الاميرالاي محمد المهدي حامد..تحية ودمعة وذكرى.

[center[b]]بحييك اقبلها بالنسبة لي تشريف
يا مهدي السحاب لامن خريفها يصيف
مرهف الإحساس سيفك سنانه رهيف
يامهدي امير القافية ملك السيف

تشهد لك طرابلس* وبانزر* الميدان
بشهدوا ليك رجال طبجيتك* الشجعان
تشهد لك جحافل الدوتشي* والالمان
يا مهدي الفزع في حوبة الفرسان

بشهد ليك ثباتك ساعات المحن
في يوم الضرب جيش التلاينة* حرن
بشهد ليك خلا صيا مدافعه عوّن
بشهد لك رجالك في وقعة كرن*

بشهد لك البحاري* يامهدي وابن الضو*
و الولد البيعرف ما بقولوا ليه تسو
اخوان البنات حاكيتوا صقر الجو
وكتين مدفعها مكسيمها* سوّا الهو

بشهد ليك ابوي كان في يمينك سيف
جنياتن جنب هيبة وتمومة كيف
البركز ولد في حرها وبيقيف
بخت السمتة* لى سمحة ولهيجها ظريف

يامهدي حليلهم رباعتك الافذاذ
وربوع ام طريفي* الكنتوا فيها عزاز
يا حليل الجزيرة الكان نداها رذاذ
وايامات جهل زينة ورفاقة لذاذ

ايام اربعات* كانت حياتكم عيد
خاليين من هموم عايشين برا تعقيد
ضاربين الفرح بالهم بدون تنكيد
وتريانين متل قصباتكم الفرهيد

مارحين في الرمال والطرفة جنب النيل
وفي ضو القميرة كم لعبتوا شليل*
يا حليل الرباعة* وناس فلانة حليل
رقصاتهن مع طنبوركم الفي الليل

يا مهدي حليلهم اهلكم الطيبين
غنيانين محنة وكانوا فقرانين
يا حلبلهم حليل ترب ناصر الفالحين
عيال (جارة النبي) والحاجة (بت فرحين)*

ليش طوح الهدام بي دياركم ليش
فارقتوا الجزيرة البتلها مافيش
ود حامد رحلتوا من ديار العيش
فارقتوا المرن* متوجهين شقيش

فارقتوا ديار اللوبة والعيش ريف
من بعدما الهدام طوح وشال القيف
من بعد الجزيرة الهمبريبها ظريف
شرقتوا وخريفكم اضحى زي الصيف

رحلتوا الشرق* وشبيتوا عن الطوق
ووالفتوا الشرق،صيد الشرق معشوق
(عنيق ام سومري)* الراتعات خلاهن فوق
ضاربات القلع وردن بداري شروق

ود حامد وداعا زي نغيم الناي
باسط ليك يمين لى كفك السواي
نبقالك درع من غضبة الهبباي
ياحادي الركوب مقنع بنات سقاي[/في خريف عام 1976/ وكنت حينها نقيبا بالقوات المسلحة طلب مني عمي وصديقي سعادة المرحوم الاميرالاي مهدي حامد بعضا من خواطري النبطية وقلت له بكرة يا عم وفي اليوم التالي حملت له الكلمات اعلاه ووجدت معه بالصدفة العمين الوسيلة وعوض السيد محمد احمد رحمهم الله جميعا فبكوا والله لما تلوت لهم تلك الكلمات وكان اكثرهم بكاء عمي مهدي رحمه الله.
*طرابلس وقعت بها معركة العلمين الشهيرة في الحرب العالمية الثانية بين الحلفاء بقيادة الجنرال البريطاني (مونتغمري)وقوات المحور بقيادة الجنرال الالماني (روميل) وسموا بثعالب الصحراء واشترك فيها العم مهدي وكان ضابط مدفعية ضمن قوات الحلفاء وذلك عام 1942م،اما (البانزر) فكانت فرقة المدرعات الالمانية الخفيفة الشهيرة و(الطبجية) هو الاسم الذي كان يطلق علي سلاح المدفعية آنذاك. (اصبح الاميرالاي محمد المهدي حامد اول قائد سوداني لسلاح المدفعية عقب الاستقلال وحاكما عسكريا للمديرية الشمالية في الفترة من 1958م الي 1964م).
*(الدوتشي) هو بنيتو موسوليني زعيم الحزب الفاشي الايطالي وحليف (ادولف هتلر).
*(التلاينة) هو الاسم الذي عرف به الايطاليون.
* موقعة (كرن) كانت في اثيوبيا الحاية وقعت في النصف الاول من اربعينيات القرن الماضي زترقي فيها مهدي حامد اثناء المعركة.
*( البحاري) هو المرحوم اللواء احمد مجذوب البحاري الذي كان اساسا ضابط مدفعية واصبح فيما بعد عضوا بالمجلس الاعلي للقوات المسلحة ووزيرا للحكومات المحلية ابان حكم الفريق ابراهيم عبود1958-1964.
*(ابن الضو) هو المرحوم اللوء عبد اللطيف الضو وكان من اوائل السودانيين الذين حصلوا علي هذه الرتبة إبان الحكم البريطاني وكان ضابطا فذا.
*( المكسيم) مدفع رشاش سريع الطلقات.
* (السمتة) هي الشكرة او الثناء.
*(ام طريفي) و(الاربعات) هي الجزر التي كان يقيم بها اهلنا بالغرب قبل ارتحالهم للسقاي بداية اربعينيات القرن الماضي بعد ان اطاح الفيضان او ما عرف ب(الهدام) بديارهم فرحلوا قسرا للشرق.
*(شليل) لعبة كان يلعبها الصبيلن والفتيات معا في ضوء القمر وهو الضوء الوحيد الذي كان متاحا لهم ولنا وياله من ضوء لايعوض.
*حبوبتنا (جارة) وحبوبتنا (ست البنات بت فرحين) هما زوجتا عبد الله ود ناصر ومن صلبهما جاء نسله.
(عنيق ام سومري) هي الغزلان وكان من المناظر العادية ان يراها اهلنا عند حلولهم بالسقاي وهي ترد البحر للشرب واوردتها هنا رمزا قاصدا بها (الفتيات).

center]