منى سلمان" عافية منو وراضية عليهو "

Muna Salman منى سلمان عافية منو وراضية عليهو
لأهلنا في خط الشمال حكمة قديمة تقول Sad

إن مات فكي فرقو في .. وإن مات مرّاسي فرقو قاسي)!!فالحكمة التي تبدو للوهلة الأولى مجرد (شفقة) مُبتلى على اندثار مهنة (المرّاسة)، إلا أنها تحتمل تأويلا آخر حسب تفسيرنا لكلمة (فكي) .. فلو أخذناها على معنى الشيخ أو العابد كمرادف لكلمة (فقير) وتطلق على شيخ المسيد ...أو الخلوة، وبالتالي يمكننا تفسير المثل بمعنى كثرة العلماء وأهل الدين، فإذا مات أحدهم ففي الكثيرين غيره الخير والبركة في حمل الراية بعده ، على عكس الوضع عندما يموت الـ (مرّاسي) !أما إذا أخذنا الكلمة (فكي) بمعناها السيئ والذي يرمز للمتعاطين بالدجل والشعوذة، فالشق الأول من المثل حينها سوف يلامس كبد الحقيقة، وإذا مات (فكي) فهناك العشرات من محترفي الاذية القادرين على سد فرقته من بعده. - كعادة النساء في بيت البكا اجتمعت مجموعة نساء من مختلف المطالع والمشارب في راكوبة الخدمة، وبحميمية لا تعرف الفواصل بين الخاص والعام، سرعان ما ضمنت المجموعة جلسة (ريد) أنستهن دنيا الناس والمرحومة ذاتا !بجوار قيزان الخضرة المفروكة جاء مجلس حاجة (صفية) ببشاشة وجهها الصبوح ووقار الطرحة التحت التوب والسروال الطويل الذي يقي ساقيها من الانكشاف كلما أخذت راحتها في القاعد أو الرقاد كما تفعل كبيرات السن من حبوباتنا .. وكحال قعدات الونسة الحريمية التي لا تخلوا من بعض النبيشة في الرجال، جاءت (سيرة بحر التطبيق)، فتبرعت حاجة (صفية) بسرد تجربتها الشخصية مع الضُر، وكيف أنها تعرضت لـ (التحريش) الشديد من قريباتها عندما تزوج رفيق دربها بشابة من دور بناته وأولاده، قالت:عاد من الحاج عرّس إلا والنار انطلقت في أخيّاتي وجاراتي وقعدن يحرشن فيني .. كيييف ترضى بالضرة يا العويرة؟؟ وكمان تسكتي لمن يجيبا ليك في البيت وتطلع في راسك !! أخير ليك تمشي للفقرا تداويها وتلزميها حدّها ! للا يخلوا ليك الحاج ده يرميها رمية الكلاب ..فردتهم بالقول:أنا مرة حاجة بيت الله .. دايرني أسوي لي عمل للمسكينة دي .. هي ذنبا شنو؟ .. أكان القسمة أدتا .. أجي أنا ما أرضى بي حكم الله علي وعليها !!استقطبت الحاجة بقصتها الانتباه وجذبت أسماع الموجودات في الحوش، وسرعان ما حمي وطيس النقاشات وتعالت الإدانات ضد (الفقرا) و(الضرات) و(غبا الرجال) .. أعجب الحاجة حيازتها للاهتمام فوضعت (الكُنش) جانبا وانبرت تفند حيثيات ما ذهبت إليه من قرار بترك الضرة لحالها دون ضرّها بالفقرا، فقالت:شن بدور أنا بالرجال بعد عمري ده كلو وبناتي البقن نسوات ماسكات بيوتن .. ما يعرس كان عرس .. ماشي يسوي لي شنو عرسو؟؟هاجت النسوان وماج مجلسهن وقامت الغيرة بإحداهن فـ(تسدرت) للموضوع وقالت:المرة عمرا كلو تقضيهو تخدم في الراجل وتربي في عيالو ووكتين تكبر يرميها عضم ناشف ويقبّل على غيرا !!حسمت حاجة (صفية) الجدال بدفاعها المستميت عن فعلة زوجها:يا جماعة إنتو ما عارفين حاجة ساكت .. أنا الحاج ده عمرو ما قصر فيني .. وكتين دخول السينما كان عيب وصعلقة .. الحاج دخلني السينما وخلاني شفتا ناس (فاتن حمامة) .. ولبسني الساعة قبال ما النسوان يعرفو لباس الساعات .. كساني وعزّاني .. وهسي وكت جاب ليهو مرة يجدد رويحتو معاها .. اليمشي .. أنا عافية منو وراضية عليهو.

» الفاتح جبرا - : آآآخ ... يا مرارتى ! "بعد اذن العم بشرى" (-;
» السودان بين سد النهضة والسد العالى تعقيباً على فهمى هويدى والدكتور سلمان محمد أحمد سلمان
» مارأيك أخى ود أحمد أن ندخل (إسمك الخايف عليهو فى مسابقة ؟؟؟؟)
» قصيدة حلمنتيشية ... إسمك الخايف عليهو !!!!!!! وإنت ما خايف علينا
» فتوى أردنية تحرم "الشات" بين الشاب و الفتاة