مسدار الى سعادة اللواء شرطة معاش أحمد المرتضى البكرى أبوحراز

فرحنا بقدوم سعادة اللواء شرطة معاش أحمد المرتضى البكرى أبوحراز الى صفحة التوثيق للشرطة السودانية بالفيس بووك ورأيت أن أستقبله بهذا المسدار على أمل أن يتواصل الاخوان ، سعادة اللواء عابدين الطاهر ، الاخ عبدالغنى عبد السخى وقلت لسعادة اللواء أبو حراز :

فى حرازتك ..... فى حرازتك لمّنا
ويا فرح ....... أنّزل علينا وعُمنا
هو قائد .. لوانا هو خالنا .. وعمّنا
فرحنا بى قدومو الكبير يا ربى داعى يأمُّنا

كتب الاخ القمندان عبدالغنى عبدالسخى قصيدة لسعادة اللواء أحمد المرتضى البكرى أبوحراز قال فيها :

الزول اﻻشم صاحب الفكر والرأي
شيال التقيلة الفي الملم هداى
ما هضلم حرازو من المطر شاشاى
بس هضليم خشوع لي ربنا العطاى
ياناس بي تفاعلو يرن نغيم الناى
وبي سمح الخصال ايقاعو شد رضاى
في ضلو الرهين يا خﻻ بلقي هناى
اتلموا وتعالوا نكون جميع بي جاى
ننهل من معينو هو للجميل سواى
نتكاتف نشيل الشيلة غادى وجاى

وأنا أواصل رداً للأخ عبدالغنى بهذا المسدار :

عبدالغنى يا الهيميم حداث كمان سواى
جييب سمح الحديث فى البكرى هو الحكاى
لى شرطة بلادو .... ما قال ... وآ أسفاى
ليها يشيل يسطر ..... تأريخ تقوووول حدباى

مسدار للأخ عمر محمد عثمان أول الدفعة 56 والذى أفاد أنه سوف يغييب لعامل الارهاق !!! أو ربما ( قام بيهو التركين !!) أبو بجهز فى مشاعرو للولايات المتحدة الامريكية وخايف ( من مقالب الدول !!!! زى ما قال عمنا حسن ود عبدالله عليه رحمة الله فى القصة المعروفة فى السقاى !!!) المهم بعد أن فتح بوست بهذا المعنى جاتو رسالة قوية من الفريق شرطة عوض وداعة الله حسين بالعودة الفورية وعدم التأخيير !! أخوان دفعتو لأنهم ( محروميين ) من إصدار أى تعليمات ليهو أستندو على تعليمات الفريق ، وأنا بدورى قلت مع التعليمات نديهو مسدار عسى ولعل وقلت :

كيييف تفوت ...... وكيييف تغيييب
بالاشارة ديمه تفهم .... إنت ما إنت اللبييب
لو غايبك عادى أرجع ...... نحنا ليييك راحه وطبييب
بدوون ردودك أو وجوودك ..... خوفنا نبعد ... نبعد أو نسييب

والله يا عمر عثمان شويه كدى وتبقى قصيدة نديها لى فنان عديييل كده !! غايتو أكان تمييت إسبوع وما ظهرت بتلقاها فى لجنة النصوص !!! . تحياتى .

* تخريمة : الحالة بى لبس الشغل لسع ما قلعت بس أتغدييت!!! وعايز أديها نومه ساعة وبعدها أستعد للختمة بمركز بلال ، ذكرتنى النومه ساعة دى عدييلك كردقيلى كان بنوم ويقوم فى عشره دقائق أيام الكلية تحياتى له وللإسرة الكريمة .

الاخوان الزملاء والاحباب الكرام ضيوفنا من الاهل والنسابة والذين أحبو وأرتبطوا بالشرطة لسبب وأخر ، صباحكم خير أحمد الله على نعمة الصحة والعافية واليوم الاثنين يوم راحتى العملية مع الجمعة من كل إسبوع ، بالامس بعد أن ختمنا القرآن بمركز بلال بيرمنجهام على أرواح والده الاخ الباشمهندس عبدالناصر عمران المحاضر بجامعة أستون كلية الهندسة الميكانيكية وعلى روح الاخ السر المهدى عبدالمتعال وفصلت لكم ذلك فى أكثر من موقع عند حضورى وحكيت الكثير للمدام والتى حرصت على معرفه نجاح وحضور الختمة والتى كانت بحمد الله محضورة وصل عدد الحضور 40 تقريباً ، خلدت للنوم بعد هاتف للأخ صالح فى تلفون كنار الثابت بالسقاى وطلبت منه أخذ الهاتف ووضعه تحت يد الاخت راضية والوالدة لكى أقابلهم اليوم الاثنين ، اليوم بعد صلاة الفجر وما زال الشيخ عبدالمجيد الباكستانى فى سفره الى باكستان ونائبة لا يقدم الحديث اليومى فحضرت وجهزت الحديث الرابع عشر من الأربعين النووية وقبل أن أنزله عرجت على الفيس بوك فإذا بى أجد مشاركات سعادة اللواء أحمد المرتضى البكرى أبوحراز وقلت والله الحرازة دى ما أفوته ساكت بعد أن طالعت الردود الطامعة بطعم سيده ( مش سيده وبس سيده وشديده نسأل الله أن يطيل عليه الشدّة والعافية ) فقلت لابد من مسدار صباحى على وزن الدرس اليومى بعد صلاة الفجر فقلت فى مسدار الصباح :

المرتضى .... المرتضى منى لييك سلام
يا طب المرور...... .. يا شفى الاقسام
المرتضى .... المرتضى منى لييك سلام
نحنا فى صحوة ...... أم لسع فى أحلام
بى سطرووك الروعة ..مكتوبة بى أقلام

*********************
موزوونة بالاشعار ...ومسبوكة كالافلام
المرتضى ... المرتضى منى لييك سلام
من قلب بيريطانيا ...من جوّه بيرمنجهام
جييب لينا من دخرييك.. يا سيده والاتيام

» مسدار بمناسبة ترقية اللواء شرطة معاش أحمد المرتضى البكرى أبوحراز الى رتبة الفريق شرطة
» مسدار بمناسبة ترقية اللواء شرطة معاش أحمد المرتضى البكرى أبوحراز الى رتبة الفريق شرطة
» عاجل الشفاء لسعادة اللواء شرطة معاش أحمد المرتضة البكرى أبوحراز
» اللواء شرطة معاش عمر على حسن يكتب عن ...حكاياتنا مايو !!!
» سعادة اللواء شرطة معاش عمر على حسن يرد على قصيدتى بقصيدة بمناسبة عيد الفطر