاف ده ما عاوزو
الموظف : أي معاملة بدون غلاف لا ينظر فيها
المواطن : طيب ليه ما إتضمنت قروش الغلاف والدمغات دي في الإيصال ؟
الموظف : دي رسوم براها !

السيد مدير عام الشرطة :
إذا كنا نعول على (الشرطة) أن تحمى المواطن من أى (جبايات) غير قانونية (معقول) تقوم (الشرطة ذااااتا) بهذا التحصيل غير القانونى لهذه الأموال والتى من الواضح أنها لا تورد في خزينة الدولة (ح تورد كيف و إذاى يعنى؟ وبواسطة ياتو مستندات ؟)
لقد ساءني جداً كمواطن أن أنبه إخواننا في قيادة الشرطة (قبل عامين ونص) إلى هذه التجاوزات فيتم الرد بان هنالك تحقيق في الأمر لأفاجأ بأن (القصة مستمرة) وإنو المسألة (ماشة) رغم عدم قانونيتها ومخالفتها للقواعد المالية !
عزيزي القارئ :
• تري لماذا تمادت الشرطة في ممارسة هذا السلوك الغير قانوني على الرغم من تنبيهنا السابق لها؟
• ما هي نتيجة التحقيق في قصة (ولدنا عبدو) التي اشرنا إليها قبل حوالى عامين ونصف ؟
• ما سر هذه الرسوم التي تتحصل دون إيصال؟ وأين تذهب؟
• لمن تتبع هذه الدمغات وهذا (الغلاف الإجباري) أبو عشرة(ألف) !
كل هذه الأسئلة سوف يقوم بالرد عليها أخواننا في (المكتب الصحفي للشرطة) قبل أن تصبح (كسرة ثابتة) وكده !
كسرة :
إذا كان تحصيل أي مبالغ من المواطنين بأي اورنيك غير أورنيك 15 يعد جنحة يجب ابلاغ الشرطة عن مرتكبها .. أها هسه في الحالة دي نحنا نبلغ لي منو يعنى ؟
كسرة ثابتة :
أخبار خط هيثرو شنو(ووووو) ؟

غايتو نحنا فى زمنا أنا كنت بركب وأمشى المنطقة الصناعية (أشحد الادوات المكتبية التى نحتاج لها فى قسم شرطة كوبر لان رئاسة الشرطة ما عندها !!!!).
ولكن منذ أن أطلق الراحل المشير الزبير محمد صالح عليه رحمة الله فى العام 1994م تقريباً (وبحسن نيته المعروف به ) أطلق عباره لناس الشرطة عندما كان وزيراً للداخلية وقال لهم (ماتتصرفو وأى زول مخالف فى الشارع تدفعوا إيصال !!) .
قالوا كدى ناس الشرطة قبلو على المواطن الغلبان ولا إستثاء حتى لزميل الشرطة وفى إجازاتى دفعت كم إيصال وعندما أقول لهم هذه سيارتى الخاصه وإنا الان فى طريقى الى الترخيص وأستخرج بطاقة رائد شرطة بالمعاش يقول لى الضابط يا جنابو والله الاورنيك خلاص طلعتو ما بقدر أرجعو إلا أدفعو من جيبى !! وأقوم بدفعه !!!.
الشرطة فى المكاتب الاخرى أبتكرت الارانيك والدفاتر والملفات مدفوعة القيمة وبحكم أن فى يدها الخدمات الى يحتاج لها المواطن تجد المواطن يقوم بالدفع .
الايجابيات فى هذا الامر وللأمانة نقولها تحسنت مرافق الشرطة وخدمات الشرطة من سيارات ومكاتب وأدوات مكتبية ووجود للشرطة على الشارع أقله (ناس المرور وحملاتهم التى لاتتوقف ) والتى أرى أن الكثير منها غير قانونية وهى (جبايات ليس إلا ) .
إذا أردنا أن نقارن بالوحدات غير الشرطية فهذا الامر موجود فى كل القطاعات الخدمية فى السودان .
أضرب لكم مثال عملت فى جوازات مطار الخرطوم منذ 1982م وكنت أخدم كل أقاربى من المغتربين وغيرهم أركب سيارتى وأذهب من غير قرش ولا تعريفة حتى أننى مرات الرسوم الرسمية أدفعها من جيبى وبالمقابل كل زميل يخدمنى لابد أن أخدمه عندما يحضر المطار فى حجز للسفر أو فى تاشيرة لا يصدقها إلا رئيس القسم أو فى مجامله مع ناس الجمارك وتعلمون كل ذلك !! الان كل هذا أصبح (برسوم إما تذهب لمكاتب الوكالات ) أو أن الشرطة أستحدثت أسياليب مثل التى ذكرها الاخ الفاتح جبرا .
لو كنت مكان المكتب الصحفى لكتبت مثل هذا الرد ولا أرى فيه عييب لأن المواجهة بالحقائق ربما كانت لدى السودانيين (أحسن من الزوغه بالدو ) .
الشىء الذى أود أن أقوله أن الشرطة أو قسم الشرطة أو رئيس القسم يحتاج الى مصاريف لتسير القسم منها على سبيل المثال الاكراميات للضيوف وكنت عندما يكثروا الضيوف أستعين بالاخ نائب الدائرة وأخطره مثلاً بأن مدير شرطة الولاية أو شرطة بحرى فى زياراتنا ويقوم بالاكرام اللازم مشكوراً ( إكراماً يليق بأهل العيلفون لاننى كنت فقط أستطيع أن أكرمهم بشاى مصلح من يد المدام !!) ويحدث كثيراً فى الزيارات المفاجئة وبحمد الله كانت مستوره .
لا أعتقد أن مبالغ التصديق للحفلات تذهب لجييب رئيس القسم فالمصاريف التى يحتاجها القسم يتم تدبيرها من هذه الرسوم ( إنتو كمان دايرين تهججوا مجان !! على العموم لو الفنان كان مجان سوف أكتب لرئيس القسم بأن يعفييكم من الرسوم ويا محمد عبدالمطلب إنت قاعد تكتل الحفلات والله زوول مديح !! أكان زوول مديح من الليلة بقول لى رئيس القسم المديح زاتو بى رسوم !!!!!آها الرآى شنو !!! غير نزيد البترول والدهب ونسأل الله أن يرزقنا ونتقى الله فى أرزاقنا وأقوالنا وأفعالنا ونعبد الله حق عبادته يرزقنا كما يرزق الطير تغدو خماصاً وتعود بطاناً .
فى السعودية التى نتنج 10 مليون برميل هناك نظام المعقب وأحمد الحبر وأبومازن وجماعتو يدفعو للمعقب الشى الفلانى (بغم ما بقولوها !!! بس هنا فى السودان فالحين فى الفصاحه والفتاوى الماها صاحه !!!!).
يا محمد عبدالمطلب أها ردّ عليك ضابط شرطة (زووول نصيحة زى الطريفى وكان رئيس قسم فى العيلفون نفسها وعارف البير وغطاها بس ما حضرت زمن الزبير محمد صالح وكنت بكون زى وزى أخوانى طالما (مرطب ) !! والله رجعت بعد 1999م وتحديداً 2003م لقيت مكاتب الشرطة فى السودان زى الشرطة فى المانيا !! بس ماتقوم به الشرطة فى المانيا يساوى مليون مره ما تقوم به الشرطة فى السودان وهم للأمانة( أقصد الالمان النصارى ) مخلصين وجادين فى عملهم ونحن غير ذلك فى السودان فى كل القطاعات من الرئيس مروراً بالوزير والوالى الى أن تصل الخفير .
يا جماعة ردى ده مرات فيهو (هترشه ) زى هترشه الفاتح جبرا فأرجو أن تميزوا فيه بين الجد والهظار وهذه طريقتى فى الرد لا أريد أن يكون جافاً صلباً .
الاخ عبدالعظيم الفكى الرد الطويل ده كلو ليك انت !!!أها بعد ردى ده إن شاء الله عرفت أين أقع من الاعراب !!!؟؟ .
لكن زى ما قلت ليك لو بقيت موجود بكون زى صاحبى اللواء شرطة الصديق عثمان حتى أصل رتبة اللواء شرطة أعمل وألبد وأنفّذ التعليمات !!! كمان نحنا (ملكية ) نحنا ما شرطة يا ناس الشرطة نسيتوها الشرطة تبقى شرطة الى أن يرث الله الارض وما عليها ولكن إذا أنصلح ما فوق الشرطة (وزارة المالية وما فوق الوزاره الرئيس ونائبة والوزراء سوف ينصلح حال الشرطة لانها أيضاً تتلقى التعليمات .
آها أنا راجييكم تعلقو وأرد على تعليقاتكم وأبقى يا محمد عبدالمطلب جاهز أنا من أسع برجع بالليل كتّر سطورك وجييب مدخورك ونشوف فرحك وسرورك إن شاء الله وطالما أنت موجود فمنتدى العيلفون وأهل العيلفون إن شاء الله بخير والى لقاء ومن بيبرمنجهام سلام والمطره صابه والغيمة كابه .

» مسادير فى الهلال من منتدى العيلفون بمشاركة بشرى مبارك إدريس
» هجليج السر والعلن ورد على بعض الاخوان من منتدى العيلفون بشرى مبارك
» نقلاً من منتدى ودبهاى والاخ مبارك أبراهيم الامين عن بشرى مبارك إدريس
» بشرى مبارك نقلاً من منتدى ودبهاى
» الشرطة ورغم الشاسى والفاتح جبرا من الرآى العام