السودان من أمدرمان على الهواء بالتلفون من منتدى العيلفون(ومسادير من أبناء العيلفون

مظاهرات وشغب وبمبان
الحركة الشعبية من جهة بعد اعتقال عرمان وباقمون
حزب الامة من جهة
ومناوشات من الاتحادى

والشعب المسكين حا يضيع تحت الرجلين
__________________

العباسية والموردة غاز مسيل للدموع
ورصاص وشغب
__________________

اطمن كل الشباب
الامووووووووووووور 100% شويييييييييييييت بلبله وتمت السيطره وقتى
نومو قفا
العقاب تمام التمام

يوم فشل الجميع المتظاهرين والشرطة
يوم عرف الجميع أن البلاد فى ورطة
أب شنب المكافح بى بنطلونو أب شرطة
ما عرف البسويهو وراحت عليهو الخرطة

فى تصريح لسعادة الفريق شرطة محمد الحافظ مدير شرطة ولاية الخرطوم ومع الدكتور عبدالرحمن الخضر الوالى صرح الفريق أن أمن ولاية الخرطوم خط أحمر لايمكن تجاوزة ولا كبير على القانون والمسيرة غير قانونية لعدم حصولها على التصديق المطلوب . ولذلك كتبت هذا المسدار:
الامن خط هو أحمر ... والقبض كان مشروع
باقان فى الحراسة ...... يدعو المسيح ويسوع
وعرمان جنبو جارو .... كايس يجيب لى دفوع
ما بيقوم مظاهرة مظاهرة... شوفوها لحسة كوع

والاخ بشرى انت فنان فنان فنان وده نوع من التجديد فى المواد لك التحية والاحترام

ديــــل مـــن الصعـــب ينقــــــــــــدرو
مهما يجيهم سيل ليه بالطواري يستـــرو
ديل حيرو العالم ناس امريكا ذاتهم فترو
باقان اخوي إنجم الزول بشاكل القـدرو

صح لسانك يا حمادة الشعر كربتو
ما بنقدر عليك كان قل أو كترتو
ديل البمسكو بعصرو و بطلعو فرتو
كان عرمان أو باقان الديمة حارق كرتو

نواصل بعد أن أنفضّ سامر مسيرة عرمان وباقان وأنتهى بهم الامر الى حراسات الشرطة !!!:

أدونا الخبر باقان ..... وكيف أخبارو
عرمان ما رفيقو قال معاهو ياكل نارو
دخلوها الحراسة . والكل فقد أنصارو
ما عدداً كبير .... وما ظنو ياخد تارو

باقان لو تسيب تلعب...... على الحبلين
تحقق مبتغاك وتعمّر...... تعمّر الجبلين
خليها المظاهرة شوف فى الجنوب خطين
واحد للزلط ..... والتانى للكرعين

صرّح الفريق سلفاكير ميارديت النائب الاول لرئيس الجمهورية عند وصوله الخرطوم للتشاور والحوار مع الرئيس البشير لحللة الازمات بين الشريكين صرّح بأنه والرئيس البشير فى سرج واحد وعليه كتبت لهم هذا المسدار :

لو راكبيين فى سرج سوقو بلاش تعطيل
باقان كان ترابى .... خلونا من تطبيل
جربناكم زمان ....ما ليقينا غير تغفيل
أثبتو للصناديق الصناديق والله خير دليل

بعد إجتماعات سلفاكير ومكتبة مع البشير ونائبة ومكتبة وافق المؤتمر الوطنى على تنفيذ كل المطالب وإجازة القوانيين المتبقية قبل يوم 23 من هذا الشهر وقد صرح باقان فى أكثر من ندوة أن الامر أشب بالشيكات بدون رصيد وسوف نرى ولكن مظاهرة الاثنين قائمة قائمة فكتبت وقلت :

باقان قال قبضنا شيكات وينو رصيدة ؟؟؟؟
راجيين الشهر بنشوفة بنشوفة يوم توريدة
لو طلعت (ملوص ) الوطنى أكبر صيدة
وشربنا كتير مقالب ودى المره مابنعيده

تسلم ياخال والله نحنا هنا الناس ديل جننونا معاهم بقينا يومي نفتح النت ونشوف الجديد شنو في المظاهرات دي ومره قالو امدرمان فيها جوطة ومره معارف الحركة الشعبية والله ربك استر واجيب العواقب سليمة والله انا من وجهة نظري الانفصال أفضل واريح لينا من الغلغة دي خليهم نشوف بقدرو اسدوها براهم في الجنوب ؟
ولا ريك شنويأخال بشري ؟

أنا والله يا سامى زى الطيب مصطفى مع الانفصال قلباًوقالباً مش هم عايز الانفصال نحنا بالاكتر (ريحونا وريحو نفسكم )لان وحدة الدين هى الوحده الباقية وزول دينو ما دينك اللمه معاهو أخير عدمه !!!!

Senior Member تاريخ التسجيل: Sep 2009
المشاركات: 475

--------------------------------------------------------------------------------

حسب تصريحات باقان أموم الاخيرة أن ما وعد به المؤتمر الوطنى من تنفيذ وإجازة للقوانيين لايمنع قيام مسيرة اليوم الاثنين 14 ديسمبر فى حين صرّح الدكتور نافع على نافع أن من يخرج يتحمّل مايحدث له من الشرطة وقال تحديداً( ياكل نارو !!!) حتى هذه اللحظة لم أسمع أو أتابع من الذى أكل نارة باقان أم نافع لذلك كتبت :
ما جانا الخبر......... عن مرقه الاثنين
باقان قال مصرّ........ نمرق مع جادين
الشعب قال معاهو....... مليون ومليونين
ونافع قال (ياكلو نارم) لو مرقو بس صفين

طالعت صحف اليوم الاثنين ووجدت ما يفيد أن الشريكين توصلا الى تفاهمات بشأن القوانيين المختلف عليها وسوف يعود النواب للبرلمان والوزراء الى مجلس الوزراء وشكل الحكاية أن المسيرة (طرشقت ) والحركة شكلها باعت أحزاب وفاق جوبا على حساب الشريك ويظهر باقان مبتسماً أمام الكميرات ورد بدبلوماسية عندما سأله الصحفيين عن مصير مظاهرة اليوم !!! وقد كتبت هذا المسدار :
قرينا فى الصحف أنو الحكاية انفرجت
باقان مبتسم مع الرموز العرضت
وعرمان فى زيارة كايس حقوقو الشردت
يرجع برلمانى وكل القوانيين وردت

أصّر تحالف جوبا على قيام المظاهرة بالاثنين رغم أن الحركة الشعبية لم تشارك وكانت قد وصلت الى تفاهمات وهكذا الحركة الشعبية تمطى أحزاب الشمال وعندما تحقق غايتها ترميها وتتغابى فيها العرفه !!وقد كررت الشرطة إستعمالها للقوه لمنع التظاهر بحجة عدم القانونية لعدم حصول الاذن اللازم للتظاهر ووالله العظيم الاذن للتظاهر موجود عند أرقى بلاد الديمقراطيات وأخذنا أكثر من إذن فى المانيا لكى نسير مظاهرات أذكر منها إحتجاجاً على قتل المرحوم عامر عمر عجيب فى طائرة لوفتهانزا الالمانية بواسطة شرطة الترحيل الالمانية وكان ذلك فى مايو 1999م وكانت المظاهرة فى ميونيخ وقدمت الطلب نيابة عن الجالية السودانية وتم تحديد الزمان والمكان للتظاهر وخط السير والنهاية ومن الذى سوف يخاطب المتظاهرين وقد كانت المظاهرة مرتبة والحضور كبير وتابعتنا الشرطة والمباحث ب6 سيارات و10 مواتر و20 فرد مباحث وإستخبارات وقد أشادوا بالانضابط والنظام وأرسلوا لنا خطاب بهذا المعنى .أذكر أيضاً فى بون أكثر من 10 مظاهرات 5 أحتجاجاً على محاوله إغلاق أكاديمية الماك فهد بون وأحداث غزة وغيرها وكلها تحصل الجهة المنظمة على الاذن وخط السير والمتابعة من البداية الى النهاية بواسطة الشرطة ولم نسمع ببنبان أو ضرب أو خروج من غير إذن .
وقد واصلت فى المسادير وقلت :

ما وقف التظاهر رغم الحلول الجارية
وناس أركو ومناوى برضو رفعو السارية
أعتقلو مريم والشرطة نارة نارة الهارية
ما خلو المظاهرة بس خلو الدموع الجارية

--------------------------------------------------------------------------------

عند إطلاعى اليوم على الصحف الصادرة من الخرطوم وكتاب الاعمدة الذين تناولوا مظاهرات الاثنين وعزوا فشها الى إختلاف الهدف بين القادة والساسة وبين الجمهور الذى ينوى المشاركة فهدف المعارضة إسقاط المؤتمر الوطنى وتوزيع اللعبة من جديد مثلما تعامل الترابى مع مذكرة العشرة وأستطاع أن يحتويها ويفرتق من شاركوا فيها الى أن وجد نفسة خارج غمار وأوج السلطة هو وجماعته ودخل العشرة كلهم إلا من توفاه الله (الدكتور مجذوب الخليفة عليه الرحمه ) لذلك هدف الترابى واضح وصريح وأعلنه على الملا لذلك لايستطيع تحقيق هذا المراد وقد فشل عندما كان يصادم نميرى أيام مارس 1973م عندما كان الاخوان المسلمين أكثر عنفاً وتنظيماً فى جامعة الخرطوم بقيادة على عثمان وأخوانه !!! وقد كتبت هذا المسدار :

لو عرفو الهدف كان الجموع إتلمّت
ما عايزين قديم فيهو المحاسيب خمّت
عايزين تنمية وعايزين طرق كيف عمّت
وعايزين نزرع نصدّر نصدّر والخزاين جمّت

» بين مصطفى محمد جماع من منتدى العيلفون وبشرى مبارك ومسادير ثنائية
» أخيراً وجدت منتدى العيلفون
» بوست بعنوان منو الجابك لينا يابشرى منتدى العيلفون وأطلب منكم زيارة منتدى العيلفون
» تسمية العيلفون من منتدى العيلفون
» منتدى أبناء السقاى (فرع مينو أسعد الطيب )