منتديات ابناء السقاى
يا ضيفنا لو زرتنا لوجدتنا نحن الضيوف وانت صاحب المنزل اهالي السقاي يرحبون بكل زائر ويسعدنا تسجيلك معنا (إدارة المنتدى)
منتديات ابناء السقاى
يا ضيفنا لو زرتنا لوجدتنا نحن الضيوف وانت صاحب المنزل اهالي السقاي يرحبون بكل زائر ويسعدنا تسجيلك معنا (إدارة المنتدى)
منتديات ابناء السقاى
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


المنتدى الجامع لأبناء السقاى الكبرى
 
الرئيسيةأحدث الصورالتسجيلدخول

 

 من أغانيات الزمن الجمـــيل

اذهب الى الأسفل 
2 مشترك
كاتب الموضوعرسالة
alhabob




عدد المساهمات : 5
تاريخ التسجيل : 02/09/2012

من أغانيات الزمن الجمـــيل Empty
مُساهمةموضوع: من أغانيات الزمن الجمـــيل   من أغانيات الزمن الجمـــيل I_icon_minitimeالإثنين 15 أكتوبر - 20:20



من أغانيات الزمن الجمـــيل ... من إعداد الشاعر / الحبوب
مع الراحل المقيم / الشاعر والملحن الموهوب/ عبد الرحمن الريح
قنينة العطاء ..
التي تسكب عطر حلمات الدواخل
ألقا سـرمــديا خالدا من خرائد الحرف وقلائد النغم الطروب ..

لا تُخْفِ ما فعلت بك الأشواق واشرح هواك فكلنا عشاق
قد كان يخفى الحب لولا دمك الجاري ولو لا قلبك الخفاق
فعسى يعينك من شكوت له الهوى في حمله فالعاشقون رفاق
تعالوا لنرقصها مع ونعيشها معا على ضفاف النيل وخفقات أهل السقاي ... حيث الماء والخضرة والوجه الحسن
يا جميل يا مـدلل مع فنان الحقيبة الرائع عوض الجاك
من روائع الزمن الجميل هذه قبسات من همس الحروف الجميلة والأماني السندسية .. الراقصة .. مع الأشواق والمحبة الندية لكم جميعا أهلي .. هيا نسرح اليوم يا أخوة السماح مع اروع شعراء الزمن الجميل مع الشاعر عبد الرحمن الريح الذي يعتبر أحد ركائز الزمن الجميل والعصر الذهبي لغناء الحقيبة ورفيق درب أروع من غنى وترنم بنميق الحروف المدوزنة الراحل المقيم إبراهمي الكاشف، ثم من بعد أثرى شاعرنا عصر الحداثة بكل الطرب الأصيل المؤسل بعصير الحنايا الشفيف

ســهر المنام لي وحــدي يا قسيم الريد الريد فوقك النبي .. تعالوا أحبتي وهلموا ألي لنقضي معا أجمل اللحظات المعطرة بعصير حلب الحنايا الذرافات القا وشجوا وشجونا .. لحيظات باقية أبدا ودوما في وجدان امتنا الخالدة .. من إرثها الرائع الجميل أغنيات تسري في كل حته من خبايانا الظميئة للود والحب والتعارف والأشواق المستدامة لكل ماهو حبيب للنفس وتسر به كل خفقاتنا ونبضات عروقنا .. عصر الروائع والرائعون من أجيال العطاء فلا أقل من الوفاء لآهل العطاء ... بالعيش في رحاب جنانهم الوريقة المزهرة بكل ما هو عاطر وخالد.
يا أماسي الغربة فـد يوم متعينا .. شيلي دميعات الأســى وما توجعينا
هلموا أيها الأحبة لنسرح معا اليوم وغد وبعد غد وكل يوم مع الرائعين دوما من خلاصات الود والعطاء
فهنالك لُحيظاتِ صدقٍ ووعد تنثني فيها هامات كل عشاق الوطن، إجلالاً وتقديراً للخُلصاء الأوفياء من المبدعين، من أبناء شعبنا، ممن فارق منهم هذه الفانية ومن بقي منهم على قيد الحياة، فلله ما أبقى ولله ما أخذ. فذكراهم ستظل، هاهنا في كل بقعة من مساماتنا وكل رفة رفيف أرواحنا التي تتسع لكل جميل وبديع ورائع ومجدد موهوب، ذكرى ستظل دوما وأبدا خالدة باقية للأبد في ذاكرة تاريخ الأمةعبر الأجيال المتعاقبة.
الراحل المقيم الشاعر الجميل عبد الرحمن الريح
يامن نقشت وسطرته ورسمت اللوحات المتفردة، بومض الروح والصدق والنقاء،
وبالعشق المقيم في دواخلك لشعبك وارضك، ولم تتوقف عن العطاء حتى آخر رمق بل ظللت تجود بخرائد النبض المعتق بشذا روحك الطيبة الطاهرة، ولحظةإ ثر لحظه تتحف أبناء أمتك وتبث إليهم إبداعا جديدا متفردا، وكل أبداعاتك ما زالت وستظل تسرى وتسري في نفوسنا. فغدا عطاؤك عطاءا سرمديا في الأعماق ترددة الأجيال. فيلامس صداه شقاف القلوب متوسمة الدرب الأخضر، الذي رسمته لوحاته بومض الأعماق ورفة الخاطر المجبول على المحبة والصدق والعشق للجمال وكل جميل هو حسن أي شئ ليس بالحسن في غناك وأشعارك.
الطاووس
كلمات عبدالرحمن الريح
ملك الطيور ارقص وسط الطيور نشوان
خلي الزهورتفتح مختلفة الالوان
ارقص وهل في الكون
طاير جميل مثلك بيهو الوجود مفتون
من درك المكنون
اكشف كنوز حسنك ورينا فيك كم لون
ما بين جمال وفنون
للزهر تصحو عيون
تهدي الشذي واحيان
تهدي الهوي النديان
للعاشق الولهان
يا اجمل الاطيار
ليك في الحديقة ديار
مبنية بالورد ومعروشة بالازهار
مخضرة الاشجار في شواطئ الانهار
ملتفة والاغصان بالخفة والميسان تلهب الانسان
انشر جناحك و ميل حي الربيع يا جميل
خلي الشمس تسكب ذهب الاصيل في النيل
في رياضك النضرات
النور يسير قطرات
محمرة العبرات
الروعة تستكمل
يبقي المكان اجمل زي لوحة الفنان

ظبية المسالمة
لي في المسالمه غزال نافر بغنى عليه
جاهل قلبو قاسى وقلبي طائع ليهو
مصـباح الظــلام الربنا معليه
زايد في الكمال نور الجمال جاليهو
إن شافو الغزال مع نفرتو يواليهو
وإن شافو القمر أنوارو تخجل ليهو
كل من شافو قال أنا بالنفس افديهو
هو غصن الرياض الزاهي في واديهو
أزهار الربيع ما زى زهور خدّيهو
وجدلات الحرير ما لينه زى إيديهو
إن جاء النسيم زى الفــرع يتنيهو
والثمر الرطيب كـذب اليقول يجنيهو
باللّمى والخدود يأذى العشوق يفنيهو
الصحا والنعاس والسحر في عينيهو
والده معجنو وعلى فطرتو مربيهو
الفرد الوحيد في الدنيا مافى شبيهو
يتجاهل علىّ وأنا حالي ما غابيهو
سابني في نارهواى وشال قلبي يلعب بيهو
هو أمير الهوى وقاضى الغرام مفتيهو
إن جار علىّ في قتلى كيف يفتيهو
يا قلبي الحزين إنت الصبر خاتيهو
إن جار أو عدل سيبهو اليتيه في تيهو

زيـدني في هجراني
زيدني في هجراني وفي هواك يا جميل
العذاب سراني على عفافك دوم
سيبني في نيراني لمتين تطراني
أنظرك في النوم جوز نواعسك راني
طرفي قصدو يراك وما قصدت تراني
ما بسيب حبك والله لو ضراني
يا نعيم أزماني يا حياة روحي و بهجة أمدرماني
في الحياة غيرك مافي زول هماني
وفي بعادك أزاي وفي وصالك أماني
بلبل الأغصان غنى بي ذكراك وبالنويح أوصاني
الجمال خصاك والعذاب خصاني
و الدلال أوصاك علي دوام تعصاني
يا درر ألحاني يا أزاي و دواي يا راحي يا ريحاني
إنت نايم وأنا ألم البعاد صحاني
حن عليّ بغرامك و الله كان يمحاني
مال فريعك باني فيه بدر وظلمه وفيه ردفا باني
حين نسيم الليل بي روايحك أتاني
زاد عليّ الشوق و دمعي سال هتاني
و على عفافك دوم زيدني في هجراني

أقول إنت نور
أقول أنت نورولا أقول زهور
ولا أقول نسيم فواح بالعطور
أقول أنت نور من أفق الوجود
ولا أقول زهور من روض الخلود
ولا أقول نسيم من عطر الورود
أراك في الحقيقة مع دقيقة
ومحاسنك رقيقة
كأنك حديقة ومفاتنك زهور
أقول أنت نور من أفق الجمال
ولا أقول زهور من روض الخيال
ولا أقول نسيم السحر الحلال
أقول إنت إيه محيرني ليه
أحب أسألك أشوفك تتيه
أخاف أخجلك لأنك نبيه وكلك شعور
فليك حق تكون تحب العلوم وتهوى الفنون
وديع كالرضيع بعيد عن ظنون
وما في الفؤاد يبين في العيون
لأن الوجوه تكاد أن تفوه
بما في الصدور

ماليا غيرك حياة
يا أسمر يا رمز الضياء
إنت حياتى
يا فاهم يا دارس معنى الحياة
من أدبك ليك
حارس من غير رياء
يا باسم يا ناعس
يا ملاك يا لابس توب الحياء
إنت حياتى
ما شوهوك بفصادة
على الخدود السادة
طبيعى خلقة ربك
ما داير زيادة
مع لونك الأسمر
ورد الخدود محمر
لا بودرة لا أحمر
آيات محاسنك
زى ماء الحياة

يا حمامه مع السلامه
ظللت جوك الغمامه
طيري في جوك المعطر وانشدي شعرك المسطر
قولي للشادن المبطر زيد دلال وزيد وسامه
أنشدي شعري بين دورو علو يذكرني في خدورو
أوعي يلعب عليكي دورو
يا حمامه مع السلامه ظللت جوك الغمامه
أسأليهو عن المحبه وعن فؤادي الذي أحبا
ليتو يسأل عن الأحبه مرة في عمرو يا حمامه
يا حمامه مع السلامه ظللت جوك الغمامه
الغرام ناسي فيهو ذاتي فيهو خاطرتا بي حياتي
أين حبي وذكرياتي أصبحت روحي مستهامه
يا حمامه مع السلامه ظللت جوك الغمامه
كلميني عن الموده كيف ضاعت وكيف صدا
بعد ذلك إذا أستبدى قابل الجاي بي إبتسامه
الجمال يا حمامه فاتن فيه أروع من المفاتن
كل من يعشق المحاسن قل أن يوجد السلامه
يا حمامه مع السلامه ظللت جوك الغمامه

يانجوم الليل أشهدي
علي لوعتي وتسهدي علي بكاي وتنهدي
من ليه حسن الكون هدي النافر الجافي الهدي
ياعيني يوم تشاهدي أغري السلام وأستشهدي
ياعيني دمعك بندي وقول العوازل فندي
أنا لي غرام يامعاندي زي زهرة الخد الندي
ياعيني أبقي ترصدي عسي توجدي ماتقصدي
مهما جرح قلبي الصدي هو برضو غاية مقصدي
قمراً حماني تهجدي وتركني فاقد منجدي
آه من صفارو العسجدي وعينو المتل عين الجدي
يامن خرقت عوايدي ونظمت فيك قصايدي
لو عمري شيئآ في يدي لوهبتو ليك يا سيدي

جاني طيفه طايف
جاني طيفه طايف لحاظه كالقذايف
وأنا من عيونه خايف
جاني طيفه طايف في ثوب من الطرايف
خدود كالقطايف ليهو العنب شفايف
حبيبي دمعي زارف غرقني سيله جارف
لماذا عني صارف وهالكني وإنت عارف
حبيبي أانا حالف في عوازلي ليك أخالف
قلبي ليك محالف ومتي يا غزال توالف
تلا في هواي صحايف ولقي حبي غير زايف
قال لي أراك خايف ودون تشرح أنا شايف
ياملهم العواطف ومهدل المعاطف
متي ياجميل تلاطف
وتكون علينا عاطف
جاني طيفه طايف

يا روحي انصفني
في حكمك لأنو قاسي
علي أنا يا حبيب ظلمك
تظلمني والأيام قد تنصف الإنسان
نشاهد المحبوب عفوا عيان وبيان
بالنسبة لي لطفك والرقة يا فتان
ما كنت تظلم من قد أضحى بيك ولهان
تتركني للماضي مع إنو في الإمكان
نجدد الذكرى وتنسى كل الكان
هيامي بيك يا فاتن مصدروالإنصاف
أنصفت حسنك حب وانصفت حبي عفاف
ذوبت روحي معاني دقيقة في الأوصاف
هومت نفسي خيال في معبدك طواف
سكبت روحي على كاس المحبة سلاف
هل بعد ذلك كل سهام نؤاك أهداف؟
يا حبيبي غرامي تركته للايام
تركت حب ودموع تركت شوق وهيام
عودت نفسي إذا ما أشتدت الآلام
أصبر على الحرمان وأضحي بالاحلام
جنة هواي العذري ندية كالأنسام
تخلي نار الشوق بردا علي وسلام

خـــداري
كلمات الراحل المقيم الشاعر والملحن عبد الرحمن الريح
وغناء المبدع الرائع حقا الفنان حسن عطيه أمير العود
خداري البي حالي ماهو داري
جافاني
متين يزورني حبي محياهو يضوي داري
أقول جلست مرة مع الطير الخداري
من بعدوا في هواهو و لي روحي كم أداري
إيه قصدوا من عذابي لو ما قصد وداري
كل ما رأيتوا باسم الطيب يجيني ساري
كل ما رأيتوا تايه يزداد علي حساري
لولاهو ما إشتبهت في يميني أو يساري
لولاهو ما صبرت على ذلي و إنكساري
في فكرة الكواكب و الأنجم السواري
والحور مع جمالن بالنسبه ليك جواري
أظهر أمام عيوني لا تبقى متواني
أنا جارك البحبك أوعك تخون جواري
لو ما حبيبي يرحم لاشك في دماري
نار الغرام صلتني في الأدمع إنهماري
ما دام صبحت عاشق والحب صبح ثماري
سيبوني في الأرايك أسجع مع القماري

ما رأيت في الكـون
ما رايت في ا لكون يا حبيبي اجمل منك
في جمالك وتيهك وفي جهالة سنك
من كمالك و ظرفك ومن جمالك اظنك
يا حبيبي نساء الدنيا ما ولدنك
راجي عطفك ولطفك راجي حلمك و حنك
ديمه يا مريود تجدني سائل عنك
يا حبيب الانفس ما بتوب من حبك
لو صليتني بنارك برضي برضي بحبك
مره تيه في دلالك ومرة ارعي بحبك
مره خليك جاير مرة خاف من ربك
يا جميل المنظر كيف كيف اذمك
سيبني في الامي و بالعلي ما يهمك
خالي عقلك و قلبك فاضي فكرك و همك
المدام المسكر والعسل في فمك
قلبي ذاب من نارك وصبري ضاع من صدك
هل اداري حياتي ام اعالج ودك
نسمة الاسحار مزاجه نفحة ندك
وزهرة الازهار بستانه صفحة خدك
السرور اوقاتك والمحاسن خمرك
الزمان حدامك ممتثل لي امرك


يا جميل يا مـدلل
بصوت الفنان الرائع والراحل المقيم عـوض الجاك
ياجميل يا مدلل قولي ليه بس حكم الغرام قد حلل
عذابي يدوم
كلما ما أطراك بالدموع أتبلل
جسمي صار منحول والمنام يتقلل
طرفو لي رؤياك دمعو كبر وهلل
جفاني النوم
بالعلي لا تجهل يا حلو النغمات يا لذيذ المنهل
نارو حارقة الجوف و المدامع تبهل
بعد هذا الحال هل وصالك يسهل
تحن يا ظلوم
ليل ضفايرك مسدل يا رشيق القامة والمعاطف الهدل
القوام ممشوق والمعاصم جدل
ده البخلي إليك حبي لا يتبدل
يزيد كل يوم
ما العقول تتخيل والأديب للقاك يتهبل
بيد أني عزيز خفت في المستقبل
أهدي ليك الحب وإنت بي ما تقبل
أكون محروم
في هواك لو أعزل برضي لا أنساك في الخيال أتعزل
العجيبة كمان قلبي صار ليك منزل
إنت فوق للقوس والسماك الأعزل

الشادن الكاتلني ريده
هلك النفوس و الناس تريده
مالو لو يرحم مريده
الكون وحيدو والكون فريدو فيوه لا يوجد طريدو
نظم العقول في سلك ريدو لبسن قلايد في وريدو
الجيل قديموعلي جديدو ليهو إعترف معدوم نديدو
فاق السلاح و كسر حديدو نقرابي في صفحة خديدو
يصعب علي وصف قصيدو وصعب علي نظم قصيدو
ده غزال سارح بين صيدو يا ريد محال شركك يصيدو
إنسان كحيل ناعس هجيدو جيد الغزال كانو جيدو
مهما أقول القول أجيدو أنا وصفو كيف أقدر أجيدو
كلما أقول الحظ يعيدو نحس الزمان يسبق سعيدو
القطر دانيهو وبعيدوهو هلال صيامو و يوم عيدو

الفريد في عصرك
يا الفريد فى عــصــرك والزمان زمانك
أهدى لي مـن فـضـلـك نـظـره فى رمانك
يا الفريــد فـى عصرك قلبى فاقد أمانك
حرام عليك تهجرنى وترضى بى حرمانك
بالكمـال شـرفـت مـناطق أُم درمانك
وبالجمال إمـتزت على شباب زمانك
يا أنيس الصـيد أنا فى الغرام إنسانك
إنت روح شعــرى وأنا فى الشعر حسانك
إن قصدت هلاكى تدنى من فرسانك
وإن عـطـفـت على ذاك من إحسانك
يا الحنيـن فى نفسك قلى وينو حنانك
شلت قلبى ودمى خـضـبـت بنانك
إن مرقت تـمـر فى اـروض علي أفنانك
النجوم تـتغـزل فى بـياض أسنانك

أسحار الجمال
شعر الراحل المقيم هرم الغناني السوداني عبد الرحمن الريح
إحترامي إليك من صميم قلبي غير ما أشعر
إلتفافنا عليك والدليل حبي تسمح تنظر
شوف دموع عيني سايلة في خدي
من لهيب الشوق برضو ما في خلاص
هكذا يا ظالم جزا الإخلاص
إنت في حبك والفؤاد مجروح
ما فضل مني شئ خلاف الروح
هكذا الأشواق تسمو بالعشاق
من سرا الأشباح لي سما الأرواح
حيث تروي غناك للنجوم هناك
سارحة في علياك طاهرة كالأفلاك
أنت نور من بدور الكمال
ساطعة فيك آيات من معاني الجمال
تجعل الفنان عبقري الخيال
لو نظم أشعار أو عزف أوتار
تندهش أفكار والعقول تحتار
يا جميل ياما في الجمال أسحار


أنا في شخصك بحترم أشخاص
حاير فى امرى معاك
الشاعر المجيد الرائع عبد الرحمن الريح
حاير في أمري معاك لا قدرت ألقي وفاك
ولا قادر أنسي هواك
حاير في أمري معاك وعيوني حيرانا
في أمري والأنجم من سهدي غيرانا
الغمده تهجرني والليل يسامرني
تحمل نسيم شذاك ياروحي ما أحلاك
في مشيتك محتار ماقدرت أعرف كيف
ياناير الوجنات جسمك رشيق وخفيف
نتلاقي في الخطوات وتقسم البسمات
تحمل نسيم شذاك ياروحي ما أحلاك
حاير في أمري معاك لا قدرت ألقي وفاك
ولا قادر أنسي هواك
غبت عن انساني ياوحيد الكون السقام مساني
إذا فراقك طال ابقي لا تنساني
غبت عن إنساني وإنت ساكن قلبي وذكرتك في لساني
صابحتني دموعي والسهر ماساني
وعيني بعد فراقك فارقت أوساني
أشكو ليك هواني لو تبطل هجري ونفرتي وسلواني
ديما راغب هجرك شبت قبل أواني
حبك أمرض قلبي وما رجع داواني
ذنبي إيه تسلاني سيب نفورك وأترك طبعك الغزلاني
لما طرفي يشوفك حبك يتوالاني
قل صبري وفي نار العشق خلاني
ياسرور أحزاني كلما زاد شوقك فيك تزيد أوزاني
بي غرام في جمالك و بي الغرام تأذاني
الدعج في عيونك يا حبيبي آذاني
عينك الساحراني تزري عين الشادن والغزال الراني
أمدحك بمحاسنك ياجميل وأراني
شفت كم من شاعر في غناك جاراني
عندي فيك معاني غيري مين يدريها سيبني وحدي أعاني
أسعي لي رؤياك وبالعذاب تسعاني
في إشتياق لي شوفتك والظروف مانعاني



بـدر الحـسن
بدر الحسن فاق القبلو ووراه
بين اجيالو حايز حسن الكون براه
آمن في قراه تعبانين وخاسرين الجارين وراه
القاصد وصالو والعايز يراه
ماطايلين خيالو ومانايلين سماه
مابنطال سماه امتي يجود ويرحم بي ودو ولماه
مالو منع وصالو واختفي في حماه
يانسيم روح واسأل عن سببو الحماه
اسكر من شذاه واطرب من محاسنو وارتاح لي اذاه
بي صدو ونفورو آلامي ورزاه
مهما جازي قلبي اقل عن جزاه
مابجيب من دعاه ولابيرحم فؤادي الحتي الطير نعاه
بي نيرانو عذب قلبي ومارعاه
مابنفع بلاه وكيف اعمل معاه
يانع في نداه وقايم بالمحاسن من اول بداه
دمع الهجر رافع خبرو ومبتداه
ضيع عمري ظلماً فلتسلم يداه

يـخـجـل البـدر ويـخـمـد المـصـباح
ياليـل هـات لينا صـباح
أنحنا كل صباح نبني في الآمال ما وجدنا رباح
سـرنا المكتوم بالدموع إنباح
والسهاد أصـبح لينا أمرو مباح
القلوب ترتاح للكمال التام في الكمال نرتاح
أصلو زول لكن صورو الفتاح
من سلاف الروح محنة للملتاح
الجمال شراح للصدور لكن للقلوب جراح
قالو أهل الحب في الزمان الراح
نشوة الأشواق أحلي من الراح
النسيم لو فاح يمتزج بزلال دمعنا السفاح
كم عشوق مهجور مضي بالاصفاح
عينو في الورد وروحو في التفاح
ياهوي الأرواح إنت للعشاق كالشذي الفواح
عطر الدنيا وأملأ الأسواح
يزهو بيك الكون في غدو و رواح

أسعد الأيام للرائع الراحل المقيم الشاعر/ عبدالرحمن الريح
أسعد الأيام
مر بي في عام
شفت فيه حبيب كالربيع بسام
أسعد الأيام أشرقت شمسو
بالسعادة وراق وإبتسم صبحو
تلهم الإنسان حسنو في نفسو
قلنا فيه كلام كل حب وغرام
تلاقي فيهو نصيب والفراق اقسام
شفت فيهو حبيب مالو لو جاني
وفي سكون الليل طيفو ناجاني
أو عذاب قيثار حبو أشجاني
يهدي لي أنغام تسمو بالأحلام
تلهب الفنان روعة الإلهام
الجمال في سحر الوجود ضافي
والعلي معلوم ليس بالخافي
وإنت سر حبي وبلسمي الشافي
المودة مُدام والتجافي حرام
في جفا ال
أحباب لذة الآلام
الرجوع الى أعلى الصفحة اذهب الى الأسفل
بشرى مبارك




عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام

من أغانيات الزمن الجمـــيل Empty
مُساهمةموضوع: رد: من أغانيات الزمن الجمـــيل   من أغانيات الزمن الجمـــيل I_icon_minitimeالثلاثاء 16 أكتوبر - 1:25

لك الشكر الجزيل والتحايا وواصل كفاحك وزيدنا يا الحبوب
الرجوع الى أعلى الصفحة اذهب الى الأسفل
http://mubark59@hotmail.com
 
من أغانيات الزمن الجمـــيل
الرجوع الى أعلى الصفحة 
صفحة 1 من اصل 1
 مواضيع مماثلة
-
» رومانسية من الزمن الجميل ... إبحــار في ذاكرة الزمن الجمل
» عريس بلا عيوب
» خطرفات في الزمن الكتاحة
» مرحب بالاخ الرشيد الزين فى الزمن الضايع !!!!!
» يا مصعب الطيب من اللذي يتغير الزمن ام قلوب البشر ؟

صلاحيات هذا المنتدى:لاتستطيع الرد على المواضيع في هذا المنتدى
منتديات ابناء السقاى :: منتدى الشعر والخواطر والقصص-
انتقل الى: