كمونية حاجة سعدية (موقع النيمة )

ارسل: الاربعاء ابريل 01, 2009 9:57 am موضوع الرسالة: حاجه سعدية

--------------------------------------------------------------------------------

ما مشيت لى حاجه (سعدية) ؟
- مالا عندها شنو ؟
- مش وقعت من (الركشة) وإتظلطت و(خيطو) ليها راسا تلاته (غرز) ؟
حوار عادى يمكن أن يحدث بين أى زوجين ... زوجه تخبر زوجها بأن جارتهم ترقد مريضة إثر حادث تعرضت له ، طيب أيه الغريب فى الموضوع ؟ أقول ليكم ... الغريب فى الموضوع أن زوجتى العزيزة كانت تخبرنى بهذا الحادث الذى تعرضت له (حاجه سعدية) وهى غارقة فى (الضحك) !!
- بتضحكى مالك ؟ ده هسه موضوع يضحك؟
- خلينى كدى أحكى ليكا وبعدين إنتا براك ح تعرف
وبعد أن أخبرتنى (حرمنا المصون) بالقصة لم أتمالك نفسى وإنفجرت فى نوبه من الضحك المتواصل كما (أتوقع أن يحدث لك ذلك عزيزى القارئ) وإليك القصة :
بعد أن إكتمل عدد المشتركات فى الصندوق (الماسكاهو حاجه سعدية) قررت أن تذهب لتسليمه إلى صاحبة (الصرفة الأولى) فقامت بوضع (القريشات) فى (كيس نايلون أسود) ولفها بعناية حتى لا يستبين ما بداخلها ثم أوقفت (ركشة)
- ماشه وين يا حاجة؟
- ماشه ليا يا ولدى لى ناس زيارة قدام محطة (جامسكا) فى الثورة !
وإنطلق سائق الركشة وهو مندمج مع الأغنية التى يبثها (المسجل) بصوت عال وأخذ شارعاً جانبيا ثم آخر حتى صار بعيداً عن شارع الظلط الذى من المفترض أن يسلكه مما حدا بحاجة سعدية أن تقول له :
- يا ولدى إنت ماشى بى وين؟ أنا بى هنا ما بعرف السكة !
- يا حاجه إنتى مش ماشه (جامسكا) ؟ أنا خلاص بوصلك !
إستمر سائق الركشة فترة من الوقت (يدخل بى زقاق ويطلع بى زقاق تانى) حتى توقف أمام أحد المنازل وقام بالضغط على البورى ففتح باب المنزل (3 ضلف) لتدخل الركشة وبداخلها (الحاجة سعدية) ! التى تفاجأت بوجود عدد من (الشباب) يلتفون حولها تفوح منهم رائحة (الخمر) و(الدخان) :
- يا وليداتى أنا (مرا كبيره) عاوزين منى شنو؟
- (مشيراً إلى طشت كبير) : ما عاوزين منك شئ يا حاجه بس نضفى لينا (الكمونية) دى !
كان الطشت (مليان لى عينو) بالمصارين و(الكرشة) و(العفشة) ، وضعت (حاجه سعدية) الطشت أمام (الماسورة) وهاك يا (نضافة) ، على الرغم من أن كمية (الكمونية) التى فى الطشت من الواضح انها لأكثر من (بهيمة) إلا أن (مهارة) حاجه سعدية قد ساعدتها فى إنجاز المهمة فى وقت قياسى مقداره ساعتان بالتمام والكمال !
- (وهى تستعدل ثوبها) أها يا وليداتى رجعونى حتتى !
- (أحدهم يناولها كيس أسود) : يا حاجه معقولة تفكينا (عكس الهوا ) كده وتمشى؟ يعنى (الكمونية) دى ناكلا (نيه) ؟
قامت حاجه سعدية بفتح الكيس الذى يحتوى على (الفحم والبصل والصلصة والبهارات) ، جلست على (البنبر) المتآكل من جديد ، (ولعت نارا) وبدأت فى (حش البصل) ثم (دق التوم) والفلفل
- أها يا وليداتى ... لى (الصلصة) كبيتا ليكم فيها ... خلاس ودونى لى اهلى الواطه (فللت) !
- خلاس يا حاجه تعالى أركبى نوصلك
على مشارف الحى قام سائق الركشة بإنزال (حاجه سعدية) التى إتجهت صوب منزلها بينما انطلق (السائق) عائداً إلى ( شلته)
- مالك يا حاجه إتأخرتى وجايه (فترانه) كده ؟
- كيفن ما اجى فترانه وتعبانه ؟ ومنضفه (كمونيت) الدنيا والعالمين !!
- أجى (كمونيت) شنو ياحاجة ما قلتى ماشة تودى قروش (الصندوق) الوداك للكمونيات شنو ؟
وبعد أن قامت حاجه سعدية بسرد (الحكاية) وسط دهشة الحاضرين خاطبتها حفيدتها (الطالبة) قائلة :
- والله يا حبوبه بركه البقت على (الكمونية) مع الحاجات البنقراها فى الجائد دى !
لما كان من الضرورى تسليم مبلغ (الختة) لصاحبتها فقد قامت (حاجه سعدية) بإرتداء ملابسها فى عصر اليوم التالى ثم قامت بوضع (القريشات) فى (كيس نايلون أسود) لفته بعناية حتى لا يستبين ما بداخله ثم أوقفت (ركشة)
- ماشه وين يا حاجة؟
- ماشه ليا يا ولدى لى ناس زيارة قدام محطة (جامسكا) فى الثورة !
وإنطلق سائق الركشة بالشارع الرئيسى الذى بعد أن تحرك قليلا وجده مغلقاً فى منتصفه بسبب بعض الإصلاحات فإضطر إلى أن ياخذ شارعاً جانبيا ثم آخر وعندما إنتبهت (حاجه سعدية) إنو (الشوارع ما ياها) قذفت بنفسها من الركشة وهى تصيح :
- وحات الله ما بقدر على الكمونية تااانى !!

ود ادريس اديك العافية
وقصة مضحكة حقيقة وانت عارف الحاجة دي كان ما تلبت من الرقشة كنت انا قمت رميتها منها اصلو ما ممكن كمونية تااااااااااااااااااااااااااااااااااااااني.
وعلى طاري الكمونية عندكم كمونية في المانيا ولا نرسل لكم كمونية من الرياض خروف سواكني 100%.
وبعدين سألتنا عن معرفة الشاعر من ابيات قصيدته ونسيتنا ما داير تدينا هديتنا ولا شنو نحن ما ردينا زمان يا جنابو وما في محامي بياكلوا حقو.

حقك مابروح يا أستاذ (يا ودالطيب ) لكن عايز أكثر من إجابة ولأريد أن أكشف عن المسابقة ويوم 10.4 من هذا الشهر سوف نعلن الفايز . أمّا الكمونية والله العذابى السكن معاى بعد سفر الاولاد علمنى ليها لكن بتاعة الرياض الكاربة دى مابفوتة وعقبال أجيكم فى الرياض وأطلبها من حرمكم وأم عيالك وتحياتى لها وأرجو أن لاتكون تشكى من (مشاركاتك ) عندما تطول الغتسة فى المنتدى .

عدد المساهمات : 134 تاريخ التسجيل : 04/03/2009

والله القصة جد مضحكة اديك العافية والله المنتدى من غيرك ____ ______ _______ ولاحاجة
دمت بخير

لكم الشكر على التعليق أخوانى ودالطيب وأختى نوال محمد وطبعاً المنتدى أنتو وأنا وجميع الحاضرين خاصة من يحضرون التمام الصباحى أو تمام الظهر أو العصر أو التمام المسائى أو التمام (المفاجىء) وعلى العموم المنتدى يحلو بتعليقاتكم فأرجو أن لاتحرمونا الطلة وماتقولو (مسخت خلق الله ):
والله طلتكم تفرّح يلا خلونا أنصرّح
زيدوا فى الاسطر كتابة جد تفرّح

الاخ الاستاذ ود الطيب والبقية بخصوص المسابقة الخاصة بمعرفة الشاعر من خلال بيت الشعر والله فتشت البوست أصلى ماليقيتو (الكُبر مادخل ) المهم أنا بديكم خيارات وأحتفظ لك بحق أنك أكثر الاخوان قرباً من الاجابة أذا أستبعدنا محاولتك الاخيرة الفاشلة بتاعة الحرجل ولكن أنت جبت البيت وهو فى طمبرة وطابت فى مدنى ناس شنكل :
الخيارات والتى تجعل الهدية (عطية مُزيّن )
1 . لوجود زميلنا من أبناء مدنى وهو صلاح بابكر عيسى شنكل ( وهو من مواليد بريطانيا لندن )
2 . لوجود زميلنا عبد العظيم شنكل ( مدير شرطة الجوازات بمدنى برتبة العميد شرطة )
3 . لوجود زميلنا إبن مدنى محمد عبد الحميد شنكل ( مدير شرطة المرور السريع وهو صديق الاخ عباس الطيب يوسف )
أى شخص عندو فرصة واحدة فقط

» نكات نقلاً من موقع النيمة
» محن عاصم إبن الدكتور شرف الدين الطيب طبيب المريخ عليه الرحمة
» هذا التصرف لايشبة الكابتن هيثم مصطفى (موضوع قديم !!!!!)
» رحبوا معى بالاستاذ بهاء الدين مضوى المحامى (نقلاً من موقع النيمة )
» الاخ فهمى عبد العزيز ينقل الفصة من صاحبتها شخصياً (موقع النيمة)