محمد عبدالماجد " وان طال السفر"
< قبل ما يعملوا (الزلط) ...ود الحاجة كان عندو (لوري) عامل بيه (سافوتة) للناس في الحلة.
< زمان كان في تقليعة بتاعة (لواري)....اللواري كانت ماسكة الجو...طبعا كان لا في افراس ...لا في صفصاف.
< الواحد كان لو عاوز يسافر (يتقنقن) في اللوري من صباح الرحمان ..وقت يصل المنطقة المسافر ليها يصل متل (فوطة الفراني).
< اضانو يفتش ليها شهر ما يلقاها من الغبار.
< عيونو واقعات تقول مركبن ليهو ميكانيكي سيارات ...بتعلم الكهرباء في (عجلة الجيران).
< وشعرو منكش متل (دولاب العزابة) ...ضلفة فيها هدوم ..وضلفة فيها (كتب ومجلات)..وضلفة فيها (شاي حب)...وضلفة فيها (توم وشمار).
< دواليب العزابة كدا.
< الدولاب تلقي خمسة ضلف ..ضلفة في الصالون ..وضلفة في غرفة النوم ..وضلفة في المطبخ ..وضلفة في الحوش ...وضلفة عند الجيران.
< المهم ..هسع دا ما موضوعنا.
< موضوعنا للتذكير هو لوري ود الحاجة.
< لوري ود الحاجة دا قلت ليكم ...وقت يدخل الحلة بشغل البوري حقو ..بتذكر البوري كان مقطع من اغنية حماسية.
< اتذكرت (البوري) حقو كان مقطع من اغنية (الجنيات الجرو).
< عشان كدا كان لوري ود الحاجة وقت يدخل البلد ...(الجنيات) كلهم بجروا قدامو.
< وكان اللوري كل خطوة والتانية بقيف ينزل ليه راكب.
< كل ما (اللوري) يقيف قدام بيت ...الجماعة يقولوا : انتوا ناس ودالخليفة عندهم شنو؟...في جماعة جوهم من الخرطوم.
< ناس الخرطوم ...طبعا بتعرفوا من (شنطهم)...الشنطة تلقاها تلمع متل (البطيخة).
< انت اول (البطيخة) بتلمع.
< بطيخ هنا ما بعرفو.
< لكن بطيخ روسيا بيلمع.
< اها الزول دا عاوز يفك اي حاجة ويقبل علي (البطيخ).
< وعاوز ليه طريقة يعرج بيها علي (روسيا).
< قالوا ليك (روسي) اتزوج ليه روسية.
< الموضوع اكثر من عادي ..يعني شنو روسي يتزوج روسية.
< انتوا اصبروا ..بس جنكم (تنقنقوا).
< الروسي بعد خمس سنوات مشي لي نسابتو الروس.
< برضو الموضوع ما فيه اي حاجة غريبة.
< يا جماعة انتوا ما تصبروا.
< انا ماشي عليكم في الكلام.
< الروسي مشي لي نسابتو ...واثناء ما هو قاعد مع نسابتو ..في واحد منهم قال ليه : ان شاءالله جبت ليك ولد.
< الروسي قال ليه : ابدا ...لكن الولد بجي.
< الزول البتشوبر قال ليه : ان شاءالله جبت ليك بنت؟.
< الروسي قال ليه : ابدا .لكن البنت بتجي.
< البتشوبر ..قال ليه : طيب جبت شنو؟.
< الروسي قال ليه : جبت لي (بطيخة) ودخلتها التلاجة.
< يا راجل ..حمدلله علي سلامة (البطيخة).
< البطيخة هسع ما موضوعنا ..موضوعنا (لوري ود الحاجة).
< انت (لوري) ود الحاجة فايق ليه.
< زمان وقت اللواري ...كان في (موضة)...حقت حجز المقاعد القدام.
< وكان في حاجة اسمها : احجز لي (الشباك).
< انا هسع ما عارف الموضة دي فاتت وين؟.
< في ناس ما بركبوا إلا في الشباك.
< وفي واحدين بعملوا فيها حرفا ...وقت ما يلقوا (الشباك) ...بعملوا فيها ناس (تمباك)...وفي واحدين بقولوا بستفرغوا.
< في واحد ركب ليهو في بص....قعد ليه في حتة اضايق فيها شديد.
< قاعد فوق (اللستك) طوالي ..قعد يتلفت في البص متل (حكم الراية)..شاف ليه بنت قاعدة علي الشباك.
< تقول في الاسكندرية.
< زولكم مشي علي البنت وقال ليها : معليش ممكن تقوموا لي من الشباك ..عشان عمك (بسف) يا بنتي.
< البنت قالت ليها : انا ما بسف ...لكن افضل من اديك (الشباك)...اديني انت (التمباك).
< السف دا نحن بنسفو ..لو فيه (شباك).
< انت يا ابو الشباب عاوز تفك (لوري ود الحاجة) وتمسك لينا في (الشباك).
< الشباك ان شاءالله عيشتو تطير.
< لوري ود الحاجة...كان كاتب في خلفيته (القسمة ما معروفة).
< اي زول يركب في اللوري ..قسمتو بتكون برة.
< الغريبة في الامر ...ان لوري ود الحاجة كان في الوقت داك عاجبنا ..رغم ان اللوري كان كل خمس دقائق بضرب فيه (استك).
< عندنا زول في الحلة ...علم ولدو الكبير ..وسفرو روسيا ..عشان يحضر هناك.
< الولد وقت جاء شايل الدكتوراة في (استنساخ الاجنة)..ابوه قال ليه : انا ما عاوز منك حاجة غير انك تجيب لي (لوري) زي لوري ود الحاجة.
< في واحد في الحلة عامل فيها مثقف ..قال ليه : انت بدل ما تقول ليه : عاوز ليك قطر ...تقول ليه عاوز لي لوري زي لوري ود الحاجة.
< طبعا في ناس لوري ود الحاجة عامل ليهم (عقدة).
< غايتو زمان (اللواري) دي كانن حاجة سمحة.
< زمان الواحد وقت يسافر بي لوري يصل البلد زي (دقيق الطاحونة).
< هسع الزول البسافر يصل (ساقط)...ضاربو المكيف...المسافر بقي يلمع زي (سنجال تو).
< زمان المسافر من الشنطة ما تفرزو.
< هسع الحكاية دي انتهت ...ظهرن باصات زي (الصيدليات)....نضااااااااف.
< مرة عندنا واحد ركب ليه بص سياحي ...الرحلة كلها يصور في البص والركاب بالموبايل.
< عقدنا عديل ..تقول البص حقو...فرحان بيه جنس فرح.
< السفرية كلها يضحك.
< الزول دا من شدة اعجابو بالبص والرحلة ..قالوا ليك وقت وصل الخرطوم ...جاء قالب طوالي في البص التاني ..قال دي فرصة الواحد ما يفوتها.
< يفوتها كيف؟.
< انتوا تعالوا هنا (كرت) يوسف محمد حصل فيه شنو؟.
< والله يا برجاس كرتكم دا بقي متل (نجيلتكم).
< اوعكم تقولوا لي ما وصل.
< الواحد قدر ما حاول يتزاوغ من موضوع (الكرت) ما قدر.
< الكرت الواحد يتعارض ليه متل (الشوكة).
< هسع تلقاكم قلتوا ..اها (الكرت) وصل ...تاني بتقول شنو؟.
< الكرت قالوا ليك هسع حايم في شارع الستين.
< اها الكرت عرفناه وصل ...وشبع وصول.
< الاعداد كيف؟.
< تصوروا دائرة الكرة بنادي الهلال ...اول حاجة قدروا عليها ...قالوا سوف نغلق التمارين.
< انتوا لو عاوزين تغلقوا التمارين ...ما كان تعسكروا برة.
< وقت عاوزين الراحة ...ما كنتوا تسافروا.
< ما تقعدوا لينا هنا ...وتقعدوا (تثاقفوا) فينا.
< كامبوس ...كل مرة يقولوا بصل الجمعة القادمة.
< يفوتوا جمعة ...جمعة.
< لا كامبوس يجي ...لا جهازه المعاون.
< انتوا يا ناس الهلال اي حاجة تجرجروا فيها.
< انتوا (النجيلة) عملتوها لينا موضوع.
< في واحد عامل فيها فاهم قانون.
< عامل فيها فاهم اي حاجة.
< ثقافة شديدة ..اي موضوع تفتحوا يتصدر ليك فيه.
< الزول المثقف دا ..قال لي تعال هنا : انت يوسف محمد دا (كرتو) وصل يا دوب كيف بيلعب مع منتخب بلادو قبل كرتو ما يصل.
< قلت ليه علاقة (الكرت) بمشاركة يوسف محمد مع منتخب بلاده شنو؟.
< زولكم المثقف قال لي : انت يا زول ما عارف المريخاب ... هسع لو عرفو المعلومة دي...بقوموا يسربوا الموضوع دا لي منتخب زامبيا.
< المريخاب طبعا ممكن يعملوها.
< الحاجات دي عادي بتحصل عندهم.
< هسع ينط لينا واحد ..يقول لينا : طيب وين الوطنية؟.
< انا ما عارف الوطنية الدخلها في الموضوع دا شنو؟.
< غايتو (بتثاقفوا) فينا ...جنس ثقافة.
< قالوا ليك مريخابي (صريح)..الصراحة دي ما بتلفت فيها.
< المريخابي دا لاقي ليه زميل (وصافة) قديم ...قال ليه : انت عارف مع يوسف محمد دا الهلال دا ما محتاج ليه اعداد.
< يوسف محمد مدور زي الطلقة في بطولة الامم الافريقية (قولوا ما شاءالله).
< لاعب زي يوسف محمد دا ...سيون السويسري كيف يفرط فيه.
< الظاهر كدا ناس سيون ديل عندهم اداري زي (جمال الوالي).
< جمال الوالي طبعا ما بقصر معانا.
< في مريخابي تاني ..شاف يوسف محمد في بطولة الامم الافريقية ..قال : مع يوسف محمد دا ..جمال الوالي إلا يعمل ليه اربعة طوابق.
< احسن ليكم يا ناس المريخ شوفوا (طوبكم) من بدري.
< الشغل دا ما بتقدروا عليه.
< معسكر كينيا ما بحلكم.
< ملحوظة : عجلوا لينا بالكرت ..باقي نحن مستعجلين شديد.
هوامش
< وارغو في (مشجعين) المنتخب النيجيري مافي.
< كلتشي في (الخريطة) ما موجودة.
< انتوا عليكم الله يا مريخاب وقت بتشوفوا يوسف محمد مع المنتخب النيجيري ما بتقولوا : كلو من جمال الوالي.
< هسع الهلال كان سجل عبدالكريم الدافي ...دا كلو ما كان حصل.
< خسرتوا ليكم 2 مليون دولار ساكت.
< انتوا خسرتوا 2 مليون دولار ..ونحن كسبنا يوسف محمد.
< قلنا ليكم الزول دا لسع بشجع الهلال ..قعدتوا تغالطوا.
< السنة كلها تغالطوا.
< يوسف محمد طلع ليه (قونين) من الشبكة في مباراة المنتخب النيجيري مع المنتخب الزامبي.
< يعني الموسم الجديد ...يمكن (المعز محجوب) يقعد احتياطي.
< لاعب يطلع في الاقوان متل (الزلابية).
< قولوا ما شاءالله.
< الغريبة في ناس بقولوا ليك ..يوسف محمد ضعيف في الدفاع.
< يعمل ليكم شنو اكتر من كدا.
< انا لو كنت في مكانة بلة جابر ...كان عملت صور اشعة للركب.
< ما معقول يكون يوسف محمد طرف يمين ...وبلة جابر طرف يمين.
< المريخ الشايفو قدامي دا ما عاوز ليه اعداد.
< لكن نحن عاوزين نستعد للاهلي المصري والترجي.
< ليه حقو الطاش وعماد الطيب و الشاذلي يستقيلوا.
< الموضوع ما بستاهل.
< ناس بوكو بحسموه.
< مسكين ابوجريشة تعبان في الفاضي.
< بالمناسبة وصول كرت يوسف محمد دا عاوز ليه صفحة عديل.
< عاوز ليه من الغلاف للغلاف.
< والله كرتك دا مفروض يضبحوا ليه عديل.
< كرت الفتوح.
< خبر عاجل: النفطي قال لو كان عارف منير امبدة ما كان بوقع.