الشاعرة:سعادة عبدالرحمن
أتنين كان ختنك
أتنين كان ختنك في المحن ما تبالي
رفقة دون وأطماع النفس في المال
ترديك في الهوان وان كان مقامك عالي
والاثنين خصم من صالح الأعمال
واثنين لا تصغر نفسك أتحاشاها
سيرة الناس وان كان الخشوم لايكاها
الموقد لو نار يوم بكره بتوطاها
والجابلك خبار الناس اكيد وداها
والجرح المنوسر ما بتطيبو الكيه
وما برد حشا المحروقه قولة أحيا
الا القول بطيب خاطر المأذيه
باعك واشتراك زولا غفرلك سيه
والتجي من بعيد قسمتنا نتلقاها
حاره الشينه من الليك كان سواها
لا بتقدر تصل حداً تلزمو ياها
لا بداوي الزمن جرحك ولا بتنساها
والما ساترو الله كضبت ما بتسترو
الزول ان ختيت فيه المروه اخترو
الضفر ان نقح صح البدن في بترو
دربك أعوج إن قبلك كبارك عتروا
واحذر وش منافق بي بشاشه يقلدك
وحين تديو قفاك بي سوط لسانو يجلدك
ما تأمن عدوك ما حك ضفرك جلدك
نسبك للوراك صحيح أبوك الولدك
والليك إن عدوك بتختو في ود عينك
والناس ما تياب كيفنها اصابعينك
مهما انت بازل ما بتسدد دينك
ترجع لي مراحا العرجا والله يعينك
وزول ملكتو امرك كان غلط ما تلومو
وما تعشم صغير بيك يكبر كومو
الزول الصميم بي حكمه داوي همومو
ما تستنا لي قسم اليقوم من نومو
موضوع: اتنين كان ختنك 
الخميس 21 يوليو - 21:56
