اصابه يوصف محمد ...... "وان طال السفر"

< المريخاب ديل بعملوا كدا ليه؟.

< بحرجونا دائما.

< دائما هم بدخلوني في (ضفورنا).

< النفط طلع ليه عشرات السنين ...المريخابي قال ما عرف (النفط) طلع ..إلا وقت المريخ اتعاقد مع (النفطي).

< ما سمع بالنفط ..إلا من اعلام المريخ.

< تصوروا واحد مريخابي ضرب لي مريخابي تاني ...وقال ليه : حول لي رصيد يوسف محمد (اصيب).

< المريخابي التاني ..بقي يشتري في (الكروت) ويحول في (الرصيد).

< من تحويل الرصيد ...فقد سوائل عديل.

< فقد عديل ...لما ركبنا ليه (قزازة) دم.

< الاصابة عاجباهم شديد.

< في مريخابي تاني دخل ليه في (صندوق) ...حلف ..ما يخلي (الصرفة الاولي).

< قال ليهم عندي (سماية).

< طبعا السماية بشيلوا بيها دائما (الصرفة الاولي).

< اي واحد يشيل (الصرفة الاولي)...اعرف طوالي بكون عندو (سماية).

< سماية يعني (الصرفة الاولي).

< الصرفة الاولي يعني شنو؟.

< يعني (السماية).

< اها صاحبكم المريخابي دا قال عندو (سماية) ...عشان كدا عاوز (الصرفة الاولي).

< قدر ما حاولوا يقنعوه ...ما اقتنع ...قال ليهم يا (الصرفة الاولي) ...يا ما عاوز.

< قدر ما حنسوه ما اقتنع.

< المريخابي وقت عرف يوسف محمد (اتصاب).. خلي (الصرفة الاولي).. وانسحب منها ..قال ليهم وقت (هوت) اتصاب لو ادتوني (الصرفة) الاخيرة ما عندي مشكلة.

< الجماعة قالوا ليه : لكن (سمايتك).

< قال ليهم : السماية ح تطير يعني ..ان شاءالله (الولد) نسمي ليه بعد ما يدخل المدرسة.

< ح يحصل شنو يعني؟.

< نحن ما ضايقين.

< يا زول (سماية) ولدك.

< سماية شنو بعد (اصابة) يوسف محمد....نحن ولدنا دا ما داخلين بيه (الانتخابات)...ما ضايقين ليه.

< غايتو (الاصابة) دي عاجبهم جنس عجب.

< في واحد في حلتنا ...عشرين سنة ..ما شفنا (سنونو).

< عشرين سنة ...ما عندو (سن) ظهرت.

< تكشيرتو زي العيش الحرقان.

< الزول دا اول امس لاقاني يضحك ......وسنونو في (السهلة) ..قال لي صحي يوسف محمد اتصاب؟.

< قلت ليه : علاقة الاصابة بي سنونك شنو؟....والله لو عارفين الاصابة بتخلي سنونك تظهر كنا يوسف محمد اصبناه ليكم من الدوري السويسري.

< ما كنا بنخليكم تدفعوا 2 مليون دولار في عبدالكريم (الفاضي).

< غايتو المريخاب ديل عندهم (عين) حارة خلاص.

< تصيب الزول في (العرقوب).

< احكي ليكم حاجة.

< عشان تعرفوا المريخاب ديل بفكروا كيف؟.

< قالوا ليك مريخابي لقي ليه ساعة ذهب واقعة.

< شال الساعة واتبسط ..وعاين ليها كدا ...لقاها (مؤخرة) 25 دقيقة ...صاحبكم طوالي رمي ساعة الذهب ...وقال ساعة مؤخرة اعمل بيها شنو؟.

< هي يعني بقت علي تأخير الساعة.

< انتوا مجلسكم دا كلو (مؤخر)...عملتو شنو؟.

< مجلس غير (درع السد) ما شال ليه حاجة.

< شايلين ليكم (درع) ما بتخجلوا.

< الدرع دا في (التأبين) خلوه.

< الزول من يكرموه بي (درع)...يعني الزول دا ميت.

< شفت ليكم زول استلم ليه (درع).

< الدرع دائما بستلمو ورثة الزول (المدرع)...اقصد الزول المكرم.

< ما في زول بستلم ليه درع.

< هسع انتوا الي الان فرحانين بي (درع).

< طلعوا من المولد بي (درع).

< والله نحن نطلع من موسم طويل وعريض بي (درع)...ما نقعد في البلد دي تاني.

< جمال الوالي لو عمل لينا عشرين طابق ...ما بدقها معانا.

< انتوا يغشوكم بالطابق التاني ...وتفرحوا بالدرع.

< هسع المريخاب فرحتهم في الدنيا دي عشان يوسف محمد اتصيب.

< يعني الموسم دا ...(درع) ما بطلعوا بيه.

< خلاص كفاهم فرحة اصابة يوسف محمد.

< اها ان شاءالله (اصابة) يوسف محمد دا تبقي ليكم (طابق ثالث).

< قالوا ليك معسكر المريخ في كينيا كلو مركز في اصابة يوسف محمد.

< موسي الزومة كل ما يقولوا ليه يوسف محمد (اتصاب) يضرب ليه دستة برتقال.

< فرحة ساكت يضرب في البرتقال.

< ان شاءالله (البرتقال) يبقي ليك (شنكار).

< اما بلة جابر ..قالوا ليك بقي ما بنوم...الليل كلو يغني في (سهران الليل).

< اكرم الهادي سليم ...قالوا ليه : يوسف محمد (اتصاب)...قال ليهم : الضهر راح...وبقي زي الطلقة ...وما عندي اي مشكلة.

< انت وجع الضهر جابو ليك يوسف محمد.

< وجع الضهر جابو ليك يا كابتن (سادومبا).

< عشان ما تلخبط ليك الاختصاصات.

< اصلو نحن عندنا سادومبا ..بجيب وجع الضهر.

< امبيلي بجيب وجع (الفقر).

< يوسف محمد بجيب وجع (الاضنين)...عشان هو لاعب طرف.

< امادو بجيب وجع (الكلي).

< عشان الكلي برضو بتقع في الاطراف.

< شفتوا النظام دا كيف؟.

< نحن اي حاجة عندنا بي نظام.

< ما عندنا حاجة ساكت.

< اي حاجة بي نظام.

< هسع صاحبكم وقت جاب سيرة النظام ...يجيب لينا سيرة (وجع الضرس).

< وجع ضرس شنو يا ابو الشباب ...الناس وصلوا (القمر).

< انت لسع شابكنا وجع ضرس ...وجع ضرس..وجع ضرس.

< قالوا ليك مريخابي قالوا ليه ابعد حاجة شنو؟.

< قال ليهم : الطابق التاني.

< المسكين ما شاف ابعد من (الطابق التاني).

< لا سمع بي ناطحات السحاب ...ولا سمع بالفضاء الوسيع ...ولا سمع بالقمر.

< الزول دا عندو ابعد حاجة الطابق التاني.

< ملحوظة: هسع ينط لينا زول يقول لينا : يوسف محمد ذاتو اتصاب.

هوامش

< اجتماع الاتحاد العام حول الملفات كلها لي مجدي شمس الدين.

< وهذا تلقائيا يعني اعتماد تسجيل يوسف محمد.

< اها صلاح حسن سعيد تاني بعمل شنو؟.

< يا اخوي شوف ليك اثقال ارفعها بعيد مننا.

< نحن ما فاضين ليك.

< صلاح حسن سعيد ..ما فاضل ليه شيء...غير يشخص لينا اصابة يوسف محمد.

< بكرة بتلقوه مصرح ليكم في الموضوع دا.

< يمكن يفتح ليه عيادة خارجية عديل للموضوع دا.

< احتمال ..صلاح حسن سعيد دا ممكن يعمل اي حاجة.

< اصلو هو بفهم في كل الاشياء.

< اي حاجة عارفها.

< لكن بعد مجدي شمس الدين وصل زولكم دا يا مريخاب بكتفي بي التوقيع علي (المستندات).

< ما بعمل حاجة غير ما يوقع.

< والتوقيع ذاتو لو ما قال ليه كمال شداد وقع ...ما بوقع.

< بمشي بالتوجيهات.

< عشان كدا وقت ناس شداد ومجدي كانوا خارج البلد ..حاول صلاح حسن سعيد يعل ليه شخصية مستقلة.

< هي بعملوها كدا يا رافع الاثقال.

< الزول دا في خطط المدرب وتشكيلته ادخل.

< بدخل في اي حاجة.

< دا زي الزول البكون (مطرف) عندما يركبوا (الصيوان).

< زول يقعد ينظر بس.

< احفر دي ..وشيل الطوبة دي ..وميل شمال.

< في ناس كدا.

< في (المقابر) يقعدوا ينظروا.

< وداللحد دا يكبوا فيه نظريات الدنيا كلها.

< المشكلة الجماعة البنظروا ديل ما بشتغلوا.

< بس يعذبوا ولاد الناس ساكت.

< خبر عاجل: وإلا عندكم كلام تاني.

=================
محمد عبدالماجد.