شنقلي (هوباية)شنقلي (هوباية)

* قالوا ليك ناس المريخ بعد ما شافوا مباراة الهلال والمحرق.

* قعدوا واتشاوروا...قالوا احسن (نتضاير) من بدري.

* حالتها دي بدون (يوسف محمد).

* المريخاب في حلتنا شالوا هم.

* عندنا (مزيرة) فيها 12 زير ...قبل المباراة زول كان بمشي علي المزيرة دي مافي.

* بعد المباراة المريخاب قبلوا علي (المزيرة) ..نشوفوا الموية الفي الازيار.

* مريخابي السنة كلها ..شايل (جك) الفول وماشي علي الدكان عشان يجيب ليه فول ويرجع.

* المريخابي دا حيرني ...كل ما اشوفه ..بلقاه شايل جكو.

* المريخابي دا بعد مباراة الهلال والمحرق ...لاقيتو واقف تحت العمود وشايل جكو.

* جك اخضر كدا.

* المريخابي اول مرة يشكي لي من (الفول).

* اول مرة يقول لي (الفول) جايب لي (حصوة).

* اول مرة اسمعو يقول ليه كلمة ما كويسة في (الفول).

* عرفت ليك طوالي ..انو المريخابي دا ..(هدف) مهند الطاهر مغلط عليه.

* في ناس كتيرة (هوبات) مهند الطاهر بتغلط عليهم.

* عندنا واحد.. الدكتور مانعو عديل من (هوبات) مهند الطاهر.

* قال ليه الدكتور : هوبات مهند الطاهر دي بتضيعك.

* المريخابي بقي من يشوف (هوبة) مهند الطاهر ..بجري علي (الثلاجة).

* عندو حبوب ببلع منها اربع حبات ..وقت يشوف هوبة مهند الطاهر.

* مسكين زولكم ...(الوصافة)...خلتو متل (السوستة) الحالجة.

* انتوا تعالوا هنا ..ناس الهلال ديل عندهم حاجات غريبة.

* قولوا ما شاءالله.

* ناس الهلال ديل شغالين بالثنائيات.

* المريخ حسمتو ثنائية (سادومبا).

* المحرق حستمو ثنائية مهند الطاهر.

* هوبتين ....زي دعاية المعجون.

* الهلالاب بقوا يضحكوا ..متل (البطيخة) البفتوحها ليك بالسكين قبل ما تشتريها.

* ما تشيل ساكت ..شوف عين.

* اقول ليكم معلومة. ناس بلة جابر وموسي الزومة ...بعد ما شافوا الهلال امام المحرق ..قالوا تاني ما برجعوا.

* قالوا بستقروا قبلهم. البلد دي ما بتتقعد مع الهلال.

* معقولة ...السنة دي تاني يقعدوا (يتواصفوا) فيها.

* جمال الوالي دا بذكرني بالقصة دي.

* قالوا ليك في واحد اسمو (مفتيح).

* الغريبة مع الاسم دا ....كانت اي حاجة مقفلة معاه.

* اي حاجة يهبشها ..بتتقفل معاه.

* مفتيح دا ...عمل ليه (فرن).

* في ناس قالوا ليه ما في احسن من (الفرن)...كدا شوف انت الناس البياكلوا في (العيش) دا قدر شنو؟.

* الفول والقدور البتشوفها دي كلها (بنسفوها) ليك بالعيش.

* ما في استثمار اضمن من (الفرن).

* في واحد بتاع تنظير ...ملك (الاقناع) اي زول بقنعو ليك.

* ملك الاقناع دا ...(الحجر) بقنعو.

* زول صعب. ملك الاقناع دا ..لو لاقي ليه (شيطان)..وكلموا يخلي البعمل فيه دا ..ويفتح ليه (محل تركيب عطور) الشيطان بقتنع.

* الشيطان اليوم التاني بعتزل شغلتو ..وبفتح ليه (محل تركيب العطور).

* ملك الاقناع دا زول صعب. لو لاقي ليه (قطر) بقنعوا ليك.

* يعني مثلا لو ملك الاقناع دا لاقي ليه (قطر) ماشي كريمة ...الزول دا ممكن يغير ليك سير القطار ..ويخلي ليك القطر عادي يقلب (بورتسودان).

* قلت ليكم في الاقناع الزول دا ما في زول بلحقو.

* زول صعب شديد...ملك الاقناع دا ..لزوه لي (مفتيح) عشان يقنعوا يعمل ليه (فرن).

* في ناس بستفيدوا من الخطوة دي ..عشان كدا رسلوا ليه (مفتيح).

* ملك الاقناع قعد مع (مفتيح) ..قالوا ليه : انت (عوير)...كدا قوم الصباح ..وشوف الناس البقعوا (قرّاض) ساكت في العيش كم؟.

* دا غير الناس الكل ما يدخلوا المطبخ بسلوا ليهم (رغيفة) من جردل العيش ويقرّضوها.

* مفتيح حكاية (قرّاض) العيش دي ما كان فاكر ليها...عشان كدا عجبتوا الفكرة.

* بني ميزانيته علي هذا الاساس.

* مفتيح ذاتو كان بحب (القرّاض). بموت قي (قرّيض) العيش.

* مفتيح طوالي مشي عمل ليه (فرن)...اجر ليه مكان في احسن حتة ..وجاب ليه عمال من (الصين) عشان يخبزوا ليه (العيش).

* تقول الفرن حقو دا عاوز يطلع منه (بترول).

* الفرن عمل ليه دعاية في القنوات الفضائية ..اصلوا ما قصر من الناحية الاعلانية للفرن.

* دفع دم قلبو في (الفرن).

* الشهر الاول ...كل ما باع ليه (عشر) رغيفات.

* ما في زول بهببوا.

* الزول البجي علي (الفرن)..بسأل الزول الببيع العيش ويقول ليه : اسمع يا ابوالشباب في محل تمباك قريب هنا.

* تمباك في عينك.

* الفرن خسر خسارة شديدة.

* بعد ستة شهور ..الديون والخسائر اتراكمت علي (مفتيح).

* مفتيح بقي ما عارف يعمل شنو؟.

* ملك الاقناع بتذكروه.

* الجماعة رسلوا (ملك الاقناع) لي (مفتيح)...عشان يقنعوا يقلب (الفرن)...محل اتصالات.

* يا زول مفتيح في الاول رفض الفكرة جملة وتفصيلا.

* لكن (ملك الاقناع)..انتوا عارفنوا ...(الثعلب) بقنعوا ليكم.

* مفتيح اقتنع يقلب الفرن (محل اتصالات)...بعد ما قال ليه (ملك الاقناع) انو ناس الاتصالات عاوزين يعملوا (المسكول) بقروش.

* يا مفتيح ....والله (مسكولات) ساكت تغني.

* مفتيح بتعجبوا (المسكولات)..اليوم كلو شايل تلفونو وبمسكل لي (اصحابو).

* عشان كدا اقتنع بالفكرة تماما ..وقلب الفرن ..محل اتصالات.

* يا زول مفتيح بعد ما قلب الفرن (محل اتصالات) زول مشي عليه ما في.

* زول هببوا مافي. في كل خميس ..في زول بدخل عليه في محل الاتصالات ..ويقول ليه : اسمع يا ابوالشباب في محل تمباك قريب هنا.

* عشان كدا ..مفتيح قال احسن استثمار انا اقلب (المحل) دا ...محل (تمباك).

* اليوم والتاني ..مفتيح نزل اللافتة بتاعة الفرن ...وركب لافتة بتاعة (مفتيح للتمباك الخطري).

* اها ..انتوا قايلين في زول عبرو. زول مشي عليه ما في....حتي الزول الكان بجيه كل خميس عشان يسألوا من (محل تمباك)...بقي يجيه كل اربعاء ..ويقول ليه : اسمع في عيادة اسنان قريبة هنا.

* زولك الظاهر عليه (التمباك) انتهي منو؟..عشان كدا قبل علي عيادة الاسنان.

* وكان مفتيح كل ما الزول دا يجيه ...ويسألوا من (عيادة قريبة)...بيلعنوا وقت يفوت ..ويقول ليه : كل منك ضللتني.

* المهم موضوع التمباك ما نجح مع (مفتيح).

* ملك الاقناع بتذكروه. ملك الاقناع ظهر تاني ..وقال لي (مفتيح)...احسن حاجة تقلب محل التمباك دا ..محل بيع للسمك.

* الدنيا دي ما فيها اضمن من تجارة السمك.

* الناس زهجوا من الفول...احسن تعمل ليك (محل لبيع الاسماك).

* مفتيح ..نقطة ضعفوا في الدنيا دي (الاسماك).

* عشان كدا اقتنع بالمشروع دا.

* لكن المشروع خسر خسائر كبيرة...تقول الناس خلوا اكل (السمك).

* الكدايس في الحلة شبعن من السمك بسبب خسائر (مفتيح).

* خسائر تقيلة.

* بعد شهر...كان في زول بدخل علي (مفتيح) وبقول ليه : عاوز لي (سمكة). مفتيح يقوم ويتنفض ويجيب ليه السمكة.

* الزبون يعاين للسمكة كدا ..ويقول ليه : سمكتك دي مالها كدا.

* مالها يعني؟.

* زي العندها (حساسية).

* طبعا الزول لما يكون ما عاوز بشتري بكون ظاهر.

* شفتوا حكاية مفتيح دا ..زي حكاية جمال الوالي.

* كل سنة يجيب ليه لاعب ..ويخسر فيه ..وفي النهاية يشطبوا.

* عليكم الله هسع (وارغو) دا ما زي (السمك).

* واليجا تاني ما زي (الرغيف).

* وطمبل. طمبل مالو؟. طمبل رجعوه.

* ملحوظة: نحن ما رضيناها ليك يا طمبل.

هوامش

* الرجعة كعبة ..وشينة كمان.

* اللاعب لما يكون كبير ويرجعوه ..شينة في حقو.

* الهلال لو كان قابل (الوحدات) ..كان اخذ للمريخ حقو.

* كنا جبنا ليكم التار.

* السبعة ...لي هسع طعمها زي الحنضل في حلقونا.

* الله مرق (الوحدات).

* ناس الوحدات عرفوها.

* اتخارجوا من بدري.

* ناس المريخ خايفين الهلال يجيب ليه كاس زي كاساتهم الوهم دي.

* نحن الكاس لو جبناه ما بنقتنع بيه.

* كاسات زي دي ولا بنشتغل بيها.

* بس بنكاوي بيها ساكت.

* انتوا خليكم مركزين مع سان جروج...ما تقوموا تعيدوا لينا (التسعة).

* كلمناكم من هسع اعملوا حسابكم.

* وفتحوا عيونكم.

* ناس النفطي ديل ما بنستروا.

* خبر عاجل : النفطي براه.

=================

محمد عبدالماجد--وان طال السفر