ترحيب بخالد عبدالحى

الاخ خالد عبدالحى لك الود والتحايا وإذا أنت خالد ود خالى عبدالحى والامك خديجة أو غيرة أرحب بيك والبارح علقت وكتبت ليك ولم ترد لذلك أفرد لك بوست بإسمك وأديك مسدار:
نرحب بيك يا خالد ود خالى عبد الحىّ
الشاب الخلوق معروف خلا وفى صىّ
أهلوا أسياد تكية ......وما بعرفو النىّ
وجدو سيد البنيّة ناس (حيطة) أهلاّ لىّ

والله يا بشري شوق شديد وياهو خالد ودخالك عبد الحي طبعاَ الابيات عجبتني شديد وحفظتها
كمان .خالك وناس البيت بدون فرز بسلموا عليك وبقولوا ليك سلم علي الاولاد .
..وسلاااام كتيييييييييييييييييييييير مني ليك..

شكراً خالد وفرحت جداً لما عرفت أنك ود خالى عبدالحى والحمدلله وأرجو أن أطمئنك أن الاولاد بخير وأسع أنا فى كتابتى لى قصيدتك دى طلعوا على الكليات بتاعتم إسراء وأحمد وإسراء عندها إمتحان رياضيات من الوزارة (ماشاء الله وربنا يحفظة إسراء فى الرياضيات نجيضة ما طلعت زى أبوها مسويها كلها كتابة وشعر ومسادير والكاتب المميز والمبدع وودبهاى والسقاى !!!!مع تحياتى لكل المميزين فى كل مكان ) أحييك أخى خالد عبدالحى وسلم على جميع أهلك وبدون فرز وخاصة المعاك فى البيت .وأوصيك ومصعب الزبير خوجلى بالسعى فى قيام حلقة تجويد قران وأبدوا من صالون والدى مبارك إدريس الجمعة الجاية وأخبروا والدك وعمك المبارك بهذا المشروع وكلم أخوانك وأصحابك ولكم فى تجويد القران إن شاء الله أجر كبير وأنا علىّ الشاى واللقيمات كل أسبوع .

اخي بشري بعد التحيه الحمد لله انكم بخير
( البنت بتطلع لي امها معناها امها نجيضه في الرياضيات انشاءالله ماتكون واجهتا صعوبه في الامتحان .واحمد ما
اطلع لينا شاعر كمان)
بالنسبه لحلقة التلاوه انشاء الله نسعي جادين في قيام الحلقه ونحرص علي استمرارها علي مدار السنه
(الناس يابشري بقت شغاله بي امور الدنيا وناسيه الاخره )نحنا بنحاول نجمعم وانتو ساعدونا بي دعواتكم
وربنا يعين .(وعمتي بتريد اللمه)

فعلاً يا خالد أمها كانت نجيضة فى الرياضيات والمرحوم المك جدها كان خريج إقتصاد وكان نائب مدير الاسواق الحرة وكان من أبرز رجالات الاسواق الحرة عليه رحمه الله وقد توفى فى شبابو . أحمد برضو بتاع رياضيات وقد أختار الهندسة المكانيكية نسأل الله أن يوفقة . أحمد مرة وهو جاى من الاجازة أيام كانوا فى السودان فى القبس بحرى كان عندنا أحتفال فى الجالية السودانية وأنا أقدم قصيدة فى الاحتفال فوجدت أحمد كتب قصيدة رايعة جداً وراجعتها معه وشجعته لتقديمها ولكن تدخلت خالدة ومنعته (بحجة العين ) ومن اليوم داك وطفش من العين ومن القصايد !!!! غايتو أحسن ليهو ينجض الرياضيات القصايد ما بتوكلوا عيش فى هذا الزمن الغريب والعجيب !!! الاخ خالد أرجو أن تهتموا بأمر القرآن لان فيه صلاح الدنيا والاخرة وأسالنى أنا مجرب وسوف أساعدكم بالفاتحة واللقيمات إن شاء الله . تحياتى للاسرة مرة أخرى وللوالدة عمتك الجودلية وقول ليها عايزين نعمل التلاوة فى الصالون بشرى قال لينا أعموها وخلو أمى تسوى ليكم الشاى واللقيمات .

» فتاوى الصيام والدكتور عبدالحى يوسف
» برنامج الشيخ الدكتور عبدالحى يوسف ببرمنجهام إعداد بشرى مبارك إدريس
» تعارف الاعضاء
» جديد لنج
» ترحيب حار بالاخ أمجد محمد سعيد