احمد القاضى
عدد المساهمات : 739
تاريخ التسجيل : 07/03/2009
 |  موضوع: عشان يشيلوها  الخميس 23 يوليو - 4:44 | |
| عشان يشيلوها ؟ الفاتح جبرا |
| |
(خضر الكهربجى) أو (خدر) كما يطلق عليه سكان الحى شاب فى الثلاثينيات من العمر جاء من أحد (الأقاليم) قبل عده سنوات ليسكن مع أحد أقربائه فى الحى الذى يمارس مهنته فى عمل توصيلات الكهرباء المنزلية المختلفة بمهارة فائقة وقد عرف عنه إلى جانب ذلك (الطيبة) و(الدروشه) وإنو (البتديهو ليهو بيشيلو) .
قبل أيام إحتجت إلى عمل بعض التوصيلات فى (المطبخ) فأرسلت فى طلبه حيث حضر على الفور حاملاً (شنطة العدة) فقمت بشرح مكان ونوع التوصيلات التى أريدها وبعد أن إستمع لما أقوله فى صمت شرع فى العمل فى صمت وهدوء وأنا أراقبه حتى إذا ما إنتهى (لم عدتو ) وأدخلها فى الشنطة (فى صمت أيضاً) فناولته الفيها النصيب وكعادته فقد أمسك بالقروش ووضعها فى جيبه دون أن ينظر لها .
بعد ذهاب (خضر) أحسست أن هنالك شئ (ما ياهو) فى الزول ده .. لكن هو شنو أنا ما عارف؟ فعيناه تتحركان بسرعة كما أنه كثير الإلتفات (بتلفت كتير) لم أسرح حينها مع إحساسى ذلك تجاه (خدر) إذ حسمته وأنا أقول لنفسى : ما يتلفت كان يتلفت هو أنا مالى ؟
بعد يومين وأنا أقف بعربتى أمام محل (البنشر) لتسليم صاحبه (لستك ضارب) فوجئت بخدر الكهربجى وهو يحمل بطارية يود شحنها وبعد أن قام صاحب البنشر بفحص البطاريه قال مخاطباً خضر :
- خلاس تعال ليها بعد ساعتين تلقاها جاهزة
إلا أن خضر نظر إلى (بتاع البنشر) نظرة ريبة وإستنكار وقال يخاطبه:
- بقعد بحرسا ... أخليها عشان يشيلوها !! والله أفوت منها هسه يجى زول يركبا فى عربيتو ويمشى بيها !!
وأنا إستمع إلى رد (خضر) قد زاد إحساسى ذاك بأن الزول ده ما براهو
وقد جاءت اللحظة التى تيقنت فيها تماما من صدق ذلك الإحساس عندما طلبته بعد عدة أيام لتركيب بعض مفاتيح الكهرباء فى المنزل وبعد أن قام بإنجاز المهمة وكنت حينها أقوم بتصليح عطب فى (مكنة العربية) خاطبته قائلاً :
- بالله يا (خدر) خلى ليا (شنطت المفاتيح) بتاعتك دى وتعال شيلا بعدين عشان إحتمال أحتاج ليا لى (مفك) أو (زرديه) !
إلا أن (خدر) نظر لى فى ريبة وإستنكار ثم فاجأنى برده : أخليها عشان يشيلوها !! والله أفوت منها هسه يجى زول يشيلا !!
هنا فقط عرفت تماما إنو (خدر) ما براهو فتركته ينصرف بى (شنطتو) غير أننى صممت أن أعرف الحاصل وقد وجدتها فرصة بالأمس وأنا أحضر أحدى المناسبات بالحى حيث كان قريب (خدر) الذى يسكن معه يجلس إلى جانبى
- إنت مسئول من الخير ولدكم (خدر) ده مالو؟
- مالو؟
- لا يعنى شنو قصة (أخليها عشان يشيلوها) دى؟
ضحك قريب (خدر) كثيرا قبل أن يسرد لى الحكاية والتى تقول أن (خدر) قد كان مغتربا لعدة سنوات جمع فيها (شويت قريشات) إستطاع أن يشترى بها (شيلة) محترمة ثم عاد نهائياً (لقريته) ليتزوج وبعد أن إقتربت مواعيد الزواج إكتشف (خدر) أنه قد نسى مسألة (الملابس الداخليه) فأشار عليه والده أن يسافر إلى العاصمة لشرائها من (سوق ليبيا) وبالفعل جاء (خدر) إلى العاصمة ومكث أسبوعا قضاه بحثا فى (الأسواق) عن (الحاجات الناقصة) كان هذا الأسبوع كافياً لإتمام زواج والده من أحدى (نساء ) القرية المجاورة والتى أعجبتها (الشيلة) تماما !! |
| |
|
