الى الاخوان ودالقاضى وياسر الطيب الحاج وطارق حسن الشريف عايزين منكم كلمة ورأى وتعليق

الاخوان بالسقاى بنتكم سلمى عيسى الصافى قامت بمجهود مقدر بخصوص المنتدى الجديد كنت أرد عليها فى بعض الاشياء الى تتطلب رآى الجماعة نريدكم أن تظهروا ونتفق على رآى لان القرى من حولنا قطعت الشوط الكبير فى أمر المنتديات المدفوعة وأننتم الملح ده أبيتو ما تكتروا منو وظروفكم مقدرة!!!!! لكن طله بتاعة دقائق ما بتعمل حاجة أدونا رايكم بارك الله فيكم .

عدد المساهمات : 42 تاريخ التسجيل : 04/12/2009

لماذا الخذلان وانتم اهل الكرم والجود والمروه.
نعلم ان مشغولياتكم كثيرة ولكن ذلك لايمنع من المشاركة والمساهمة حتى ولو مرة فى الاسبوع
(جهد المقل)
بعد سفر بشرى مبارك لالمانيا انعدمت المشاركات تماما ما عدا مشاركات سامى الماحى
(له التحية والتقدير ) والله ياجماعة الخير الكلام دا ما بيصح منكم لان السقاى خرجت للمجتمع افذاذ فى جميع المجالات وما زالت (حواها حبلى ) عشان كده لازم منتداكم يكون قدر المقام , انا جيتكم ضيف وزول بلد جيتكم قاطع البحر (كتة ) ولو ما شجعتونى بمشاركاتكم الجميلة المعهودة بقوم احرد والمرة دى العوم (ضهر) عشان راجيكم ترفعوا لى اياديكم وانا فى نص البحر اقوم اقلب ضراع .
تحياتى لجميع الاهل بالسقاى بداية من اولاد بلتنا مرورا بصاحبى عصام / عماد ودعاتى وصاحبى بابكر على وما انسى دفعتى عامر تاج الدين واولاد قدورة على راسهم عمى (وفردتى ) يوسف عبد السلام واولاد السمانى ( وحريف الوست عوض / مالك الطيب) فردة بشرى مبارك (حبيب الجميع ) والذى اطلقت عليه اسم سيد اللبن وذلك لاثرائه جميع المنتديات بمواضيعه الشاملة لجميع التخصصات وخاصة تلك التى يمد بها يوميا منتدى السروراب وكذلك منتداكم ( والله يا جماعة جنى مبارك ده ثروة قومية عديل كده) ربنا يرد غربتو من المانيا لانجلترا (مؤقتا) عشان ينعش المنتديات التى اصبحت خاوية بعد سفره ونسأل الله رد غربته والعودة لديار الوطن وياخد منى سيك فى قبولو ويكون زميلو عوض الطيب انا زميلى (محمد عبد القادر الطيب من النية .. حافظها عديل)الاستاذ عماد ود عاتى نطلق عليه عبد المجيد اخوى(القصه يعرفها بشرى ) منذ ايام الجامعة بمصر (بالمناسبة ود عاتى صديق وزميل دراسة كان اوجه طالب سودانى فى جامعة الزقازيق) لكنو ما حريف فى الوست زى ناس بشرى (وينك ياعمدة يظهر الكواكب الخاصة اخدت وقتك كلو )
الونسة معاكم سمحة وعشان يمتد التواصل لابد من المشاركة الفعالة فى المنتدى
شدوا حيلكم شوية يا طارق,ياسر ,ود القاضى و..و...و...و...و...وكلكم
لكم تحياتى ومودتى
اخوكم د.صيدلى / عبد الجليل قسم السيد
العامرية وخريج الجيلى الثانوية
مدير المبيعات بشركة مرواكو للادوية - ام درمان - بانت
مشرف شركة ايساى اليابانية بالسودان
صاحب صيدلية العودة الحديثة - ام درمان المهندسين مربع 30

الاخ الدكتور عبدالجليل لك التحيه والود وأطل لك من بون والحمد لله الكمبيوتر أتصلح (قالوا السبب طبيز أيمن وإسلام والاتنين نكروا وقلنا ليهم ولايهمكم طبز روحو براهو !!)والله أسع أيمن يزازى جنبى قال لى يابابا ما تزيد من الساعة عشان دورى !!!. والله العظيم أنا بشوف دايماً مواضيعك أحلى من مواضيعى وأعيشها حرفاً وسطراً ونقطة وشوله فأسال الله أن تكون فى ميزان حسناتك .
*الاخ الدكتور الرايع عبدالجليل قسم السيد يبدو أنك ضربت فى الجبل شويه بعدم إطلاعك على المنتدى قبل شهر والسبب أن الذين تسأل عنهم كونوا منتدى سموهو (السقاى السروراب ) وأنا رفضت الاسم والدخول فيه وطلبت أن يكون الاسم السقاى والتى تشمل السقاى المثلثة السروراب والبتلاب والانصار ولكنهم رفضوا ودفعوا القروش وتم إفتتاح المنتدى يوم 16 فبراير ورابط المنتدى تجده على هذا المنتدى قبل يوم 16 فبراير أنزل الرابط فى كل المنتديات الاخ محمد صديق المشرف على المنتدى الرياضى . وكانت الاخت سلمى عيسى الصافى التى صممت المنتدى ووعدتنى بتغيير الاسم الى السقاى ولكنها (نكصت عن وعدها ) تحت أراء تزعمها ياسر الطيب الحاج وأشرف جادالله تفيد بأن إسم السقاى السروراب لانرى فيه أى عيب حاله حال منتدى السروراب غرب وأنا أحترم رأيهم وتمنيت لهم التوفيق وعندى 12 مشاركة ولكن سوف تكون مشاركاتى فقط فى الافراح واللاتراح لاقدر الله .
أمّا عن الوست والاخ عماد وعوض مالك ومحمد عبدالقادر الطيب أولاً تحياتى لهم جميعاً وأعدكم إن شاء الله وأنا سوف أكون فى إجازة فى يوليو القادم أن تكون هناك ثلاثه جولات فى السقاى فى صالون المبارك إدريس وفى النيه منزل الاخ محمد عبدالقادر الطيب وفى منزلكم العامر فى العامريه بس عندى طلب بسيط وهو أن نقوم بعمل ختمه للقران نهدى ثوابها لكل مواتنا من أهلنا فى القرى الثلاثه وبعدها بفاصل طويل من الونسه والذكريات الطيبه يمكن أن يدوّر الوست وبما أننى سوف أكون لوحدى فسوف أكون جاهزاً للمبيت فى النيه أو العامريه فما رأيك فى هذا العرض ؟؟؟
أتمنى أن أجدكم على الصحة والعافيه وتقريباً لى 20 سنه ما لعبت وست مع عوض الطيب لكن ما بكون نساهو بس أختونى من زماله عصام وعصام حريف والله ما فيهو كلام لكن حظى وحظو ما ماشين مع بعض !!رغم أننى أتذكر أسنافيك كاربه فى العيد لينا على صديقة فى العام 1986م المكاشفى محمود والفاتح سليمان دفعتى فى المتوسطة فى الكباشى وكبير أمناء المخازن فى الجوازات (الجنسيه ) وكانت إسنافيك مشهورة ومحضورة أظن كانت المتفرجين (هلال مريخ من كثرتهم !!!) وحتى الان المكاشفى يتذكرها كأنها أمس لانها فى عقر دارهم فى الخليله !!
ورغم ذلك الاسنات الطارت منو بسبب (الدقسات ) تفوق العشرة!!!

» الترحيب بالاعضاء الجدد
» ترحيب بمن هو اهل له(الشاعر الفحل محمود نور الدائم)
» قصيدة فى المديح على روح الحاج زين العابدين عبدالله حاج البدرى ولكل آل الشريف
» مبروك لكم جميعا
» مــــرة واحــــدة