بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
 |  موضوع: محمد عبدالماجد ..... وإن طال السفر نقلاً من منتدى الهلال  الخميس 1 أغسطس - 8:04 | |
| وان طال السفر | محمد عبدالماجد :: البرير نصرتو (الفيفا) ثلاث مرات
بيت ابوك ان خرب ......امشى الفيفا
عندنا زول...متل (المخلاية) الفاضية ..نسابتو كل (سبت) بعملوا معاه مشكلة.
الفتح (المروحة) دي منو ..طلع وخلاها شغالة.
دي هسع (بطيخة) تجيبها مع الرجال.
البليلة الجبتها امس ..طلعت ما سمحة ...قديمة ..ومسوسة...شالت نار الجن وما نجضت.
انت ليك ..ولي زمانك ...اللحمة ما يدوها ليك (عضم)...الجزار الببيع ليك (اللحمة) دي بغشك.
بيديك (العضم)...وانت واقف تعاين ليه.
الكهربة الجبتها الاسبوع الفات ...جبتها شوية ...انتهت.
دي ما الكهربة الكنت بتجيبها طوالي انت ما عارف استهلاك (الكهربة) في رمضان بزيد.
كهربتك الجبتها دي (سحور) ما بتسحرنا.
دي نماذج من نقة (نسابتو) معاه.
برنامج كلو يوم.
كل يوم الصباح ..بصحوه قبل ما تشرق الشمس ..عشان يسمعوا ليه (الجدول) دا.
شغالين ليه زي (الترزية) الايامات دي البتمشي ليه كلو بقول ليك انا ما بستلم لي قطعة الايامات دي.
وقفت (الاستلام).
تقول عاوز تسلمو (جواز) للعمرة.
النسابة كرّهوا زولنا العيشة ...كل يوم طالعين ليه بي حجة جديدة المسكين بقى زي (شوال الفحم) في اخرو.
حتحات ساكت.
من (النقة) كمل عديل كدا.
سمك قزاز نضارتو بقى زي سمك شباك الخشب.
قعر نضارتو زي (قالب الجلي).
مرة زولنا دا هو بالمناسبة اسمو (ود الشاطر)..غلب عديل كدا من نسابتو.
زهج ..ونفسو مرقت من الحياة.
ما عرف يتصرف معاهم كيف؟.
بقوا ليه في رقبتو.
كل يوم طالعين ليه بي حاجة جديدة.
يشوفوا (الستائر)...يقوموا يدخلوا في (الستائر)...يقولوا ليه (لون) الستائر ديل ما حضاري.
في زول بجيب ليه ستائر لونها (اخضر)...انت قايل نفسك قاعد ليك في (كشك ليمون).
حوض برسيم بس...نحن وين؟...انت مالك عاوز تفضحنا مع الناس.
يبدل اللون ...يعمل ليه ستائر (رمادية) فيها نقشة بيجية خفيفة ...يقولوا ليه انت بيتك دا بقى زي (مكتب المحامي)...هسع في زول بعمل ليه ستائر (رمادية) في البيت.
دا شنو لون العرائض دا.
يحاول يقلب الهوبة ...يجي شايل ليه (فرخة) معاه..يقوموا النسابة كلهم ينطوا ليه في وشو ..(عليك الله الفاضي يعمل ليه فرخة منو؟...كان تجيبها مشوية).
نسابتو ديل كانوا باختصار شديد كدا بدخلوا ليه في اي حاجة.
لا الولد مفروض تحوّلو من مدرستو دي ..تودي مدرسة تانية ...المدرسة البقرأ فيها دي ما شغالين بيه.
والبنت ذاتها (روضتها) ضعيفة..لازم تحولها روضة تانية.
ديل (قمصانو) كانوا بدخلوا فيها.
انت ما مفروض بعد العمر دا تلبس ليك (قميص) اكمامو قصيرة انت قايل نفسك صغيّر.
خليت لاولاد الثانوي شنو؟.
والالوان البتلبس فيها دي ..الوان شبابية ...شوف ليك الوان سادة ...(انت عاوز تعرس تاني وإلا شنو؟).
الزول لازم يحترم نفسو.
ديل مرات كان بجي راجع من الشغل ..بلقاهم حوّلو مكان (الدولاب)..وقلبوا مكان التلفزيون...ونزلوا (الكرتونة) الفوق.
الشيء الكان بتغيّظ (ود الشاطر) ...انو كان وقت يركب تلفونو في الشاحن ..بجي يلقى اخو زوجتو الصغيّر ...طلع موبايلو من الشاحن ..وركب موبايلو هو.
اها في حقارة اكتر من كدا.
في زول قلبو حار في الدنيا دي بقبل الكلام دا.
والله دا نحن في شندي (نطاعن) فيه.
الدم حدو الركب.
عذبوه عذاب.
بدّخلوا ليه في اي حاجة.
حلاقتو ..لمن ما تعجبهم بعلقوا ليه عليها ...(هسع دي حلاقة تحلقها انت قايل نفسك بتلعب في الدوري الانجليزي).
ود الشاطر ..مرة يجيب معاه صاحبو ...يقول ليه : اها تشرب شنو؟...قهوة وإلا شاي.
صاحبو يقول ليه : (قهوة).
نسابتو يجيبوا ليه : (شاي).
شغالين (معاكسات) كدا.
صاحبو قال ليه : انت وقت ما بتقدر على الحاجات دي ....ما تسألني ..يعني في داعي تقول لي بتشرب شنو؟..وانت ما عندك قرار في الحتة دي.
ما تبقى لي ذي زول البرلمان السوداني ما عندك اي قرار.
المهم ناس الشغل لاحظو ان هناك (تدخلات) معيبة في خصوصيات (ود الشاطر) من قبل نسابتو.
وان نسابتو بدخلوا في اي حاجة ذ من غير وجه حق ...عشان كدا اصحابو في الشغل ..نصحوه يمشي (الفيفا) عشان يوقف (نسابتو) ديل في حتتهم.
الفيفا طوالي ...خلوها تشوف الحكاية دي.
الموضوع دا ما في جهة بتقدر ليه غير (الفيفا) الفيفا وحدها القادرة على ان توقفهم في حتتهم.
صاحبكم (ود الشاطر)..لقط ورقو ...وشال حاجتو وخاطب (الفيفا).
الفيفا اليوم التاني ردت.
النسابة اليوم الثالث قعدوا يفتشوا في الواسطات ...واللجان...وكسير التلج.
زولكم (ود الشاطر) بقى لو راجع البيت شايل ليه (قرعة)..نسابتو يقولوا ليه : (والله البطيخة الجبتها دي طاعمة جنس طعم).
انت (البطيخ) الطاعم دا بتجيبوا من وين؟.
زولكم حاجتو بقت (ظابطة).
الساعة اتنين يضربوا ليه يقولوا ليه انت وين يا زول حايم في الشمس دي.
ود الشاطر عندو (جدادة) ما بتبيّض ...(17) يوم ..ما مشت ليها على حفرة البيض.
جدادة قاعدة ساكت.
ود الشاطر يوم جاء راجع بدري ..عاين للجدادة كدا ..وقال ليها ما تبقى لي كدا زي (وارغو)..انا جايبك هنا عشان (تبيضي)...يمين بكرة اجي والقى الحفرة ما فيها (بيضة)...إلا ارفع ورقك للفيفا.
انتي بتلعبي وإلا شنو؟.
انتي قايلة (الفتريتة) البتأكلي فيها دي جايبها من مؤسسة تعاونية.
فاكرها هملة.
الجدادة اليوم التاني رمت ليها (طبق) بيض.
طبق كامل كدا.
طبق كمان بي (ختمو).
ولو لقت ليها (هرشة) شوية ...البيض دا تجيبوا نجيض.
عالم ما بتجي إلا بالفيفا.
انتوا إلا يجوكم بالطريقة دي.
ما بتشتغلوا إلا بـ (الفيفا).
الفيفا تخلي شغلها وتقعد تصاقركم كدا.
انتوا قالوا ليكم (الفيفا) فاضية ليكم كدا.
قالوا ليك واحد في شارع (عبيد ختم)...دخل ليه في (ركشة)..بوليس الحركة ما عرف يعمل شنو؟.
بتاع الركشة ..قال نمشى (الفيفا).
الحكاية دي ما في زول بقدر عليها غير (الفيفا).
نحن بقينا قاعدين ساكت.
عليكم الله هسع المدينة الرياضية دي لو رفعنا (ورقها) للفيفا ما كان اكتملت.
الفيفا كانت ح تقول ليكم ..الاراضي دي (الضربها) منو؟.
والاسمنت والسيخ...والطوب الشالو منو؟.
مدينة رياضية (23) سنة ما قادرين تتموها.
انتوا عارفين البرازيل عملت ليها مدن رياضية كاملة في خلال (4) سنوات استعدادا لكأس العالم.
قطر في خلال سنوات معدودة ح تعمل ليها مدن وقري رياضية مجهزة من كلو ...ومكيفة كمان.
انتوا يا كافي البلا (23) سنة ما قادرين تتموا (المدينة الرياضية).
مدينة شنو؟.
دي بقت (حارة) او (حلة) ساكت.
هسع عليكم الله في (كم وزير رياضة) جاء في المدينة الرياضية دي وفات خلاها في حالتها.
اكتر من (20) وزير رياضة اتحادي وولائي مروا في (المدينة الرياضية) دون ان يضيفوا لها ولو (طوبة) واحدة.
عشان كدا مفروض زول يشيل (الاسمنت والسيخ) القاعد ساكت دا ويمشي على (الفيفا).
الشيء دا ما بتحلوا إلا (الفيفا).
نحن ذاتو قرفنا.
وفترنا من الموضوع دا.
بي مناسبة (الفيفا) دي ..انتوا عارفين (الفيفا) نصرت الامين البرير كم مرة.
الفيفا نصرت الامين ثلاث مرات.
قالوا ليك الامين البرير خصصوا ليه (جناح) في الفيفا.
جناح كامل متخصص في مشاكل البرير ..ومتفرغ ليها.
كلكم بتذكروا ...حادثة الحمودي ...الحكم الجزائري ...عندما اوقف وجمد الاتحاد الافريقي الامين البرير.
الامين البرير ما كضب شال ورقو ومشى على (الفيفا).
البرير سافر ليها عديل.
مشى جاب براءتو ورجع.
ما في زول قدر يقول ليه حاجة.
الانتصار دا كان اول انتصار على الامين البرير ضد (الاتحاد الافريقي).
المرة الثانية ...وهى المرة التى تدخلت فيها الفيفا ونصرت الامين البرير ايضا ...كانت في قضية (سيدي بيه).
الطرف الذي نازله الامين البرير هنا كان الاتحاد السوداني..وقد استطاع الامين البرير ان يفتح (السيستم) بعد ما قفل.
تذكروا حكاية السيستم قفل.
اها الامين البرير قدر يفتح السيستم بـ (الفيفا).
هسع قالوا (البلف) ذاتو فتح.
الفيفا برضو ادخلت في قفلة (البلف) دا.
ما علينا.
موضوع (البلف) دا ما موضوعنا هسع.
المرة الثالثة التى انتصر فيها الامين البرير ...وعادت له بعض ما افقدته له الوزارة كان في تدخل الفيفا عندما اكدت رفضها التام لتدخل السلطة في العمل الرياضي.
وكما كسب البرير وخصمه الاتحاد الافريقي ...وكسب وخصمه الاتحاد السوداني كسب هذه المرة وخصمه وزارة الشباب والرياضة بولاية الخرطوم.
هذا هو الانتصار الثالث للامين البرير وبـ (الفيفا).
يعني الحكاية ما لعب ساكت.
تلك الاشياء من غير شك تحسب للامين البرير...الذي استطاع ان يحافظ على (شرعية) مجلسه رغم كل الظروف المحيطة والتى هددت مجلسه وكادت ان تعصف به.
اصبحت خبرة البرير الادارية والرياضية كبيرة ...وهو يمر من خلال تلك المنعطفات ...ويتجاوز الكثير من المطبات.
في ظني ان البرير لو ذهب الان ..يحفظ له انتصاراته ..وقتاله العنيف والقوى والقانوني من اجل شرعية مجلسه.
فقد توافقت السلطة مع خصوم البرير مع ذلك فشلوا في الاطاحة به.
هذا كله نحن نحسبه للهلال الذي يمنح منسوبه قوة ..وشرعية ...ويجعلهم بتلك الارادة ...والعزيمة التى تنتصر دائما.
ملحوظة : الفيفا دي ما بتقدروا عليها ما تقعدوا تتفاصحوا فينا ساكت.
هـــــوامــــــــــــــــش
اليوم انتخابات الاتحاد العام لكرة القدم السوداني.
رغم من ان فرص الدكتور كمال شداد ومجموعته ضعيفة ..إلا اننا نسأل الله له التوفيق ...والفوز في الانتخابات اليوم.
مجموعة معتصم جعفر بعد فضيحة اشراك (مساوي)..مفروض طوالي يقعدوا في بيوتهم ..ويشوفوا ليهم شغلة غير الكورة.
لكن نحن في السودان.
الزول البفشل دائما بنجيبوا راجع.
بلد فيها بمشوا لي قدام الناس البفشلوا.
بعدين ...حكاية القسم ..واداء القسم في الكورة والانتخابات امر غير لائق وغير جيد.
القسم اكبر من هذه الترهات.
مجدي ِشمس الدين الذي كان يفترض ان يسكت الان ...يصرح ويتلكم.
والله (اقدار) يا زمن.
مجدي اخر زول مفروض يتكلم.
مجموعة معتصم جابوها بالافطار.
يا معتصم ..لمة الافطار دي ما تغشكم ساكت.
عشان نفس (الكوتة) دي ممكن تجتمع في (السحور) لو اراد كمال شداد ذلك.
لكن كمال شداد ..الطرق الملوية لا يحبذها.
اخر مرة دخل معتصم جعفر مباني الاتحاد العام متين؟.
الدكتور كمال شداد كان ساكن في شارع البلدية ..لمتابعة ومناقشة المسائل والقضايا الرياضية.
اسامة عطا المنان كل علاقته باتحاد الكرة ...(وكالة سفر).
وكالة السفر هى التى تجعله يدخل الانتخابات ..ويبقى ضمن ضباط الاتحاد العام اكثر من (10) سنوات.
مجدي شمس الدين بعد احداث (ام دوم) السلطة يمكن تضحي بيه.
عشان كدا فرصة مجدي دون كل المرشحين اليوم (ضعيفة).
الله يشوف السودان بي مجموعة كمال شداد.
هذا هو الطريق الوحيد الذي يمكن ان يتم عبره انقاذ الكرة السودانية.
قدموا مصلحة السودان مرة ...وصوّتوا لمجموعة الدكتور كمال شداد.
البلد محتاجة للدكتور.
كمال شداد ...لم يصرح حتى الان ..ولم يتراجع ....ودخل المنافسة والانتخابات بثقة وجرأة قوية.
رغم ما يحيط بالعملية الانتخابية من تدخلات.
الله يكون في العون.
عاجل : اتذكروا انكم صائمين يا ناس التطوير. | |
|
