من الحب ما قتل!!! والفاتح جبرا من الرآى العام

فى عموده المقروء (زاوية حادة) بصحيفة «الرأى العام» بتاريخ السبت 26 مارس 2010م رشحنى أخى وصديقى الكاتب الساخر جعفر عباس (أبوالجعافر) لمنصب (زوج مسيار) من سيدة سعودية (33 سنة) قامت برصد مبلغ مليون و«330» الف دولار (فقط) لمن يتزوج بها وهي امرأة وضعها المادي أكثر من ممتاز وتريد الستر غير أن لديها شرطاً (تعسفياً) قد لا يعجب الكثيرين وهو أن يقبل الزوج العيش معها في الفيلا الخاصة بها يعنى مسيار وكده!
يقول صديقى أبوالجعافر - أمد الله فى أيامه-: شخصيا أرشح الحبيب الفاتح جبرا لهذا المنصب (أنا أعرف أنه سكند هاند بحكم أنه متزوج ولديه عيال وأعرف أن زوجته سيدة فلتة وبنت ناس ولكن ولأنني احب الفاتح فإنني أريد له الخير.. ولا تزعلي مني يا مدام فالسيدة السعودية تريد زوجا مسياريا.. يعني يروح جدة أسبوعا ويقعد معك «3» أسابيع!! والفاتح لونه فاتح وبالتالي فإنه من السودانيين القلائل المؤهلين للمنافسة، وهو أستاذ جامعي وحبوب.. ارسل لي الـ (سي. في.) يا الفاتح لأنني أريد لك الانعتاق من البرنجي، والانتقال من حي بيت المال حيث لا مال الى بيت مال حقيقي.. وإذا طلع الفاتح «جبان» ولا يعرف مصلحة نفسه، فعلى الراغبين في الخطبة موافاتي بسيرهم الذاتية وصورهم غير المفبركة بالفوتو شوب مع إرفاق «50 »دولاراً (رسوم إدارية) مع كل طلب.
انتهى كلام أخونا أبوالجعافر الذى ما أن إنتهيت من قراءته حتى (طوطوتا الجريدة) ودخلتها تحت (السرير) خوفاً من أن يصادرها (الأمن) فتقع فى أيدى (الحكومة) قائلاً لنفسى: الظاهر أبوالجعافر ده ما عارف حاجه ساااكت!!
فهذه السيده لو رصدت (مليار و330 مليون يورو) لما كان من الممكن أن (أخطبها ساااكت)!! بالطبع ليس لأننى زول (مرطب) والقروش التى عرضتها هذه السيدة (ما بتعنى ليا حاجه) ولكن ببساطة لأننى متزوج زواج (كاثوليكى)، وقبل أن يسارع أحدهم بإهدار دمى ( لو كان عندى دم) فدعونى أقوم بشرح المسألة وهى ببساطة أن المدام (كاثوليكية) وعندما تمت مراسم الزواج فى الكنيسة (بعد أن تمت فى المسجد) قال لى أحد القساوسة ممن أشرفوا على المراسم يخاطبنى:
- نحن نعلم أن دينكم يبيح لكم الزواج بأكثر من زوجة فهل تعاهدنا بأن لا تتزوج عليها؟
فأجبت عليه بالإيجاب معاهداً وأديتو (كلمة رجال) والراجل بيمسكوهو من (لسانو) وكده!
أها يا جماعت الخير هسه بعد ده كووولو (وأبوالجعافر عارف الموضوع ده) فى داعى يقوم يرشحنى وكمان يقول ليا عاوز ليكا الخير وعاوز أطلعك من (البرنجى) والفلس والشنو ما عارف؟
بعدين حتى لو إتجاوزنا (الحتة دى) فأنا زول (مرضان بالقلب) وما بقدر على (المساسقة) وحكاية أسبوع فى (جدة) وتلاتة فى (أم درمان) لأنو من أول أسبوع فى (جدة) ح أرجع وأقضى باقى الاسابيع فى العناية المكثفة (ده لو ما أحمد شرفى) فهذه السيدة (بلا أدنى شك) سوف تحاول أن تسترجع (رأس المال) الذى دفعته فى أقصر فترة زمنية ممكنة!
ويبدو أن أخونا (أبوالجعافر) الجزئية دى (واقعة ليهو كويس) وزاغ من الموضوع وإلا لما قام بترشيحى لهذا المنصب متعللاً بحبه لى (ومن الحب ما قتل)، ولآثره على نفسه وقام بتقديم (السى في) بتاعتو وتم قبول أوراقه (بعلاً مسيارياً) لهذه السيدة خاصة وانه شخص معروف فى (المملكة) بحكم أنه ظل يكتب فى صحافتها عقود من الزمان!!
كسرة:
يقول أبو الجعافر: (وإذا طلع الفاتح جبرا جبان وما بعرف مصلحة نفسو !!) .. ياخى جبان جبان الخواف ربى عيالو بعدين ياخى بدل ما ترشحنى (للموتة المضمونة دى) ياخى رشحنى (اشتغل) معاكم فى (قناة الجزيرة) أو رسل ليا فيزا وعقد عمل انتا ما عارف (الزرووف) بقت هنا (سعبة) كيف؟

أضف تعليقك طباعة الموضوع أرسل الموضوع
(قراءة: تعليق: 20 طباعة: إرسال: )
التعليقات

--------------------------------------------------------------------------------

1/ waleed - (sudan) - 18/4/2010
نقول مبروك ياعريس ولا الحكومة عندها راى تانى .. أسمع الكلام مدام الظروف بقت صعبة عرس ورسل للحكومة التانية بدل تمشى وتجى .... عيش حياتك فى السعودية لافى محلية لا نفايات لاجمرة ... كسرة أحسن توافق عشان ماتروح فيها

--------------------------------------------------------------------------------

2/ ابومحمد الشنداوى - (جدة) - 18/4/2010
لك تحياتى الاستاذ/جبرا شوف المواضيع الزى دى ما فيها هظار ، زودى بى رقم الولية (الفات فيها الفوات) وانابجدة واكون معاها مش اسبوع على (طووووووووووول) لاتتردد بارسال رقمها وايميلها ، ولك الاجر عزيزى

--------------------------------------------------------------------------------

3/ فاروق نوري - (الخرطوم ) - 18/4/2010
موضوع لا يحتاج الي تعليق

--------------------------------------------------------------------------------

4/ يوسف الطيب - (عمان) - 18/4/2010
الناس في شنو والحسانية في شنو

--------------------------------------------------------------------------------

5/ أسامة أحمد محمد خالد - (السعودية) - 18/4/2010
الآن فقط تأكد لنا ولأبو الجعافر إنك فعلاً ما عارف (مسلحتك)... يا أخي الراجل ما قصر معاك أداك أسبوع مقابل تلاتة، إنت عارف حسب (المعايير الدولية) العاملين في حقول البترول في الفيافي والـ Off-Shore بيدوهم شهر قصاد شهر تقديراً لقساوة الظروف... يعني عرض أبو الجعافر يكون الحاجة الوحيدة التي ضاهت بل فاقت المعايير الدولية في الأيام دي... وغايتو أكتر من كدة ما في حاجة أحسن إلا توافق على العرض لكن بتمانية شروط وبعد تقبض المقدم تنسحب..

--------------------------------------------------------------------------------

6/ ابوجودي - (الامارات) - 18/4/2010
كلمتك دي كبيره خلااااااااااااس : الزرووووف بقت سعبة كيف يعني كل ما نأمل ونقول الناس قالت كلمتها ممكن يكون ترجع تقول كيف تغطي الصورة صورة طيب لي وين وكيف لمتين ياجبره احنا ما قاعدين بي اقامة يا الغالي

--------------------------------------------------------------------------------

7/ مها عبد الرحيم - (المركز الفومي للبحوث) - 18/4/2010
كنت عاوزة اعلق على مكتوب البرادعي (ابو الجعافر ) ولما كنت واثقة من انك سترد علية يوم ما فقد اثارت ان انتظر ردك و البرادعي ما اختارك انت الا لى شئ فى نفسة فهو هنا اشبة الفتاة التى عينها على رجل تريدة ولكي تجس نيضة و تعرف هو مرتبط ولا لا تقترح علية ان يتزوج شخصية بعينها و تراها تقول لة ما تعال نعرس ليك فلانة ديك و قلبها يتمنى ان يرفض الفكرة فالظاهر البرادعي يتمنى الامر لنفسة ولكنة خائف من حاجة و المسالة ما مسالة و يؤ ثرون على انفسهم ولو كان بهم خصاصة ومن هنا اقول للبرادعي شنو يا يرادعى خليك شجاع و خوض المغامرة الحياة فرص ولا خائف على كرسى الحكم و الزعامة المنتظر ما تخاف انا اول زولة ح ترشحك لا نتخابات القادمة لو رشحت نفسك ولو على الاولاد و الجماعة ما تخاف هم ما ح يصدقو ان جات لحدى عندهم فرصة زى دى و الصياد الشاطر من دقق على موقع الصيدة و الغنيمة بصراحة ما عارفة لى شنو بحب امازح البرادعى امكن لانو من عندينا وربنا يديك العافية يا جبر ا ويعطى البرادعى العافية و الصيدة الشافية و البحر ما بيابا الزيادة

--------------------------------------------------------------------------------

8/ ابوهاشم - (ابوظبي) - 18/4/2010
يا استاذنا جبره انتا مالك بقيت ذي ناس الحكومه ..انهم كل ما يكونو عايزين حاجه مثلا عايزين يزيدو السكر او البنزين بقومو يجسو رد فعل الشعب الفضل ويطلقو الاشاعه ويشوفو رد فعل الشعب الفضل ... والظاهر عليك ح تعملها ده اذا ما عملتها ...ومكناتك دي ما بتمشي فينا يا فرده

--------------------------------------------------------------------------------

9/ السماني - (عمان) - 18/4/2010
ياأستاذ جبرا / لك التحايا حتي تضحك ملئ شدقيك/ عندي ليك اقتراح قبول هذا العرض وبدل ما تكتب لينا أكتب يوميا عمود ساخر لتلك السيدة السعودية فسوف تجدها بعد ايام قلائل في عداد الاموات من شدة الضحك والحسرة و ليس من شئ آخر. وبعدين ماتعمل نايم وتنسي حق الوصية.

--------------------------------------------------------------------------------

10/ نانا - (السودان) - 18/4/2010
ياخوانى ادونى عنوان المرة دى وانا بعرسها لى راجلى طوالى وموافقة يقعد معاها 3 اسابيع وانا اسبوع بس نقعد معاها فى الفيلا دى

--------------------------------------------------------------------------------

11/ السودانى - (( الامارات)) - 18/4/2010
هات العرض ده يالفاتح جبرا ( الله يجبر خاطرك) ورفضت عرض من صديق حميم وأنا خايف تبقى عليك قصة واحد نايم حلمان بأن شخص مجهول يهديه مبلغ جنيهان ورفض النائم بحجة إثنين لاتكفى وألح على المجهول بأن يتمها ثلاثه وغادر المجهول وتركه بعدما أصر النائم على المبلغ وصحى من نومه فلم يجده فأغمض عينيه بسرعه فائقه وقال ليه ( طيب هات الإثنين ) فالمرأه الثانيه مع الاولى كلاعبين فى خانه واحده كل واحده تحاول إشراك نفسها لتثبت وجودها لتضع الأخرى فى خانة الإحتياطى تمهيدا لشطبها .

--------------------------------------------------------------------------------

12/ عبدالرحمن سعد - (الخرطوم) - 18/4/2010
فعلا أحسن ليك تتخارج من الكمين دا...!!!، بعدين لو / أبو الجعافر بقدر على الموضوع دا، أحسن يبقى عليهو لأنو والله محتاجين جدا ل / جبرا ، عشان يملا لينا الدنيا نكتة تخرج من عمق القلب، مش تزيد عليهو القلب ياخى

--------------------------------------------------------------------------------

13/ Suha Makeen - (Sudan) - 18/4/2010
Dear El Fatih I enjoy every ward that you write, i think both of you,Abu El Jaafir, the only means by which we can forget our problems for a while !!! many thanks

--------------------------------------------------------------------------------

14/ محمد حسن شوربجى - (السعوديه) - 18/4/2010
اعتقد ان هذه الزوجة المسيارية انسب لك ابو الجعافر اكثر من جبرا لانها ممكن تعيش معاك والحكومة وما حتفهم رطانتكم ممكن تودوها وتجيبوها وتضمنوا انها ما حتزعل , اما مع جبرا فالامور ستكون مكشوفة حتى لو رن الموبايل فى فيلتها بالسعوديه حتفهم القصة كلها , ابو الجعافر فى كل الاحوال هى الانسب لك فتوكل على الله وتقدم مسياريا

--------------------------------------------------------------------------------

15/ ابـــوعـــ هـ ـــــــــود - (السعودية) - 18/4/2010
السلام عليكم و رحمه الله و بركاته جبرا لاترفس النعمه تحياتي لك يا جبره بس يا جبره انا داير اطلع برا موضوعك و عندي سؤال عفوي للاخت / مها عبد الرحيم انتي يا مها متزوجه و لا لسع

--------------------------------------------------------------------------------

16/ بشرى مبارك إدريس - (بيريطانيا (بيرمنجهام )) - 18/4/2010
الاخ الفاتح جبرا جبر الله كسرك فى هذه الفرصة التى ضاعت منك والجات فى البرنجى سامحتك !!لكن البرنجى مع القلب دى ما بغتس حجرك أعمل حسابك نريدك أن تعلق لنا وتسخر الى ما بعد الديمقراطية العاشرة لو حسبنا أننا أستهلكنا فى 54 ثلاثة ديمقراطيات فقط فقد تكون الديمقراطية عندنا أربعة أو 7 سنوات أو 16 سنه أو 21 سنه مثل ديمقراطية الانقاذ الاخيرة !! وأرجع الان للموضوع لماذا أختار أبوالجعافر وما أظن أن أختيار المرأة لهذا العمر إنه إختيار أبوالجعافر وأجزم أن أبو الجعافر لايعلم أن هذا العمر هو عمر النساء فى الجنه فلماذا أختارت هذا العمر لانها تريد جنه الدنيا عند النساء هذا الامر لايمكن أن يحققة إلا شاب فى نهاية العشرين فلماذا لم يختار أبوالجعافر إبنه الذى يدرس فى ماليزيا من 6 سنوات فهل (طبق هناك ماليزية أرجو أن يجيبنا بمقال كارب !!على العموم نصحيتى لهذه السعودية أن تذهب الى نيجيريا ولاية كانو المسلمة فسوف تجد من يحقق لها هذا الامر وبحكم وجود عدد مقدر من السودانيين ربما يكون (خاتف لونيين وجنسيتن ويجيد لغه الهوسا ولغة القران الكريم ) ويكون العقد بالمال وبالفاتحة وبعيداً من الفاتح (كبكبة ) أقصد الفاتح جبرا

--------------------------------------------------------------------------------

17/ محمد الحسن - اللقب الجميل - (السعودية ) - 18/4/2010
لو أعطيتوني عنوانها يا جبرا، أنت وأبو الجعافر ما حأقصر معاكم إذا حصل نصيب، وبارك الله في من نفع وإستنفع.

--------------------------------------------------------------------------------

18/ محمد حمزه - (المليون ميل) - 18/4/2010
والله يااستاذ الفاتح انا من اشد المعجبيين باكتاباتك يديك العافية وجعللك زخرا للبلاد وين ماشايفنك فى حكيات انشاء الله خير وقول لا ابو الجعافر المراءه السودانية زيها مافى

--------------------------------------------------------------------------------

19/ حسن عبد الله - (الرياض ) - 18/4/2010
والله ابو الجعافر عايز يقدم ليك خدمة العمر لو لا حكاية استرداد راس المال طبعا الله يستر ما تقدر تدفع القسط الأول

--------------------------------------------------------------------------------

20/ عمك فتحي - (الدمام) - 18/4/2010
(واقعة ليهو كويس) حلوه دي .. يعني ما براي .. يجازي محنك يا أبو مروه

» كان عرف السبب والفاتح جبرا من الرآى العام
» بره الموضوع والفاتح جبرا من الرآى العام
» حجاج تحت التمرين والفاتح جبرا من الرآى العام
» الفهامة والمايقوما والفاتح جبرا نقلاً من الرآى العام
» تصوير سمعى والفاتح جبرا من الراى العام