بشرى مبارك
عدد المساهمات : 7557
تاريخ التسجيل : 19/02/2009
العمر : 64
الموقع : أقيم فى بيريطانيا مدينة بيرمنجهام
 |  موضوع: أنكتب لينا عمر جديد ومنى سلمان  الجمعة 12 فبراير - 17:23 | |
| أحضرت (نجوى) واجب الضيافة لصديقتها وجارتها (حنان) وجلستا تتسامران وتتبادلان اخبار مجتمع البعثة السودانية حيث يعمل زوجيهما في دولة مجاورة، جلستا على المقاعد الوثيرة لصالون شقتها الفاخرة في أحد احياء العاصمة الراقية، إنشغلتا بالحكي بينما جلس على الارض بالقرب منهما إبنا (نجوى) الصغيران (عمر) و(علي) يلعبان.
حكت (حنان) عن نجاة ابن إحدى صديقاتهن من موت محقق بعد سقوطه في بركة السباحة في النادي أثناء حضورهم لحفل زفاف فيه، تأثرت نجوى بطبعها الرقيق للقصة وإغرورقت عيناها بالدموع وقالت:
(كُر علي يا حمودي .. دي سلامة كبيرة لانو وقعة زي دي كان ممكن يغرق فيها لو مافي زول شافو .. والله ده انكتب ليهو عُمر جديد)!!
إلتفت (عمر) بعد أن شدت انتباهه دمعات أمه، سألها عن ما يبكيها بقلق فأخبرته قصة نجاة حمودى من الغرق.
سألها: طيب يعني كيف أنكتب ليهو عمر جديد يا ماما؟
بسّطت له المعنى وقالت: لما الزول يحصل ليهو حادث ولا حاجة خطيرة وبعدين ربنا ينجيهو منها .. بيبقى يعني زي الربنا اداهو عمر جديد.
مرت الأيام وعادوا للسودان في الاجازة السنوية حيث تعودوا على قضاء الاجازة مع أمها واخواتها في بيت الأسرة بينما يقوم زوجها (مصطفى) بالسفر لاهله في الدامر ثم يعود ليكمل معهم باقي الايام، ولكنه عاد من الدامر سريعا على غير عادته ولذلك في المساء عندما استعدا للنوم سألته نجوى:
خير .. مالك المرة دي ما قعدتا مع ناس أمك وجيت راجع سريع؟
قال : والله عندي نية أعمل لي حاجة.. لكن عارفك إنتي وأهلك بتاعين البرجزة ديل حا تعملوا لي منها توم وشمار!
سألته: داير تعمل شنو؟
قال: داير أطهر الأولاد ديل .. خلاص كبروا وانتي كل مرة تقولي لي خليهم للاجازة الجاية .. لمتين نأجل في الحكاية دي؟
انقبض قلبها وقالت متحججة: الطهور عايز ليهو استعدادات.. الكرامة والحفلة وعايزين نعمل حاجات كتيرة.. ما ممكن فجأة كده تقول لي نطهرم!!
قال في زهج: ياخي أصلو طهور ولا عرس .. والله أنا عارفك بس مشكلتك قلبك الرهيف ده .. خايفة عليهم ساكت رغم إنها حكاية بسيطة.
لم تقتنع نجوى وظلت تتحجج بالحجج الواهية حتى اتفقا على مواصلة النقاش مع باقي الاسرة في الصباح ولكن مصطفى عندما اضطجع للنوم (كان راقدلو فوق راي).
استيقظ في صباح اليوم التالي وكان يوم جمعة وايقظ ابنيه (عمر) و(علي) وهو يقول:
ارح معاي الليلة السوق المركزي عشان أوريكم ليهو.. ونجيب لامكم الخضار واللحمة.
نهضا بفرحة وانطلقا للحمام ، صاح خلفهما موصياً:
ما تنسوا تلبسوا الجلاليب الجديدة السمحة الجبتها ليكم!!!
تأخروا كثيرا فإتصلت عليه نجوى على الموبايل فطمأنها قائلا: ما تخافي خلاص راجعين في السكة.
انفتح الباب ودخل مصطفى والاولاد يسبقهم الصراخ والبكاء الشديد، فصاحت نجوى من داخل المطبخ: سجمي يا مصطفى .. الشفع ديل ببكوا كدي مالم؟
اجابها بصوت عالي بسبب ضجيج البكاء:
طهرتهم .. وريحتك إنتي وأهلك من حركات الفشخرة العايزين تعملوها لي!!
لم تقو على الوقوف فبركت على الارض وهي تبكي بينما استند (علي) و(عمر) الى كتفها وهما يواصلان البكاء.
عندما عادوا لمقر عمله بعد الاجازة حضرت (حنان) لزيارتهم فأسرع الصغيران اليها عند دخولها، امسكا كل منهما بواحدة من يديها وقالا معا:
ماشفتي يا خالتو .. نحنا وكت طهرونا في السودان .. انكتب لينا عُمر جديد!! | |
|
