حكم الهنا

التحية للخال بشري والي جميع الاعضاء ومطالبة مني الي الخال بشري بان يسرد لنا قصة طرد الحكم في احدي التمارين القوية والتي انحاز فيها الحكم الي تيم التازي علما بان الحكم كان احد المقربين الي بشري ومن هنا يبعث لك الزميل والاخ المضاد لك في التمارين التازي بالتحايا وبقول ليك كان لقينا لينا سوط نيمة من النوع بتاعك لي ناس هيثم مصطفي كانت الدخاخين نزلت حبة ...

يا دحدوح (ما عذبتنا !!) على وزن خلف الله ما عذبتنا والله يا دحدوح بقيت كل ما أشوف إسمك قبال ما أفتح الموضوع أقول أسع دحدوح يكون عندو طلب من الماضى وأضحك قبل أن أفتح!!!! شكراً لك على عذاباتك الرايعة مثلما ذكر الاخ الكاتب والشاعر سعد الدين أبراهيم عنى فى الرآى العام وقال (جنابو بشرى العكليته معذبنى بالرد اليومى على مواضيعى لكن عذاب ظريف ) فأنت كذلك لكن الموضوع أنا كتبتو زمان فى كم منتدى لكن عشان أفتشو أحسن أكتبو من جديد وبكتبو ليك لكن ما متغدى وما مسوى لى غداء فى البيت ماشى المطعم وعايز أكل (شيش كباب أطلب ليك معاى والله شعبان من سوق قندهار وتحياتى لكل جماعة سوق ليبيا ) بجييك صاد أصبر شويه . كما أرجو أن تحىّ الاخ التازى وقول ليهو قبل ساعة كنت بتحدث معى صاحبك صالح وكفارة ليهو وهوطالع من الطبيب أدانى ضياء الدين مضوى طمنى عليهو ودردشت مع ضياء الدين قلت ليهو قول لى صاحبك صالح ده أكل أكل ساكت يوم الترجى الله يستر عليكم من الغلب !!! أنتو الانتاج الحربى طيش الدورى المصرى ما قدرتو عليهو والمصيبه فى المريخ شباكو دى أتقول (مسكونه بى زول شايل ليهو موس طوالى مشرطة !!!والله يستر من ناس أنيرامو وجماعتو وغايتو أكتر حاجة فرحان ليها أنهم بلعبو قبالنا ونحنا معترفيين بى فريقنا الفته لكن هم يتفاصحو التقول مدرنيين هناك مع الترجى .

الاخ دحدوح رجعنالكم والحمد لله أتغديت وأول حاجه كدى أتناول لى لبانه والله (ريحى بصلى ترمى ) أظنى عشان المدان مافى الزول قدر ما ردم فى البصل ما قلت لا !!! لكن والله المطعم الباكستانى خطييييير أها أتغديت النقوم على التمرين هى !!! أقصد على الحكم والتحكيم .
أذكر فى العام 1988م كان الحدث ودحدوح عمرو ثلاثه سنوات لسع نونو حضرت من العيلفون يوم الخميس وكنت رئيس قسم شرطة العيلفون وأمضواًبان وقتها وعريس ما تميت سنه بعد صلاه الجمهة وزمان كنا بنشيل الود والصوانى والغداء ما زى أسع وفطوركم المع صلاه الجمعة ينتهى والغداء وبرنامجو راح فيها !!أتغدينا وكان التمرين قد خُطط له من الصلاه والتحديات والتازى جهز جماعتو والحكم كان (عمى وخالى ) عصام مضوى إبراهيم وكان حكم معروف فى روابط الجيلى وغيرها ومن زملاء عصام غازى وعبدالحليم فضل الله وتحياتى لهم . بدأ التمرين وكان مسخناً كالعاده مجموعة تشجع بشرى وأخرى تشجع التازى رغم علمى أنهم (تحت تحت ) مع التازى للاستمتاع بسيرتى والتى يحشد لها التازى (فرقه كامله من المديح والغناء والرقيص ويجدها فرصه الاخ عبدالعزيز ليفرغ كل طرداتى له من التمارين أو الاستخفاف بمستواهو المتواضع جداً عندما يضيع هدف مضمون لايضيع من أعمى !! والحال أيضاً ينطبق على خالك عبدالوكيل أنتهى الشوط الاول بتقدم التازى 1.صفر ونال التازى إنذار وبالكرت الاصفر ولاحظنا أن عصام مضوى حتى الكروت عندو!! فى الشوط الثانى ومنذ البدايه كثفنا هجومنا على أمل التعادل والتفكير فى التقدم فيرتكب التازى فاول عادى لايرقى للطرد حتى فى المباريات الرسميه ناهيك عن تمرين يعلم الاخ عصام أن الهظار فيه أكثر من الجد !!ولكن يطرد التازى ويستجيب التازى بسرعة حتى يقول لى لا أعترف بتعادلك فقد خرجت والنتيجة أنا متقدم عليك!!!!! فلم أترك التازى يفكر ولا الحكم فسألت عصام لماذا طردته ؟؟ فقال لى القرار قرارى ورأيت أن أطرده للانذار الاول فحاولت أن أقنعه أن الحكايه تمرين فأصر ولما كانت الصفاره التى يستعملها هى التى أعطيتها له (خاصه بالشرطة) فقلت له لو سمحت عليك يا عصام أدينى الصفاره وأتفضل أطلع وناديت على التازى وقلت ليهو تعال راجع ورجع التازى وواصلنا التمرين حتى أحرزت هدف التعادل وأنتهى التمرين من غير سيره وكانت السيره من نصيب حكم الهنا !!!.
الغريب فى الامر أن عصام مضوى لم يحتج على كلامى ولم أجد تفسيراً لعدم إحتجاجة ولو طردنى فى اللحظة ديك كنت قبلت قرارو ولكن لم يفعل وأعتقد حالفه التوفيق فى قبوله للقرار والذى لم يحتج عليه كل اللاعبيين والمتفرجيين فما رأيك أنت أخى دحدوح ؟؟؟

وحتى أواصل فى الطرده التانية فقد كانت فى تمرين عادى كان المطرود الحكم طلب إدريس وبرضو عمى وخالى والسبب أنو ولع سيجاره أثناء التمرين وهو حكم وطوالى شلت منو الصفارة وطردوا وواصلت التمرين حكم ولاعب !!! تحياتى لحكام الهنا المطرودين وتحياتى لكل البتلاب ولك أخى دحدوح وشنو أنا أحكى براى أوعه تقول لى الفاشل جداً جداً مجدى محمد عبيدالله قاعد معاكم الان قول ليهو والله فشلك يكتبوا فيهو ديوان شعر مش مسدار زى الكتبتو أهجى فيك فى منتدى البركل !! .

تسلم الخال بشري علي هذه القصص الممتعة جدا والزكريات الجميلة وكفارة للخال الصويلح

» رحله بين طيات السحاب !!!!!! وحدنا ومين زينا !!هلال الهنا