بشرى مبارك
عدد المساهمات : 7557
تاريخ التسجيل : 19/02/2009
العمر : 65
الموقع : أقيم فى بيريطانيا مدينة بيرمنجهام
 |  موضوع: الفاتح جبرا والبطارية نزلت نقلاً من الرآى العام السودانية  الأربعاء 25 أغسطس - 23:51 | |
| الى منزل صديقى (مأمون) أحمد له السلامة لنجاته من حادث وهو يقود عربته بالقرب من مستشفى أم درمان ، قلت له وأنا أنظر للجهة اليسرى من العربة التى تهشمت تماماً :
- ياخى والله ده حادث كبير .. الحمدلله ربنا شاف ليك وما جاتك حاجه.
قال لى وهو يبتسم ... والله أنا ما غايظنى الحادث بقدر ما غايظنى شئ تانى حصل مع الحادث،
وبدأ يحكى لى :
العربية العملت معاى الحادث دى عربية بتتبع لإحدى الجهات النظامية .. وأول ما الحادث حصل الناس إتلمت كعادة السودانيين .. واحد من الناس خاطب سائق العربة وقال ليهو يا زول إنتا غلطان .. إلا أن أحد الأشخاص (الواقفين)
إنبرى لهذه الشخص ,وخاطبه بلهجة حازمة قائلاً :
- أسكت يا زول .. ما تتدخل فى الموضوع ده.
ولم يكتف هذا الشخص بردع ذلك المواطن بل عندما أراد أحد الجنود الذين كانو بالعربة التحدث امره أيضاً بالسكوت.
يواصل صديقى مأمون قائلاً :
جاءت عربة المرور وقاموا برسم الحادث وطلبوا منا أن نذهب إلى القسم إلى أن سائق العربة (الجهة نظامية) قال بأن لديه مشواراً قريباً هاماً سيذهب له وسوف يلحق بنا فى قسم المرور ، وقد لفت نظرى حينها أن ذلك الشاب ذا اللهجة الحادة قد ركب معهم فى العربة .
ذهبت إلى القسم منتظراً حضور العربة وبينما أنا كذلك دخل إلى القسم ذلك الشاب ذو اللهجة الحادة فقمت على الفور بسؤاله :
- الجماعة ديل وين؟
- قاعدين ينزلو ليهم فى حاجات فى بيت اللواء فلان وح يجو هسه ... إنتا عربيتك مأمنة؟
- أيوه مأمنة تأمين شامل.
- خلاس أنا أمشى أخلى العسكرى المسئول من تقارير الحوادث يجى يعمل التقرير ويمشينا بى سرعة.
يواصل صديقى (مأمون) :
دخل ذلك الشاب إلى مكتب التقارير ومكث بعض الوقت ثم جاءنى فسألته عن تأخر (العربة) قال لى :
- الناس ديل ما مفروض يتأخروا عشان بيت اللواء فلان ده قريب بى جاى .. كدى خلينى أتصل فيهم أشوفهم تأخروا ليه.
- (وهو يمسك بالموبايل والمكرفون مفتوح ) :
- أيوه معاك الملازم ياسر.
- أيوه سعادتك.
- مالكم إتأخرتواأنا منتظركم فى قسم المرور.
- خلاس قربنا ننتهى سعادتك.
- يلا تعالوا بى سرعة عشان أنهى ليكم الموضوع ده.
بعد دقائق .. أخرج الموبايل أيضاً ليتصل لكنه أعاده إلى جيبه ومد لى يده قائلاً :
- لو سمحت يا أستاذ موبايلك أكلم ناس البيت الظاهر (بطاريته نزلت)
يواصل مأمون :
أديتو الموبايل .. إبتعد قليلا وهو يتحدث بيديه فى عصبية ... متجها نحو باب القسم ... إنشغلت عنه بعض الشئ ولما لم يعد للقسم خرجت إلى الشارع ... وفص ملح وذاب !!
بعد قليل حضرت عربة القوات النظامية .. سألت أفرادها :
- يا جماعة الملازم ياسر الكان راكب معاكم ده جاء هنا ومشى يكون راح وين؟
- ملازم شنو ؟ تقصد الشاب الركب معانا العربية من مكان الحادث.
- أيوة !
- ده قال لينا يا جماعة وصلونى قدام معاكم !!
إنتهت (البطارية نزلت) بتاعت أخونا (مأمون) وتعالو معى إلى بطارية نزلت من نوع آخر فقد حكى لى صديقى (مصطفى) وهو يعمل مسئولا عن إدارة أحد المطاعم الخرطومية الخمسة نجوم بان أحد المضيفين قد أخبره بان هنالك فتاة تجلس وحيدة لأكثر من ساعة والدموع تنهمر من عينيها ، يقول (مصطفى) بانه قد نزل من مكتبه إلى صالة الطعام حيث وجد الفتاة تنتحب بالفعل ، عرفها بنفسه وطلب منها أن تهدأ وأخبرها بأن المشكلة لو فى (الحساب) فإدارة المطعم تتنازل عنه .. إلا أن الفتاة إزداد نحيبها فطلب منها الخروج من الصالة حتى لا تلفت الأنظار وعندما خرجت وكفكفت دموعها أخبرته بالقصة :
أنا خريجه ليا ستة سنين وبكوس لى شغل وما لاقية .. لقيت فى جريدة إعلانية إعلان عن وظيفة بى نفس المؤهلات بتاعتى .. إتصلتا عليهم رد عليا المدير وقال ليا تعالى نعمل ليكى إنترفيو وجيبى معاكى السى فى بتاعك وشهاداتك الأصلية ، قلتا ليهو الشركة وين ؟ قام قال ليا (جوار المطعم الفلانى) ممكن تنتظرى هناك أنا ح ابعت ليك موظفة تجيبك ، أها لمن جيت فى المواعيد ووقفت جانى زول لابس بدلة وكرافته وشايل ليهو ملفات وأوراق وبعد ما سلم عليا عرفنى بى نفسو وطوالى قام قال ليا :
- لو ممكن بس نشرب لينا حاجة فى المطعم وبعدين نمشى الشركة وهى فى الشارع التانى
.. طلب عصير ومشويات ومعجنات وحاجات كتيرة .. وكان كل مرة يمسك بالموبايل ويقول كلام كبار كبار .. الشيكات .. البنوك ... العطاء .. وفجأة بيتكلم ليهو فى محادثة قام دخل الموبايل فى جيبو وقال ليا لو سمحتى أدينى موبايلك (البطارية نزلت) .. قمت أديتو ليهو .. قعد يتكلم ويأشر بى أيدينو .. ورجع شال الورق الكان شايلو قعد يقلب فيهو ويتكلم وهو ماشى لمن فتح الباب وطلع ! (وهى تجهش بالبكاء) والله يا أستاذ أنا ما حارقنى الموبايل ولا الأكل الطلبو الزول ده ... أنا حارقانى الوظيفة الأملتا فيها !!
كسرة:
تحذير : مافى زول يقول ليك (البطارية نزلت) تديهو موبايلك ! | |
|
بشرى مبارك
عدد المساهمات : 7557
تاريخ التسجيل : 19/02/2009
العمر : 65
الموقع : أقيم فى بيريطانيا مدينة بيرمنجهام
| | موضوع: رد: الفاتح جبرا والبطارية نزلت نقلاً من الرآى العام السودانية الخميس 26 أغسطس - 12:45 | |
| أضف تعليقك طباعة الموضوع أرسل الموضوع
(قراءة: تعليق: 12 طباعة: إرسال: )
التعليقات
--------------------------------------------------------------------------------
1/ خالد فارس - (السعودية) - 25/8/2010
والله ياستاذ جبرة انا من زمان ناس البدل والكرفتات والناس الكلامن كتير وكبار كبار اصلو ما بصدقهم0مش كان بطاريتو نزلت 0
--------------------------------------------------------------------------------
2/ طارق - (المانيا) - 25/8/2010
اخي الفاتح حياك الله نعم اولاد الحرام ما خلوا لاولاد الحلال حاجة. لكن الخطير في الامر اننا بهذه الطريقة قضينا و نقضي على الشهامة التي عرفنا بها ... الحل: خليك اذكي و قول ليه كدي وريني
--------------------------------------------------------------------------------
3/ ابو القاسم احمد يوسف - (القلقالة) - 25/8/2010
عبدالمنعم ودالشواطين كما ينادونه اهل القريه قام بزياره احد اقربائه بمستشفى الخرطوم وعند دخوله رن هاتفه وبصوته الجهور كيفك يامير وين انت انا الليله اى جيت الخرتوم علا راجع هدا دربى وفى اثناء حواره مع امير وقف امامه شاب ظريف كيف ياحاج بالله ده امير يا سلام عليك الله ادينى ليهو وقام عبدالمنعم بتسليمه الهاتف وذهب به بعيدا وغاب الشاب وسط الزحمه
--------------------------------------------------------------------------------
4/ صفوت الحارث المحامي - (السعودية ) - 25/8/2010
يا دكتور الناس لاقيه تأكل تقول لي موبايلك ناس الموبايل ديل ما كده.............
--------------------------------------------------------------------------------
5/ احمد عبد الباري - (KSA) - 25/8/2010
ما الذي يجعل أي شخص يتجشم هذا العناء والشقاء لكي يظفر في الأخير بوجبة وموبايل أو موبايل فقط؟ كنا مجموعة من الأصدقاء الشباب في مدينة الرياض نحمل مختلف التخصصات. كنا أحد افراد الشلة خريج - جيولوجيا- أحرصنا جميعا على سرعة العمل لذا قررنا عمل مقلب دولي فيه. اتصل صديقنا مهندس المساحة على خال خريج الجيولوجيا وقال له: قيل لي أن ابن اختك يحمل مؤهلا جامعيا في الجيولوجيا، وأنا رجل اعمال سعودي ولدي شركة تعمل في حفر الآبار وأود أن اوظفه حالا، لذا لابد أن تأتوا لتقابلوني. فرد الخال أين نقابلك؟ فقال له تقابلوني في (دوار الإحساء). سأل الخال وكيف تعرفنا ونعرفك؟ فرد السعودي المتنكر احملوا في ايديكم ورودا حمراء وانتظروني. ظل صاحبنا وخاله يحملان الورود الحمراء لما يقرب الساعتين. أخيرا قررا الرجوع. اعترف لهم مهندس المساحة بتدبير المقلب إلا أنهم غضبوا منه غضبا شديد وقاطعوة مدة من الزمن ثم رجعوا إلى حالة الصفاء مرة. لقد كان مقلبا مُراً لم يزل يضحكنا رغم مرور ..سنة عليه.
--------------------------------------------------------------------------------
6/ عبدالله الفاضل - (الجزيرة - العيكووورة) - 25/8/2010
اصبحت البطاريات نازلة والقيم والمبادئ نازلة والرجولة والشهامة نازلة والكرم والنخوة والرجالة نازلة والكورة وكل الالعاب عندنا نازلة ( بدليل تعادل منتخب الشباب السوداني مع الصومالي تخيلوا ) والاغاني بقت عندنا نازلة وهابطة والقنوات الفضائية بقت عندنا نازلة وكلها غناء ودعايات, والمطرة كمان نازلة ( وامطرت لؤلؤا من نرجس وسقت وردا وعضت علي العناب بالبرد) والمجاري والمصارف طافحة . والموية قاطعة , والاسعار طالعة في السما والناس روحا طالعة . وهذا زمانك يامهازل فأمرحي ونططي والبعيش كتير ياما يشوف كتير . ولكن مايزال الشعب السوداني بخيرو .
--------------------------------------------------------------------------------
7/ HISHAM - (DUBAI , UAE) - 25/8/2010
الله يعين السودان و السودانين و ال جاتك فى ماتك سامحتك .الله يسامح ارباب الأ نقاذ لأنهم خلوا ال اختشو ماتو .
--------------------------------------------------------------------------------
8/ عبيد حاج حسان - (السعودية ) - 25/8/2010
كدى تقل المرؤة بين الناس وأولاد الحرام هم السبب . . طلبت مني موظفة المطار بأن اخرج مقص صغير ( حق الشنب ) شافته بالجهاز في حقيبتي وتحديدا قالت لي المقص جنب الموبايل ( اجراء امني ) وفعلا تم ذلك واخذت حقيبتي وطلعت في سلم الطائرة السعودية ثلاثة أو اربعة درجات وفجأة جاءني احدهم يلبس الافرهول الازرق يعني شغال معاهم واخذ حقيبتي وحقيبتين اخر وكان يردد ( السعوديين مابيرضوا ) وذهب بهما خلف الطائرة السعودية وشحنهما مع العفش بعد أن اخذ الموبايل حقي . واكتشفت الحقيقة المرة دي في مطار جدة وذهبت للمسئول الذي قال لي أنا ممكن اعمل ليك فاكس للخرطوم لكن حاتخسر مشاوير في الفاضي . ده في الخرطوم عادي انت ماعارف بلدكم ؟ تصوروا ؟؟؟؟؟
--------------------------------------------------------------------------------
9/ أبو عمر - (هولندا) - 25/8/2010
يعنى ياجبرة تانى حتى لو وأحد من ناس البيت قال لينا البطارية نزلت نقول ليه ياصاحبى العب غيرها والله شنو؟؟؟؟؟!!!!!! لكن مفروض يكون ألانسان حريص عشان كمان ما يكون عندنا شكوك فى الاصدقاء ونقوم نحرم نفسنا من التعامل الظريف الذى خص الله به السودانين .
--------------------------------------------------------------------------------
10/ زول - (السودان) - 25/8/2010
اللذيذ / جبرة ... في قصتين زي بتاعتك دي ؛ اسمح لي احكيها ليك وللسادة القراء : القصة الأولى ؛ واحدة قرت في الجرايد بتاعت الإعلانات دي عن وظيفة وقامت اتصلت بالموبايل المعروض والزول قام واعدها في السوق العربي ؛ جاها بي عربية فارهة وسالها من اوراقها وصورها بتاعت الفوتوغراف قالت ليه انتو ما طلبتوها ؛ قام قاليها مافي مشكلة نمشي نتصور تصوير سريع . وطبعاً مشوا محل الإستديو ودفع صاحبنا الـ 3 جنيه بتاعت الصور وهي داخلة تتصور وكلها فرحة وحيوية قاليها بي حياء شديييييييييييييد العبارة اللذيذة (البطارية نزلت) وصاحبتك ادتو الموبايل ودخلت تتصور وانت والسادة القراء اتخيلوا لما طلعت وشايلة الصور ........... القصة الثانية : سواق امجاد ركبت معاه بت نجفة وبتعطش الجيم وحامت بيه حوامة شديدة وهو فرحاااااان ، المهم في النهاية وقفت بيه جمب مستشفى الخرطوم التعليمي وقالت ليه : البطارية نزلت ؛ واختفت في الزحام المهم ؛ طلعت معروفة لي ناس المباحث قالوا ليه : لابسة كدا وكدا وشكلها كدا وكدا ؛ فرحاً .. قال : آآآآآآآآآآآآي قالوا ليه : أقنع ؛؛؛؛ معليش يا جبرا بطارية اللابتوب بتاعتي نزلت ؛ ممكن جهازك ؟؟
--------------------------------------------------------------------------------
11/ عمر حسن - (السودان) - 25/8/2010
حكمة غالية قالها لى والدى عليه الرحمة ،،، انقلها للجميع للفائدة العامة لتجنب مثل هذه المواقف مستقبلاً والحكمة هى : ( يا إبنى ما بتتغشى الاً عندما تطمع فيما عندك الغيرك )
--------------------------------------------------------------------------------
12/ بشرى مبارك إدريس - (بيريطانيا (بيرمنجهام )) - 25/8/2010
يا جماعة أقول ليكم كلام نزلونى هنا أنا عندى مشوار!!!!! عايز أجيب لى كرت وأتصل على ضابط الجوازات فى سفارتنا فى سوريا عايزو فى موضوع وغايتو فى إجازتى الاخيرة الحاجة الما أتغيرت (وما نزلت والحمد لله البطارية بتاعتة )الزمالة فى القوات النظامية وفى الشرطة خاصه وبالاخص فى دفعتى الدفعة 46 وأحييهم وقد ترقوا الى رتبة اللواء شرطة .
| |
|
