البعض يفضلها ثنائية

< اليوم الاثنين مباراة تجمع بين الهلال والمريخ ....و(الاثنين) فيها دلالات واشارات كبري.

< الهلال سوف يعمل من اجل ان يجمع بين البطولتين (الاثنين) ...الدوري والكاس.

< وزي ما الهلال عاوز يجمع بين الدوري والكأس ..نجد ان المريخ ان شاءالله سوف يجمع هو الاخر بـ (الوصافتين) الاثنين.

< لا وصافة واحدة ولا وصافتين ..بل ثلاث وصافات.

< خلاص يا المريخاب عاوزين تغالطوا.

< نعدها ليكم.

< جيبوا ورقة وقلم.

< اول وصافة حققتوها في الموسم كانت في (سيكافا).

< قول (الفضية) الاولي.

< تاني وصافة ...هي وصافة الدوري الممتاز.

< قول (الفضية) الثانية.

< ثالث وصافة ان شاءالله سوف تكون وصافة كأس السودان.

< قول (الفضية) الثالثة.

< فضياتكم دي تعمل ليها (دلالة).

< الفضيات الثلاثة دي علي طريقة خالد عزالدين لو جمعتوها ووديتوها الي (دلالة) ممكن تعمل ليكم (حافلة).

< بتجيب ليها حافلة وكرسي.

< المهم ان المريخ علي المستوي المحلي سوف يحقق في هذا الموسم (وصافتين).

< بمعدل وصافة لي كل طابق.

< واليوم ...اثنين....والاثنين يوم مبارك.

< يعني اي حاجة بي اثنين.

< بمعني ان الهلال ان شاءالله اليوم سوف ينتصر بي هدفين.

< عشان نحن اي حاجة عندنا بي نظام.

< عمر بخيت صاحب الفانلة الزرقاء ذات الرقم (الاثنين).

< وهو من الذين سجل في شباك المريخ (هدفين).. رقم فانلته (اثنين).

< اي حاجة نحن عندنا بي نظام.

< حتي (مسح الايميل).

< الهلال اتغلب من مازمبي في استاد الهلال بخماسية ...ومشي جاب التار وهزم مازمبي في بلدو بي هدفين.

< والهلال هسع خسر من المريخ في نهائي كأس السودان بهدف...وان شاءالله اليوم سوف يكون الرد بهدفين.

< عليه حسابيا ...الهلال سوف يجمع ان شاءالله بالبطولتين.

< وسوف يفوز بهدفين ...والليلة الاثنين.

< عشان كدا بنقول لجماهير الهلال ادخلوا ساكت واحجزوا مواقعكم من بدري.

< اعتقد ان الفرصة متاحة للهلال ليحقق الثنائية اليوم وليس هناك ما يمنعه من ذلك ...فهو مؤهل لأن يحقق الثنائية.

< كل ما سوف نتحسر عليه هو اننا اليوم سوف نفقد (رقصة) اكرم الهادي سليم.

< وارقص لي اكرم ..ارقص لي.

< موش انتوا زمان يا الهلالاب بتقولوا : درن لي يا درمة ..درن لي.

< اكرم ننصحه ان يرقص بين (الشوطين)...عشان في نهاية المباراة لن يتمكن من ان يرقص.

< اهداف الهلال قد تأتي في الشوط الثاني ..لذلك فان فترة ما بين الشوطين سوف تكون انسب وقت لأن يرقص اكرم.

< انا ح اخلي ليكم الموضوع دا هسع واعرج ليكم.

< جنك تعريج.

< شفتوا ليكم زول شايل ليه جوكرين ومعرج.

< زمان كان عندنا واحد اسمو (تفتيحة).

< تفتيحة دا انا ما عارف الغشاهو منو ؟...قال ليهو انت فنان ...وانت صوتك جميل.

< تفتيحة دا مقتنع انو صوتو جميل....اي مسابقة يلقاها يمشي يشارك فيها.

< المسابقات البشارك فيها طبعا ما بجي فيها الاول.

< عشان كدا طوالي كان بهاجم (لجنة التحكيم) ...ويقول ليك : الجماعة ديل قاصدني.

< والجماعة ديل بحاربوا المبدعين ...والناس العندها موهبة.

< عارفين الموهبة البتكلم عنها (تفتيحة) شنو؟.

< في واحد صاحبنا قال لي تفتيحة : والله ما شايف ليك موهبة ..غير (كيلو الموز الشايلو دا).

< طبعا تفتيحة كان شايل ليهو (كيلو موز) الوقت داك ...وصاحبنا القال ليهو الكلام دا كانت نقطة ضعفه في الدنيا دي (الموز).

< (تفتيحة) دا مرة مشي لناس الاذاعة عشان يجيزوا ليهو (صوتو).

< دخل علي ناس اللجنة ..لقي ليك (الصلع) دي بتلمع متل كشافات كوبري توتي بليل.

< تفتيحة حاول يكون مختلف ...دخل ليك في اللجنة باغنية (في الضواحي وطرف المدائن).

< تفتيحة دا وقت وصل لي (في قفاهن تور قرنو ماكن).

< واحد من ناس اللجنة كان نائم صحي مع الوصفة ...ولقي ليك (تفتيحة) بقول في (في قفاهن تور قرنو ماكن)...قام طوالي قال ليهو : يا ود الناس انا الاغنية دي سمعتها مليون مرة ..اول مرة اشوف فيها (التور) شخصيا.

< انت القال ليك ادخل علي اللجنة بـ (التور) منو؟.

< تفتيحة طلع من اللجنة زعلان وهو يشكك في وطنية اللجنة ..وبقول ان هذه اللجنة بتحارب المواهب وبتدمر الواعدين.

< بالمناسبة كل (اللجان) كدا ...متخصصة في تحطيم (المواهب).

< بس من يلقوا ليهم (موهبة) يقعدوا يدمروا فيها.

< عليكم الله هسع في داعي اعلام الهلال دا يهاجم (اكرم الهادي سليم كدا).

< اللاعب برضو عندو موهبة ما كعبة ..ما كان في داعي يدمروا ليهو موهبتو كدا.

< والله اكرم دا تاني في عرسو ما يرقص.

< الهلالاب خلوا اي حاجة وقبلوا علي (اكرم الهادي سليم).

< يعني شنو لو رقص.

< الرقيص ما فيه اي حاجة.

< الرقيص احسن من الاعارة الوهمية ..واحسن كمان من الايميل اتمسح.

< الايميل الاتمسح هسع الدخلو في (البرد) دا شنو؟.

< فيها شنو لو اكرم قعد يعبر عن شعورو.

< نحن الحاجة الغايظانا ...انو (الوصافة) دي ما في داعي يرقصو ليهو كدا.

< حارس مازمبي الرقصت رقصتو دي يا اكرم هسع بيلعب في بطولة كأس العالم للاندية.

< انت يا اكرم بتلعب في (التمهيدي).

< ناس كتابي الاول ديل.

< بتوع التمهيدي.

< امس الدرس كان (الهام وسهام) ...الليلة الدرس (الغراب النجيب).

< غراب سنة ثالثة بتذكروه.

< المقررات دي كلها بتواجهكم في (التمهيدي).

< مفروض تذاكروها كويس.

< بدل ما تمشوا تخسروا (معسكرات خارجية) في الفاضي ..اقعدوا هنا وجضموا (كتابي الاول).

< ما فيها حاجة ...ما تخجلوا.

< نرجع لي (تفتيحة)...العامل لينا فيها فنان.

< تفتيحة ...لو سمع ليهو صوت حفلة في الحلة ..بمشي للعريس يقول ليهو: إلا تديني (فاصل) اجضم فيه الوتر.

< تفتيحة دا لو لقاك في ركن ..بتتكلم في تلفون ..لقاك نائم ..كلو ما فارقة معاه.

< محل ما يلقاك بقول ليك : اسمع حاجة من اعمالي الجديدة.

< يا ود الناس انت عندك اعمال قديمة ...عشان يكون عندك اعمال جديدة.

< يبقي ليك في رقبتك.

< لو مسكلت ليهو ساكت ..يرجع ليك يسمعك عمل جديد.

< انا ما عارف انصاف المواهب ديل بظهروا لينا من وين؟.

< يوم ناس تفتيحة ديل...جاهم (حرامي).

< الحرامي دخل البيت ..وكسر شباك الغرفة ...ما خلي ليهو (دهبة) حائمة.

< وقت الحرامي عاوز يطلع بعد ما لملم اي حاجة ...(تفتيحة) صحي.

< قال ليه : بس تعال هنا ...جيب العود المعلق جوة دا وتعال نسمعك اللحن الجديد دا.

< الحرامي مجبور ...جاب العود ..وصنقر عشان يسمع اللحن الجديد في البرد دا.

< الحرامي دا اضايق في الدنيا دي جنس مضايقة.

< ما عرف يمشي وين؟.

< تفتيحة وقت شاف الحرامي بردان قال ليهو ادخل جوة جيب ليك بطانية وتعال ..عشان الموضوع دا يمكن يجر.

< وقت الواطة شرقت ....الحرامي قال لتفتيحة استأذن انا ماشي ..عشان ألحق (الصايغ) وافك الدهب دا واتصرف فيهو قبل ما تبلغو.

< تفتيحة قال ليهو : تمشي يا زول وين اقعد اشرب الشاي...ودوب ما الشاي يجي ...تعال نسمعك العمل دا.

< الحرامي حالتو بقت صعبة.

< اها من اليوم داك الحرامي حلف ما يتلب ليهو في بيت فيهو (فنان).

< البيت البتلب فيه من يشوف فيهو (عود) معلق...بقوم يتخارج منو.

< لو لقي (الخزنة) مفتوحة ما بمشي عليها.

< ملحوظة: تفتيحة في عينك.

هوامش

< الاستاذ عثمان حسن مكي قال ان نجم الدين عبدالله مدافع فريق الخرطوم افضل مدافع في الدوري الممتاز بما في ذلك سامي عبدالله وسفاري.

< وشهادة الاستاذ عثمان حسن مكي ..لا جدال حولها.

< لذلك فان مجلس ادارة نادي الهلال عليه ان يحرص علي تسجيل هذا اللاعب الذي سوف يضيف الكثير لدفاع الهلال.

< اذا وجد الهلال ثغرة قانونية او وجد استثناء ليضم به لاعب الميرغني كسلا فيصل موسي فان الهلال سوف يكون اضاف (درة) حقيقية لوسطه.

< نذكر ان مدرب الميرغني كسلا مبارك سليمان قال في افادة خاصة انه طوال الـ 15 سنة الاخيرة لم يشاهد في الملاعب السودانية لاعبا مثل فيصل موسي.

< نتمني فقط ان يوفق الهلال في تسجيل هذا اللاعب.

< علما ان اللاعب الذي تمنعه القواعد من التسجيل بعد ان يكون قاب قوسن او ادني من القمة يسبب له ذلك احباطا كبيرا...وهو عادة يفشل بعد ذلك.

< لكن نثق ان الهلال سوف يجد له مدخلا او قل مخرجا لتسجيل هذا اللاعب.

< مجلس الهلال عندما كان يفاوض في يونيو الماضي في كابوندي وسادومبا ...كان الجميع يقول : كيف سوف يتسني للهلال تسجيل اولئك اللاعبين ...وتسجيلات يونيو لا يسمح فيها بقيد الاجانب.

< اتحاد الكرة في التسجيلات السابقة كان متفهما ومتسامحا ..ونرجو ان تكون روح الاتحاد العام في هذه التسجيلات بنفس السماحة والمرونة.

< لاعبو الهلال يجب ان يتعاملوا في مباراة اليوم بمسؤولية اكبر ..وان يكون سلوكهم اقوم.

< اذا تعامل لاعبو الهلال مع المباراة بجدية ومسؤولية فان الهلال سوف ينتصر ان شاءالله.

< الهلال محتاج ان يختم موسمه بنجاح ..ويحتاج ان تكون مباراة اليوم مباراة تسعد الهلالاب لأنها تأتي في ختام الموسم.

< الجمع بين البطولتين سوف يرفع اسهم كامبوس كثيرا.

< جماهير الهلال هي الاخري مطلوب منها المساندة والوقوف مع الفريق حتي اخر ثانية من عمر المباراة.

< نرجو ان يتعامل الجميع مع المباراة بمسؤولية وان تكون هناك نظم واسس احترافية في الهلال ..ليس في الملعب فقط ..بل في المدرجات ايضا.

< مفتاح مباراة اليوم يوجد في (المدرجات).

< لذلك فلتحرص جماهير الهلال ان تكون ذلك (المفتاح).

< الرد علي اكرم الهادي ..لن يكون بالاهداف فقط..بل بالتشجيع والمساندة.

< الليلة عاوزين نشوف (جبل الجليد) وهو سريع الذوبان.

< اول مرة اشوف لي (جبل جليد) بجهجهو البرد.

< فييرا الليلة عندو كلام.

< تذكروا هذا الاسم.

< وسادومبا ..برضو الليلة ما بقصر معاكم.

< بس مطلوب من جماهير الهلال الحضور علي وجه السرعة.

< وخليك في استاد الخرطوم.

< ساندوهم ..شجعوهم في كل الظروف.

< وان شاءالله سوف يكون النصر من نصيبكم.

< خبر عاجل: الله معاكم.

» ثنائية فى مرمى حى العرب وكاريكا ينفرد بصدارة الهدافين (نقلاً من قووووون)
» بين مصطفى محمد جماع من منتدى العيلفون وبشرى مبارك ومسادير ثنائية