} عندما عاد (طٌلبة) الي بلدته من الخارج بعد ان اكمل دراسته في الخارج ...جاء يحمل شهادة دكتوراة في علم (الحموضة).
} علم الحموضة دا ...علم جديد ...ما تشتغلوا بيهو كتير.
} المهم (طلبة) وقت وصل البلد ...الحلة كلها اتكسرت في بيتهم ..موية الزير عندهم كملت.
} جنس خلق.
} طلبة رجع شايل شهادتو ...وفرحان ...سنوني متل (ملاح الرجلة) البايت.. يضحك سنين..سنين.
} زولكم فرحان.
} تقول هو (مفاجأة) صلاح ادريس.
} اول ما طلبة طلع برة البيت نظام بتفقد في احوال الحلة ...لاقهو واحد ...ثبتو ليك طوالي وقال ليهو : انت يا طلبة (صلعتك) دي مالها كبرت كدا.
} الضربك شنو؟.
} اوعي يكون طقاك (سرطان)...قالوا السرطان بحت الشعر...الله يلعنو.
} طلبة معنوياتو بقت في الواطة.
} طلبة بقي زي (المفتاح الرايح).
} صاحب طلبة ..شعر ليك بي صاحبو ...عرف ليك نفسياتو دقت الدلجة من كلام الزول دا.
} عشان كدا قال احسن اكسر ليهو تلج...عشان ارفع ليهو روحو المعنوية.
} روحو المعنوية عاوزة ليها مدرب لياقة عديل عشان ترتفع ليهو.
} اصلو بعيد عنكم ...في ناس معنوياتهم ما بترتفع إلا بالتلج.
} في ناس يحبوا ليك (التلج) دا زي الحافز.
} طلبة مشي شوية ..لقي ليهو ناس واقفين...طلع (النظارة) قال ينظر ليهم شوية.
} الدنيا فيها شنو غير (التنظير).
} دخل فيهم شمال.
} قال ليهم تعرفوا ان العلم اتطور برة.
} في واحد بلافح الكلام زي الشافع الشيطان ...العندو (جدادة) بنتظرها في القفص عشان تبيض ...يشيل (البيضة) قبل ما تقع في الواطة.
} الغريبة ما في انو كان بشيل (البيضة) قبل تقع.
} الغريبة انو كان البيضة قبل ما تقع في الواطة ...كان بسلقها.
} يعني البيضة بتنزل (مسلوقة).
} ومرات وقت يزهج ...كان بفقعها.
} قلت ليكم (شافع) شيطان ....ما صدقتوني.
} المهم الزول البلافح في الكلام زي الشافع الكلمتكم عنو فوق ...قال لي (طلبة)...العلم برة اتطور كيف؟....كدا حدثنا في الموضوع دا.
} طلبة قال ليهم : الناس هناك مسؤولة وبهتموا بالانسان ما زي هنا...ما في احترام للناس.
} معقولة ...العالم برة اتقدم والبلد هنا كلها بتتحدث عن (قنبلة) صلاح ادريس.
} معقولة بس.
} ريال مدريد دا سجل فيغو وسجل زيدان وبكهام ورونالدو البرازيلي والبرتغالي ...ما سمعنا لينا في يوم ...اداري في ريال مدريد قال : عندنا (قنبلة) في التسجيلات.
} وبرشلونة سجلت ألعب ناس في الدنيا ...اصلو ما حصل سمعنا انو برشلونة عندها (مفاجأة).
} احكي ليك حكاية غريبة شوية.
} ناس المريخ ديل مرة قالوا عندهم (مفاجأة).
} الصحافة الرياضية دي كلها قعدت تتحدث عن (مفاجأة) المريخ.
} تصور في النهاية (مفاجأة) المريخ طلعت شنو؟.
} طلعت شنو يا ابو الشباب؟.
} مفاجأة المريخ طلعت (طن اسمنت).
} اصلهم كانوا ببنوا في (الطابق التاني).
} طيب اقول ليك حاجة تانية.
} مرة ناس الوصيف قالوا عندهم (قنبلة).
} الجرايد دي كلها تكتب عن (القنبلة).
} عارف القنبلة في النهاية طلعت شنو؟.
} طلعت شنو يا ابورويس؟.
} القنبلة بتاعة المريخ طلعت (لوري طوب).
} اصلهم كانوا بعملوا في (السور).
} هسع ناس المريخ ديل لو قالوا عندهم (مفاجأة) بتتخيلها تطلع شنو؟.
} تطلع شنو؟.
} لو عندهم (قنبلة) اكيد تطلع (تبيّض) السور.
} بتعرفوا (البياض).
} تلقاكم ما بتعرفوا.
} انت قنبلة المريخ خليها ...قنبلة الهلال دي رأيك فيها شنو؟.
} قنبلة الهلال دي بقت زي (التمساح).
} التمساح يا ريتو لو اكلني.
} القنبلة يا ريتها لو انفجرت فيني.
} طبعا عارفين قصة التمساح.
} ارجع ليكم لي (طلبة) انتوا كلو مرة تطلعوني من الموضوع وتاني الرجعة تبقي لي صعبة.
} طلبة قعد يتكلم عن بلاد برة ...قال ليهم تصوروا الناس ديل عندهم (اسعاف) اسرع من المسكول.
} الاسعاف قبل ما تطلبو تلقي واقف قدامك.
} الاسعاف بصلك قبل الحادث بي 34 ثانية.
} الجماعة قالوا ليهو : عليك الله ما تبالغ فينا.
} دا اسعاف شنو البصل قبل الحادث ...انت مالك عاوز تبقي لينا زي (مفاجأة) الهلال.
} قالوا ليك في واحد ضربو قطر.
} قطر عديل.
} عشرة يوم زولكم فاقد للوعى.
} عشرة يوم هو داخل الانعاش...لا حركة لا مؤتمر وطني؟.
} بعد عشرة يوم زولكم بدأ يتحرك.
} اتقلب علي الجهة التانية.
} فتح عين.
} اولادو السبعة نطوا ليهو في رقبتو؟.
} عمك قال ليهم : مفاجأة الهلال شنو؟.
} الاولاد قالوا ليهو : يا حاج ما في اي (مفاجأة)..صلاح ادريس دا بتكلم ساكت.
} زولكم كتم ...طوالي مات.
} الدكتور دخل ...قال ليهم انتوا قلتوا ليهو شنو؟.
} قالوا ليهو : نحن قلنا ليهو : الهلال ما عندو اي مفاجأة.
} الدكتور قال ليهم : كلامكم دا اكعب ليهو من (القطر) الدخل فيهو ...انتوا ليه بتقولوا ليهو كدا؟.
} القطر ارحم.
} وطلبة ينظر لي اولاد الحلة.
} قال ليهم انتوا عارفين في امريكا مرة في واحد وقع من الطابق رقم 21 ..الزول دا قبل ما يصل الواطة ويدق الدلجة...الاسعاف كان منتظرو تحت.
} انتوا قايلين اسعافهم زي اسعافنا.
} نحن هنا لو حصل حادث او حريق (الاسعاف) يجيك في (تأبين) الزول الذي طلب له الاسعاف.
} لو حصل حريق في حتة ....ناس المطافي يجوك بعد اسبوع.
} تقول سماية.
} غايتو طلبة قاشر بالناس ديل جنس قشرة...وهو ما عندو حاجة غير (صلعتو) دي.
} انا اول مرة اشوف لي زول يحضر ليه دكتوراة في علم الحموضة.
} الحموضة دي شنو كمان؟.
} الحموضة دي حاجة زي (مفاجأة) الهلال.
} ملحوظة: عليكم الله تاني ما تجيبوا لي سيرة (المفاجأة) دي.
هوامش
} بعد قلق ظهر موبوتو ..وبعد موبوتو انتقل مسرح الاحداث الي يوسف محمد.
} وقت التسجيلات تنتهي بتصلوا كرستال رونالدو يا ناس الهلال.
} ناس المريخ ديل ارتاحوا ...اختصروا (المفاجأة) حقتهم في (طارق مختار) وناموا علي كدا.
} طارق مختار مضمون ولا (مفاجأة) مجهجهة.
} هسع واحد يطلع ليك ويقول ليك حمد الشجرة (قنبلة).
} صافي ما تبقي من التسجيلات بعد خصم العطلات والاجازات الرسمية عشرة ايام فقط.
} وناس الهلال عاوزين يمشوا وزارة العدل ...وعاوزين يجنسوا ..وعاوزين يعملوا كشف طبي ...وعاوزين يعملوا اختبارات فنية ...وعاوزين يفجروا قنابل.
} عشان التسجيلات بتستناكم.
} الله يسهل ساكت.
} الله يدينا الصبر.
} يا صلاح ادريس لو كنت عاوز تفجر (الولايات المتحدة الاميريكية) كنت فجرتها.
} معقولة (قنبلة) ما قادر تفجرها.
} نصف لاعبي المريخ يتمنون اللعب في الهلال.
} بل كل لاعبي المريخ يحلمون باللعب بالهلال.
} احلموا ساكت.
} الحضري اعتذر...واكرم اعتذر ...واي زول بغلط في الهلال لازم يعتذر.
} اعتذروا ساكت.
} اول مرة اشوف لي (جبل جليد) بعتذر.
} فؤاد نقة ...اتضح انو نقة ساكت.
} نحن ناقصين يا عم؟.
} احرزوا المركز الثالث قعدوا ينظروا لينا ...لو حققتوا البطولة تعملوا شنو؟.
} هسع بكرة الفاتح النقر يتكلم عن كامبوس.
} وما بعيد الصيني يكون عندو رأي في هيثم مصطفي.
} في الخرطوم اداري بدعم فريقو بالنقة.
} لعنة الهلال اذا اصابت الخرطوم ..سوف يهبط فريق الخرطوم للدرجة الاولي.
} خبر عاجل: انفجار قنبلة في كابول.
موضوع: المفاجأة ان شاءالله تطير 
الإثنين 28 ديسمبر - 11:52
