المنتدى الجامع لأبناء السقاى الكبرى
|
| | | أنا ....أنا بكرهك والشاعرة نضال حسن الحاج |  |
| | | كاتب الموضوع | رسالة |
|---|
بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
 |  موضوع: أنا ....أنا بكرهك والشاعرة نضال حسن الحاج  الأربعاء 29 يونيو - 7:15 | |
| بكرهك
بس بكرهك ده انا بكره اليوم الصنع قلباً
يكورك ويندهك
انا بكره الوطن البلم شرف الغرام المنتهك
من ياتوا باب طليت على؟ ما كنت اصلا بشبهك
انا بكرهك
انا شيلته ريدك فى القليب وسقيته من دم العروق
صنقعته دليت النجم دنقرته كبيت نور وشوق
وعصرته موية الانتظار ختيته فى وجع الحروق
كان النتيجة تبيع هواى واريتو كان سويتلوا سوق
انا بكرهك
من وين اجيب ليك الدموع من وين اصنقر حيل
كلام امنيات قلبه الرجوع من وين اذا هتك الظلام
حيل خيلى القالك شموع لكنى مجبور اطردك
واقفل وراك باب الطلوع
انا بكرهك
شديت رحالاتى ومشيت وقتين هتك حيلك هواى
ارتحته فى موجى ورسيت لا حرك الموج البحر
لا صد قلبى ولا قسيت لكن طلعته خيال عشم
ضمخ رؤى الوجع المميت
انا بكرهك
قدر اشتهاى انا بكرهك قدر الغرام الكان زمان
كابت مساماتى وهواى انا بكرهك
قدر انى ما لوثته بيك كريات شرايينى ودماى
انا بكرهك
قدر انى غنيتك غناى
من وين دخلته على مدن شاخت من الوجع الاليم
من وين طرقته جدار قلب لقح هوى العشق العقيم
من وين سخت شمسك على كانت سماى مليانه غيم
فتق جراحاتى وامش خلينى فى لهب الجحيم
انا قلت ليك
انا بكرهك
قدر المواسم الشاده خيل الريد عليك
انا بكرهك
قدر المصايب الحارسة بوابات مجيك
انا بكرهك
نفس المسافة وحجم قلبى الكان تملى بيشتهيك
بقى بكرهك
اتوكل ارحل منى فوت حرمان على قلمى
الكلام كان غيرك اجتاحو السكوت
خليهو قلبى الاندفن تنسج عليه العنكبوت او
خلى من بعدك اموت
الموت اخير من انى افضل فى رحابك وفى رجاك
انا كنت لو غاب القمر دايما بضوى ظلام دناك
وانا كنت لو غيمك رحل بطلع عشان اسكن سماك
وانا كنت لو بردك نزل بوقد صوابعى لهب حداك
لكن منو القدر كده؟؟؟
والله لو انا فى محلك بنسج الشمس احترام واهديها
ليك متمدده
بفتح كراريس الكلام واختار حروفى واجرده
وبنبش قبور المستحيل كلمات شكر متفرده
لكن خسارة على قلب حباك بلا مايعرفك
انعل ابو القلم العلى دفتر غناك دمه انسفك
انعل ابو الشعر الغشانى وغنى فيك وألفك
ملعون غناى كان ما امتطيت خيلى وبقيت اتأسفك
بتأسفك وقتين عيونى يسوقن الشوق لانتظارك
لما ليلى يسوق محاسنه وينهزم عندك نهارك
لما ما ابكى انهزامى عشان ابارك انتصارك
لما كوكبى ساب مداروا ورحل عشان يسكن مدارك
كنت مالي زمان ومالك
لكن وحاتك بكرهك
ندمان على عمراً معاك ضيعتوا فى غفلة زمن
ندمان على دمعاً سكبتو على رضاك بلا تمن
انا كنت بحلم فى وجودك ينكسر خاطر الشجن
لكن رضاى عليك عشم ابليس قصاد جنة عدن
انا بكرهك
كل ما يطول ليلى ويواتيهو العذاب
انا بكرهك
كل ما القلم يركب مصاعب الدنيا يمشى على الكتاب
انا بكرهك
كل ما الفراق كتل مضامين العشق سدالو باب
انا بكرهك
عدل سابقا من قبل بشرى مبارك في الأربعاء 29 يونيو - 7:22 عدل 1 مرات | |
|  | | بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
| | موضوع: رد: أنا ....أنا بكرهك والشاعرة نضال حسن الحاج الأربعاء 29 يونيو - 7:20 | |
| انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو؟؟
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسيبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤالانا ابكرهك
عدد الشعر ما سنّ سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك
مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
على كل حال
انا بكرهك
| |
| | | | بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
| | موضوع: رد: أنا ....أنا بكرهك والشاعرة نضال حسن الحاج الأربعاء 29 يونيو - 7:23 | |
| | |
| | | | بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
| | موضوع: رد: أنا ....أنا بكرهك والشاعرة نضال حسن الحاج الأربعاء 29 يونيو - 7:34 | |
| رد الشاعر رحيل عثمان علي الرائعة نضال حسن الحاج
ليه تكرهي ؟
ليه تكرهي القلب البنادي علي غريبا ماهو في؟
ليه تكرهي الوطن الجمع اشلاء غراما منتهي؟
ليه تكرهي القلب النبض بي حبو قلبك من سنين؟
ليه تفتحي الباب للدموع؟
ليه تزرعي الشوك في ارض كانت تضم الياسمين؟
شبهك قليل,,, ياشامخه زي قمم الجبال
ياحلوه زي زهر الربيع ،،،،،، ياساطعه زي شمس الضحى
يالوحه ضاجه حياه وشعور,,, ياحقيقه اروع من خيال
ياسامقه زي شجر النخيل
ليه تكرهي؟
مشكلتك الروح التفتش ديمه لي قلبا امين
لكن خساره بقي الامان حلما سراب مدسي مابين نور وطين
ليه تكرهي؟
كل الزهر حزنان عليك
حتي البحر لاقاني بي حزن السنين
فاضت دموعو عذاب وهم ,,,زعلان شديد معقوله انتي بتكرهي ؟
ماانتي جمعتي النجم اجمل عقود من الوفا
نورتي دربا بي شموع,,, قلبك وحاتك مابيعرف يوم جفا
بس اسمعي : الريده صبحت مستحيل
والعشقو من قدم السنين ياكان مصيرهم للجنون
او طعنه في جوه القلب جرحت فؤادم والحنين
ليه تكرهي؟
دمعك نشف من طول سهادك والنواح
نضمك كمل من شعرك المنسوج الم علي ماضي كان مليان جراح
شمعك طفا,,,نجمك افل ,,, نورك رحل
سجن الغرام مابشبهك
حتي الكره مابشبهك
ليه تكرهى؟
طردك مباح ,,, هجرك مباح
قفلك وراو باب الضلوع ,,, كان قلتي طفيت الشموع
كان قلتي خليت القصيد ,,, او قلتي من بعدو العشق حرمان اكيد
ليه تكرهي؟
كان اشتهاك شوق البلد للنسمه في عز الهجير
كان اشتهاك بسمة طفل بتبدد الليل الطويل
كان اشتهاك غنوة فرح بتودي للزمن الجميل
ليه تكرهي؟
كريات دماك ما اتلوثت بس زادت الحد في الغرام
عشقك جميل ,,, ماانتي علمتي الهيام
ليه تكرهي؟
زولك عرف انو القلب مفتاحو كلمه وكلمتين
خبط علي باب القلب وبدون اذن اتحكر العشق اللعين
غيمك شمس مليانه ضو,,, وشمسو من كتر الخداع دايما بتغرب مرتين
لازم جراحك تندمل ,,,لازم ضلامك يبقي ضو
لازم صحاريك تبقي نيل
ليه تكرهي؟
خيل ريدك اجتازت قصور ,,,دكت قلاع,,,دكت حصون
لكن اذا خيلك كبت ماتاسفي ,,,ماالكبوه من طبع الخيول
بس اوعي تلدغي مرتين
ليه تكرهي؟
لمن عشق قلبك سما,,,بقي طير يرفرف في السما
ليه تحبسي الطير في قفص مصنوع من الهم والانين
ليه تكرهي؟
ليه تحرمي القلم الكلام ؟
خليهو يكتب في الملام ,,,او مره يقريهو السلام
اوحتي يتزكر حنينك والهيام
بس ياملاك ماتكرهي
خلي الشمس تدخل تطل تطرد نسيج العنكبوت
خلي القمر يقعد حداك,,,خلي الحزن يرحل يفوت
ماتاسفي
لوكنتي في كونو القمر ,,ضوو انطفا
لوكنتي في دنياه غيم شمس الهجير حرقت دناو
لوكنتي في عز البرد نار اّنسك واوحشة الليل الطويل
علي زول وحيد ماليهو هم,, وفي ايدو قيد
ليه تكرهي؟
مسكين اذا ماقدرك,,,غبيان اذا ماقدرك
مابكفي لو شال الشمس واهداها ليك في يوم مطير
مابكفي لونسج الحروف بي رقه زي صوت الخرير
مابكفي لو شكرك الف,,,مابكفي لو صاد النجوم في كل ليل
مابكفي لو مسك السما ,,, اوحتي مسكك العبير
قلمك اسير في وقعة العشق المحال
شعرك جريح مابين حقيقه وبين خيال
وغناك اسير مابين مؤكد واحتمال
ليه تاسفي؟
ماتاسفي لو في عيونك شوقو بات لابد من يصبح صباح
ماتاسفي لوليلك المهموم وقف في بابو منتظر السماح
لابد من من فرحا يطل ويلبسك اجمل وشاح
لابد من زمنا يجي يسقيهو سم,,, يسقيك راح
لابد من حزنا يفتق في قليبو المات زمان كل الجراح | |
| | | | بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
| | موضوع: رد: أنا ....أنا بكرهك والشاعرة نضال حسن الحاج الأربعاء 29 يونيو - 7:35 | |
| تابع للرد
ليه تاسفي؟
ليه تكرهي؟
ماتندمي قدامك المشوار طويل
فيهو الكعب,,,فيهو العديل
فيهو الاجاج والسلسبيل
فيهو العشر,,,فيهو النخيل
ماتندمي لودمعك اتساقط مطر
او حلمك اتبدل شجن
او حبو من دنياك رحل
اوحتي فارقك السحاب خلاك في عز الهجير
لو طل ليلك بالعذاب قرب خلاص فجر الهنا
لو قلمك اتفجر الم ,,,اوحتي من دمعك اخد
اوحتي من دمك اخد,,,اوحتي من روحك اخد
قرب خلاص فرحك دنا
لو حتي طالت فرقتك كتلت معاني الريده فيك
روح خلاص زمن الانين ,,,ورجعتي لي زمن الغنا
ماتبكي ,,,يكفيكي الحداد,,,اتوضي بي موية الصبر
ماتبكي ,,,يكفيكي الحداد,,,قلبك كفاو اتملي فوق نار الجمر
ليه تكرهي؟
املي الصحاري ورود وحب ,,,ماتكرهي
رغم احتمالات العذاب ,,,ماتكرهي
رغم الحقايق المره في دنيا السراب,,,ماتكرهي
رغم الشنا ,,,رغم الكذب ,,رغم الضباب ,,,ماتكرهي
رغم الحنان الانفقد في دنيا مابتعرف إياب ,,,ماتكرهي
بالرغم من كل السؤالات البقت من غير جواب,,,ماتكرهي
بالرغم من انو العشق اصبح خراب ,,, ماتكرهي
بالرغم من صوتنا الصرخ يازول تعال,,,ارجع تعال ,,,لاجانا زولنا ولاصدي,,, ماتكرهى
حالك عديل بس همو دابو الليله طال
علي كل حال ما تكرهي | |
| | | | | | أنا ....أنا بكرهك والشاعرة نضال حسن الحاج | |
|
مواضيع مماثلة |  |
|
| | صلاحيات هذا المنتدى: | لاتستطيع الرد على المواضيع في هذا المنتدى
| |
| |
| |
|
