أنا زعلان من السرورابى (ومن بيرمنجهام بشرى مبارك إدريس )

الاخ أحمد عبدالمنعم عبدالوهاب المعروف بالمنتدى بالسرورابى والناس يشالغوة بالصلعة مثل حالتى (والله صلعة وشيب من الكبر طبعاً وما تقول لى الوراثة والكاب والبرد والجليد !!!!!تجاوزت الخمسين والحمد لله والمكتوب فى المنتدى دى شهادة التسنين !!!!) فى الحقيقة قدر ما حاولت أتذكر هذه الشخصيه فشلت وكنت فاكر الراجل (الدفعة الورانا بى صلعتو دى !!!) وأنا أقرأ فى تعارف الاعضاء لقيت ليك السرورابى (والله صغير وجاهل ) هل تصدقوا السرورابى مولود فى السنة التى أمتحنت فيها الشهادة السودانية ودخلت معهد البصريات العالى وتركته لكلية الشرطة ولكن واصل فيه زميلى وصديقى عبدالله الطيب بابكر الحاج ودالزيداب وكنا ومازلنا أصدقاء منذ الجيلى الثانوية التى أمتحنا فيها فى ذلك العام (تخريمة يا ود أحمد أمتحنت سنه كم من الجيلى وكنت فى فارابى أم معرى ؟؟؟) سبب الزعل أنو السرورابى قدر ما رديت على مواضيعو وشاغلتو فى الكورة وهزايم المريخ ما عبّرنى أتاريهو المسكين ما بعرفنى وهو أكبر من مصعب الزبير بى شويه وفقك الله أخى السرورابى وأدام الله عليك عشق السقاى وعشق ما تعشقة فى السقاى آها بى موضوعى ده أكان ما رديت تكون عوجه ؟؟؟!!!

اولا السلام عليكم ورحمه لله تعالى وبركاته
انا والله يامبارك مابعرفك شخصيا لكن سامع بيك ولو لاقيتك حاليا حا اعرفك من الشبه لانى بعرف اخوانك جيد جدا وخاصه صالح وبعدين انا مابرد ما عندى قصد بس انا زول كيرلس شويه كده يعنى لكن على العموم انا صلعتى ماكبيره وانا كبير وعمرى 30 سنه
ويازول بنتلاقى كان حيين
مع خالص تحياتى

شكراً أخى السرورابى على الرد وبالمرة ما (تهبر ) علينا جاى عندى (لقمة حارة ماشى أسويها أسع والملاح تقلية جاهز أفطر وبالمرة نباصر ليك إقامة بى جاى بى جاى إن شاء فى إيرلندا !!!! لك ودى أخوك بشرى مبارك إدريس أنا عندى أخو واحد صالح مبارك والبقية أبناء أعمامى وهم أخوانى أيضاً .

انا عارف انو عندك اخو واحدصالح وبعرفو كويس وبعرف اولاد اعمامك
العصيده العامله ليم منو بس اوع براك اصلو المغتربين ديل الواحد يخش المطبخ يلخبط لما يفتر فى النهايه يجى
يقول ليك عملت شعيريه وتلقاها ملبكه ماتفرزها من العصيده
لكن يازول بجيها العصيده انشاء الله كان فى المانيا الله يودينا ليها ولا فى البتلاب ياقلبى
على وزن الخوجلاتب ياقلبى واسأل الخبراء فى المنتدى يوروك سر البتلاب ياقلبى
وسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسسلللللللللللللللللللللللللللام

والله يا السرورابى صاحبك نجيض خلاص فى المطبخ والله أعمل ليك ملاح روب والله تقلية أصلو ما تقول شغل راجل !!!زى الناقش أنو (غرامك بتلابى لكن بت منو فى البتلاب؟؟؟؟ (رسل لى فى الخاص ) أصلك بتاع برمجة أها قول ما بعرف !!! عشان أجى أنط فى صلعتك دى (علشان أسلم عليها ماتخاف !!!) . العصيدة أنا معاى أولادى الكبار فى بيرمنجهام لكن العصيدة حدهم معاها رمضان بعد رمضان بكون عندى فيها مزاج كل أسبوعين مرة والله العظيم تحلف تقول عاملها منيرة مبارك والله راضية مبارك والله أمينة الفى السعودية وكمان خفيفة ولينة بس زبادى !!! ومعاها التقلية الماخمج خلى الموضوع ده برنامج الونسة القادمة أكان ما عندك موضوع وربنا يسهل ليك نسمع بيك قطعت الخور وودعت العزوبية والجور والبور وضبحت الخرفان والتور .

السلام عليكم وصباح الخير
بخصوص موضوع الغرام وكده هو ماحاجه مدسوسه ومابتحتاج للبريد الخاص
انا ياسيدى خاطب دعاء الفاضل زين العابدين (بت الاشراف) وكانت خطوبتى فى يوم الخميس
31-7-2008 والحمدلله وجدت فيها كل مواصفات الزوجه الصالحه والملتزمه والنجيضه نجاض اهلنا البتعرفو (بتعوس وتفرك) وحاليا هى فى السنه الثانيه علوم حاسوب بجامعه امدرمان الاهليه
وانشاء من خشمك ولى باب السماء اقطع الخور واطلع من البور وقد عقدت العزم على ان ادخل فى تلك التجربه عما قريب وحا اعزمكم كلكم بس انت تجى السقاى ماتقعد فى البتلاب بس احضر العقد لانو حايكون فى مسجد البتلاب
العصيدهاللينه ماسمحه القويه هى السمحه لكن لازمتكون بتعرف للعصيده والكسره لانو البتلاب مشهورين بالكسره لحدى ما واحدمن ابناء السقاى متزوج منالبتلاب اطلق اسمحى الكسره على واحد من احياء البتلاب

يا سلام ونعم الاختيار من الاشراف ومن الظراف ولى معهم كلهم بدون فرز ود خاص وأكثرهم صديقى (وخصمى فى الكورة والتمارين لمن كنا بنلعب الكورة وأنا أحسن من التازى والله أخر إجازة أتمرنت !!) لكن والله التازى يجليها واقفة !!! مع تحياتى له .تخريمة والله البارح أنا التلاوة كلها ماكان عندى موضوع غير أدعو ليك وغايتو بإذن الله أكان ما الشغل إن شاء الله حاجة أحسن منو ربنا يسهله ليك وأرجو أن ترسل سلامى الى كل السقاى المثلثة من ودأبوالقاسم (ونترحم على موتانا وموتى المسلمين ) من ود أبوالقاسم حتى السقاى الانصار . بالمناسبة أرجو أن تبحث لنا عن تسمية المقابر بهذا الاسم وتأريخ المقابر ولك الود ونترحم مرة أخرى على موتانا . اللهم أغفر لهم وأرحمهم وأسكنهم الجنات مع الصديقيين والشهداء .

» من بيرمنجهام سلام (قصيدة كلمات بشرى مبارك إدريس)
» رمضان فى الغربة فى أروبا وتحديداً فى بيرمنجهام هذا العام من بشرى مبارك إدريس
» الوصايا العشر للارتقاء بالمنتدى(تقديم بشرى مبارك إدريس .... بيرمنجهام )
» مبارة الهلال والرجاء فى سطور من بشرى مبارك إدريس من بيرمنجهام وكلو شىء تمام
» مبرووك فوز الرئيس قصيدة من رائد شرطة معاش بشرى مبارك إدريس بيرمنجهام