بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
 |  موضوع: عوض ضفارى !!!! ماتجو جارييين تقولو ده عوض جلاس !!!!!  الخميس 24 يناير - 6:45 | |
| عوض ضفارى !!!! ماتجو جارييين تقولو ده عوض جلاس !!!!!
--------------------------------------------------------------------------------
نشأت بيننا وأهلنا من قرية (لونى ) ريفى أبوحجار بالنيل الازرق وشائج القربى والمصاهرة ومنذ الستينات تعرفنا على عدد مقدر من أبناء (لونى) الذين تزوجوا من السقاى أو أقاموا بزوجاتهم من لونى فى السقاى بحكم القرب من العاصمة وفرص العمل الاوسع فكانوا نعم المعين لنا فى كل مناحى الحياة ، فى مجال كرة القدم برز منهم نجوم كُثر أشهرهم الراحل (أحمد إبراهيم ) ثيردباك سلاح الموسيقى ونادى الوحدة بحرى والسقاى وكان قوى أمتاز باللعب القانونى والغير قانونى وفى أخر أيامة قبل وفاته قبل7 سنوات تقريباً أصبح يلعب كرأس حربة وأجاد فيها أيضاً ونترحم عليه ، برز أيضاً حامد محمد أحمد (حمدونا )كجناح خطير وعيبه فقط كان فى التسديد الضعيف والذى لو وجده لكان فى الهلال عشقه الاول ، ولكن بطل قصتنا (عوض ضفارى ) قد برز فى كرة القدم ولكن فى موضوع قد يكون جديد على الملاعب وهى أن صاحبنا عوض ضفارى متعه الله بالصحة والعافية كان كل شوته (ضفارى بالبوز وهو حفيان ) من زمن الكورة أم بوز طوالى شوته (عوض ضفارى تمرق البوز بره وربما تنفس الكورة ) فكان المنفاخ من لوازم الحضور فى التمرين !! تم جاء عهد السبعينات والكور (البرازيلية ) الاسود وأبيض فما يلم عوض فى كورة ويديها واحد ضفارى إلا وكان مصيرها واحد من أتنين يا قداها وبوظ على الناس تمرين الخميس أو الجمعة الكاربات أو دخلت الكورة (الزلط زلط بحرى الجيلى قبل أن يصل شندى وعطبرة وبورسودان !!) لان الزلط جار الميدان كلها 5 أمتار وطوالى كورة (عوض ضفارى ) بتلاقى البص أو العربات السفرية وما نسمع إلا (دل !!) ولو لاقاها كارو ما تسلم منو !! .
كان الاخوان عندما يجمعو قروش الكورة يقولو لى (عوض ضفارى ) تدفع حق تلاته أفراد ومره غرموهو حق الكورة كاملة .
فى التمانينات أغترب عوض ضفارى الى السعودية وأصبح فى كل إجازة يأتى بكورتين !!فقال له أحد الظرفاء فى القرية والله يا عوض لو جبت ليك فى كل إجازة شوال كور ما يعادل الكور القديته بى ضفرك وبى العربات !! التحية للأخ عوض ضفارى والذى لم أقابله من أكثر من 25 سنه . | |
|
