نجر ساكت والفاتح جبرا وساخر سبيل من الرآى العام

عزيزي القارئ.. إلتقى مايكروفون (ساخر سبيل) بعدد من المواطنين وقد كان موضوع الحلقة هو سؤال يطرح على المواطنين: ماذا لو تم تعيينك مستشاراً في تشكيلة الحكومة (الجديدة)؟.. أتركك والإجابات:
عوض كلتشات (ميكانيكي): أول حاجه أعملا ح أشوف حكاية بصات الوالي المما جابوها ما اشتغلت ليها يومين بركت دي.. ح أفتح المكنة واشوف البايظ شنو؟ واشوف السلندرات مخروطة على كم أصلو حكاية إنها جديدة دي ما بتمشي علينا يا (فردة).. المهم كان بتقبل عمرة نعمِّرا وأكان كمان ما بتقبل نقوم نركِّب ليها مكنة جديدة أصلو الحكاية كووولها مكنات في مكنات!
حسن سلوكة (مزارع): شوفو أنا أولن بالتبادي ح أمشي للزول الإسمو المطيري.. العاوز يعمل لينا أطول برج في العالم وأكبر مدينة بتاعة شنو ما عارف وأقول ليهو.. شوف يا زول الحداشر مليار دولار بتاعتك دي أنحنا محتاجنك نستثمرا في مشروع الجزيرة ده.. وده الكلام البيخلينا من الدول المتقدمة.. ما تسمع ليّا الكلام القالوا ليك مستشار الرئيس بإنو برجك ده ح يخلينا دولة متقدمة عشان الزول ده والله بقى يتكلم سااااكت وأنا المزارع (الزول الله ده) قاعد أضحك بقيت من تصريحاتو!
علي بليه (عجلاتي): شوفو مع إنو حكاية إني أبقى مستشار دي واسعة شوية (والجنزير) بتاعا عاوز يتشدّا حبه، لكن بقول ليكم عليّ بالطلاق أول يوم أمسك فيهو أركب ليكم البلد دي كوووولها عجلات.. وأول ناس أركبهم ليك المسؤولين.. قال أيه عاوزين مرسيدس سوداء بالنهار وبيضاء بالليل.. والله أخليهم ليك أي زول فيهم ماشي ليهو اجتماع ما يقوم (سداري) ما يصل!
محمد برمة (بتاع اللبن): لو ده حصل بعد كده الواحد (يزيد الموية) للبن بي إطمئنان.. مش أي مسؤول أول ما يعيِّنوهو أول قرار ليهو بيعملو عشان صالح لبنو.. بسم الله أقصد (ورقو)؟ أنا أول قرار ح اتخذوا هو (عدم فحص الألبان المغشوشة)!!
حسين بنبار (جزار): يا سلام والله دي ح تكون حاجة جميلة أقل حاجة الواحد يعمل ليهو (سنكيت) .. لكن بس المشكلة الواحد يشتغل في الحكومة العاملة زي (الكمونية) دي كيف؟
آدم سلسيون (بتاع أورنيش): شوف يا معلم.. أهم حاجة في الموضوع إنو الواحد من صباح الرحمن ح يَطلِّع مصاريفو.. أمسك ليك المسؤولين المعاي ديل وادي ليك كل واحد (وش) أورنيش لمّاع مصلّح.. بعدين أنا زول تفتيحة ما ح يقدر واحد فيهم يقول ليّا إنتا زول دستوري ومسؤول بتشتغل شغل خاص ليه؟ ما هُم كوووولهم العندو شركة والعندو مزارع والعندو شنو ما بعرف داك يعني جات على (الأورنيش)؟
أحمد عراوي (ترزي): أنا والله من زمان عارف إنو الجماعة ديل ح يستعينو بيا عشان قصة التفصيل دي عاوزة ليها ترزي فنااان وكده.. أول حاجة الجلاليب دي ح نعمل ليها جيب رابع نسميهو (جيب الكومشن) وجيب خامس (حق المخصصات) والح يكون باع (خط هيثرو) ده ح نعمل ليهو جيب مخصوص نسميهو (باااالغتا لكن)!
على الله (معاشي): شوف يا بني.. أول حاجة أنا ما بستغرب إني أتعيّن بعد عمري بقى كم وستين ونزلتَ المعاش لأنو ناس الحكومة ديل تلات أرباعهم أكبر مني ولسه شغالين.. الحاجة التانية أنا لو إتعيّنت ح أقوم أول حاجَة أجيب كل المعاشيين واسألهم واحد واحد وأقول لكل واحد نفسك في شنو؟ الح يقول ليك (حبوب الضغط)، الح يقول ليك رسوم (عملية بروستاتا)، الح يقول ليك (متأخرات الإيجار)، الح يقول ليك (شية جمر)!! أنأ ح أرفع المعاش الشهري لكل معاشي عشان يكفيهو للعيش في حياة كريمة.. معقولة يا ابني الزول يدفع للبلد دي أغلى سنوات عمرو وشبابو بعدين معاشو ما يجيب ليهو خمسة كيلو لحمة؟
عبدو نازل وين (كمساري): شوف أنا ما تشوفني كده.. عندي بكالوريوس هندسة كهربائية يعني العملوهم مستشارين ديل ما أحسن مني.. بس الظروف ما خدمتنا ولجنة الاختيار كل ما أمشي معاينة يقولوا ليّا سمِّع لينا سورة الكافرون وأنا بيني وبينك مما كنتَ في الإبتدائي حفظت السور كووولها لكني بس معقد من السورة دي وما قادر احفظها، ثم ياخي هم عاوزين يشغِّلوني مهندس وللاّ (داعية؟) غايتو أنا أول ما أمسك ح أعيّن كل الكماسرة الشغالين معاي ديل في عربات المسؤولين.. يعنى كل عربية مسؤول يكون فيها كمساري راكب معاهو.. العربية البيتحرك بيها في الشغل.. كمساري.. البوكس البجيب الخدار ويودي الأولاد المدارس.. كمساري.. العربية البتودي المدام بيت الحنّانة ومحل الطلح.. كمساري.. كل مشوار بي حقو.. وآخر اليوم الكماسرة ديل كووولهم يوردوا ليّا القروش وأوع زول فيكم يقول ليا ح تورِّد القروش دي للمالية؟ أوردا للمالية ليه؟ إنتو ما قريتو تقرير المراجع العام البيقول ليك المسؤولين ديل كل واحد عامل ليهو حساب (جانبي)؟ هو الجانبي ده أنا ما بعرفو؟
حنان مسكول (حنّانة): والله أنا ما عارفة يعني ح يستفيدوا مني في شنو.. لكن على المستوى المهني الشخصي بفتكلر إنو المسألة دي لو حصلت ح تكون (طاقة القدر) اتفتحت ليا.. لأنو إضافة لمتطلبات العمل والوظيفة الما عارفاها شنو ولا عارفة مهامها شنو، لكن دي فرصة إنو الواحدة تدخل منازل زملائها المسؤولين وتتعرف على زوجاتهم وتوسِّع السوق بتاعا شوية، وطبعاً الحنة بتاعة زوجات المسؤولين دي سعرها براااهو وبعدين إضافة لكده يعني ما بخلوها (تبهت)!!
كسرة:
جارنا عباس النجار قال ليّا ما سألتني أنا ليه يا أستاذ؟ والله أنا أكتر زول مؤهل يكون مستشار ما الحكاية كوووولها بقت (نجر) سااااكت!!

» حجاج تحت التمرين والفاتح جبرا من الرآى العام
» نعلم الغيب والفاتح جبرا وساخر السبيل ونقلاً من الرآى العام
» الشرطة ورغم الشاسى والفاتح جبرا من الرآى العام
» بره الموضوع والفاتح جبرا من الرآى العام
» من الحب ما قتل!!! والفاتح جبرا من الرآى العام