سعادة اللواء شرطة معاش عمر على حسن يرد على قصيدتى بقصيدة بمناسبة عيد الفطر

عيدك سعيد ومبارك
ويعود كمان يتبارك
لاخونا بشري مبارك
وتعادلو برضه مبارك
والجايي برضو مبارك
ونقول ياوصيف تتبارك
نحن بنجيب اخبارك
اتنين درون بالاهلي
ونصقّعك في دارك

تحياتي للاسرة وكل عام وانتم بالف خير وعافيه
عمر على حسن

11-16-2010, 08:09 AM
كالعادة إستيقظ قبل صلاة الفجر بأكثر من ساعة أقرأ فيها ماتيسر من الذكر الحكيم وبما أن صلاة الفجر متأخرة جداً فى برمنجهام وهى الساعة السابعة صباحاً العاشرة بتوقيت السودان رأيت أن أصبّح على كل المسلمين فى العالم الاسلامى وعلى أهلنا بالسودان وعلى الاهله على وجه الخصوص بهذه القصيدة وقد خصصت بدايتها لجماهير هلال الملايين والموج الازرق حتى ينسوا معركة الصفاقصى ويستمتعوا بعيدهم ويتفرقوا لوصيفا وبرضو نقول لكل الوصيفات عيدكم مبارك ونحنا وإنتو حالة واحدة عندما نلعب بإسم السودان أما بعد ذلك فكل أزرق مع فريقو وكل أحمر مع وصيفو !!! والقصيدة تقول :

أرسلت هذه القصيدة بالايميل لسعادة اللواء شرطة معاش عمر على حسن بالامارات العربية ثانى أيام العيد فرّد على بهذه القصيدة الموجودة أعلاه ولمن لايعرف سعادة اللواء عمر على حسن .
بإختصار هو من أكفأ ضُباط الشرطة السودانية دخل كلية الشرطة السودانية فى العام 1957م وتخرج مع 28 ضابط من دفعته فى العام 1959م كأول دفعة تتخرج من كلية الشرطة الجديدة فى ذلك الوقت فى برى والتى أيضاً تحولت العام الماضى الى سوبا .
عمل فى مواقع مختلفة حتى وصل الى رتبة العميد شرطة مدير شرطة محافظة الخرطوم وأحالة نميرى مع عدد مقدر من دفعته للصالح العام برتبة اللواء فى إكتوبر 1979م .
شغل منصب رئيس نادى الهلال العاصمى لكرة القدم ثلاثة مرات وكان صاحب أعمدة ومقالات عن الهلال نتذكرها ونحن صغار وكنت من المعجبيين بكتاباتة الى أن وفقنى الله أن أتعرف عليه عبر سودانيز أون لاين فى بوست الباترا أشهر تعلمجى فى كلية الشرطة والذى أبدع فيه وصال وجال .
من أبرز الضابط فى دفعته :
الفريق أول شرطة أبراهيم أحمد عبدالكريم عليه الرحمة والذى شغل منصب مدير عام الشرطة وكذلك الفريق أول شرطة فيصل محمد خليل عليه رحمة الله وأيضاً من دفعته الفريق أول شرطة عباس مدنى الذى شغل منصب وزير الداخلية فى الفترة الانتقالية مع المشير سوار الدهب رئيس الحكومة ، من دفعته أيضاً الفريق شرطة عبداللطيف على أبراهيم والفريق شرطة عبدالعزيز حسين تربال وكان أول الدفعة الفريق شرطة أحمد ورسمة غالب عليه رحمة الله نترحم على الاموات منهم ونحى الاحياء منهم فى أى مكان وكل عام وأنتم بخير .

سلام العيد مبارك ....... عليكم لكل أهلّه
سلام يغشى الجميع وينزل يمر يمر بالحلّه
أنسوهو الصفاقصى .... الحنفيّة إنتو الملّه
ما قصّر هلالنا وما نرضى فيهو فيهو الذلّه
إلا الحظ معاند غلب الكتير الكتير والقِلّه
*********************
أبارك العيد وأسلّم .. أسلّم على أمى ثم الوالد
ومن بعدو الجميع ... وما أخلى إلاّ إلاّ وأقالد
أمكلتوم وأمنه منيرة راضية وكمان ناس خالد
وامر على كل كبارنا ....وحتى الترضّع وآلِد
وأذكر ليها خيرنا خيرنا.... ومجداً قديماً تالد
*********************
العيد ليهو طمعاً .. فى الغربة ما زى عيدكم
وكيف نفرح وننبسط ...وما شفنا فيهو جديدكم
صلاة العيد جموع .. فى الصيف سمح تريدكم
الله أكبر الله أكبر الله أكبر لاإله إلا الله والله أكبر الله أكبر ولله الحمد أغلى رصيدكم
ونحنا من البرد نكتّر فى اللبس ونتمنى دافى عصيدكم
**********************
وأنا فى العيد وأكتب ودمعى دمعى نازل سيل
وفارقنى الغميد.. فى نهارى نهارى أو فى ليل
لو بمرادى أسع أسع ألبس ألبس.. وأشد الحيل
وأحضر العيد معاكم .... ونلعب ولو لى شليل
أكييد حا أفرح وأسعد لو كان لو كان بلا دبييل
**********************
فى كل منتدى بكتب بكتب وليهو بزور
أدييكم تحية وأديكم أحلى أحلى مرور
ما افطّ الجميع وأسلّم وامُر وامُر بالدور
وأنا ما بعرف خداع أو أقول الزوور
أبارك العيد عليكم واوزّع الريفى دور
أبارك العيد عليكم واوزّع الريفى دور
أبارك العيد عليكم واوزّع الريفى دور