رسالة شوق

أنا فيحاء . مساء الخير عليكم جميعاً بلاء إستثناء. ومتأسفة للتاخير للدردشة معاكم . أنا في بعثة رسمية بسفارتنا بالقاهرة. وبقالي ثلاثة شهور وما قادرة أصبر وكل مرة عايزة أرجع تعبت خالص وعايزة أسالكم كيف قدرتو تغيبوا وتتحملوا سنين الغربة ؟ عايزة أدعوكم لحضور مراسم زواجي بالسودان يوم 29/10/2009م بالنادي القبطي بأمدرمان . زوجي أسمو (أحمد يحي أحمد على) من أولاد أمدرمان (جموعي) زميلي بوزارة الخارجية. وهو عمل ليكم رسالة وصورة ودخل المنتدي قبل كده.
تحياتي للجميع ببلاد الغربة وأينما وجدو وتحية خاصة للأخ بشري مبارك ونفسي أتعرف عليهو أكتر والأخ (الكابتن) محمد صديق والذي يواصل الإتصال بي دائماً ود. لبنى والصغير أواب وتحية للأخ (فراولة) وإن شاء الله الزعلة راحت والأخت د. عبير صلاح والنجمة اللذيذة تماضر القاضي والأخ أحمد والحلوة تهاني والأخ (الفار) ومزمل ونوال ونازك والحاجة بثينة وسيف وأسماء وتحياتي للجميع بدون
فرز. والقاكم .

عدد المساهمات : 340 تاريخ التسجيل : 22/02/2009

الاخت العزيزة فيحاء نورتي المنتدي والف مليون مبروك وربنا اتم علي خير وبيت مال وعيال عقبال لاخي وصديقي نقه

الاخت فيحاء يوسف محمد سعدين أكثر من سعادة بزواجكم ونسأل الله أن يتموا على خير وألف مبروك مقدماً وسعيد بطلتك فى منتداك وسعيد بسؤالك عنى ومحاوله التعرف بى أكثر ويسعدنى ذلك قطعاً ويجعلنى (مكنكش فى المنتدى بالعشرة ) التحية لنسيبنا الجموعى أحمد يحى أحمدعلى ونحنا جموعية وأكان حسب حتى الجد السادس نطلع أهل وأرجو أن تسلموا على زميلكم فى الخارجية القنصل السابق لسفارتنا فى بروكسل محمد على التوم وزوجتى خالدة فرح أبو سنينية (خالتو ) وهو ود سعاد فرح أبوسنينة.
الغربة تحتاج الى التوفيق والدعاء والصلاة والبرنامج والله العظيم أنا أتحرك من بيرمنجهام الى بون زى الماشى من السقاى السروراب الى السقاى البتلاب !!!! وما شاء الله السودانيين أصبحوا بالاف فى كل دول المهجر والقاهرة دى زى أمدرمان أهل زوجك . قلت قبل أن أختم أهديك هذا المسدار :

من بون نرسل ليك تحايا..... ونبارك ليك زواجك
وإن شاء الله زوجك ديمه فارس....... تاجو تاجك
فى الليلة ديك والكل سعيد... وبهجتو فى إبتهاجك
يجمعكم المولى الكريم ويضوى ليك ويكون سراجك[b]

عميق شكري وودي وتقديري لك فانت في مقام الخال والعم. أنا عاشقة للمسادير وبحبها جداً ومسدارك معبر وعميق وعلى فكرة عندنا
ناس كتيرين من المؤلفين للمسادير. وهناك فكرة تجميع كل ما كتب وتم تأليفه من ما جادت به قريحة أبناء السقاي وأعتقد يمكنكم إصدار
كتاب (مجادعة) للمختصين في هذا النوع من الشعر
يا مشروفة الهرف الشخر باجورك
شالنك بروقاً كابة جايبة مطورك
والباقي راح .

الاخت فيحاء ومنذ أن دخلت على هذا المنتدى أصبحت تفوح لنا النسايم الطيبات وتكبر لدينا الامنيات ونجتر الذكريات ولانهتم بعد ذلك وبعدالاشادة من جانبك ومن أخرين بعد كده قررت ألا أرد ولا بكلمة على أى رآى فى مساديرى وغيرها حتى ولو بلغ العدد رقمى الذى وصلته الان ، التحية لكى أختى فيحاء ومثل هذا الاطراء هو الزاد والوقود الذى يمنعنا الصدود وكثرة الردود فى هذا المنتدى وهو بمثابة رسالة وتوضيح أن أهل السقاى أهل مسادير أهل تدابير وأهل تعابير وفقنا الله جمعيعاً وبالجد أشعر بنسايم عطرة تفوح فى هذا المنتدى وأرجو أختى فيحاء وعلى الرغم بالمشغوليات الكثيرة فى تجهيز زواجكم الميمون أتمنى أن تتواصلى منعا وتشجع أخواتك من السقاى وغيرها بالدخول وفقك الله .وقبل أن أختم أرجو أن تبلغى تحياتى للاخ علم الدين يوسف محمد وتقولى ليهو حا ترجع القاهرة متين ؟؟؟؟؟من بشرى مبارك إدريس بشرى ودالجودلية محمد بابكر أخواتى منيرة مبارك وراضية مبارك وأمينة مبارك وأخى الوحيد صالح مبارك إدريس ومعروف عند أهلو السروراب أكثر منى بحكم الاصدقاء والعمل بحافلة الاسرة فى خط الجيلى التحية لكل الاهل وأتمنى أن تتواصل الزيارات ومن بون ألآف تحية وعلى العموم أذا أعطوكم أختيار أنت وزوجك الى أروبا أختاروا بريطانيا لاننا بأذن الله سوف يستقر بنا المقام خلال عام من الان فى بيرمنجهام وعلى العموم فى العدم ألمانيا هولندة بلجيكا كل معانا كويس وسوف نصلكم وتصلونا بإذن الله وأتمى أن نسمع بيكم قريباً ويا حبذا لو كان معاكم محمد على التوم فى بعثة دبلوماسية واحدة لمدة 5 سنوات .

الاخت فيحاءالف الف مبروك وربنا يسعدك ويوفقك ويتم ليك على الف خير وصدفة جميلة اننا نسجل فى المنتدى فى نفس اليوم مع بعض تحياتى ليك وعبرك التحايا للاخ علم والصديق الغالى
نقة والغالية هبة وكل اهلك بدون فرز

العروس فيحاء ألف مبروك وربنا يتم لكم على خير ونقول (بارك الله لهما .......وبارك عليهما........ وجمع بينهما بخير) والتحية موصولة الى نسيبنا الجموعي ونتمنى ان نسمع عنكم كل ما هو جميل.

ازيك يافيحاء.مشتاقين والله .كيف انتي وأخبارك شنو؟مبروووووك ليك وربنا يتم ليك علي خير.أمي (فاطمه احمد علي)و أخواتي بسلمو عليك شديد .حاتجي متين من القاهره و تنوري لينا السودان؟(طبعا انا وناس البيت كان لاقينا فيحاء في القاهره لمن مشينا في الاجازه ومن هناك اتعرفنا عليها )وربنا يديم الود بين الناس

عدد المساهمات : 126 تاريخ التسجيل : 18/02/2009

الاخت الغالية فيحا ء لك الف تحية من 0 والف الف مبروووووك وربنا يرزقك السعادة والهناء0
واسال الله ان يصبرك علي الغربة واياك 0 والف الف الف مبرووووووووووووك ثانيا

عدد المساهمات : 308 تاريخ التسجيل : 05/02/2009

[ندعوك للتسجيل في المنتدى أو التعريف بنفسك لمعاينة هذا الرابط]

الاخت العزيزة والغالية فيحاء

والله جد مشتاقين ليك وربنا يرجعك السودان بي السلامة

وزي ما قالو موضوع الغربة اصلو حارة العشرة سنة الاولي بس

والان الغربة ما زي زمااااان الناس بقت كثيرة في المهجر وتحس كانك في السودان
خاصة في دول الخليج

والف مبروك الزواج مقدماً وربنا يتم علي خير

وتحياتي لي الوالدة وكل الاخوان والاخوات وتحية خاصة لي نسيبنا الجديد

ودي هدية بسيطة مني ارجو ان تعجبك
[ندعوك للتسجيل في المنتدى أو التعريف بنفسك لمعاينة هذا الرابط]

» هوي يا رجال فاطمة جات
» رسالة شوق
» رسالة الي كل غائبة وغائب عن المنتدي
» تطوير السقاي
» رسالة شكر