تكوين لجنة الحاسوب والانترنت بالسقاى البتلاب

كلفنى الاخوان بالقرية لاختيار لجنة مركز الحاسوب والانترنت بالسقاى البتلاب لان إختيارى سوف يقبله الجميع إن شاء الله وقد أخترت هؤلاء لهذه المهمه وأعلم أن هناك من هم أكثر كفاءة وأداءً ولكن أكتفينا بهذا العدد ولاشك ان كل اهلنا سوف يكونو يداً واحده لقيام هذا المشروع والذى سوف يكون بإذن الله حديث المنطقة كلها ويعم خيرة الجميع بفضل المولى سبحانة وتعالى وسوف يتم بناء صالون كبير يقسّم ثلثين للرجال وثلث للنساء وسوف نبدأ بعشرة أجهزة حاسوب ويصمم المشروع لثلاثين جهاز حاسوب 20 للرجال و10 للنساء إضافة الى 6 كابينات إتصالات تلفونية حتى يكون المحل مركز متكامل لكل الخدمات إضافة للتصوير والفاكس وسوف يقام هذا البناء بنادى السقاى البتلاب الثقافى الاجتماعى والرياضى .وقد أجريت عدة إتصالات بأهل الخير والشركات ووعدوا خيراً واللجنة مكونة من الاتية أسماؤهم :
1. الفاتح على بابكر . رئيساً
2.زين العابدين الشيخ الطيب . نائب الرئيس
3.الاستاذ بهاء الدين مضوى ابراهيم المحامى . سكرتيراً
4.عبدالعظيم الهادى عبدالرحيم أمين المال
5.أحمد بابكر البتل . نائب أمين المال
6. كمال الشيخ الطيب .عضوأ
7.الاستاذ عبدالهادى حمد ابراهيم المحامى .عضواً
8.سيف الدين عباس الصديق .عضوأً
9. عبد الوهاب ميرغنى عبد الرحيم (ممثل اللجنة الشعبية ) عضواً
10.عماد محمد إدريس عضواً
11.عبدالسميع محمد أحمد عضواً
12.أبوالقاسم العوض صالح . عضواً
13.مجدى محمد عبيدالله .عضواً
14.أبراهيم الطيب صالح عضواً
15. ياسين محمد صديق .عضواً
16عصام عبدالرحيم عبدالماجد
17وسحنون فضل الله حسين (اعضاءومسؤلين تقديرات البناء والاشراف والخرط )
18.ممثلين المغتربين بالسعودية . أبوالقاسم حمد أبراهيم عضواً
19. مضوى التوم عبد القادر عضواً
20.عبدالعزيز على بابكر . عضواً
21.أنور الشيخ عبدالله . عضواً
22. ممثلين الشباب ثلاثه وهم دكتور . مامون عبدالله محمد عضواً
23.هشام الطيب محمدأحمد عضواً
24.مجاهد محمد السمانى عضواً
25.التازى زين العابدين عبدالله .عضواً
26عادل الطيب إدريس .عضواً
27 هناك أربعه من الاخوات ممثلات المرأه . الاستاذة الشفة محمد أحمد الجميل
28.الاستاذة . الناعمة الهادى عبد الرحيم. عضواً
29.المهندسة الزراعية . أمنه الزبير خوجلى .عضواً
30. حكمه على الطيب . عضواً
أتمنى من الجميع قبول هذا (التكليف ) والعمل على تقديم الافكار والوقت والجهد والمال لقيام هذ المشروع العملاق والذى سوف يجعل القرية تواكب التطور والنهضة والتى تتبارى القرى فيها وأخرها مركز الحاسوب فى الفكى هاشم وكذلك عند أهلنا بالسقاى والذى نتمنى أن يكتمل قريباً سوف أكون معكم بالهاتف لمتابعة كل صغبرة وكبيرة وسوف نكون يداً واحدة لعمل الخير لقريتنا وأهلنا نسأل الله التوفيق والسداد وسوف يقدّم لكم الاخ عبد العظيم الهادى بعد صلاه الجمعة هذا المشروع وأرجو أن تباركوه وتعملوا على بركة الله .

ود المبارك
ماشاء الله ايجابيات الملتقى الثاني بدأت تظهر عملياً وألف مبروك على هذه الخطوة المباركة وعيني باردة على اللجنة كلها درر وجواهر وربنا يوفقكم لتقديم ما فيه خير المنطقة.
والسمح بعجب وأهلنا يستاهلون كل سمح وجميل.

عدد المساهمات : 308 تاريخ التسجيل : 05/02/2009

الف مليون مبرووووووووووك
مبروك علي الفكرة وكل الشكر لمن طرح الفكرة وربنا يتمها علي خير وبركة
ومبروووووووووك اللجنة وهم اهل لهذا التكليف والكل يعلم ان العمل الاجتماعي تكليف وليس
تشريفاً وكل من يقبل بة يحس بالتشريف عندما تتوج جهودهم بالنجاح وتجد الفرحة في عيون الصغار والاحترام من الكبار 0
ويا جنابو نحنا معاكم اذا احتجتو لي اي شئ
وربنا يوفق الجميع

[center]حقيقه هِمَم الرجال تصنع المعجزات
وبداية المليون ميل خطوَه
فهنيئاَ لأهلنا لإختيارهم ودالمبارك(جنابو) لتكوين اللَجنه وإنشاء الله
ستكون مقبوله من الجميع وهى كما أسلف أخونا بشرى تكلَيف وليست
تشريف فأتمنَي من هؤلاء النفر الكريم أن يكونوا عضُداَ واحداَ حتى تعُمَ الفائده
ووحدهم الرجال من يصنعوا التاريخ ,فهيَا نتطلَع لغـدٍ مُشرق يطال أجيالنا القادمه
وطالما يوجد بيننا نَوع (جنابو ود المبارك) فأكيد أكيد ستكون الأيَام مُشرقه فهلٌَمُ
لإشراقــــــات تتزايد
أبوطيبــــــــــه

يا السميت اسمك omer الجنه عدلت بس عليك تعديل كلمة (العربيه) فهية بالتا المربوطة (العربية) وتصحيح (حتي) فهية تكتب هكذا (حتى) وليس باليا وعليك تصحيح كلمة (مضحكه) فهي تكتب هكذا (المضحكة) كما عليك تصحيح عبارة (حاجهوالله) التي وردت ضمن عباراتك، بس بعد دا ناقص تورينا اسمك ومكانك عشان نجي نشكرك ولا دي قلبك تقراها، فياخي من باب الشجعة والرجولة ان تعرف بي نفسك والا احترم نفسك أوفارقنا هذا ليس مكان للمتسكعين والمنحرفين.

عدد المساهمات : 61 تاريخ التسجيل : 04/05/2009

السلام عليكم نعتزر كنت بعيد عن المشاركات لظروف العمل خارج الخرطوم مبروك جنابو وربنا اوفق الجميع ود الطيب ماتحرق اعصابك اي شخص عاوز تعرفوا بتعرفوا والله لو شغال من لابتوب برضو بتحدد موقعوا الشبكة مربوطة مع بعض واعلم ان اي كلمة بتتكتب مراقبة علي مستوي العالم وكل دولة عندها الحق في ذلك انتظر وترقب

عدد المساهمات : 39 تاريخ التسجيل : 23/03/2009

نرحب بتكليف العم بشرى وحرم مافينا زول برجع وراء
وبالمناسبة لازم من تكليف بعض الاعضاء بمثل هذه الاعباء
والاخوة المكلفيين من قبل ماشفنا ردهم فى منتدى الاخبار

بحمد الله وتوفيقة أستطعت الاتصال هاتفياً من بون على الاخوان العم الفاتح على بابكر والاخ عبدالعظيم الهادى وفشلت بعد عدة محاولات بلاتصال على مجدى والاستاذ عماد محمد إدريس كما أتصلت على الاخ أبوالقاسم حمد فى السعودية وسوف أتصل على بقية الاخوان لشرح الفكرة .
*الاخ مجاهد محمد السمانى أرجو طباعة صفحة تكوين هذه اللجنة وأن تصورها 26 صورة وتسلمها الاخ عبدالعظيم الهادى لكى يتلو على الاهل بعد صلاة الجمعة أسماء أعضاء اللجنة ويعطيهم فكرة عن المشروع وقد حاولت الاتصال على مجدى محمد عبيدالله لهذه المهمة وفشلت كما أرجو وأنت فى العاصمة وإمكانياتك طيبة بفضل الله أن نكون حلقه وصل مع بعض لكى تعكس لى كل صغيرة وكبيرة فى هذا الامر خاصه أنّك عضو فى هذه اللجنه .
* وأشكرك والاخ هشام الطيب محمد أحمد على الحماس (والحلف بالطلاق ) لقبول هذا التكليف وأرجو أن تكون هناك طله يوميه فى هذا الموضوع وتقبلوا شكرى وتقديرى لكم ولقريتكم .

مبروك يا جنابو تشكيل اللجنة وعقبال افتتاح المركز انشاء الله ومثل هذه الانجازات بتهلك الحسدة والمردة من الانس والجن وسيروا وعين الله ترعاكم ونحن جزء اصيل من هذا المشروع وجاهزين يا جنابو لاي تكليف وننتظر منك فتح باب التبرع ان كان بالاجهزة او بالمال وانا هنا في هذا البوست من سكان البتلاب ولك التحية جنابو على اخر مسدار في من لا اسم له....

الاخ محمد بابكر رجل المال والاعمال لاشك أنك تتابع الاخبار بالسقاى البتلاب من الاخوان بسوق ليبيا عبدالعظيم الهادى أمين مال لجنة الحاسوب والانترنت والاخ أحمد بابكر مدير أعمالك بسوق ليبيا ونائب أمين المال لجنة الحاسوب والانترنت. رأيت من خلال هذا البوست أن أطلب منك دعم مشروع الحاسوب بتبرّع سخى يتناسب مع عظمة ومكانة السقاى البتلاب عندك وحرصك أن تكون فى مقدمة القرى فى مجال رفع الامية الرقمية . ونحن نتوقع أن يكون رقمك الذى تعلن عنه كبيراً إن شاء الله خاصه أن النداء نبعثه لك وأنت فى الصين البعيدة ..... فأرجو أن تطالع هذا البوست أو أن ينقله لك أحد الاخوان ، الاخ محمد أنقطعت إتصالاتك وفقدت تلفونك لعل المانع خيراً أرجو معاودة الاتصال .أفتقدناك فى رحلات النيّة الاخيرة خلال إجازتى العام الماضى فبراير 2008م وخلال هذا العام مايو2009م ونتمنى أن نلتقى قريباً عند إفتتاح هذا المشروع إن شاء الله وأخيراً أهديك هذا المسدار:
يامحمد ودبابكر..... جود علينا وأدفع
ومعروف يدّك سخيّة من صِغير ترضع
بتلابك معاك......... اليد تناول ترفع
شوف كيف الصغار فى ريفنا هم الاجدع
وشوف أخوان بابكر سووا وكانوا الابدع
وتنقد الرهيفة إن شاء الله..... ما تترقّع

الاخ كمال الشيخ الطيب نتمنى لك عاجل الشفاء وناجع الدواء.كمال فى اللجنة فى اللجنة أو خارجها قناعتى أنه سوف يقّدم دون إبطاء سواءً باللجنة أو خارجها أرسل له تحياتى وهذا المسدار:
ود الشيخ كمال........ كفارة ليك وسلامتك
ويارب دايماً معافى نفرح حضور فى كرامتك
عايزنّك تطوّى ودايماً ...... تطّوى ظلامتك
أدفع بى سخاء ...... عارفين قديمة شهامتك

العم عبدالعزيز على بابكر والاخ أحمد عبدالعزيز تحية طيبة نحييكم ونقّدم لكم مشروع الحاسوب والانترنت فى السقاى البتلاب ونعشم فى دعمكم لهذا المشروع وأقّدم لكم هذا المسدار :
ود على عبدالعزبز... ودبابكر وبلتنا
جنب غابة جدودك ختينا ساس ختتنا
مركز كمبيوتر .. ما تسمع الغالطنا
بى دعمك يقوم ويزيد على حلتنا

الاخ مضوى التوم لك الود والتحية وأصحابنا ناس الكدرو يسألو عنّك ... رأيت ان أنقل لك عبر منتدى أبناء السقاى مشروع مركز الحاسوب والانترنت بالسقاى البتلاب وأنت صاحب مواقف فى تسجيل الفريق فى الثالثة وفى مياه القرية وفى كل مشاريعها كنت حضوراً وأنا أكثر الناس قرباً منك أيام زمان وأيام البوكس بتاعى 78 وبعده الكوريلا وعموماً نتوقع دعمك السخى وأليك هذا المسدار :
ود الكرام...... مضوى عبد القادر
فى المعدن أصيل فى الاصالة النادر
يعمل من غير كلام تلقاهو ديمه يبادر
يا بحر الدميرة الصوتو عالى وهادر

الاخ عبدالحليم السيد لك الود والتحية ولاشك أنك سوف تسعد وأنت كبير المحاسبين والحاصل على الزمالة من أعرق المعاهد البريطانية فى لندن سوف تسعد بمشروع الحاسوب والانترنت فى السقاى البتلاب والذى ينتظر دعمكم ووقوفكم وإليك هذا المسدار :
أبو عبدالرحمن ودشيخنا ود السيّد
دارس الاقتصاد درجاتو فوق الجيّد
فى علم الحساب حافظو وفيهو شِديّد
عمّر مركزك مركزك وشيّد وزيد حا تشيّد

ياود المبارك العملتو جد شـــــئ طيًب
وودالصادق معاكم يمين قريب وقريًب
وعمُوم أولاد سروربس إنت دُق جرًب
مابنفوتك يمين إن شيتك هوايلو تشيًب
وكما أسلف الخال العزيزطارق الشريف تجدُنا بين الغابة والجِسرِ وحاضرين وجاهزين أياً كان المطلوب والتحايا عبرك للأهل بالبتلاب
أبوطيبَــــــــــــــــه

ود الصادق الطيب والله ما قصّرت وأنا دخلت سريع وجارى على الشغل فى الميرتيم والليلة ربما كان أخر يوم وربما نعمل لبكرة أو بعد بكرة عموماً اعد برد هذا المسدار وقد أعجبنى مسدارك وواصل فى المسادير .

الاخ ودالصادق رغم أننى شغال الليلة لكن بعد الساعة12 ظهراً واليوم هو متابعة أخذ الاجهزة والاغراض الخاصة بالشركات التى حضّرت للمؤتمر والعمل حتى العاشرة مساءاً وكتبت لك المسدار وواصلت لبقية الاخوان وإليك المسدار :
ودالصادق حبابك والله ما قصرّت
مسدارك ظريف بيهو يمين بدرّت
عامرة يمين ديارك إنت الزرع خدرّت
بى دعمك نزيد ومركزنا ليهو حضرّت

الاخ أبوالقاسم حمد وأسرتة الكريمة الابناء حمد ومحمد ومروان وتسنيم ومروة المتواجدة بالسودان والاخت أمينة مبارك إدربس لكم التحية من بون ورأيت وأبوكم العم والاخ أبوالقاسم من أكثر وأطول الناس يداً فى دعم مشاريع القرية رأيت أن أرسل لكم هذا المسدار:
ياودحمد وأبوحمد ودحليمة الفى الرياض ساكنين
جدودك فى السعية يدو المنيح ... المنيح وسمين
إيدك ديمه قدام ......قدام... شايل مع الشايلين
بتشيل التقيلة...... التقيلة ومعاها ... مرحتاحين
وما شايلنو هم ....... نحمد نقول ........ آمين
لى مركز كمبيوتر ....كمبيوتر نوينا جد عازمين

الاخ أنور مالك أختفيت ولبدت (إن شاء فوق راى !!!!) عموماً مفتقدين ونساتك وضحكات وأرجو أن توجة إبنك محمد أن يساهم فى مشروع مركز الحاسوب والانترنت الى حين حضورك وبقية الاسرة الكريمة والى أن تحضر بالسلامة أرسل لك هذا المسدار وعارفنّك زولاً فيك عمار:
يا أنور سلام طولت...... من الطله
عزمنا معاك بنينا مركز وخاتى الزله
الناس فى النفير ماتلقى أصلو محله
والكل مجتهد جابو... الاكل بالحّله
أخوانك هناك ناوين كمان لى مجله

الاخ عوض عبدالرحيم من فحول شعراء النيمة (المريخاب ) وجد المسادير التى كتبتها للاخوان لكى يفتحوا باب التبرع لمركز الحاسوب والانترنت بالسقاى البتلاب فشارككم بهذا المسدار وقد نقلتة من منتدى النيمة
--------------------------------------------------------------------------------

للاخ بشري ولجميع اهلنا في السقاي

يا اهلنا في السقاي وكل الربوع الغادي
يغشاكم سلام يصل الجميع فرادي
العاجبني فيكم وبلقى فيهو مرادي
عملكم بالكلام الوصبيهوا اجدادي

دايرين لمن نجيكم داخلين عليها الحلة
مركزكم يكون باهي وجميل الطلة
ولغة الكمبيوتر نلقاها هينة وسهلة
ونمرق من هناك وفي ايدنا نطوي مجلة

أذكر أننى عندما أطلقت مشروع مجلة السقاى قبل عامين فى منتدى أنا سودانى ، أرسلت إيميل للاخ الصحفى جعفر عباس كاتب عمود زاوية حادة فى جريدة الرآى العام السودانية وهو فى الدوحة قطر ويعمل فى قناة الجزيرة ويشارك فى مجموعة من الصحف القطرية وقد ردّ على مشجعاً وطلب أن نبدأ بأى بداية مهما كانت صغيرة سوف تتطور بمرور الايام . والان ننوى قيام مركز الحاسوب والانترنت بالسقاى البتلاب أطلب من الاخ جعفر عباس دعم هذا المشروع بعدد من الكمبيوترات والفاكسات ومكنات التصوير حتى نرفع الامية الرقمية فى القرية ويكون الاخ والاستاذ جعفر عباس له سبق فى هذا الشأن إن شاء الله ، تقبل تحياتى وسلامى ومرسل لك مسدار مثلما أرسلنا لاهل السقاى البتلاب وغيرهم، الى المسدار :
يا جعفر ود بدين سيد الفهم والرآى
من مركز كمبيوتر فى قرية السقاى
نوينا يقوم هناك معانا كم سواى
يكون مركز كبير ويتحدّث الحجاى
راجينّك تساعد إن شاء بى غناىّ

عدد المساهمات : 61 تاريخ التسجيل : 04/05/2009

السلام عليكم باركنا ليكم اللجنة لكن يظهر الرد للشخصية وليس مضمون الحديث ارجو ان لا نرد للشخصية الاعتراض علي الاسم لايمنع الرد

عدد المساهمات : 340 تاريخ التسجيل : 22/02/2009

الاخ بشري الف مبروك وربنا اوفقهم هذه خطوه جميلة الي الامام ونحن معكم مع احترامي لمن اخترت وهو نعمه الاختيار لكن عندي اضافه لو امكن او تجعلهم احتياطي عبد القادر الخضر 2رمضان حسن 3المكاشفي السيد4مجتبي خير الله 5ابوبكر الطيب مع مودتي

عدد المساهمات : 6 تاريخ التسجيل : 28/05/2009

الاخوة الاعزاء و الاعضاء الكرام لكم التحية
بالرجوع الى تكوين لجنة الحاسوب و الانترنت بالسقاي البتلاب اوضح لكم بانه تم توزيع المهام على االاعضاء بواسطة العم عبد العظيم الهادي عبد الرحيم ووجدت كل الترحيب و المباركه و الحماس حتى من الشيوخ ، نسالكم الدعاء بالتوفيق لصاحب الفكرة و المسانده فى هذا المشروع الخدمى الذى سوف تعم فائدته باذن المولى عز و جل على جميع الاهل بالمنطقة و المناطق المجاوره .

مجاهد السماني

الاخ مجاهد لك الشكر والتقدير على متابعة هذا الامر وعلى الاقل وفرت لى حق الانصالات خاصه أن الشبكة صعبه هذه الايام الحمد لله على توزيع المهام والمباركة من الكبار فى إنتظار أن نرمى لى قدام إن شاء الله .
الاخ محمد صديق حامد لك الشكر على الترحبيب بلجنة الحاسوب وأضافة عدد مقدر من أهل العمل ولكن لو رجعت للحديث الذى كتبتة بعد أن كونت اللجنة ذكرت أننى تجاوزت أسماء مشهود لها بالعمل والعطاء ولكن أننى متأكد أن كل البتلاب هم لجنة ويد واحدة وفى النهاية الموضوع تكليف وأتمى أن نتساعد جمعيعاً وأكيد مجاهد محمد السمانى سوف ينقل لهم هذا الحديث والاختيار الطيب لك شكرى نيابةً عنهم

» بوست خاص بتبرعات الاخوان لمركز الحاسوب والانترنت بالسقاى البتلاب
» الى كل خريجى الحاسوب بالسقاى السروراب
» زواج إبننا عبدالغفار عبدالملك عبدالله إدريس بالسقاى البتلاب 6 مارس 2015م
» توفى اليوم الاحد 9 إكتوبر الى رحمة مولاه الاخ محى الدين العوض صالح بالسقاى البتلاب
» عاجل الشفاء للأهل بالسقاى البتلاب ... حالات تسمم جماعية فى زواج بنت الاخ عبدالعظيم الهادى