اقروا الكلمات دى وعلقوا

انشاءالله تعجبكم وكان عجبتكم بديكم تانى واحدة

بتقولي لا لقليب عليك يقطر حنان ويذوب وله
بتقولي لا ومتين مجيك ما اظنو لا لا بيحملا
بتقولي لا يابهجه ياغاليه ياست القلوب يامذهله
وحياه شبابك ذبت في عينيك حنان ومغازلا
سافرت في رحله مشاعر ملهمه ومتأملا
شفت الورود من وجنتيك غيرانه جات متوسله
حتى القمر غار من صفاك واصبح يردد في الصلاه
وجاك المساء يؤدي الفروض داعب شفايفك وغازلا
شال لون جميل من وجنتيك مسح خدودو وبللا
واصبح يلملم في النجوم ينظم عقود او يغزلا
طرز لجيدك بالحرير احلي العهود وبتقولي لا

انا بيك بدغدغ في القلوب يا حلوه احرف واشتلا
املاها رقه ودندنات وعناق حنان ومبادلا
انا بيك لو قلبك يحن عالم يجن من الوله
اهديك حنان ما اظنو كان في الدنيا او كانت صله
وازرع هواك بين النجوم روضة حنان وادللا
واحكيك لحون ياغاليه لا انسابت ولا عود غازلا
واخلي كل الكون يقول فنان يذوب في مذهله
بتقولي لا يالهفة المشتاق ويا طعم الحلا
وبتقولي لا........

طيب هاكم التانية المرة دى بدون تعليق بديكم الهدية

اعزرينى اسحق الحلنقى
أعذريني الدمعة ديّه...حتبقى آخر دمعة ليّه
تاني لو قربت مني.....يبقى ليك الحق عليّ
********************
أعذريني محال أعاود....تاني ريدتك وأمشي ليها..
ولا أرحل في عيونك....والطفولة الضاجّة فيها....
كيف أريدك وانتي أصلك....ريدتي ما حسيتي بيها..
بالبعاد ما تعذبيني......أعذريني وأعذريني.....
*********************
ما قدرت مرة واحدة......بالغلط أغلط عليك.....
وانتي عمرك كلو ظالمة.....والدليل غفراني ليك...
عارفو قلبك مامعاي.....برضي شاغل قلبي بيك.....
بالحنان ما تعشميني......أعذرينيوأعذريني.....
*********************
من زمان وأنا راجي منك....كلمة بيها تفرحيني.....
وانتي ما فرحت قلبي......كنت ديمة تجرحيني......
قسمة الزول ما بتفوتو....والبجيني معاك بجيني....
لو بكت منك عيوني......سامحيها وأعذريني

المرة دى نمشى لاسماعيل حسن فى قصيدة بلادى اكيد سمعتوها المرة دى حروف والمرة الجاية صورة وصوت يلا هاكم اقروا

بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره
وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي ، لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا، معايا زي ضلى
لو ما جيت من زي ديل..
كان ،أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟

والله انت زوقك رفيع وعندى عايزها كيف صورة وصوت ولا كلمات بديك كلمات اسعدنى مروك كثيرا وانتظر الجائى كلو موجود مديح فى غنى فى ولكل من ترغبه لك التحية