{ عندنا زول في الحلة السنة كلها يشكى من (وجع الضرس)...زول اليوم كلو ماسك (ضرسو).
{ جاب للضرس عقدة.
{ طبعا في ناس (عباقرة) في الحتة دي ...لما يلاقوه بقولوا ليه : انت الضرس دا ما تريح نفسك وتقعلو.
{ انتوا فاكرين (الخلع) دا ساهل.
{ طبعا هو عمل كثيرا بالوصية دي ...كل مرة بمشى للدكتور عشان يقلع (الضرس).
{ الدكتور تمشى ليهو يقعدك ساعة في الاستقبال.
{ تقول قاعد ليك في حفلة ...ما بشتغل بيك الشغلة ...يطلع ويدخل فيك ..ويتكلم في التلفون.
{ يندمك علي مشيتك ليهو.
{ المشكلة بعد ما تدخل للدكتور ...الدكتور يقعد ينظر ليك.
{ زولكم قال كل ما يمشي ليه علي دكتور بتحصل ليه المواقف دي.
{ الدكتور بقول ليه : ضرسك دا ملتهب ...عشان كدا ما بنقدر نقلعو ليك تعال لينا الاسبوع القادم.
{ الاسبوع القادم وقت يجي ...الالتهاب بكون راح ...ووجع الضرس ذاتو بكون راح...عشان كدا صاحبكم بنسي الموضوع وبقول انسي يا معلم.
{ الاسبوع التاني ...زولكم بيوجعو ضرس تاني ..يمشي عشان يقلعو...الدكتور بقول ليهو ضرسك دا ملتهب ..تعال لي بعد اسبوع.
{ يا دكتور انا الضرس دا لو ما ملتهب ..ما في حاجة بتجيبنا ليك.
{ انا جايبني ليك (الالتهاب) دا.
{ بعد اسبوع الالتهاب بكون راح ..ووجع الضرس برضو بكون راح...لكن ضرس العقل قام عليهو.
{ الزول يمشي للدكتور عشان يقلع ضرس العقل ...الدكتور زي كل مرة بقول ليهو : ما بقدر اقلع ليك ضرسك دا ...عشان ملتهب ..شيل الحبوب ديل وتعال لي الاسبوع القادم.
{ الاسبوع القادم وقت يجي الالتهاب بكون راح ..والوجع ذاتو بكون راح ...لكن الضرس الاول داك ..بكون قام عليه.
{ زولكم بمشي للدكتور ...الدكتور بقول ليهو الضرس دا ملتهب.
{ وشيل ابلع الحبوب دي.
{ وتعال لي الاسبوع القادم.
{ دا برنامج الزول دا.
{ هسع الموضوع دا عليكم الله ما زي تسجيلات الهلال.
{ المحترف يسوقوه عشان يعمل ابداء الرغبة.
{ بعد ابداء الرغبة نقعد شهر في انتظار (الكرت).
{ ناس الهلال ديل شطب (سولي شريف) عملوا ليهو (توم وشمار).
{ انا اول مرة اعرف انو الشطب دا صعب كدا.
{ تقول عاوزين يشطّبوا ليهم (عمارة).
{ عندنا زول تاني ...هو برضو بشبه تسجيلات الهلال.
{ زول قليل وشوية .....متل (الجبنة) في ثلاجة العزابة ...5 دقائق ما بتقعد.
{ الغريبة كلهم بنكروها ...الاكلها ما بتعرفو.
{ ديل بنكرو البحر.
{ التلاجة في بيت العزابة ما بكون فيها غير (قالب تلج).
{ طيب الكلام دا بالنسبة لي تسجيلات الهلال ...تسجيلات المريخ كيف؟.
{ تسجيلات المريخ دي زي (لمبات) الداخلية ....كل خميس بسرقوها.
{ وكل سبت بقولوا للخفير: انت البسرق اللمبات ديل منو؟.
{ الخفير بقول لي مدير المدرسة : والله الولاد المتل (خصومات) المرتب ديل ...الله لا يريحهم ...ديل بسرقوا الكحل من العين.
{ ديل عفاريت ...لو (كليتك) ما عامل ليها مثبت ما بتلم فيها.
{ ديل مرة سرقوا التلفزيون وهو شغال.
{ ناس البيت قاعدين زي العجب ...بحضروا في مباراة القمة.
{ الحرامي جاء شال (التلفزيون) وشغل ليهم الراديو وفات.
{ في واحد من ناس البيت عامل فيها مفتح ...وقت الحرامي شال التلفزيون وشغل ليهم (الراديو)...قام واتنفض وقال : الصورة دي مالها بقت ما واضحة؟.
{ ما واضحة في عينك.
{ هسع ناس المريخ ديل كل مرة يجيبوا ليهم محترفين ....وفي النهاية يطلعوا اي كلام.
{ شيء وارغو...وشيء لاسنا.
{ وشيء نفطي ..وشيء مرابط....وشيء حضري.
{ وفي النهاية تبقي عليهم حكاية (اللمبات) المسروقة.
{ في لمبات بتحرق كل 24 ساعة...انا ما عارف البحرقها شنو؟.
{ تقول بتلعب تحت السن.
{ في اندية في الممتاز لاعبي المرحلة السنية عندهم كدا...اللاعب يسجلوه ...ما تشوفوه تاني إلا وقت يكمل السن القانونية يقوموا من يكملها طوالي يشطبوه.
{ في اندية كدا ...المرحلة السنية عندهم زي (سكين الضبيحة) ما بطلعوها إلا في العيد.
{ طبعا في ناس بضبحوا كل جمعة.
{ لكن في ناس كمان ...(الدم) دا ما بشوفوه إلا في (الفيلم الهندي).
{ هسع ناس المريخ ديل بتذكروا ليهم لاعب في المرحلة السنية.
{ اللاعب بتسمع بيهو مرتين في المريخ.
{ يوم يسجلوه.
{ ويوم يشطبوه.
{ هيع.......عفارم عليكم.
{ المريخ خليهو هسع ...ناس الهلال ديل قصتهم شنو؟.
{ ناس الهلال عندهم (مفاجأة).
{ تاني.
{ صلاح ادريس قالوا نفي في صحيفة المشاهد الكلام الذي نشر عنه في العربية نت بقوله ان الهلال اكتفي بالاجانب بي (امادو).
{ تصريح طبعا محبط شديد...تصريح العربية.
{ اها وقت صلاح ادريس نفي هذا التصريح .....ناس المريخ تاني رجعوا ما ينوموا.
{ انتوا تعالوا هنا ..بكري المدينة دا ما تشوفوا ليه حل.
{ جنسوه.
{ ادهو الجنسية المصرية ..او الجنسية النيجيرية ...وسجلوه كمحترف.
{ اصلو اتحادنا العام دا بحارب في اللاعب الوطني.
{ وبعد دا كلو ...الاتحاد العام بعمل فيها انو بفتش عن مصلحة اللاعب الوطني.
{ اسكتوا عليكم الله ...الموضوع دا ما تتكلموا فيه.
{ غايتو شداد دا عندو جنس قوانين.
{ تقول بدقها في سوق ستة.
{ انت يا شداد القوانين دي بتجيبها من وين؟.
{ قوانين شداد دا زي حكاية الزول السافر ..روسيا.
{ اول ما نزل من الطيارة ...ودخل موسكو ..شاف ليهو بتاع تاكسي روسي وقال ليهو : عليك الله وديني (دار الرياضة ام درمان).
{ بتاع التاكسي الروسي ..قال ليهو : لكن نحن هنا ما عندنا (دار الرياضة ام درمان).
{ زولكم قال لسواق التاكسي: وقت ما عندكم (دار الرياضة ام درمان) رافع نخرتك في شنو؟.
{ بتاع التاكسي ..دور التاكسي حقو وخلاهو.
{ زولكم اتقدم شوية ...مشي ليهو لي مطعم بتاع سمك ...لقي ليك (الروسي) صاحب المطعم عيونو متل (القون الفاضي)..صاحبكم قعد ..الجرسون جاهو ..قال ليهو : عاوز شنو يا ابوالشباب؟.
{ الكلام دا كلو طبعا بالروسي.
{ قال ليه : جيب لي سمك ما فيه (شوك).
{ الروسي غتيت ...قال ليهو : سمك هو وإلا فول الما فيه شوك دا.
{ مرة في واحد مشي طلب ليهو طلب فول ...وضرب ليك في الفول دا متل (الكمانات).
{ زولكم وقت عاوز يقوم قال لي الجرسون والله عندكم فول احلي من شية الضان.
{ الجرسون ما بتلفت قال ليه : عشان كدا سعر طلب الفول عندنا زي سعر طلب شية الضان.
{ زولكم كان عاوز يطرش الفول ...لو ما لحقوه بي (عفريتة).
{ العفريتة هسع الدخلها شنو في الموضوع دا؟.
{ انت بتتكلم ساكت.
{ حاجة اخيرة...قالوا ليك واحد مشي مع اخوه ...عشان يعمل ليه (عملية عيون).
{ الزول بتاع العملية ...دخل علي الدكتور وطلع بعد 3 ساعات بعد ان عملوا ليهو العملية.
{ اخوه عاين ليهو كدا ...ما عرفو...قال ليهو : والله علي شوية كدا تبقي زي (مفاجأة) الهلال.
{ مفاجأة شنو في (البرد) دا.
{ ملحوظة: مفاجأة في عينك.
هوامش
{ اتمني ألا يشطب الهلال صالح عبدالله وان لا يحوله لنادي اخر كمعار.
{ التسجيلات دي بتنتهي ...نشوف (مفاجأة) ناس الهلال حدها وين؟.
{ انا خايف صلاح ادريس يقول ليكم المفاجأة سوف تكون في (يونيو) القادم.
{ عشان بنستناك.
{ الطاش عمل شنو مع (الجنسية).
{ قلنا ليكم مية مرة شوفوا ليكم (سلم طيارة)...واحسموا لينا الموضوع دا.
{ دا كل هين ....الكروت خبرها شنو؟.
{ قالوا ليك كرت سادومبا بصل ملكال ويرجع.
{ اما كرت امادو .. قالوا ليك روحو طويلة زي (الكديس).
{ كرت الفتوح دا ما بفكوا.
{ خبر عاجل: لو صلاح ادريس اصبح رئيس للاتحاد العام لكرة القدم ..منتخبنا الوطني بختو بالمفاجآت.