يارقش يا زول دقس

أخوانى أعضاء المنتدى تعلمون أنى أكثر الاعضاء (مصاقرة للمنتدى والمنتديات الاخرى ) لاحظت وعينى باردة أن منتدى السقاى يحوم حوله عدد مقدر من الزوار ودى ظاهرة طيبة وأنا أعزيها لسببين
الاول إمّا المنتدى فيهو رقش ومواضيع نحنا شايفنها بسيطة عند آخرين كويسة (الطشاش فى بلد العمى شوف !!!!!!)
أو أن الزوار داقسين جابم الدرب ساكت ومارقين !!!
فما قولكم أنتم ؟؟؟؟؟؟؟؟

احبتي الغاليين:
دعوني اكون أكثر المتفائلين وقول ان الزوار الذين يمرون على المنتدى يتمتعون بما يجود به اعضائه، ونتمنى منهم المزيد والمزيد... قف
انا شخصياً أول شيء بعمله عند ما اجلس على كرسي المكتب وافتح الكمبيوتر بخش على المنتدى فوراً دون أي تأخير حتى اكحل عيناي باخبار ومواضيع احبتي ناس السقايات.....
احبتي لا تنسو اننا امام العالم ويشاهدنا العالم بكل وضوح فهلا استشعرنا عظم هذه المسئولية الكبيرة وارتقينا بمنتدانا.

والله أنا برضو بقول كدة ونعمل على جلب أكبر عدد من المشاهدين
تخريمة : إنت عارف يا ياسر أنا فى منتدى السروراب ردودى كلها مسادير وعملت بوست الدخول ليهو بى مسدار أهلك ناس قرمة وأخوانى يشيلو مساديرى ذاته ويضيوفو فيها كلمة من هنا وكلمة من هناك ويردوا على بيها !!! والله ضحكت وبى جاى أخونا أبو كارم قال لى مساديرك (عويره ) كان قصيرة وكان طويله وهناك (ما حايقة !!!) وفعلاً لولا أمزجة المشتركين لبارت المسادير !!!!!! وأوعه تكون من (المكجنين المسادير وخاصة مسادير بشرى البكتبة فى الناس البعرفم والما بعرفم !!!) تخريمة : معليش عفيتك من التعليق !!!!

عدد المساهمات : 340 تاريخ التسجيل : 22/02/2009

تسلم يااستاذ دعونا نتطلع الي غدا مشرق احييييك يارزين ياغالي الاخ بشري كل شخص وتقديره انا واحد من الناس والله قصائد المدرسة زمان مابريدهن ومابريد الشعر نهائ لذلك لابنتقد لابشكر اما من ينتقدك في بوست وتنقله الي بوست اخر واخر لا اري داعي وماذا تريد من ذلك لقد رايتك ترد عليه في مكان اخر واخر افهموا كلام اخونا ياسر هذا لب الموضوع افهموا قبل ان نجد من ياتي ويقوله بطريقة لن نقبلها ودمت تسلم ود خالي

أخى محمد صديق منتدى السقاى مكشوف على الهواء الطلق من كتب فيه يطلع عليه كل العالم قصدت من نقله لمنتديات أخرى للرآى والرآى الاخر وقد يتفق معه كثيرين وهذه فائدة وأرجو أن نطور فهمنا . المرحوم والدك علية الرحمه أعظم من أنجبة السودان فى الرياضيات وتعلم أن كل شخص كان يكرة الرياضيات والحساب الاملائى ولكن هل ننتقد المرحوم صديق حامد حياً كان أو ميتاً عليه رحمه الله . الذى لا يعجبنى النقد فى مثل هذا الظروف ونحن هواه وليس محترفين فأنت مشكور لابتشكر ولا ينتقد (هذا الذى أريدة !!!!) وهذه هى سياستى أما حكاية أنا بشكر فى نفسى والله العظيم أنتم تخلطون بين شخص أظنكم وشخص آخر فى خيالكم أسالوا من درسوا معى وعملوا معى وتعاملوا معى وبعد ذلك أحكموا والله لا أنت ولا أبوكارم ما بتذكر سلمت على واحد فيكم أو تحدثت معه لمده دقيقة وهذ ليس (تكبراً) ولكن فارق السن وفارق الوظيفة وفارق مكان العمل وعليك الله أسأل منى فى الحله التازى زين العابدين أو مامون ومن السقاى انور تاج الدين أو محمد أحمدعوض السيد وبأختصار (أنا متواضع جداً وزاهد جداً فى هذه الحياه لا أطمع فى مال ولاجاه ولا عايز زول يشكرنى ولايدنى أكثر من حقى لان ما عند الله خير وأبقى ولا أنتظر ما عند الناس لا شكراً ولا مالاً ولا فشخرة مثلما وصفها الاخ أبوكارم وأقسم بالله أنكم غلطانيين فى النمرة !!!!!

الحبيب والبعيد في بلد الجليد/ حمادة
لك التحية وانت تعي ما اقول وما اتمنى ان يكون عليه المنتدى وعقبال الباقين والجايين ..
عزيزي بشرى
فيما يتعلق بالتكجين والمكجنين، اقول ان المسادير نوع من انواع الشعر اتزوقها كغيرها من الشعر بغض النظر عن كاتبها، وفي الشعر اشعار تتزوقها وتآكلها كما الاسكريم شوية شوية مخافة ان يكمل منك بسرعة لحلاوتها، ومنها اشعر تبلعها بلع كحبوب الملاريا حتى لا تتزوقها، وفي الحالتين لا غنى عنهما سوا كان الشعر ايسكريم ام حبوب ملاريا بس كعب الكينين وما اظن اشعارك تستخدم بالوريد.
لك التحية وانت تجود علينا بكل ما هو جميل ومشكور غير مشحود على ذلك ورضا الكل مستحيل..

عدد المساهمات : 340 تاريخ التسجيل : 22/02/2009

مثلما وصفها الاخ أبوكارم وأقسم بالله أنكم غلطانيين فى النمرة !!!!!العزيز بشري اتمني ان تفسر لي هذه الجملة اخي لو انتقدك شخص لا تجمعني معه هذه طبيعتي ماعشانك لكي تريد ام لا تريد اما الرياضيات والعلوم وتدخل اسماء لايخصها الموضوع هذا ليس المكان حيرتني انا قلت الزول دا برد علي اسم غير اسمي تخريمة عامل السن لايمنع التحدث مع بعض والله لناعلاقات من هم اكبر منك في السقاي و البتلاب ولا علاقة لهم بكرة القدم ودمتم

تحياتي ليكم كلكم
والله يا جماعه الناس حقوا تبرد نفسه وما في داعي للمطاعنات بانواعها الواضحة والهظار هظار ..عشان مرات الهظار بيقلب جد وفي ناس بيكونوا شايلين المديدة حارة جاهزة بس راجيين الامور دي اعملوا حسابكم
وانا بشوف الناس لو مسكت في عضم الموضوع احسن
والونسة والمداعبات المنتدى اداها حقها في قسم عدييييييييييييييل مخصص للحاجات دي
والقسمين الاول والتاني لو خليناهن للمواضيع الجادة الفيها عضم انا قايل اخير
مع خالص احترامي وتقديري
الخال بشرى
العزيز محمد صديق
الغالي ود الطيب
دمتم مصباح ينير طريق عقولنا بكل ماهو رائع وعظيم

عدد المساهمات : 167 تاريخ التسجيل : 30/03/2009

ابنناء الغالي مصعب الزبير

كبير كبير كبير بعقلك وعلمك اتمني ان يسمع الجميع

وفقك الله وسدد خطاك ,,,,,,,,,,

املي ان يحذوا الجميع ويمسكو عضم الموضوع

ونحن فخورون بمنتدانا ..........

اختلاف الرائ لا يفسد للود قضيه

والهظار التقيل ما بنشال لانوا تقيل عشان كدا

نكون تقال ومتواضعين ,,,,,, مع احترامي للجميع

عدد المساهمات : 340 تاريخ التسجيل : 22/02/2009

الله اديك العافية الاخ مصعب لكن اعلم اننا نكتب نختلف ونتفق ونختلف لكن القلب ابييييييض لاتوجد به ضغينة او حقد كلنا اهل وربنا اصلح حالنا وربنا اوفقنا الي مانصبوا اليه تخريمه ابوامجد وييين مختفي الله اكون في عون العزابة

عدد المساهمات : 308 تاريخ التسجيل : 05/02/2009

يارقش يازول دقس

عبارة استوقفتني مراراً وصراحة عجزت عن فهمها او الرد عليها 0

وياريت يا جنابو توضح لينا معني العبارة او المقصود منها 0

كنت قبل أن التحق بالشرطة أهوى التدريس وكدت أن أصبح معلم مع الاخوان عبدالله عبدالله ومحمود التوم ولمن ظهر معهد البصريات العالى دخلت المعهد لمده شهر وظهرت كلية الشرطة ودخلت الكلية وظهرت المانيا وهاجرت اليها وظهر منتدى السقاى وتعرفت على مزمل صديق وتدفع كم يامزمل عشان أشرح ليك أو ترسل لى من مطبخ نوال ؟؟؟ مع تحياتى لعموم الاسرة . أخى مزمل بسل روحك الليله قبل ما أشرح ليك عشان تانى تقول والله تانى أوعه من سؤال أو تكتر الاسئله ؟؟!! يارقش أو زول دقس أنا ما عارف يامزمل أنت جيل منو بالضبط لكن أكيد أنا أكبر منك ب 20 سنه ؟؟؟ رقش ودقس هى لغه (الرندوق ) والرندوق زاتو شنو؟ الرندوق هى عامية العامية (هذا إجتهاد من جانبى فقط !!!) ورقش حاجه كويسه يعنى منتدانا إما كويس لكثرة المتاوقين أو ناس داقسين ما ناقشين شىء عن المنتديات ويدخلوا يتفرجوا ساكت !!!!!. على العموم هذا الذى قصده من البوست والذى أقدر عليه من الشرح وأكان إنت فعلاً جاد وما عارف هذه العبارات أنا عندى ليك سؤال واحد.. ليك كم سنة فى السعودية وأخر مرة نزلت السودان متين وإن شاء بتعرف العراقى والسروال أبوتكه ؟؟؟؟؟

ياجماعة ناس السعودية وناس السويد برضو عندهم مشكلة فى (الرندوق ) وأقول قبل أن أشرح للاخ محمد صديق حامد وأرجو ألايزعل لانه رفع يده للسؤال أولاً وسأل عن (غلطان فى النمرة معناها شنو؟؟؟؟)
ياسليم الذوق كلمنى بالرندوق لو تعرف الشوق مره تنزل يوم من علاك الفوق شوف عمايل الحب فى الحشى المحروق !!! ومره أشرح ما هو الرندوق ؟؟؟
صباح أو فيروز ما متأكد منو فيهن عندى أغنية بتقول :
غلطان فى النمره أنا مش بيضاء أنا سمره وساكنه فى شارع الحمراء !!!
تقصد للذى أتصل بها فى صياغ الكلام العادى أو المعنى الظاهر ولكن المعنى الخفى والذى جلسنا سنتين فى كليه الشرطة ونبحث عن السوابق القضائية من لدن أبورنات رئيس القضاء الاسبق حتى عهد خلف الله الرشيد وأبوقصيصة من يقرأ هذه المجلدات ويستمتمع بكلام وتعبيرات القضاء وأسلوبهم الرصين فى تناول الاحكام يستطيع أن يتلمّس (الخفى من المعانى والرندوق والحنقوق والتبروق والفرطوق !!!!) يعنى بإختصار وبالعربى الواضح (أنتو فاهمنى غلط !!!! ) أنتهى درس اليوم ولكنى جاهز لاى (سعال !!!). كان التعلمجية فى سنين الكلية عندما يشرحوا لنا درس السلاح يقولو لينا فى واحد عندو أى سعال؟؟؟؟!!! يقوم عزالدين يضحك ويقول ليهو (سعال ديكى ؟؟؟؟ ) ولكن أنا جاهز لاى سوال حقيقى ومعليش أنا ما طولت من السودان فأرجو أن تعذرونى .