من أرشيف الذكريات والجيلى الثانوية

رد: أغاني الفنان عبد الكريم الحوري

--------------------------------------------------------------------------------

أحييك أخى الكلس وأنت تعيدنى للعام 1977م فى الصيف ونحن فى الصف الثانى فى الجيلى الثانوية عندما حضرنا للعبيدية لزواج الاخت أسيا حسن الزبير شقيقة الاخ والصديق وزميل الدراسة الاخ زين العابدين حسن الزبير وكنا ثلاثتنا ناصر محمد يوسف (لواء شرطة الان برئاسة شرطة ولايه الخرطوم ) والاخ عبدالعظيم الهادى تاجر بسوق ليبيا وشخصى الضعيف وكان يفترض أن نغشى الاخ عبدالله الطيب بابكر الحاج (شقيق الجعلى الطيب والبروف عبدالجبار الطيب ) نغشاهو فى الزيداب ولكن لم نستطيع النزول من الاكسبريس وقتها وكان سريعاً جداً وعندما هدن ونزل (المحترفين رجفنا وغلبنا النزول وواصلنا حتى العبيدية ) وأذكر أننا ذهبنا الباوقة الجرانيس والنمر والتكاووين والعمارة وكان للاخ الزين أقارب هناك وكانت هناك صديقة لشقيقة الزين العروس إسمها آمنه عبدالله والله غناية وسمحة طلقت فينا النار لكن الزين ما خلانا نتهنا قال لينا عرسة بعد شهرين والله قربنا نقول للعريس ماتنفعك وكنا طبعاً نسمع أشرطة الحورى وبل يغنى لينا عبدالله والزين فى الداخلية فى الجيلى الثانوية ونحنا كورس والله التقول الحورى قريبنا !!وبنعرف معظم أغانى الحورى وحتى آآآآآآآآآآآ المستشفى يوم زارو كل زول نسى جوارو التاجر ترك مالو والحورى انتهك دارو جمال زينه سهام عينيك ماذينا . ومشرق والله ودلقاى فوقو الطير بسوى الواى ياروحى !!! حتى أننى كتبت أبيات قلت فيها :
غنى الحورى ألحانو
حرّك قلبى وأشجانو
رجع لى قديم الريد
ذكرنى الاهل والصيد
ياسقاينا ريدنا شديد

والله أتارينى من زمان بتاع حب وريده وشده وإن شاء الله الشده ما تروح ولا الريده!!! وبريد البريده وست البنات .