النعامة التزوزى بيك ومنى سلمان من الرآى العام

الداعي مدعي» حكمة يطلقها أهلنا الكبار للتحذير من أن الدعاء على الآخرين يرتد على صاحبه، وقد اشتهر البعض من نسوانا بإبداع فنون الشتم والدعاء بصورة لا يجاريهن فيها أحد، ووكل من يحاول رصد ظاهرة الدعاء على الآخرين، يكتشف بسهولة ان أكثر من يشقى بالدعاء عليهم هم شريحة العيال المشاغبين، ولو استجيب لنصف دعوات الامهات الغاضبات على اطفالهن لما ظل فيها (شافع حايم) ولكن رحمة الله واسعة.
كانت (شريفة قريبة تعتبر (سوبر دعّاية) قبل أن يمن الله عليها بالتوبة من المداعاة، ورغما عن شدة شفقتها على أولادها التى تعتبر مضربا للأمثال إلا أن حكاية الدعاء عندها كانت مسألة (قريفة ومزاج)، والطريف أنها كانت في مرة تنادي على ابنها ولكنه لم يجيها بل مشى إليها في صمت حتى وقف أمامها فصاحت فيه في غضب :
مالك ياولد ساكت ساي وما قاعد ترد على ؟
أجابها مبررا :
لو قلتا ليك نعم .. حاتقولي لي .. النعامة التزوزي بيك !
وإن قلتا ليك شنو.. حاتقولي لي .. الشنّينة التقطعك !
وإن قلتا ليك آآي .. حاتقولي لي .. اللوايه التلوي حنكّك !
وإن قلتا ليك هوي .. حاتقولي لي .. الهوا الامزعك !
أها مش أحسن أسكت وما أقول أي حاجة لمن أجيك؟!!
استمعت إليه في دهشة ثم قالت في غضب:
القلقُولة التسد حلقك .. بطّل الفصاحة دي !!!
كذلك كانت لنا جارة بنفس المواصفات مما جعل أطفالها يلتقطون منها تلك الموهبة بل ويبزونها فيها فقد سمعت ابنها الصغير يشكو إليها من أخواته ويقول:
إن شاء الله بناتك ديل بالرصاصة الترصصم ليك واحدة.. واحدة!!
والغريبة .. أنني لم استوعب يومها قصده بـ (الضبط) .. كل واحدة تجيها رصاصة براها .. ولا رصاصة واحدة ترشهم كلهم (يعني تمرق من دي وتخش في دي) لمن تقرضم كلهم.
هناك أيضا الدعاء الاجتماعي، مثلا لو جات واحدة تهني في مناسبة فرح متأخرة أو جات بيت البكاء وبدل أن تجتهد إجترار الدموع بالكضب أثناء المعزى، ترفع يديها بالفاتحة ثم تجمعهم هي تقول:
ان شاء الله البركة فيكم.
حينها يكون نصيبها صاروخ أرض جو بالقول:
يبركوا فيك خنق يايمة !! .. مالك ما بتبكي على المرحوم؟ .. بتكشحي فينا الفاتحة زي الرجال مالك ما وجعك ولا ما بيستاهل ترمي عليهو دميعاتك ؟!!
وأخيرا هناك دعاء المتشببات ومدعيات الصغرة، فإذا فقدت حصافتك التملقية في لحظة غفلة وناديت على إحداهن بـ يا حاجة..
يأتيك الرد مستعجلا: تحجي بلا قرعة أو تحجي في جمل أعور!..
وإن قلت: يا خالة..
تبادرك بالقول: خلال الشوك!
وإن قلت: ياعمة..
فقد تصادف من لا تحب العمعمة فتدعو عليك بـ( العمى الاداكسك) أو (الليليسك) ايهما أسرع إلى فمها !
بينما كنت أسير أمام مخبز أثناء ممارستي لرياضة المشي الصباحي، مررت بجوار إثنين من العاملين فيه، كانا منهمكين في جمع طاولات العيش، ويبدو أن كثرة مروري الىومي بين أيديهم حفزتهم لمحاولة معاكستي، فقد فوجئت بصوت أحدهم يحذرني للانتباه:
أعملي حسابك!!
ألتفت بسرعة لأجده يمر بالقرب من رأسي بطاولة خشبية .. إنحنيت وملت على الجنب بسرعة لأتفادى الاصطدام بها .. فقال الآخر منبها رفيقه:
أوعى .. خلي بالك من راس خالتك!!
إلتفت إلى الخلف في استغراب فـ الإتنين كانوا (يلدوني واقفين على حيلم ) على قول أماتنا الكبار .. واصلت طريقي وأنا أتمتم في غيظ:
أنا خالتك .. الخوخا التقلع ضروسك واحد .. واحد

أضف تعليقك طباعة الموضوع أرسل الموضوع
(قراءة: تعليق: 17 طباعة: إرسال: )
التعليقات

--------------------------------------------------------------------------------

1/ صلاح الدين سليمان طه - (السعودية) - 1/5/2010
شي مؤسف هذه العادة المتأصلة في نسائنا .. وهي من الأشياء التي ينبزها ديننا الحنيف .. وكما نعلم إن دعوة الوالد على ابنه مستجابة .. فماذا ستفعل تلكم الام لو اصاب ابنها او بنتها ما دعت به عليهم .. اتقوا الله ايها الامهات في ابنائكم .. (ليس المؤمن بطعان ولا لعان ولا فاحش ولا بذيء) .. نسأل الله الهداية للجميع .

--------------------------------------------------------------------------------

2/ أبو منار - (السعودية) - 1/5/2010
الأستاذه منى لك التحية وبقدر ما أقرأ مقالك بقدر ما أموت من الضحك. الظاهر حتى أنت قد وقعت في الشرك لكن هذا شرك أعتبره مناسبا للرد لتلك الأفعال من المشاكسين وأصحاب القلوب الميتة. وهذه فعلا من نعم الله أنه لا يتم استجابة الدعاء للأمهات على أولادهم إلا ماندر ومن ثم تتحسف إحداكن على مثل ذلك الدعاء الذي رمته على ولدها من دون أدنى قصد...

--------------------------------------------------------------------------------

3/ ابومحمد الشنداوى - (جدة) - 1/5/2010
لك تحياتى واحترامى نعم هذا واقعنا وكثير من النساء يتم طلاقهن بسبب المداعاة لاواولادهن، وبرضوا انت ماعندك عوجة داعاااااااااااااااااااية لكن الانسب كنت تقولى للعمال بدل الخوخه (خلال السرح الينسرح ليكم فرق عيونكم) ومن الاشياء القوية كنت معزوم غداء وتاخرت وقمت اتغديت فى السوق ولما اتصلوا بى قلت لهم خلال اتغديت ما تنتظروفى مع العلم بانه منتظرين الجماعة لازالوا. قام رد على بن عمى اريتك بالغدة اليتكلوها بالعود (شفى الدعاء اليابانى ) مع الدعوات لك بالتوفيق

--------------------------------------------------------------------------------

4/ الفاتح يعقوب - (السعودية) - 1/5/2010
واللة يا استاذة كان الجماعة ديل قالوا ليك يا خالة وانت في ذي حالة صورتك الموجودة في الاعلي دي يكون بالغوا عديل ولكن اخشي ان تكون الصورة دي انتي داساها من زمن الصبا وان كان كذلك فلهم الف حق وفي لحالتين كتاباتك رائعة ودمك خفيف ولك ودي

--------------------------------------------------------------------------------

5/ orass - (السعودية) - 1/5/2010
(يا خالة) والله أنا متابع كل مقالاتك أول بأول بتذكريني بالحبوبات .. الله يديكي الصحة (عليكي الله ما تداعيني).

--------------------------------------------------------------------------------

6/ بشرى مبارك إدريس - (بيريطانيا (بيرمنجهام )) - 1/5/2010
الاخت منى سلمان (أو الخاله منى سلمان ) أو العمة أحسن أو الاستاذه البنفع معاك شيليهو بس أختينا دعا الكبار دعا الصغار هيين !! والله موضوع (جديد لنج ) ولكن قبل أن أنتهى من التعليق رقم واحد حسب ما وعدت بالامس ووعد الحر دين عليه (أخشى أن ينط على أحد الذين يتضايقون من ردودى بلا سبب ليقول لى الحر الانشاء الله يفسخك !!!) طبعاً بقول ليهو حسبى الله ونعم الوكيل وقل ما يصيبنا إلا ماكتب الله لنا رغم أننى أبحث عن شويه حر هذه الايام لان البرد شغال فينا ما وقف لكن قطع شك ما عايزو يفسخ زى حر السودان البعد طلوع الشمس بى 6 دقائق !!!.الاخت منى ليتك وإنتى درستى فى القاهرة أن تعملى دراسة للمداعاه بين شعوب الوطن العربى وأبدى بالمقارنه بى جيراننا المصرين لكن والله نحنا حقتنا أم قافية زى الشعر دى حاتفوز بالمركز الاول !!!ولاشك أن من ضمن مواصفات الفوز السرعة بين الفعل ورد الفعل ومدى قوه الدعوه ومدى درجة قوتها فى (الترصيص) وهل العتله كانت فى الفردى أو المجموعات. .

--------------------------------------------------------------------------------

7/ عبدالله الفاضل - (الجزيرة - العيكووووورة) - 1/5/2010
واحد بشتم في حمارو وشغال اضرب فيهو وينهر فيهو ويقول ( عرت بالشعيرية التملأ خشم سيدك ) طبعا هو البحب الشعيرية . نسوان بشتموا في بعض ( هوووووي يالسوقك باير ودمك فاير الشمس ضربتك والرجال ابتك ، يالفي الحفلة ماعبروك ولا زول رقص معاك وناس الفيديو ماصوروك وناس العشاء فطووك . القطر فاتك والزمن شاتك ، يالقطرك صفر( صفرك قطر زي مابقول ربشة ابن عمي ) يالوزعتي صورك ومافي زول عبرك ومافكيتي بورتك ، بركة الجمعة الجامعة والكلمة السامعة تدخل عليك بالساحق والماحق والبلاء المتلاحق ، هوووي يالراخية اضانك وماناقشا حنانك ، ياطيرة يامبارية السيرة يانفسيات وعدم امكانيات ، شوفوا البوز الماضاق الموز اليدين مساويك والكرعين مفاريك .نحنا نسوان عوايل وعندنا فايل ربونا في الاملاك واكلنا السيرلاك وحبينا في البلاط ولدونا في الدايات وقرينا في الجامعات ، نحنا البنريدو بنولع ليهو اللمبة والمابنريدو بنحرش ليهو الكلبة ، اولادنا لابسين الجنز وحالقين مارينز وعشانا باسطة وشغلنا بالواسطة .

--------------------------------------------------------------------------------

8/ بشرى مبارك إدريس - (بيريطانيا (بيرمنجهام )) - 1/5/2010
نواصل فى الرد رقم 2وكميات المردود بيت أو بيتين أو تلاته من الدعاء المتواصل وهل أجتهد ليأتى (بمفرده جديده ) أم أنه أستعمل القديم حاله حال الفنانيين الذين يتغنوا بأغانى الحقيبة نفس اللحن مع وجود أخطاء تصك الاذان فى الكلمات وأسألوا الفاتح جبرا (طه الاهيف على سبيل المثال والمقصود آه يا الاهيف ) ومثل الذى يقول طه الاهيف كان يجب أن يطلع عليه زول من الجيل القديم ويوقفو من الغنا ويقول ليهو : طه الاهيف إن شاء الله ياطاك الفيل ويغشوك ناس التنزييل ويقبضوك مع ناس سوق الماسورة و يتحرى معاك الضابط ابتاج ودبوره وما تحلك الشوره قول آمين. الاخت منى هناك شىء عكس الدعاء وهى الظرافة والرد بسجع أشتهر بها عندنا فى السقاى المرحوم الطيب يوسف حتى أنه أيام نميرى وعندما يكون فى الصافية لمناسبة لأسره آل البلوله كان يتحلق حوله الوزراء ووجهاء البلد وهم يضحكون وظاهرة العم الطيب يوسف كانت تستحق التوثيف وأذكر أنه عندما ظهرت البكاسى فى بداية السبعينات وكان يأتى من الجزيرة على حمارة وعندما يقابله الصيبه يصيح بصوت جهورى تيييت تيييت من الجزيرة جيييييت وله قفشات مع ضابط الشرطة زملاء أبنه العميد شرطة عباس الطيب يوسف

--------------------------------------------------------------------------------

9/ الحاج عبدالمولى الصديق موسى - (السعودية - الرياض) - 1/5/2010
هذا حقا ما عهدناه من بعض نسائنا و هو بالطبع ظاهرة غير محمودة فالمسلم ينبغي ان يقل خيرا او ليصمت اما اللعن و السب فهذا ليس من اخلاق المؤمن اتمنى ان هذا الموضوع وقفة لنا كلنا و لامهاتنا و خالتنا و عماتنا للتوقف من هذا السلوك و هناك سلوكيات اخرى اعتدنا عليها معشر الرجال و هي كثرة الحلف بالله في ابسط الأشياء اتمنى من خالتو منى ان تلغي عليها الضو بطرح المتميز و السهل الممتنع. لك الشكر اختي منى و متعك الله بالصحة و العافية و كثر الله من امثالك.

--------------------------------------------------------------------------------

10/ ابودانية - (السعودية) - 1/5/2010
ايتها الظريفة اريتك بالزرا.....لقد ابهجتنا والله اضحك الله سنك ....!!!

--------------------------------------------------------------------------------

11/ ابو اسعد - (السعودية ) - 1/5/2010
انتي قلتي قريتي في الاسكندرية زمان وخريجة سنة كام كدا يعني في الثمانينات حقو تستمتعي بالخالة اليومين ديل شوية قبل ما تجيك الطامة الكبرى و تبقي حبوبة حا تقولي الحبة التقوم ليك عارف خليها في المقال الجاي تحياتي لك وللقراء

--------------------------------------------------------------------------------

12/ بشرى مبارك إدريس - (بيريطانيا (بيرمنجهام )) - 1/5/2010
والله يا جماعة بعد ما مرقت من البيت جيت راجع لاننى أتذكرت دعوة قويه قلت لازم تصلكم وتضحكوا فيها !!عربى من الخلا الفوق لينا ببيع الحطب فى الحله ومابعرف عن الاسلام والصلاة والصيام أى شىء ولا سمع بى الاشياء دى قبل كده !!تكرم عليه بعض الاخوان الخيرين وعلموهو الوضوء والصلاه وكان ذلك قبل رمضان بكم شهر وعندما حان رمضان وكان عمرة 45 وأول مره يصوم فى حياتو فتعب تعباً شديداً ولكن أحد الاخوان أستضافة وشغل له المروحة والمكيف فأرتاح كثيراً وأكرمه بإفطار مصلح وبعد الافطار رخم صاحبنا بعد الشاى والقهوه وفى اللحظة التى هم فيها بالنوم أذن مؤذن العشاء فطلبوا منه الذهاب للصلاة وكان قد ربط حمارة بالقرب من المسجد ولم يكن يعلم أن صلاه التروايح 20 ركعه وكل مرة يسأل الجنو يازول الشى الصلاه دى حقت الشهر كلو ؟؟؟ يقول ليهو لا بس التروايح بتاعه الليله وبكره نفس الحكايه فشال هم شديد وكملت مروتو كلو كلو !!وعندما أنتهت الصلاه ركب حمارة وضرب الحمار وقال ليهو (عرت عرت التراويح التعسمك!!!) وتحياتى للاخ عبد الله الفاضل ود العيكوره والله دمك خفيف شربات وحيرت الشباب والبنات وواصل ما تقيف أنا بكتب لوجودك وردودك .

--------------------------------------------------------------------------------

13/ ابو الساره - (مكه المكرمه) - 1/5/2010
هسع يابت سلمان القصه دي كووووووولها عشان قالووا ليك خالتي (أريتم بي خلال السخله) تحياتي يا ظريفه

--------------------------------------------------------------------------------

14/ ناصح لله - (السودان) - 1/5/2010
ميغرك الثناء هذا وتندفعى اعملى حسابك كل حرف ليهو وزنه يوم لا ينفع مال ولا بنون ولا شنو يا خالة

--------------------------------------------------------------------------------

15/ مبارك مجذوب الشريف - (السعودية) - 1/5/2010
(المداعاة) ظاهرة نسائية بحتة، ولعل شعور حواء (أحيانا) بالعجز عن إستخدام القوة يدفعها إلى تفريغ الشحنة العدائية في صورة دعاء سالب مسجوع، وتختلف صيغة الدعاء حسب البيئة ومن ذلك: يضربك الضريب شقاق العناقريب، والضريب هو الموت وتزاحم المعزين يؤدي إلى تكسير العناقريب ودعاء آخر: (النطرة التنطرك وتفصصك وتقصصك)، والنطرة هي إسهال مصحوب بالحمي ومطلوب منها حسب صيفة الدعاء أن تفصص المدعو عليه فتجعله مثل فصوص القصب ثم بعد ذلك تقصقصه كما يفعل المقص بالورقة، ويا ويلاه. أما كلمة (خالة) فقد جاءني بسببها دعاء لبناني، فقد اتصلت على شركة لبنانية في موضوع يتصل بالعمل، وردت علي إمرأة يبدو من صوتها أنها كبيرة في السن، وفي أثناء الحديث قلت لها يا خالة، فقالت: شو ألت (قلت) جاك العمى بألبك (قلبك)، ؟

--------------------------------------------------------------------------------

16/ محمود عبد الله - ( السعودية - جدة) - 1/5/2010
( عرت بالشعيرية التملأ خشم سيدك ) ، يا ود العيكورة (موتنا) من الضحك ، ربنا اعطيك العافية بالله نرجو ان تتحفنا دائما بتعليقك المركب ماكينة عامود في الصفحة الاخيرة.

--------------------------------------------------------------------------------

17/ عبدالهادى - (السعودية) - 1/5/2010
والله يا (خالة) كتاباتك كلها جميلة وأن والله عايز أتزوج لكن حلفت لو ما لقيت واحدة بتعرف التراث زيك كده ما ح اتزوج بالله لو عارفة ليك (بنية) كده بالمواصفات دى كلمينى عليك الله

» لسع صغيرة فى سنى ومنى سلمان من الرآى العام
» السبب الحمانى ومنى سلمان من الرآى العام
» الفى البطون بفور بلا عطرون ومنى سلمان من الرآى العام
» لاقينى ولا تعالجنى ومنى سلمان من الرآى العام
» أوعه بعدين يقوم يخمّكم !!ومنى سلمان من الرآى العام