حاتجييك من وين الرفاهية ؟؟؟

منذ أن إستمعت إلى ذلك المسئول وهو يصرح بأن حال البلاد قد تغير مما كانت عليه وأن معدل رفاهية المواطن قد إزداد وأنا أشعرببعض (المغس) والتشنجات المعوية خاصة بعد أن ينتصف الشهر ويبدأ فى الإقتراب من نهايته ويصل (إلتهاب الجيوب) المزمن إلى ذروته و(بصراحة كده)..
أنا شكيت (فى أمراض اليومين ديل) خاصة بعد أن صار هذا المغس وتلك التشنجات تنتابنى بصورة مستمرة مما جعلنى أفكر فى عرض الأمر على صديقى (دكتور عزام) الذى بعد أن قام بإجراء عده فحوصات نظر إليا نظرة إشفاق جعلتنى أبادره فى خوف ووجل :-
- لو فى حاجه ختيره بالله يا عزام كلمنى!
- لا مافى حاجه بس عندك شويت إرتفاع فى (الرفاهية) !
- (مندهشاً) : وين؟ معقولا أنا عندى رفاهية عشان ترتفع ! هى الرفاهية دى مش عند الخواجات بس؟
- لا يا أستاذ الرفاهية دى عند أى بنى آدم بس عند ناس بتكون نشطة وناس لا!
- (وقد لاحظ انزعاجى) : مافى داعى للخوف والقلق ده مرض بسيط والمسئولين أعلنو عنو وإن شاء الله تتعالج وتبقى زى الفل المهم يا أستاذ الصبر والإيمان..
- يعنى مافيش فايده يا دكتور ؟
إلا أن د. عزام لم يجبنى على سؤالى واخذ ينظر ساهماً فى الفضاء وهنا أدركت أن الموضوع (ختير) فخرجت من عيادته وأنا أفكر فى (العيال) وامهم بعد أن يفقدوا عائلهم الوحيد (اللى هو أنا) بسبب إرتفاع هذه (الرفاهية) !! فسرحت أتخيل مصيرهم وقد قام (عم سيد أحمد) سيد البيت بإخلائهم من المنزل بعد عجزهم عن السداد (وشتت ليهم العفش فى الشارع) وقامت (الشركة إياها) بأخذ (العربيه منهم) لعجزهم عن دفع الأقساط المتبقية وقطع (الأولاد) تعليمهم بسبب طردهم من المدارس لعدم تسديد الرسوم وأصبحت مسألة الأكل والشراب (ذاتا فى تلتلة) بعد أن إمتنع (البقال) والجزار وبتاع اللبن والخدار عن (الجرورة) وأصبحوا يكشرون فى وجوههم بعد ان قاموا بتفعيل لافتة (البيع نقداً) !
عند وصولى للمنزل إنكفأت على مقود العربة ورحت سارحاً أفكر فيما سوف يحدث بعد إنتقالى إلى (الرفيق الأعلى) بسبب هذا الإرتفاع المفاجئ فى (الرفاهية) ، لم لأتبين كم إستغرقت من الوقت وأنا على تلك الحال حتى أحسست بجارى (عم عبدالمجيد) يقف أمام نافذة العربة (يبدو أنه كان واقف مسافة من الزمن) ويسألنى :
- مالك قاعد كده يا أستاذ؟ إن شاء الله مافى عوجه !
- مافى حاجه يا عم عبدالمجيد بس شويت إرتفاع فى الرفاهية!
- (فى إستغراب) : قلتا شنو؟
- ل... أصلو يا عم عبدالمجيد أنا حسيت ليا بى تشنجات كده ومشيت لى دكتور صاحبى كده وكشف عليا وقال ليا عندك إرتفاع فى الرفاهية !
- (مبتسماً) : وإنتا صدقتو؟
- طبعن يا عم عبدالمجيد لازم أصدقو !!
- (وهو يستعدل فى وقفته) : إنتا يا أستاذ مش الكهرباء عندك بتقطع طوااالى؟
- أيوه..
- والموية كمان مرات بتقطع ولامن تجى بتكون معكرة وكووولها شوائب؟
- أيوه..
- والناموس بالليل بيحميكم النوم؟
- أيوه..
- وبتاكل من المواد الغذائية المضروبه المالية السوق دى؟
- أيوه..
- وكل دقيقة يدق ليكا الزول الباب يقول ليكا مره رسوم نفايات ومرة رسوم عوائد ومرة رسوم شنو ما بعرفو؟
- أيوه..
- ولمن تمرض بتدخل المستشفى عشان تمرض تااانى؟
- أيوه..
- ولمن يكتبو ليك على الدواء وتمشى الصيدلية تشتريهو قروشك بتقصر؟
- أيوه..
- وماهيتك بتكمل من يوم خمسة فى الشهر؟
- أيوه..
هنا أخذ عم عبدالمجيد يربت على كتفى فى حنو مبتسماً وهو يقول لى :
- إطمئن يا إبنى دكتورك ده تشخيصو غلت .. اعراض (الرفاهية) دى ح تجيك من وين؟

أضف تعليقك طباعة الموضوع أرسل الموضوع
(قراءة: 1986 تعليق: 16 طباعة: 45 إرسال: 0)
التعليقات

--------------------------------------------------------------------------------

1/ جابر محمود - (الخرطوم ) - 21/2/2010
المشكلة في السودان أن كثيرين من العاملين في الدولة لا يهمهم الكسب الحلال فقط يهمهم كيف يقضوا شهرهم ينهب من هنا ويترشي من هنا ويستغل منصبه في الحصول على شيء لا يستحقه أما المواطن العادي مثلي ومثلك يسمع بالرفاهية ولكن لا يراها

--------------------------------------------------------------------------------

2/ فاروق نوري - (الخرطوم ) - 21/2/2010
رفاهية مستحيل تصيب المواطن العادي كيف تصيبه رفاهية وراتبه يخلص قبل يوم 15 في الشهر كيف تصيبه رفاهية ومازال يركب مواصلات منتهية الصلاحية ويأكل في مكان لا تتوافر فيه ابسط القواعد الصحية ومازال يحفر بئر سايفون لاستخدامه ويدفع حق العداد وحق الكهرباء وحق الموية وحق النفايات ورسوم اختام ودمغات كيف ولدينا ملايين من الشباب في الخارج

--------------------------------------------------------------------------------

3/ مجدي مصطفى - (الخرطوم ) - 21/2/2010
كل السلع المعروضة في السوق مخالفة للمواصفات وكل الخدمات المقدمة للمواطن بالشيء الفلاني وتقول رفاهية مستحيل

--------------------------------------------------------------------------------

4/ ابومحمد الشنداوى - (جدة) - 21/2/2010
الاستاذ/ جبرا لك التحية والتقدير رفاهية شنو ياعم ، استهدى بالله وخت الرحمان فى قلبك وانت معروف انك قلبك حار زى النار ابوقلب حارب لايصاب بالرفاهية وكنه غالباً ما يصاب (بالضغط والسكر وارتفاع الكرستورول، حمنانى الله وحماك وحمى جميع القراء قول امين) كسرة: انت قلت ويطلعوا اولادى من بيت الايجار طيب ياعزيزى السلفية الشلتها من البنك بخصوص الصالون عاوز تعمروا لصاحب الايجار خليك منطقى شوية ياجبرا وما تخلينا نزعل منك يافردة.

--------------------------------------------------------------------------------

5/ الطيب العميري - ( السعودية ) - 21/2/2010
لا يغنى احد الا بفقر اخرين .وعندما ذابت الطبقة الوسطى بل تدحرجت الى الطبقة الفقيرة ظهرت طبقة الرفاهية التي يتكلون عنها .ونحن نسمع بها سمع الجداد للعد .نلتحف الهموم ونفترش الهواجس ونعيش على امل بكرة.الى ان نسلم الوديعة خالقها .

--------------------------------------------------------------------------------

6/ كمال حمزة - (السعودية / الرياض) - 21/2/2010
رفاهية مستحيل قول اكتئاب قول حاجة تانية فمازال تراب السوق العربي عالق في حذائي ومازلت رغم مرور شهرين لمغادرتي السوداني أعاني من العطش والإرهاق الذي أصابني عندما كنت أقوم بإنهاء إجراءات سفري وهروبي من المعاناة قال رفاهية الرفاهية مظلومة ومفترى عليها

--------------------------------------------------------------------------------

7/ يوسف خليل - (السعودية - الرياض) - 21/2/2010
رفاهية ومازال المواطن يتكفل بكل شيء من عمود كهرباء وعداد وكهرباء وخرطوش وموية ومواصلات حتى مسئولية الصرف الصحي مازال يحفر آبار السايفون

--------------------------------------------------------------------------------

8/ abdulraouf - (KSA) - 21/2/2010
المشكلة يا استاذ/ الفاتح (والله يفتحها عليك وعلى الغبش الآنت ليهم قمرا) أنه كلامك كله صاااااااااح بس منو البتلفت ليك غير جارك عبدالمجيد الغلبان!!!! الكن من زاوية تانية انا شايف أنك بتورط ولي الأمر لأنه مقالاتك مستند خطير جداً للتذكير ولفت النظر والتنبيه والتعريف وعكس الواقع المرير وسيسأل عنه يوم الحساب فأخير ليه يجمع مقالاتك ويبدأ في حلحلتها ومساءلة المعنيين بها قبل اليوم المكتوب والمسطر . والله يديك طول العمر ... ويحفظك لعيالك ويسدد نضالك وكفاحك لاستمرارية الحياة لهم ، ويوسع صدرك ويزيدك علما.

--------------------------------------------------------------------------------

9/ بشرى مبارك إدريس - (بيريطانيا( بيرمنجهام)) - 21/2/2010
الاستاذ الفاتح جبرا والله دكتورك ده تشخيصو صاح (بإعتبار ماسيكون ) ونصايحو 100% عليك أرجع للمقال وشوفو بعد التشخيص قال ليك (لوك الصبر ) على النعمه دكتورك ده دكتور أخونا عكرمه عبدالقادر شيخ إدريس أبوهاله معانا فى المانيا ميونيخ نتلاقى كل سنه لمده شهر فى فندق ميرتيم بون ونضحك ما نخلى الشرطة ولا بنات الميريتم وأنا أقرأ فى الشعر لكى نقصر ساعات العمل الطويله حتى يتنهى الشهر وتنزل قروش الامم المتحده بعد شهر ونحل الديون وعكرمه دايماً زول نصيحه ونصيحتو واحده من ما عرفتو فى مارس 82 أنا ضابط جديد وهو ملازم أول قدييييم فى القوائم أدانى كشوفات حظر أكتب فيها إسبوع وكل مره يقول لى يا ضابط لوك الصبر!! وحاتعرف كلامى وبنتلاقى وفعلاً بعد20 سنه لاقيتو فى العام 2002 فى ميريتم بون هو لاك الصبر فى الامارات وأنا فى المانيا واللواء عابدين الطاهر دفعه عكرمه لاك الصبر شويه فى قطر وباقى الصبر قال لى المباحث وبلاغات القتل الغربيه البتحصل دى وكمان الكلاب وإنتا يا جبرا تزوغ جاى وجاى بس الكلاب تانى ما حمت عليها نلوك الصبر لمزيداً من الرفاهيه

لوكوا الصبر ساااااااااااااااي
في هجير الدنيا ماشه أصلو لاظل لاغمامه
تبكي عيني من حنينا تبكي فاقد الابتسامه
تشرق الدمعات وترجع ياصفاها يامنامه
لو طيفك مره عابر أقراء في دموع الملامه
تكتم الحيره وتغالب تسأل النجمات الآمـا
(تجيك من وين الله في)

بالجد ساخر سبيل