في رثاء الهلال

في رثاء الهلال
يا هلالاب قبيل قلتو الكفر اسيادو وقلتولنا الهلال ما بتغلب في استادو
قلتولنا الفريق في كامل استعدادو وفريق مازيمبي يضرع تقول في بلادو
القلتولنا معروف مقبرة أبطال دفنكم فيهو مازيمبي ورقادكم طال
لو كان عندكم للكاس بصيص آمال مباراة الذهاب أبقولنا فيها رجال
كلاكم في الجرايد كلو ما كان صاح وحقو يكتبوكم فيهو إستيضاح
فريق مازيمبي في كل الخطوط مرتاح وانتو فريقكم تقول بس أشباح
الراجيك تجيبلو الخمسة جات معكوسة في ليلة الأحد مازيمبي كان كابوسا
تجاربوا الخاضا كلها ما إستفاد بي دروسا ما فادوهو لا إمبيلي لا إيفوسا
قلتولنا الهلال بدري إكتمل متجلي وفي ليلة التمام ظهر الخسوف الكلي
الكنغولي لي قون شوتو ما بتجلي خمسة أقوان تقول أكنتو لاعبين بلي
بعد عشرين دقيقة بدا الهلال ينهار لقى شوية هبوب بي قطعة التيار
ليلتك يا الأحد لي هلالانا أسود ليلة مطر مازيمبي غلبوا دفاعك إترس سيلا
التوفيق بعيد ما جانب التشكيلة صحيح أحرزتو قونين إلا ما خدين كيلا
الليلة الهلال في إستادو مقطوع ريحة وفيهو عشمنا كان يحرز نتيجة مريحه
غرقت مركبو من أول التلقيحة لا تنغشو يا الأخوان نتيجتو فضيحة
ما كان عندو كورة نزلت عديل في مكانا أول قون فرحنا إلا العشم غشانا
ما لقينا الولد من الغلب فشانا يا أمبيلي معاهم إنت ولا معانا
الأسما القبيل المتل الدهب لمعانا ما قايلنها بتغيب قبل آوانا
لا إيفوسا لا مساوي نالو رضانا بعد ها الحالة نرجا الفي الذهاب راجيانا !!!