هوي يا رجال فاطمة جات

التحية والتجلة نسوقها ونقدمها مزينة باغلى الزهور والياسمين بقدوم الاستاذة المتفردة فاطمة أحمد علي وهي تجود علينا بالمشاركة عبر هذا المنتدى الذي يفتخر ويفاخر اعضائه بانضمام تلك المرأة الحديدية وهي النموزج المشرف للمرأة السقاوية بل السودانية التي تتفوق على مثيلاتها علما وادباً كما انها تتفوق على جيلها من الرجال شجاعة وكرما ونبلاً وعطاء، فلها منا تحية اعجاب وعربون محبة بالوعد منها بالمشاركة واثراء هذا المنتدى بكل ما هو جميل فهي مع علمها وتفوقها المهني لها روح دعابة تفوق روح فتحي ود البهجة واخونا عابدين ابو عوس.....
الاستاذة/ فاطمة متعطشين ومتلهفين الى مشاركاتك وما تنسي تسلمي لي على البنات وتحجزي لي الدكتورة.............

نرحب بالاخت فاطمة أحمد على الكرار ومن بيرمنجهام سلام وتحياتى للاسرة الكريمة وطوالى رجعت بالذاكرة لزيارتنا الى العبيدية والباوقة والجرانيس والتكاويين والعمارة وأنغام المطرب المحلى صاحب الشعبية الكبيرة قبل وفاتة علية الرحمة (عبدالكريم الحورى ) وكانت زيارتنا فى العام 1977م الى صديقنا زين العابدين حسن الزبير فى العبيدية (النفافير)التحية له وأسرتة الكريمة وأذكر أننى كتبت أبيات من الشعر تقول :
غنى الحورى ألحانو حرك قلبى وأشجانو
رجع لى قديم الريد ذكرنى الاهل والصيد
ذكرنى الاهل والصيد يا سقاينا ريدنا شديد

ونحمد الله أن ريدنا مازال شديداً لاهل السقاى ولنجوم السقاى ولنجمات السقاى ونحى هنا نجمتنا فاطمة أحمد على ونعشم أن تتفاعل فى هذا المنتدى فالبون شاسع بينة وبين المنتديات الاخرى المسخنة والمسكّنة بالود والتقدير لكل ما يقدم حتى ولو (قطمير !!!)
وبما أننى أستقبل البعرفو (والمابعرفو بالمسدار ) يبقى من باب أولى تستقبل الرايعة فاطمة أحمد على بهذا المسدار وإذا طلع أقل من المقام أرجو العذر يا مدام والسبب أنا عارفو ( الايام دى فى تشويش فى الارسال المسدارى فى هذا المنتدى !!!) والان الى المسدار :

نرحب بى قدومك بت على ... بت على الكرار
وندعو ليك كتير ....... كتير بالجهر والاسرار
ما قصرتى أصلو عرفوك كبير .. كبير وصغار
وسلمى على النفافير والجرانيس والمحطة قطار

الاخ ياسر الطيب الحاج قبل ما أقرأ ترحيبك بالاخت العزيرة فاطمة أحمد على فى هذا البوست قرأت بوست الاخ يوسف التوم ونقلت لك ما كتبتة وأزيد عليه لانك أنت الزيادة وأنت القيادة وأنت الوفادة وأنت الزوادة وأنت براك المنتدى نايم ولم تجى تخلى صقيرو حايم وبحرو عايم وإنت الكلس المابتعرف الفلس وما من الناس أتملص!!!!! والله مع فاطمة لقيت ليك شكرة إنت الطرفة وإنت النترة .
وكفاك وخلى لى المعاك . ونتمنى أن تثرى الاخت فاطمة أحمد على المنتدى ونصلح قعدتنا ونلبس لبستنا والضيف مكروم رغم أنها ليست ضيفة ولكن فرحنا بها فرح الضيوف وكدنا أن نضرب الدفوف ونضبح الخروف ونذكر الجروف . (يا جماعة ده موسم الورق ؟؟؟)

السلام عليكم.شكرا علي هذا الترحيب الحااااااااار علي أعظم أم في الدنيا.وهي حقيقه ما مجامله لأنها أمي وهي بالجد ام عظيمه ما قصرت معانا في تربيتنا أو تعليمنا وقدر ما أقول ما بقدر أجازيها حقها.وان شاء الله ربنا يخليها لينا ولي أهلها ناس السقاي ويفتح عليها ويقدرها علي عمل الخير

[img][/img][ندعوك للتسجيل في المنتدى أو التعريف بنفسك لمعاينة هذه الصورة]والله يا هيفاء نحنا رحبنا بيك من غير ما نعرفك أمك فاطمة أحمد على ولذلك نرحب تانى ونهديك ووالدتك هذه الكلمات

ازيك يا هيفاء وانا اقول المنتدى ما لو بقى منور كدا، بس عايزين منك طلب بسيط تعملي لينا سيرة ذاتية للوالدة الحنونة حتى يطلع عليها محبيها ومريديها من السقايات وغيرها وما تنسي سيرتك كمان عايزين نعرف اخبارك ووصلتي وين في القراية اصلو طولنا من البلد وتحياتي الحارة للوالدة وباقي الأمورات.

----هذا ما جادت به قريحة الاخ كباشى من أبناء السروراب فى منتدى السروراب من مسادير عن الاخت فاطمة أحمد على والحمد لله الذى أصبحت بنعمة المنتديات المسادير مدرسة يرحب بها الناس وتمنع النعاس وتطرد الوسواس الخناس الذى يوسوس فى صدور الناس من الجنة والناس ... وأسال أن نتعاعد على أن نكتب ونكتب ونكتب ونرحب ونرحب ونرحب ----------------------------------------------------------------------------

سلام يا ناظر الافق البعيـد
سلامتك من الهجعة والالم الشديد
دخول فاطمة هيج ليك شجونك لكنه جيدا جيد
نحن معاها في كل شي وراجيين منها التجديد
بي ما حباه الله من علم جميل ورشيد
مرحبتين حبابه والالف التهاني وشكرنا ليها يزيد
في موقعة السروراب الفي اصالته فريد

------وكمان أخونا الناظر من السروراب من الرياض برضو عندو مسدار والله المسادير فى السروراب بس تقطع البحر سوقه عامر وليها سامر وحقيقة ناس السروراب سبقونا !!!!!--------------------------------------------------------------------------

مرحـب حبـاب بـت احمد إلاسمك على امى
مرحـب حبـاب فطومة الحبها جارى فى دمى
من ما شفت الاسم طار على النوم من عينى
فى الصباح البدرى ندهت الكريم يحفظ لى امى
كلما اتذكرها فى الغربة اللعينة يترقرقن دمعى
يا بشرى المبارك انت ياسر هيجتو لى الـمى

شكرا ليكم شديد علي الترحيب الحار دا.وأنا والله عارفاكم بترحبو بي أي زول كأنوأخوكم أوأختكم والحمد لله دي من شيم ناس السقاي.وان شاء الله حا أكتب ليكم قريب السيره الذاتيه بتاعت الوالده بس طبعا هي ما قادره تدخل المنتدى الأيام دي مشغوله شديد في الشغل وبالميزانيه لكن حاتدخل قريب ان شاء الله وهي عجبها كلامكم شدييييييد وبتشكركم عليهو وبتقول ليكم ما قصرتو معاها...أما أنا بقرا طب أسنان وأسي نزلتا خامسه اخر سنه والحمد لله..وأنا تاني أكبر واحده بالترتيب

» رجال وانجازات عظام (1)
» نرحب بالاخت فاطمة أحمد على
» وفاة الحاجة فاطمة عثمان
» من وحي تعلية الروصيرص.. رجال جديرون بالتقدير نقلاً من الانتباهة والطيب مصطفى
» هجليج تناديكم يا رجال الوطن ...تسلم أياديكم وقصيدة من بشرى مبارك إدريس