الفاتح جبرا : لف ودوران

كل الأشياء فى الكون (تلف وتدور) الكواكب والأفلاك والنجوم ومحركات الطائرات والعربات والمكيفات والمراوح كلها ترتكز على مبدأ (اللف والدوران) بل كل المواد صلبة كانت أم سائلة وحتى الغازية تتكون ذراتها من نواة وإليكترونات تدور حولها (يعنى برضو لف ودوران) والكائنات الحية جميعها بما فيها الإنسان يدور بداخلها الدم فى دورات كبرى وصغرى حيث يتم توزيع الدم المحمل بالأكسجين على أجزاء الجسم ، هذه الرميه كما يقول زميلنا على اليمين (د. البونى) لزومها أن (نظرية اللف والدوران ) هذه تنطبق تماما على الإنسان وتصرفاته وخاصة الإنسان الأمازونى
فالانسان (الأمازومنى) عندما يولد وقبل مرحلة المشي يستخدم يديه ورجليه دائراً حول نفسه ثم عندما يحاول تعلم المشى تجده يلف ويدور حول (امو) ممسكاً بفستانها (عشان تشيلو) ثم عندما يكبر قليلاً ويتجاوز هذه المرحلة يبدأ فى (اللف والدوران) حول والده طالباً منه أن يشترى له (لعبة) أو (حلاوة) ثم إذا ما دخل المدرسة يبدأ فى ممارسة عملية اللف والدوران على أساتذته :

- يا ود ما كتبتا الواجب مالك؟

- ما أصلو يا أستاذ نسيت الكراس فى البيت (ما عندو كراس من أساسو)

وما أن يتجاوز مرحلة المدرسة ويدخل أحدى جامعات (الفكة) ويبدأ فى عمل علاقات مع الجنس الآخر حتى يبدأ فى ممارسة (اللف والدوران) :

- ياااى يا هانى القميص ده يجنن .. إشتريتو من وين؟

- ده من محل كده فى لندن إشتريتو لمن كنا مع (بابى) فى الإجازة السنة الفاتت (يكون ما دخل عفراء فى حياتو) !

ويتوظف صاحبنا (لو محظوظ) ويبدأ إستخدام خبراته اللفلفانية الدورانية التى تكون قد إتراكمت لديه فيسأله رئيسه المباشر :

- جاى متأخر ساعتين مالك؟

- أصلو الكبرى كان فيهو حادث ولحدت ما جا الونش وشال العربات حتين الحركة مشت !



ويتزوج صاحبنا فتسأله زوجته :

- إنتا الليله السبت إجازة بتتلبس وتتشنط كده ماشى وين ؟

- (وهو ينظر للساعة) : المدير أدانا شغل قال لازم نسلمو ليهو بكرة

- وبتعاين للساعة دى إنتا (مأجر ليك عجلة)

وهكذا ينمو الإنسان الأمازونى فى هذا الجو الملئ باللفلفة والدوران فتجد أن :

- التاجر يلف ويدور على الزبون عشان يقنعو بأنو بضاعتو أحسن بضاعه مع إنها (مهربة) و(مقلده) ومنتهيت الصلاحية .
- الطبيب يلف ويدور على المريض ويطلب منو يعمل مليون صورة شئ (مقطعية) وشئ (رنين مغناطيسى) وشئ (أشعة سااكت) ومليون تحليل شئ (الفسفور فى الدم) وشئ (البوتاس فى البول) وشئ (البكتريا فى اللعاب) وشئ (الطحالب فى الفسحة) - طبعن من المختبر الفلتكانى – ثم يطلب منه مراجعته بع أسبوع ليدفع نص قيمة الكشف (مرة تانية) ! ده لو ما قال ليهو أعمل الحاجات دى تانى من أول وجديد !

- الصيدلي : اذا طلبت منه دواء بعينه وما كان عندو ما بيقول ليك الدواء ده ما عندى لكن ح يمشى الرف ويتناول ليهو دواء (تانى) وح يقول ليك :

- ده نفس الدواء الكتبو ليكا الدكتور بس عاملاهو شركة تانية والإسم التجارى بس هو الإتغير الدواء الكتبو ليك الدكتور إسمو (سلامستين) وده إسمو (باى باى آمين) لكن مكوناتهم وااااحده !



- لاعب الكرة : مما تجيهو الكورة يقعد يلف ويدور بالكورة لحدت ما يقطعوها منو .. وفريقو يطلع مهزوم 6 صفر ومجلس ادارة النادى يجتمع و(يلف ويدور) وفى النهاية يطلع (المدرب) غلطان !!



وهكذا الحال حينما تبدأ فى بناء منزلك يبدأ (المقاول) فى اللف والدوران وإذا ذهبت لإصلاح عربتك يبدأ الميكانيكى فى اللف والدوران وإذا ذهبت لإجراء معاملة يبدأ الموظف فى اللف والدوران وإذ مشيت وين يبدأ الما عارف مين فى اللف والدوران ... وأنا هسه ذاااتى ليا ساعة بلف وأدور عشان أكتب عن اللف والدوران بتاع (الجماعة) لكن خايف المقال ما يتنشر !!

انتهى.

لفو وعين الله ترعاكم ....!

بدون لف ودوران ... تسلم علي المرور