القرايه ام دق < محمد عبد الماجد > . يوسف محمد..(الجرحو نوسر بي )

< حاول المريخاب بكل الطرق ..ان يعطلوا صفقة الهلال مع يوسف محمد.

< جربوا كل الحيل من اجل ابطال الصفقة ...لكن كل محاولاتهم باءت بالفشل.

< صفقة يوسف هوت اكتسبت اهميتها من كونها جاءت بدلا لصفقة الهلال مع عبدالكريم الدافي.

< ناس المريخ لو عارفين الموضوع دا بحصل ما كان فشلّوا صفقة الهلال مع الدافي.

< الجماعة كانوا علي ثقة ...انهم بعد ان ابطلوا صفقة الهلال مع الدافي فان الهلال لن يتمكن فيما تبقي من وقت لانتهاء التسجيلات ان يسجل محترفا اخر.

< استبعدوا الحكاية ...واقتنعوا ان الهلال علي طريقتهم سوف يعيد تسجيل (ايجا) بعد ان شطبوه كما فعلوا هم مع نصرالدين الشغيل.

< مستحيل الهلال يستطيع ان يعيد تسجيل يوسف محمد.

< يوسف محمد في انغولا ...وناس برجاس وعماد الطيب في ام درمان.

< الموضوع اكثر من مستحيل.

< بل يوسف محمد في مدينة ومجدي شمس الدين في مدينة تانية ..يعني ما في حاجة بتلمهم ..والتسجيلات تبقي لها ساعات.

< دقائق وتنتهي.

< الجماعة ديل ما عارفين ناس الهلال ديل مفتحين ...الموضوع وقت يبقي صعب بتكيفوا.

< وقت الشيء يتقفل في وشيهم ..يا دوب بتحركوا.

< عشان كدا حكاية افشال المريخ لصفقة عبدالكريم الدافي مع الهلال جعلت مجلس ادارة نادي الهلال يتحرك بجدية لحسم صفقة يوسف محمد.

< تحرك نحو انغولا..وتحرك نحو سويسرا...وفتح خطوطا مع اتجاهات مختلفة.

< والزمن ماشي...والتسجيلات تبقي لها دقائق.

< ومجدي شمس الدين في مدينة ويوسف محمد في مدينة.

< بتوع التمهيدي ديل الي الان ما عارفين في حاجة اسمها (التلفون).

< يوسف محمد سجلوه بالتلفون.

< عشان تفهموا حاجة.

< المريخاب الموضوع دا ازعجهم شديد.

< اول حاجة قالوا تسجيلو ما صحيح ...وغير قانوني.

< اليوم التاني لقوا (الحنك) دا ما شغال.

< ناس الهلال ما اشتغلوا بيه الشغلة.

< قام قالوا شنو؟.

< قالوا الشطب يهدد الشغيل والتاج ويوسف محمد..عشان الاتحاد العام عاوز يراجع الاستثناءات.

< تاني عاوزين يضحوا بي (الشغيل).

< اصلهم مسجلنه سد خانة ساكت.

< تسجيل اضطراري.

< شطب شنو البهدد يوسف محمد.

< انتوا من البداية ما قلتوا تسجيل يوسف محمد غير صحيح.

< براكم ما قلتوا كدا.

< هسع رجعتوا عشان تشطبوه.

< المهم الموضوع لقوه برضو ما جايب حاجة.

< زول اشتغل بي كلامهم ما في.

< اصلو نحن اتعودنا علي الحاجات.

< افلام قديمة ...كل مرة بنشوفها.

< الاتحاد العام اذا كان اخرج (استثناء) بموجبه اصبح امادو وجعفر بركية تحت السن..هل يعقل ان يعود الاتحاد العام ويتراجع من هذا القرار ليشطب يوسف محمد والتاج ابراهيم.

< انتوا قايلين (الاستثناء) دا طالع من (الملجة).

< قولوا ليكم حاجة بتتعقل.

< بعد 24 ساعة ..المريخاب لقوا كلامهم دا ما منطقي ...ولا بتبلع.

< الحنك طلع (بيش).

< قاموا قالوا شنو؟.

< قالوا المريخ يبعث الجنرال الي سويسرا لعرقلة صفقة يوسف محمد.

< قالوا كدا عديل ...وصرحوا بالموضوع دا.

< طيب انتوا ما قلتوا نحن ما بنعرقل صفقات الهلال ..وجمال الوالي ما شغال بالموضوع دا.

< تجوا هسع وتقولوا بالواضح (الفاضح) ان المريخ بعث الجنرال صديق علي صالح الي سويسرا من اجل عرقلة صفقة الهلال مع سيون السويسري.

< انتوا ما بتخجلوا.

< الغريبة وقت يقولوا ليهم كدا ...بزعلوا.

< هسع قالوها براهم.

< الحمدلله اعترفتوا.

< طبعا المريخاب بقصدوا من الخطوة دي ان يرفعوا سعر يوسف محمد عشان نادي سيون يطلب من الهلال المزيد من (الدولارات).

< عارفين ليه؟.

< عشان المريخ دفع في عبدالكريم الدافي 2 مليون دولار وبعد هذا المبلغ الدافي لن يلعب في المريخ.

< يلعب في سويسرا.

< يلعب في ليبيا.

< دي ما قضيتنا.

< ان شاءالله تخزنوه في جزيرة الفيل.

< المهم انتوا دفعتوا 2 مليون دولار في لاعب ...ما عشان تسجلوه ..عشان ما يلعب في الهلال.

< اها نحن جبنا لينا لاعب احسن منو؟.

< ناس الهلال ديل من شفتنتهم ..سجلوا يوسف محمد بشعار منتخب نيجيريا.

< عشان ما في زول يغالط.

< مجدي شمس الدين ذاتو ما قصر ..(قنص) لي يوسف محمد في تمرين المنتخب.

< والله يا مجدي عمليتك دي التجاني ابوسن ما بعملها.

< بعد كدا المريخاب ما عندهم اي كلام.

< يرسلوا صديق علي صالح ..يرسلوا همد ..يرسلوا الوالي ذاتو دي حاجات ما بتخصنا كتير.

< بعدين صديق علي صالح مع الصادق المقلي شن بسوى؟.

< المقلي دا سفير ...بجيد عشر لغات.

< صديق علي صالح (الجنرال) بتاعكم دا ..لو مشي لي نادي سيون السويسري إلا يقعد يتخاطب معاهم بالاشارة.

< انتوا يا مريخاب الشغل دا ما بتقدروا عليه.

< خليكم هنا مع ناس الدافي وبوضياف ..ديل بتقدروا عليهم.

< ناس الاهلي المصري ما قدروا يعرقلوا انتقال عصام الحضري للاسماعيلي.

< انت يا صديق عاوز تعمل شنو؟.

< غايتو لقيت ليك (سفرة) ساكت.

< عليك الله يا صديق علي صالح وقت تصل سويسرا ...ما تنسي (مسكل) لي همد.

< اصلوا همد زهجان ..وعندو خلاف مع جمال الوالي.

< زول يدفع ليه 2 مليون دولار في لاعب ما سجلوه.

< تدفعوا ساكت.

< بعيدا عن هذا...فان الخطوة التي تمت اول من امس وانتهت بتوقيع يوسف محمد لعقد انتقاله للهلال تعتبر الخطوة الاهم في الصفقة.

< بهذا التوقيع يمكن ناس الهلال ينوموا قفا...لا سيما وان تألق يوسف محمد مع منتخبه في نيجيريا كان يمكن ان يفتح عيون السماسرة ويعدد العروض لنادي سيون السويسرا.

< يوسف محمد سوف يظهر مع منتخب بلاده ان شاءالله في بطولة كاس العالم ..وربما تكون استفادة الهلال المادية اكبر اذا اراد تسويق اللاعب الذي يمكن ان يلفت الانظار اذا تقدم منتخب بلاده في بطولة كاس العالم.

< طبعا الهلال لن يفرط في يوسف محمد ...لكن نريد ان يحسم الهلال امر تسجيل اللاعب في الهلال بصورة نهائية.ونتمني ان يصل الهلال لاتفاق سريع وفوري مع نادي سيون ...لأن يوسف محمد سوف يكون مطلوبا من الكثير من الاندية والسماسرة.

< الخطوة الاخيرة والتي انتهت بتوقيع يوسف محمد امام مجدي شمس الدين تعتبر الخطوة الاهم في انتقال اللاعب للهلال...لكن مع ذلك نرجو الاسراع في تكملة اجراءات انتقال اللاعب للهلال والوصول لاتفاق نهائي مع نادي سيون السويسري.

< ظاهريا يبدو ان الهلال اتفق مع نادي سيون السويسري...لكن ينقص ذلك الاتفاق ان يرسل الهلال نصيب نادي سيون السويسري من الصفقة.

< ملحوظة: الله يسهل.

هوامش

< الاتحاد العام اثبت بخطوته الاخيرة ...انه يمكن ان يساعد اي نادي سوداني اذا كانت هذه المساعدة قانونية.

< نحن كنا فاكرنها قاصرة علي (نجاد) وحده.

< التلفونات طلع عندها هلالابية.

< زي الايميل.

< التلفونات (قطعوها).

< انتوا موش قلتوا الايميل مسحوه.

< الغريبة مجدي شمس الدين ظهر في الصور يستقبل في يوسف محمد...تقول هو عضو في مجلس ادارة نادي الهلال.

< يا زول ما تقول كلامك دا..المريخاب ما برضو ..وبقوموا بزعلوا.

< خليهم يزعلوا...هم البفرحهم شنو مع (وصافتهم) دي.

< انتوا الجنسية بطلعوها ..قبل اللاعب ما يصل البلاد.

< يعني شنو لو ناس الهلال سجلوا ليهم لاعب في انغولا.

< انتوا الهلال دا في انغولا ما عندو رابطة.

< رابطة اهل الهلال في انغولا مقصرة.

< يوسف محمد صحتو اتعدلت بعد ما وقع للهلال.

< الدافي مسكين ..قالوا جمال الوالي عرض ليه يلعب في (جزيرة الفيل).

< انتوا لو جنستوه ما كان حصل كدا.

< السنة كلها شابكننا ...الحضري ...هيثم المرابط ...موبوتو...عبدالكريم الدافي.

< في النهاية ...شطبوا الشغيل وسجلوه.

< عشان ما عندهم حاجة.

< احسن من ان يقعدوا ساكت.

< موضوع المعز محجوب مجلس ادارة نادي الهلال يجب ان يتعامل معه بحكمة.

< من حق اللاعب ان يفاوض وان يطلب.

< الاصوات التي تنادي بعدم الاستجابة للمعز محجوب تقصد ان تبعد اللاعب من الهلال.

< في زمن الاحتراف من حق اللاعب ان يزايد.

< هذا حق كفله له القانون.

< في الهلال المعز محجوب والدعيع وحارس السنية محمد حمزة.

< التفريط في المعز محجوب يعني اننا نفرط في نصف قوة الهلال.

< لا تعطوا المريخ فرصة بالاختلاف مع المعز محجوب.

< عصام الحضري احتفل بعيد ميلاده الـ 37 سنة.

< المعز محجوب يمكن ان يلعب 8 سنوات قادمة.

< خبر عاجل: خلوا المريخ يشوف ليه حل مع ايداهور وقلق..التسجيلات قربت.

الله يخليك

وانشالله حنواصل مع الكتابات الشيقه ل محمد عبدالماجد