حتى لايهرب أخوانا المريخاب من المنتدى !!!!!!

رد: بمناسبة مريخ هلال يوم 11/ سبتمبر

--------------------------------------------------------------------------------

مقـــبرة الممــتاز
(مستكاوي)

هذه القصيدة كتبها مستكاوي عقب فوز الزعيم بالممتاز من داخل المقبرة
الموسم الفات 2008
وجدت هذة القصيدة فى منتدى أنا سودانى ورأيت أن أنقلها لهذا المنتدى لسببين
*الاول أن تكون واحة يرتاح فيها المريخاب (الوصيفاب ) من لهيب الثلاثة والخروج صفر اليدين من بطوله (الكبار ) التى دخل فيها (الصغار ) بالغلط!!!!!.
*أن ينبرى أحد أولادنا ويجارى هذة القصيدة وهى أقرب الى مسدار الدوبيت وحقيقة القصيدة رايعة والان الى القصيدة:

مقبرة الخصوم الليـــلة رقــــدت ريكة
والعجب الملك ماسك زمــــام تحريكة
لسة الجاي كتير والحل نهــايتو وشيكة
والبعمل شفت يلـــقانا نحــــنا الويـــكة
***
الليلة الزعيـــم في هيـــــبة يحمد سيدو
الممتازجمـــيل الليله جـــاب تحـــديدو
فى كل الخطـــوط نحنا العـــب بنجيدو
بالعجب الرهيب والزهره طمبل وميدو
***
مريخــــنا العظيم الليــــله موجك عاتى
البغلط عليك حرررم يكــــون الخـــاتى
طمبل طمبلـول جنب الشـــبك بعــــاتى
بى فد قون جمـيل قـــــام طير الشماتى
***
طمبل طمـــبلول الليله طـــــرق فاســو
دربــك داريوكــان بالقــرقريبه وعاسو
ضـــاق سيد البلد الليله شفـــنه مقاســـو
حــــارسنا الامين تماها بى نص راسو
***
ما كــــان العشــــم واللع تب يا ســـيدا
الألفاظ كمــان بالحــــيل بقيت بتـــجيدا
مخــرجنا الخطـــير أدانا لقطة فـــريدة
بنمشـــيها ليك ما بنســـعى لي تخلـــيدا
***
اي آر تي شهـــود إنو السفير أحــرجنا
و نحن الحاضرين يا ريتنا ما إتفــرجنا
عفـواً يا برنـــس الكاس كتير أبهــــجنا
عــــادي بننغلب لا ضقنا لا إتزهـــجنا
***
العجب الحبيب الزول دا ياخـي أعـذرو
للمنطــــق فقـــد ورانا آخـــــرو ونذرو
قائدنا الجســـور اللـــيلة تب زاد وزرو
و سفير النوايا خســـارة قـــــــلل قدرو
***
العجب العجـيب بالجـــــد عجبنا أداءو
بالحيل صال وجال ملك اللعبو أرجاءو
الناس الفصـــاح اللـــي فريقنا أســـاءو
بالقلم الهزيل ضاقوا الوجـــع و أعباءو
***
شكراً يا كروجر و مازدا و أبراهومة
الإنجــاز كبير بالفكـــرة و المعلـــومة
مقبرة الخصـــوم اليوم بقت مردومــة
خليتو الجمــــيع ينعق نعيـــق البومــة
***
في فرح الزعيــــم ورينا رايــك ياخـي
الأســـد الجســـور قدامنا يصـبح ناخي
خليك في الصميم من غيرخمول وتراخي
قطاعين رقاب نضرب ضرب سلاّخي
***
الخبر الأكيــــد ما فيـــهو أيّ تـــواني
كاسك يا الزعيم ما أظن يفـــوتك تاني
بالدرب العـــديل مــــابي القفا الوراني
بندك الحصون و البركة في تســخاني
***
أركان الزعيم صبحت حصون مأمونة
الكاسات دوام جوّة الجيوب مضمــونة
حولنا الرصــــيد حققنا أعلــــى مؤونة
شيدنا الديار كاسات و بوهـــية و مونة
***
دايـــماً للأمـــام ما بنلتفـت للمــــاضـي
كل دول الجوار أسســنا فيها أراضـــي
طوربيدنا الحبيب للجولة أحسن قاضي
خليك في الصميم وأختى الكلام الفاضي
***
أخوان الجنيد نعم الصــمود و الهيـــــبة
ماسكين النظـام بي روح جميلة و طيبة
حافظين للزعيم من غير غضاضة وريبة
و البجي في الطريق يادابو شاف الخيبة
***
مقبرة الخصــوم إليـــوم بقت منـكوبة
طوربيدنا الخطـــير ســـوالا دق اللوبة
مقصورة السواد مــا لامّة في راكــوبة
أســـرع يا الغـــزال أدينــا قلبة هـــوبة
***
الهدف الوحيد جـوة القليب قال حــارقو
دا المريخ خطــير أحسن تسيبو تفــارقو
نحن أهل الفنــون حتى اللــعب بنسارقو
أبشــر يا عجيب جـــاييك لسّــع وارقــو
***
في وسـط الغيـــوم نجمتنا فــوق بتلالي
مريخـــنا العظيم بالجد مقــامك عـــالي
من خلفك رجــال أمثال جمــال الوالـي
البـجـي في طريقنا بحـت كُنن و بلالي
***
جمهور الزعيم خليك معاي في الصورة
كاساتك دوام جـــوة القلــــوب محفـورة
نحن أهل الفنون و أسياد عمـوم الكورة
بي إستاد جميل من ناسو لي المقصورة
***
نحن أهل الزعيم جمهورنا دايـماً واعي
في كـل الظـــروف تلقاهو لينا مراعــي
خلــف الإنتـصار و الرفـعة دايماً ساعي
مجلســنا الوقور نعــم الأميــن الراعــي
***
نحن أهــل الكـــؤوس جوية أو أرضية
الطوربيد ضـرب و القصة تب مقضية
أبو القانـون تعـــال أمرقلــنا العرضـية
يا ناســنا العــزاز ما تلفـــظوا الفضــية
***
نحن جنود شبــاب مـانا العجاز كركبنا
بنشق البحــر و المــوج بخـاف مركبنا
بنخوض الدواس لا خفـــنا لا إتكبكــبنا
شد و أركـب عديل لكــن منو البركبـنا
***
في كل الظـروف مريخنـا بلعـب كورة
بي الزوق الجميل صفوتنا جد مشهورة
واثقين من سهام طوربيدنا والمقصورة
ما شفنا العجب فـي يوم بشوت قارورة
***
ده المريخ كبيــر بـــي حقو ما متسول
للافضـــــل دوام تلقــاهـو جـد متحـول
مجلسنـا الخبيــر بالحنكـة فيهــو نعـول
والبجـي فـي الطريق والله ليـلو بطـول
***
الممــتاز وصــل أثبتنا فيــهو وجــودنا
و في الكرم الأصيل في الدنيا باين جودنا
ما راجيــن وزير يسندنا يرفـع عــودنا
و البـدخل رويســنا نجيبو بي مجهودنا
***
القانون صريح و القصة ماها شــطارة
ما داخلنا سوس مانـا البنــرجـى وزارة
قـالوا أبو القوانين قلنا برضو حضــارة
ماسكــين النظــام إلاّ الظــروف غـدارة
***
عذراً يا النوايا العمـــلوا ليـــكي سفارة
كان قوي كان ضعـيف الكورة جد خرخارة
إعــلام الســــواد الباقي ليــنا شـــرارة
المعــدن صفيـــحة و اللســان قرقــارة
***
أركـــز يا الزعيــم الليـــلة يــوم النتــرة
اليوم الكلام فــي حضــرة أروع سـهرة
بي أروع جنود الصفـــوة جـــد مفتخرة
عجبي و طمبلي و في الإحتياط الزهرة
***
النضــــم الكتــــير و الله ياخـــي فلقـــنا
جبنا الكــاس عديل لا نمــنا لا إتسلقـــنا
جاهزين بي جيوشنا و لي رويسنا حلقنا
نحن أهل الــدواس و الحــل بجيبو قلقنا
***
شفنا مدرجات صاحبنا..(لِّب) .. مبسوطة
و حبيبنا الجنيد بالطــبلة عامل جــوطة
جمهورنا العظيم ساط الملاعب سـوطة
بي لغة الورق ممكـن نقــول مــربوطة
***
أخوان العجـب بي كل صــراحة أجادوا
صاروا مهندسين رسموا اللعب و أبعادو
عن ظاهر القلـوب للخطة درسوا و زادوا
خلّوا الشــوف طشاش و الله جد بترادوا
***
أكـــرم ود سلـــيم الخـبـرة جـاية معاهو
دامـرنا الجســور يــا ربي تم مســعاهـو
و سفــاري الأمــين يتهــنى في دنيــاهو
نتمـــنى الصـــلاح و العـــزة لي إيداهو
***
ندعـــــوك يا كــــريم رب العبـــاد يـا الله
مريـخنا العظيم في عمرو ما يشوف زلة
أكــرم بي عفـوك قدال و مـــــوسى و بلة
و إتولى الشغيل و عطــية ما يشوف عـلة
***
يا المتـربصيـن شوفــوا الكــــلام التالي
واتحرو الطـريق مريخـنا اصــــبح عالي
في الكنب السعــودي وجيمــي ود ناتالي
مافي مقـارنــات بيــن الهبــوب والوالي
***
تيـمــك يا الـرئيــس الوالــي ميـة المــية
سيرتك في البلاد بي كـل صـدق محمـية
جـيـهـــت الفـريـــق بالفـــرد والكـــمــية
نـعــم الالـتـــــزام والله فـيـــــك محــرية
***
يا رب العبــــــاد نـتهـنــي بــــي واليـــنا
والحـــظ السـعيـــد نـتـمنــــي لـــي اوبينا
جمهورنا العظيم انشاء الله يرضـي علينا
نتمنـي الـصمــــــود والعـــزة لـي نـاديـنا
***
والينـــا الحبيـــب يــا ربـي احفـــظ مــالو
يسعد بي الصلاح والرفعـة فـــي اعمــالو
الـــــزول الصـــدوق افعــالـو زي اقـوالو
مـن شـر الحســـود يـــا ربـي حسـن فالو
***

كـــل انجــاز جديـــد والله جــد بفــرحـنا
بعــــد الاجـتـهــاد الليلــة دابنـــا ارتحـنا
لـو درتـوا النظــام تلقونا في الوش نحـنا
وكان درتو الكجار حررم تشوفو المحنة
***
مريخنـا العظيــم ورانـــا لــون الجمــرة
اتوالـت جمـوعنـا وليهــو جـات معتمرة
لسة الجاي كتيـر مريخنـا عـينـك حمرة
يا نـاس الوصـيــف بالله اعملــوا عمـرة
***
المسكيـن كلتـشي الليلة قاموا عليـهو
ناسيـن فضلـو والاربـاب كمـان ناسيــهو
ده الكـــان الهـلال جـوة القلـيب خاتيـهو
ستاشـــر هـدف مفـروض يغفـــرن ليهو

رأيت أن أرد على الاخ المستكاوى بعد فوز المريخ بالممتاز العام الماضى فى إستاد الهلال بعد أن أنتهت المباراة بالتعادل وقلت بعد مباراة الثلاثة النارية فى بطولة الكبار الافريقية وفى نفس المقبرة قلت :
مقبرة الخصوم........ فيها الوصيف إتجنّدل
وتوّج للهلال فى القمّة ........ مشى وإتقدّل
دايماً ضربو حامى ........ وأصلو ما بتبدّل
خلاهو الوصيف جمهورو ........ نامن ثكّل
شوف كيف بارى ديمبا خلى. الوصيف إتبهدل
والحارس وقع ..... وقع وفى شباكو اتجندل
وصاروخ المعلم ...والله ديمة ..ديمة مدنكل
وشوف إيفوسا ضربو... خلا الجميع إتزلزل
تلاتة يمين كتيرة ...... ما أصلو ديمة مسبّل
**********************
وشالو الفاتحة فيهو ناس زيسكو فى الردكاسل
فى أوّل دقائق أكرم مرض ..مرض متخاذل
وفى آخر اللقاء طردوهو ....... قام متحايل
وكان حال المريخ حقيقة........ حالو المايل
وحتى سيكافا طارت وفى أرضو كان ما خايل

» مريخ من ورق جد جد
» يا المريخاب سلام وكان( الامل)تتهنوا
» درس اليوم الاثنين 22 نوفمبر حديث لاتحاسدو ولا تباغضو ولا تدابرو وكونو عباد الله أخوانا
» نقلاً من قون الرياضية ... العايز يعرف لما هرب المريخاب يدخل من هذا الباب !!!
» المريخاب ... والهلالاب ... تخيلو أننا وصلنا النهائى ما هى إقتراحاتكم ؟؟؟