منتديات ابناء السقاى
يا ضيفنا لو زرتنا لوجدتنا نحن الضيوف وانت صاحب المنزل اهالي السقاي يرحبون بكل زائر ويسعدنا تسجيلك معنا (إدارة المنتدى)


المنتدى الجامع لأبناء السقاى الكبرى
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 كلاب الشرطة السودانية

اذهب الى الأسفل 
كاتب الموضوعرسالة
بشرى مبارك



عدد المساهمات : 7552
تاريخ التسجيل : 19/02/2009
العمر : 58
الموقع : أقيم فى بيريطانيا مدينة بيرمنجهام

مُساهمةموضوع: كلاب الشرطة السودانية   السبت 14 أكتوبر - 7:25

فضل الكلاب في السودان _ The Best Dogs in Sudan
25 يونيو، 2012 ·
زيارة جريدة الصحافه لوحدة الكلاب البوليسيه في بري واللقاء مع دكتور عابدين صاحب عيادة (anemal house) زيارة خاصة لوحدة الكلاب الشرطية
رائد طبيب عابدين: كلاب «الكبابيش» أفضل من «الوولف الألماني» في كشف المخدرات
ملازم الطيب: «ايفي» حيرتنا و«ميسو» أثبت أن ولد
«الشاكي» هو «الحرامي»
كاميرا: عصام عمر
دخلت حوش وحدة الكلاب الشرطية وانا اردد ابيات الفرجوني الذي قابل وفاء كلبه برثاء بعد ان دقشه لوري وقال:
(ضربك لوري عاد ينشل يمين السايقو
ينحصر النفس تعدم عليه طرايقو
متل ما تف زورك قندراني يضايقو
يتفو تفيف ملاح ما يلقي زولا يلايقو)
**************** دخلت ابحث عن اغلى انواع الكلاب واذكاها شاهدتها داخل الاقفاص تنبح بصوتها المخيف، ومع اني ما ارتكبت جريمة يعاقب عليها القانون الا اني (شعرت الرعشة من صوف راسي لي كرعي) وهرولت ناحية مكتب العقيد طبيب علي احمد حسن فضل السيد مدير الوحدة واستأذنته أن اقوم بجولة برفقة الرائد طبيب عابدين محمد عابدين رئيس القسم البيطري والملازم الطيب عثمان كبير المدربين لمعرفة بعض اسرار وخفايا عالم الكلاب الشرطية وما هو دورها في فك طلاسم القضايا الشائكة وبعض مواقفها البطولية وكانت هذه المعلومات التي حصلت عليها من الرائد طبيب عابدين والملازم الطيب.
**************** تربية وتدريب الكلاب لاستخدامها في العمل الشرطي بدأت في اية دولة ومتين؟
ـ اول دولة استخدمت الكلاب هي المانيا في الحرب العالمية الاولى ومصر من اوائل الدول العربية في هذا المجال.
**************** ليه اختاروا الكلب من دون بقية الحيوانات بتميز بي شنو؟
ـ الكلب حيوان ذكي جدا عندو حاسة شم قوية جدا ووفاء بلا حدود وحاسة سمع مرهفة كل الحواس نشطة اهلتو عشان نستفيد منو في الحقل الجنائي وهو من زمان بستخدموه في الحراسة والرعي ونحن اكتشفنا مقدراته في مجال فك طلاسم الجرائم وطورناها وما في اي حيوان غيرو يمكن يؤدي دوره.
**************** الكلاب الشرطية دخلت السودان متين؟
ـ دخلت في العام 1967 حوالي «9» كلاب استجلبت من جمهورية مصر العربية وبعدها في فترة السبعينات استجلبنا «5» كلاب كدفعة ثانية من المانيا.
**************** في الفترة ديك استخدمتموها في اي مجال؟
ـ زمان طبعا التخصصات الحديثة دي كانت ما معروفة استخدمنا الكلاب فقط في تخصيص الاستعراض ومتابعة الاثر.
**************** والتخصصات الحديثة دي شنو؟
ـ بعدما استجلبنا كلاب بكميات اكبر من المانيا وجنوب افريقيا توسعت ادارة الكلاب الشرطية بقينا نستخدمها في تخصصات زي كشف جرائم المخدرات المخلقة والمصنعة مثل الافيون والكاوكايين والخمور وبرضو استخدمناها في الدوريات وتأمين المنشآت ومكافحة الشغب والمتفجرات بنوعيها البلاستيكية والحديدية زي الديناميت والقرنيت.
**************** بتستخدموا ياتو سلالة من سلالات الكلاب العالمية في السودان؟ وليه؟
ـ نحن بنفضل كلب (الراعي الالماني) او الوولف او الجيرمان شيفر لانه من اجمل سلالات الكلاب وافضلها شكلو جميل وذكي جدا وما شرس لانو في انواع شرسة جدا وما بنحب نستخدمها وما بنستوردها
**************** زي شنو مثلا؟
ـ يعني في كلب من سلالة «ليبرادور» شكلو مخيف جدا لونه اسود عندو مقدرات شم عالية جدا بكتشف المخدرات بسرعة وبره بستخدموه ناس شرطة مكافحة الشغب، دا كلب قوي جدا لو مسك الزول اول شيء بكسر ليه يدو وكلب الشغب والاقتحام دا بيستخدم احيانا في التظاهرات ومباريات كرة القدم نحن هنا بنستخدم الووف.
**************** سعر الكلب الشرطي «الوولف» كم؟
ـ يعني يتراوح بين المليون والـ 4 ملايين «بالعملة القديمة» ونحن الآن بقينا نشتريهم من الخارج ونخليهم يتوالوا لزيادة العدد وفي ملاحظة انو بعض الناس بشتروهم يستخدموهم في الحراسة وحاليا بقت في تجارة واسواق لبيع وشراء الكلاب داخل السودان.
**************** الافضل في كشف الجرائم ياتو الكلب ولا الكلبة؟
ـ الانثى ممكن تواجها احيانا مشاكل زي «الحريم» في العمل اليومي يعني الحيض والولادة كلها بتأخرها لكن الانثى برضو فكت طلاسم جرائم كبيرة وغامضة.
**************** والكلاب ديل بتأكلوهم شنو وشغالين بي نظام «جوع كلبك يتبعك»؟
ـ الكلاب الصغيرة بتاكل 3 ـ 4 وجبات يوميا والكلاب الكبيرة بتاكل وجبة الصباح مكونه من اللبن والرغيف ووجبة المساء عبارة عن خلطة جاهزة جافة فيها كل المواد الضرورية بتشبه العلف مغذية جدا وموزونة وعندنا وحدة تغذية متكاملة.
**************** بداية التدريب في عمر كم؟
ـ بنبدأ ندرب الكلاب من الشهور الاولى وهم صغار بنديهم تدريبات خفيفة تنمي الخصائص الطبيعية الاولية نعلمهم الشجاعة وكيف يشيل الحاجات في خشمو ونحاول نرسلو ونلعب معاه ونمشيه في البلاط ونعلمه كيف ينط المجاري وما يخاف من الحاجات الغريبة.
**************** المدرب بدرب كلب واحد ولا مجموعة من الكلاب؟
ـ نحن بنقسم الكلاب لمجموعات لانها اجتماعية جدا ووفية. المجموعة الاولى فيها الجراء مع الامهات هنا بتعلم الحركة، المجموعة الثانية تضم الكلاب المفطومة في عمر 45 يوم، المجموعة الثالثة اي كلب يكون مسؤول منه مدرب واحد بس يكون متابعه ويشرف على تدريبه ويولف عليه ويسمع كلامه والمدرب هنا زي «الريموت كنترول» يقول للكب اقيف يقيف، اقعد يقعد امشي يمشي.
**************** بقولوا «الكلب بريد خناقو» انتو بتستخدموا معاهم العصا والا الجزرة؟
ـ عندنا اربع طرق مختلفة للتدريب. الطريقة الاولى اسمها «الطبطبة والتشجيع» يعني لو عمل حاجة كويسة نقول ليه «برافو» ونشجعو عشان تاني يعمل زيها. والطريقة الثانية اسمها «المحاكاة» هنا نحن بنجمع الكلاب المدربة مع الكلاب الما مدربة عشان تقلدها وتعمل زيها رقدت ترقد قامت تقوم معها والطريقة الثالثة اسمها «الاطعام» يعني لو عمل حركة كويسة نديه مكافأة احيانا بسكويت او قطعة لحمة. الطريقة الاخيرة اسمها «الميكانيكية» فيها عنف وعقاب وزجر بواسطة مقبض الرقبة نحن بنعتبرو زي التلميذ نكافؤو لو نجح ونعاقبوا لو رسب لكن الطريقة العنيفة دي ما بنستخدمها لانها بتعلمو الخوف ما بنلجأ ليها الا عند الضرورة.
**************** الادوت البتسخدموها في التدريب شنو؟
ـ بنستخدم الطوق والحلقة الحديدية وعندنا ادوات مساعدة زي مد اليد للهجوم والسلالم والحواجز للقفز.
**************** بتعرفوا كيف انو الكلب دا مفروض يشتغل في جرائم السرقة ودا يمشي مع ناس المخدرات؟
ـ بعد الشغل العام والمنهج التدريبي الموحد بنعرف من الجرعة التدريبية الاولى واسمها جرعة «الطاعة» مقدرات الكلب وكفاءته وميولو ودي بلاحظها خبير التدريب وبقوم يوجه بتدريب اي كلب حسب حبه للتدريب المعين.
**************** الكلاب كل تدريب بتشم بنقو وهيرويين ما لاحظتو انها بقت مدمنة ودا اثر على ادائها يعني لو ما سطلت ما ح تشتغل؟
ـ انا كطبيب بيطري كانت دراستي للماجستير بعنوان «تأثير المخدرات على وظائف الكبد والكلى للكلاب الشرطية» وجدت ما في اي اثر عضوي ناتج من «شمها» للمخدرات لكن وجدت ان بعض الكلاب في الدول الاجنبية تتدهور صحتها لانها في التدريب بدوها المخدر عن طريق الفم مع الاكل بكميات كبيرة ولفترة زمنية طويلة لذا صحتها بتتدهور والمفارقة اني اثناء دراستي وجدت ان وظائف كلى وكبد كلابنا الشرطية دي بتتأثر بي ارتفاع درجةالحررة دي كانت نتيجة عرضية لانو دراستي كانت في فصل الصيف والشتاء والخريف.
**************** من من كلاب «وحدة المخدرات» خطير وممكن نقول عليه كلب بن كلب او كلبة بنت كلب؟
ـ عندنا هنا الكلبة «ايفي» كلبة كبيرة في عمرها ومتخصصة قبل فترة جاتنا معلومة من المصادر انو في تاجر معين دخل بنقو بكميات كبيرة داخل بيتو بعد التفتيش ما لقينا البنقو قمنا جبنا الكلبة «ايفي» وقفت جوه البيت وبقت تخرش في الحيطة لما فتحنا الحيطة لقينا انو التاجر دا مدخل البنقو في صفيحة حديد جوه الحيطة وعامل البياض بي فوق ليه. وحديثا ظهر ان الكلب الوولف عندو في البوصة المربعة من انفه 220 مليون خليه شميه والانسان عندو 4 ملايين خلية شمية في البوصة المربعة من انفه اذا قدرة الكلب على الشم بي قسمة عادية اكبر 44 مرة من قدرة شم البني ادم ودا بفسر معرفة «ايفي» لمكان البنقو.
**************** وانجاز تاني لكلب ما كنتوا متوقعنو؟
ـ مرة كنا ماشين لي تدريب عادي جمب البحر عشان نغير البيئة للكلاب فكيناهم ياخدوا راحة وينشطوا شوية لما رجعوا جوا شايلين معاهم مخدرات بالصدفة اكتشفنا انو في مجموعة من المدمنين بجو يشربوا البنقو جمب البحر في محل ما متوقعنو.
**************** طيب كلمونا عن انجاز لكل من الكلاب وحده «طابور الاستعراض»؟
ـ حصلت قصة غريبة جدا مرة في واحد مغترب جاء من السفر بالليل دخل بيتو وعندو شنطة سمسنايت مليانه دولارات ختاها في الغرفة ونام الصباح لقى الشنطة مكسورة وواقعة في الجنينة مشى فتح بلاغ في البوليس ونحن جبنا كلب اسمه «ميسو» عشان يتعرف على الحرامي وسط مجموعة من الناس كلهم مشتبه فيهم واقفين في صف ما عندنا لا بصمة ولا اي دليل ضدهم قمنا شممنا الكلب الشنطة وفكيناه ولف ودور حول الصف فجأة مشى بعيد من الصف لي مجموعة من المتفرجين انا قلت الكلب دا غلطان، مشيت ازجرو لقيتو ماسك في واحد والمفاجأة انو اعترف وقال لينا «سوقوا كلبكم دا يا اخوانا انا شلت الحاجات دي» والمفاجأة الكبيرة انو الحرامي القبضو الكلب دا طلع «ولد الشاكي» بذكر والده قال خلوه الشنطة شنطتي والولد ولدي. ** لاي حد ممكن شهادة الكلب تعتمدوا عليها؟
ـ نحن بنسميها «البينة الظرفية» يعني لو طلع الزول الكاتل لازم يعترف او نلقى اداة الجريمة او اي بينة اخرى.
** اكتشاف تاني غريب وظريف لكلب من وحدة الاستعراض؟
ـ مرة في مجرم محكوم عليه بي سجن لمدة 4 سنوات في الابيض قضى مدة منها وهرب جاء الخرطوم هنا قام تاني ارتكب جريمة واتعرف عليه الكلب الشرطي ولما وديناه للقاضي قال اول شيء يمشي يتم عقوبته الاولى وبعدها ح يحكموا عليه تاني بي عقوبة جديدة ومن افضل كلاب الطابور الكلب «وعر».
** الكلاب المتخصصة في متابعة الاثر هل انهت دور القصاص؟
ـ ايوه لان القصاص يعتمد على حاسة البصر والكلب يعتمد على حاسة الشم القوية، مرة مواطن بلغ الشرطة والمتحري طلب كلب الشرطة ودا الاجراء القانوني الصحيح ولان المجرم دائما يكون مرتبكا لحظة السرقة احيانا ينسى طاقية او حذاء او اداة الكسر زي المفك وغيره هنا الكلب لما يشمها ببحث عن الجاني ويلقاه.
** قصة من قصص كلاب متابعة الاثر الغريبة؟
ـ كان في سرقة في العمارات جانا البلاغ زي الساعة 6 صباحا الكلب اتحرك من العمارات يشم في الاثر لغاية ما وصل منطقة مايو وهناك لقينا الحرامية لسه بتقاسموا في المسروقات. والبوضح قوة شم الكلب اكثر حادثة غريق ما لقينا جثته بعد بحث 3 يوم وبعد وصول الكلب اكتشف مكان الجثة تحت الهدام تحت عمق اكثر من مترين.
** دور الكلب الشرطي في حماية الشخصيات شنو؟
ـ مثلا لما يكون في مسؤول عندو لقاء حاشد او في مسؤول مشرف مناسبة كبيرة او في ضيوف وزوار اجانب بكون دوره الكشف عن المتفجرات والتدريب على المتفجرات والالغام اصعب انواع التدريبات لاننا بنعلم الكلب كيف يشم ويرقد جمب المتفجرات لغاية ما يجي الخبير.
** هل نجحت كلاب السودان في الكشف عن الالغام والمتفجرات؟
ـ نعم نجاحا باهرا السودان الآن هو مركز اقليمي للتدريب وبقينا نصدر الكلاب المدربة والمدربين لدول الجوار ليوغندا وكينيا واثيوبيا وجيبوتي ورواندا وبورندي وسيشل وعقدنا في الوحدة دي دورة متقدمة قبل عامين وفي الطريق دورة ثانية نهاية العام الحالي.
** نحن الآن داخل العيادة البيطرية، الخدمات البتقدمها شنو؟
ـ العيادة دي انشئت مع افتتاح الوحدة فيها اشراف طبي من تغذية وتطعيم وتوليد وصيدلية وغرفة عمليات مكتملة فيها الاشعة والموجات الصوتية.
** انتشرت في الفترة الاخيرة ظاهرة تربية الكلاب «المستوردة» والقطط هل العيادة مفتوحة للجمهور؟
ـ في الفترة الاخيرة الادارة خصصت عيادة خارجية استثمارية برسوم كشف رمزية للكلاب والقطط للمواطنين وللاجانب واكثر العمليات الجراحية فيها هي استئصال الرحم والمبايض وتخصية الذكور.
** اكثر الامراض البتصيب الكلاب شنو؟
ـ عندنا جرعة تطعيم رباعي بداية من عمر 28 يوم الى شهر وتكرر الجرعة بعد اسبوعين ونعطي جرعة في عمر 3 شهور تنشيطية وسنويا ندي التطعيم الرباعي زائدا جرعة ضد مرض السعر.
** غير السعر شنو من الامراض ممكن ينتقل من الكلاب الشرطية للمدربين والاطباء البياطرة في الوحدة؟
ـ مرض القارديا وامراض الديدان لكن نحن بنتبع اجراءات الوقاية والحماية لوقاية كلابنا وحماية انفسنا وندي تطعيم للكلاب كل 3 شهور.
** الكلاب حقتنا دي ما ممكن تشتغل كلاب شرطية زيها وزي المستوردة؟
ـ عندنا زميلنا نقيب طبيب عمار محمد الباقر عمل دراسات وتجارب ممتازة في مجال استخدام الكلاب المحلية في العمل الشرطي وتم استجلاب كلاب من منطقة الكبابيش والنيل الازرق وكردفان واعطت نتائج طيبة وحاليا النقيب طبيب عمار شغال في بحوث عن اصل الكلاب السودانية لانها ما من فصيلة واحدة لان هناك اكثر من 100 فصيلة عالمية وكلابنا ما بتتبع لاي منها ويحاول الان ايجاد صفات مشتركة تجمع بين الكلاب لتنقية فصيلة واحدة ومعرفة اي الانواع اكثر ذكاء.
** الكلب البوليسي بتين بتدوه «المعاش»؟
ـ بعد ما يتم 8 ـ 9 سنين بكون كبر ووصل مرحلة الشيخوخة وكفاءته بتقل. زمان كنا بنبيد الكلاب الكبيرة لكن في عهد العقيد طبيب علي احمد حسن مدير الوحدة لانه بحب الكلاب جدا برفض مبدأ قتلها لأنها عملت من اجل الوطن كثيرا بقينا نكرمها ونخليها في مساكنها النظيفة الجيدة التهوية والتغذية وتحت الرعاية الصحية
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://mubark59@hotmail.com
 
كلاب الشرطة السودانية
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات ابناء السقاى :: المنتدى العام :: المنتدى العام-
انتقل الى: