احمد القاضى
عدد المساهمات : 739
تاريخ التسجيل : 07/03/2009
 |  موضوع: ما بكتل طوالى  الخميس 23 يوليو - 4:24 | |
| ما بكتل طوالى!! | | |
تسارعت دقات قلبى المعطوب بالخفقان.. سرت فى جسدى رعشة خوف.. نظرت إلى طفلى وطفلتى الصغيرين نظرة (مودع).. هرعت إلى الثلاجة التى أضع فيها (أدويتى).. حبوب تنظيم ضربات القلب.. حبوب الضغط.. حبوب السكرى.. حبوب منع التجلط.. (تسعة حبات) أتناولها يوميا لتبقينى على قيد هذه الحياة الفانية التى إعتقد بعض (العارفين بالله) بأنها دار خلود!
كيف لا ينتابنى هذا الخوف والذعر وعلى صفحات (الرأي العام) - التى كنت أقرأ فيها منذ قليل حوار أجرته مع الدكتور صيدلى (ياسر ميرغنى) الأمين العام لإتحاد الصيادلة (المستقيل) يصرح فيه بأن 20% فقط من الأدوية هى المسجلة وأن 34% من الأدوية الموجوده غير مطابقة للمواصفات لكنها توجد على أرفف الصيدليات! (يعنى بالعربى كده تلت الحبوب الفى الصيدليات مضروبة)!!
وضعت أمامى (التسعة حبات) وقلت فى نفسى (يعنى هسه التسعة حبات ديل فيهم تلاته حبات مضروبات)؟ وغير مطابقات للمواصفات؟ ياربى يكونوا ياتو تلاته (حبات) من الحبوب ديل غير مطابقات ( طبعن التسعه حبات كووولهم ممكن يكونو من (التلت المضروب)! لكنى إستبعدت هذا الإحتمال لأنى قاعد أكتب ليكم هسه!! وإلا لكنت قد أصبحت (أسماء فى حياتنا) منذ امد بعيد!!
وبدأت أحدث نفسى بصوت مسموع: ياربى ياتو حبوب من حبوبى دى (مضروبة) وما مطابقة للمواصفات؟ تكون بتاعت تنظيم ضربات القلب دى؟ والله إحتمال كبير عشان القلب بقى زى (مكنت الجاز) يرترت كل شوية.. احتمال تكون حبوب (الضغط) أصلو الأيام دى ضغطى وصل (190)!! وإلأ تكون بتاعت منع التجلط..
- يا راجل شنو خاتى حبوبك قدامك وبتتكلم براك؟ جنيت؟
- والله أخير الجن من النحنا فوقو ده..
- فى شنو كمان؟
- قالو ليك الأدوية الفى الصيدليات دى تلتها مضروب وفشنك ساكت وأنا هسه محتار فى حبوبى ديل ما عارف الفشنك فيهن من الما (فشك)!
- بسيطة!
- كيفن بسيطة يعنى إنتى عاوزانى أموت وإلا شنو؟
- لا بسيطة .. بس أنادي ليكا (التومة)!
- (التومة) دى شغاله فى (المواصفات)!
- مواصفات شنو؟ دى التومة الوداعية القبل كده (شافت) للحكومة محل شركاتا الرايحة!
- يا ولية تومت شنو؟ إنتى جنيتى؟
- أها يعنى عندك حل تااانى؟ وحات الله هسه كان جاتك إلا تمسك ليك حبوبك دى واحدة واحدة.. حبه حبه وتوريك المضروبة من الأصلية!
بالطبع وبصفتى عامل فيها (زول مستنير) ومثقف فقد رفضت رفضاً باتا عملية الإستعانة (بوداعية) لعمل فحص (معملى) لتحديد الحبوب (الضاربة من الما ضاربة) لعلمى بإستحالة أن تقوم (التومة الوداعية) بالعمل الذى من المفترض أن بقوم به ( المسئولون) عن (الرقابة الصيدلاتية) بالبلد! لكننى فى نفس الوقت وجدت نفسى فى حيرة من أمرى فهذه الحبوب التى أتعاطاها هى من فصيلة الدواء (المنقذ للحياة) يعنى أى تلاعب فى تركيبتها أو مواصفاتها بيودى الزول إلى حيث لا (أمنيات تخيب ولا كائنات تمر)!!
سادتى القراء الأفاضل:
منذ أن قرأت هذا الحوار وهذه التصريحات وأنا أعانى من حالة خوف وذعر وعدم إطمئنان شديد بينما المسئولين عن هذا القطاع الحيوى و(الخترى) والهام وعلى الرغم من معرفتهم بهذا الأمر (الخطير) ينامون نوم (العوافى) ويمارسون حياتهم (عااادى) فى أمن وطمأنينة، يؤدون صلواتهم فى (خشوع) يلبسون الساعة باليد اليمنى (مخافة أن يزغ الشيطان قلوبهم) ويبسملون عند التحدث حتى يفقه قولهم ثم يصلون على النبى كثيرا من الصلوات ثم يحجون إلى بيت الله (أفواجاً) ويخرجون (ربع العشر) زكاة لأموالهم ويتركون (تلت) الأدوية (فاسدة) على أرفف الصيدليات ليموت بها من لم يمت (بالسيف)!
بالله ده إسمو كلام؟ ونحنا نقول الحاصل شنو؟ الناس با ماشة (المقابر) يا ماشة (الأردن) عشان يجيبوها راجعة تمشى (المقابر)! أتاريهو (تلت) الدواء الفى (السوق) مضروب (بى كده ح يموت تلت الشعب ويفضلو التلاته أرباع)!! أنحنا ما عاوزين نسأل (القصة دى) بتحصل كيف؟ والمسئولين ساكتين عليها ليه؟ بس (اليتلافو لينا) الدواء (المضروب) الموجود ده وأنا بقترح إنو لو (الدولة) ما عندها آليات لتفتيش الصيدليات لجمع وإبادة هذه الأدوية (الفاسدة) انو تفرغ شعبة (مكافحة المخدرات) بالداخلية للقيام بهذه المهمة.. أقل حاجة (البنقو) ما بكتل طوااااالى!
كسرة:
ما رآي الاخوة (نواب) المجلس الوطني في هذه الفوضى الضاربة بأطنابها؟!
|
| |
|
