منى سلمان والقسمة بتضحك على الصُفاح من الرآى العام

«هي في خشمك ومقسومة لي غيرك» مثل يؤكد أن ما هو ليس من نصيبك فلا يمكنك حيازته كلقمة الطعام تكون داخل فمك فتسقط منه ليأكلها قط أو كلب أو حتى جدادة جيعانة، وفي الزواج يقولون (القسمة بتضحك على الصفاح)، فقد يوافق الأهل وتكتمل الترتيبات لعقد زيجة ولكن تتدخل الأقدار لإفشال الأمر ولا يكون للمتضرر حيلة سوى الغناء مع محمد أحمد عوض:
والله القسمة ما معروفة .. لي وليك كانت خافية
يدوم سعدك مع غيري .. وتملى شبابك العافية
فللقسمة والنصيب دور البطولة في ترتيب الزيجات على مسرح الحياة، بصورة احيانا تتجاوز حد التصديق، كما في حكايتنا عندما تم تبديل العريس مرة واحدة!!
كما في عادات الأسر السودانية، كانت (نعمات بت عبد العزيز) هي بكر والديها ولذلك ومنذ نعومة أظافرها اتخذت موقعها في المطبخ كمساعدة لأمها على مواجهة أعباء الأشغال المنزلية، ومع تقدم السنوات وتزايد الاعباء على الوالدة بكثرة العيال، صارت (نعمات) هي المسئولة عن انجاز الكثير من التكاليف ومعاونة امها، وعند بلوغها مبلغ الزواج تقدم لخطبتها ابن عمها من البلد، وفي يوم الخطبة قال والدها لشقيقة (قاسم) والد العريس المنتظر:
طبعا انت عارف يا قاسم أخوي .. وقالوا العارف لا يعرف .. نعمات دي ياها الماسكة البيت مع أمها بتشيل وتخت معاها اليد باليد.
قال قاسم: طبعا عارف .. ربنا يدي حاجة آمنة العافية ويعينا..
قال عبد العزيز: إن شاء الله.. لكن أنا عندي شرط يا أخوي دايرك تقبلوا مني.
قاسم: قول ..إن شاء الله خير.
عبد العزيز: شرطي معاك .. إن الله تم الزواج .. نعمات دي ما ترحِلوها من أمها .. أصلو البيت ما ببقى بلاها .. وتراهو حسن شغال هنا قريب مننا.
قاسم: مافي عوجة تب ان شاء الله يقعدوا معاك هنا .. وحسن ياهو ولدك قبال ما يكون ولدي .. ماعندنا مشكلة اصلو بكر امها ما برحلوها..
اكتملت الترتيبات وتم تحديد يوم الزواج، ولكن ما لم يكن يعلمه (عبد العزيز) هو أن شقيقه (قاسم) قد (لحس) وعده له بعدم ترحيل (نعمات) فبعد عودته للبلد وإخباره لزوجته (رقية) بما كان من اتفاقه مع أخيه، ثارت عليه وقالت:
مالك بتجدع ولدك .. خلاص أنت قنعان منو عشان تخليهو يسكّن مرتو في الخرطوم؟
قاسم: قصدك شنو ما فاهم؟
قالت: إن قعد مع مرتو هناك تاني عينا دي ما بتشوفوا إلا من السنة للسنة .. لكن أن جابا معانا هنا .. ياهو البمشي ويجي فينا كل خميس وجمعة عشان يشوف أولادو.
اتفق الزوجان على عدم إخبار (عبد العزيز) بنكوصهم عن الاتفاق ووضعه أمام الأمر الواقع بعد إتمام الزواج بترحيل (نعمات) معهم في البلد.
جاءت السيرة من البلد وعم الفرح وتعالت الزغاريد وبعد إكرام الضيوف بالغداء حضر المأذون وجلسوا للعقد، وأثناء جلوسهم تحدث أحد أخوان العريس عن بيت العرسان الجهزوه في البلد ! تساءل (عبد العزيز) عن معنى ذلك فلم يجد (قاسم) بداً من إخباره بأن أم العريس أصرت على ترحيل عروسة ابنها للبلد، تعالى الشجار بين الشقيقين لينفض مجلس العقد فـ (نعمات) لا تستطيع أن تترك أمها مهما كانت الظروف .. وما كان أوله شرط فآخره يجب ان يتم في نور الوفاء به.
انتقل الخلاف للداخل فغادرت (رقية) أم العريس غاضبة لتنبري خالة العروس وشقيقة (آمنة) لتنقذ الموقف قائلة:
نعمات ماها البايرة البفتشوا ليها العريس .. إن فاتا ود العم .. ود خالتا جاهز وداير يشيلا في عيونو.
وفي آخر المساء زفت نعمات لعريسها الذي تم استبداله من ابن العم لابن خالتها على طريقة (عروسة تفتش ليها وعروسة تجيك لي عندك).

أضف تعليقك طباعة الموضوع أرسل الموضوع
(قراءة: 793 تعليق: 14 طباعة: 18 إرسال: 0)
التعليقات

--------------------------------------------------------------------------------

1/ Eiman - (sudan) - 23/12/2010
نفسي أعرف بتجيبي الكلام البسيط والفي محلو دا من وين ؟

--------------------------------------------------------------------------------

2/ ود عطبره وحفيد مهيره - (جده) - 23/12/2010
قاسم الاضينه

--------------------------------------------------------------------------------

3/ بشرى مبارك إدريس - (بريطانيا..... برمنجهام) - 23/12/2010
الاستاذة منى سلمان .......الله يسلّمك الشكر أولاً بلا حدود على الشرح التفصيلى لهذا المثل والذى سمعته أكثر من 200مرة من الطالب شرطة خفيف الظل كثير الهرج والضحك وقتها عزالدين عبدالمحمود عند دخولنا كلية الشرطة فى أول يناير من العام 1980م والاخ اللواء شرطة دكتور عزالدين عبدالمحمود لم أقابلة منذ 19 سنه رغم أنه بالخرطوم لم يغادرها على ما أعتقد فالتحية للاخ عزالدين عبدالمحمود. كان عزالدين كلما يحصل موقف فيهو زول طارت منو حاجة مضمونة ألا ويقول ليهو والله (القسمة تضحك على الصُفاح ) أنا شخصياً كنت أفهم 80% من المعنى ومنذ ذلك التأريخ وأنا أبحث عن المعنى الحقيقى حتى وجدته اليوم فمنى سلمان بارك الله فيها وزادها ثقافة شعبية وأمثال دارجية لاتكتفى بإضحاكنا فى زمن (الدبرسة والكدر السياسى والاجتماعى والاقتصادى) بل وتشغلنا بالضحك والانبساط والتعليق و تزيدنا ثقافة فأسال الله أن يعطيها الفى مرادة وبالزيادة نجاح للابناء وتفاهم مع أبوالعيال وبحبحة فى المال وسكنه جوار جبرة فى بيت المال بيت (ملك من طابقين وعربية بى مفتاحيين) آمييين

--------------------------------------------------------------------------------

4/ علي عبدالله ادريس العجب - (السعودية - الرياض) - 23/12/2010
الأخت / منى - لك تحياتي - الزواج فعلا قسمة ونصيب - لكن كمان تغييب العريس الأول و الثاني والعروس عن مسرح الدراما - شئ غير منطقي ومتين ود خالتها قال عايزا - ولا امورنا كلها بقت كلفته في كلفته - ثم العروسة - والله دي بقت زي سيارة الهايلكس - بيعتها تتربط مع واحد - ويتدخلوا السماسرة ويفركشوا البيعة من الزبون الاول عشان التاني دفع كويس - وبعدين وين الحب والعواطف والرغبة - واقول للآباء انتبهوا ومافي داعي للشروط !!!

--------------------------------------------------------------------------------

5/ العقاد - (السودان) - 23/12/2010
لك التحية على مقالاتك الرائعة وانا من المداومين على متابعتها .فعلا القسمة مامعروفة ياما ناس عقد قرانهم واطلقوا وقسمتهم بقت مع ناس تانين ففعلا صدق المثل (الفسمة مابالايد).

--------------------------------------------------------------------------------

6/ مجدي عوض الكريم - (السعودية) - 23/12/2010
ما عشان كده بنحب من بلدنا ما من برّه البلد ...لا رحول ولا يحزنون .

--------------------------------------------------------------------------------

7/ د.مشعل - (دنقلا) - 23/12/2010
مرزق ود خالتا ده....مشكورة يا استاذة مقالك رائع

--------------------------------------------------------------------------------

8/ شاكوش - (السعوديه) - 23/12/2010
بت سليمان والله قاصدانى عدييييييييييييييييييل كده

--------------------------------------------------------------------------------

9/ معجبة بمقالاتك - (السودان ) - 23/12/2010
والله صحي الزواج قسمة ونصيب

--------------------------------------------------------------------------------

10/ ود السايح البادرابي - (الرياض) - 23/12/2010
هي يالزينين رجعتي لينا لي كلام الحريم والله حديثك في محلو علا فيهو نبرة الحريم حفظك الله

--------------------------------------------------------------------------------

11/ faisal bala - (roma) - 23/12/2010
الله يديك العافيه يابت سليمان لكن الظاهر عليك مدردحه ومقلقصه وشلتي حركات المصريين القريتي معاهم ديل الله يكون في عون بعلك مره ما بتتغش شفاته ياود بمبه

--------------------------------------------------------------------------------

12/ عادل خوجلى - (السعودية الرياض) - 23/12/2010
الخت منى كل سنة وانت طيبة بمناسبة العام الجديد وما اجمل كتاباتك التى صارت لنا الملجا الوحيد من قرف السياسة واحباطها اليومى وكل ما نرجوه منك ان يوفقك الله فى جمع ما كتبتيه وتكتبيه فى كتيب لتطلع علىه الاجيال حتى يتربو ا على القيم النبيلة والكلمات السودانية الحلوة التي كادت ان تندثروالاخ السمؤل وزير الثقافة ما بقصر معاك فقد عاصرناه فى مصر نعم الاخ المعين ..

--------------------------------------------------------------------------------

13/ مها عبد الرحيم - (المركز القومي للبحوث) - 23/12/2010
بيقولو الرجل كلمه يعنى بالدارجى كدا بيربطوه من لسانه بس عمى قاسم طلع ما عنو كلمه وطفش من ولدو عروس بيحلفو بيها امها وابوها يعنى فى النهايه القسمه والنصيب احنا عندنا يد فيها ولو عمى فاسم وامنا حواء زوجته خلت الحال على ما هو عليه ايمكن كان جات من غيرهم ما منهم يعنى لو صب القاتل على المقتول كان مات براهو

--------------------------------------------------------------------------------

14/ طارق اليعقوبى - (الامارات) - 23/12/2010
اها خلاص انتهت على كدة !!!!

» منى سلمان وتنملحى جربا (من الرآى العام )
» لسع صغيرة فى سنى ومنى سلمان من الرآى العام
» سكانى لكن ما عضانى ومنى سلمان من الرآى العام
» الموت إكراماً ومنى سلمان من الرآى العام
» منى سلمان وصحيتى فى نفسى الوجود من الرآى العام !!